کراچی : آئی جی سندھ نے تمام پولیس افسران کو سینٹرل پولیس آفس میں مہمانوں کی خاطر مدارات سے روک دیا، ان کا کہنا ہے کہ افسران کام کے بجائے لمبی میٹنگز کرتے تھے۔

تفصیلات کےمطابق نئے آئی جی سندھ کلیم امام نے سینٹرل پولیس آفس میں تبدیلی کا آغاز کردیا ہے، اس حوالے سے انہوں نے سینئر افسران کو سخت حکم نامہ جاری کردیا ہے۔

حکم نامے کے مطابق آج کے بعد سی پی او میں کام کرنے والے افسران مہمانوں سے نہیں ملیں گے، مہمان کو صرف سینٹرل پولیس آفس کی پہلی منزل پر چائے خانے میں بٹھایا جائے گا، متعلقہ افسر اپنے مہمان سے چائےخانے میں ہی ملاقات کرے گا۔

اس حوالے سے ذرائع کا کہنا ہے کہ سی پی او میں پولیس افسران مہمانوں سے گھنٹوں گپ شپ کیا کرتے تھے، دفترمیں ہی کھانے اور چائےکا دوربھی چلتا تھا، ذرائع افسران کام کرنے کے بجائے اپنے دفاتر میں بیٹھ کر لمبی لمبی میٹنگز کیا کرتے تھے، ذرائع کا مزید کہنا ہے کہ آئی جی سندھ نے پولیس کے سینئرافسران سے مشاورت کے بعد حکم نامہ جاری کیا ہے۔

یاد رہے کہ نئے آئی جی سندھ کلیم امام نے اپنے عہدے کاچارج سنبھالنے کے بعدسی پی او میں خطاب کرتے ہوئے کہا تھا کہ میرے دفترکے دروازے سب کیلئے کھلے ہیں، میرٹ اور اہلیت کوترجیح دوں گا،۔

مزید پڑھیں: کلیم امام نے سندھ پولیس کے نئے آئی جی کا چارج سنبھال لیا

انہوں نے کہا کہ محکمہ پولیس کا ہر فرد میرے لیے ٹیم ممبر کی حیثیت رکھتا ہے پولیس کا مورال بلند اور عوام کی خدمت کو اپنا فرض سمجھ کرادا کریں گے۔