ARYNews.tv | Urdu – Har Lamha Bakhabar

Tag: کلین کراچی مہم

  • شہر کی مکمل صفائی تک کلین کراچی مہم جاری رہے گی: علی زیدی

    شہر کی مکمل صفائی تک کلین کراچی مہم جاری رہے گی: علی زیدی

    کراچی: وفاقی وزیر علی زیدی نے کہا ہے کہ کلین کراچی مہم کا کراچی کی صفائی سے پہلے رکنے کا سوال ہی نہیں پیدا ہوتا.

    ان خیالات کا اظہار انھوں نے کلین کراچی مہم سے متعلق میڈیا خبروں پر ردعمل دیتے ہوئے کیا. علی زیدی نے کہا کہ بارش کے دوران نالوں کی صفائی کچھ دیر کے لئے روکی گئی.

    وفاقی وزیر بحری امور  نے کہا کہ نالے صاف کر کے پانی کا بہاؤ بحال کیا گیا، گورنرسندھ کی درخواست پرمحرم جلوسوں کے راستے صاف کر رہے ہیں، کوشش ہےمحرم میں کچرےکی وجہ سےمشکلات نہ ہوں.

    علی زیدی نے مزید کہا کہ فنڈنگ کی قلت سے متعلق افواہوں میں کوئی صداقت نہیں، کام جاری رہے گا.

    مزید پڑھیں: کراچی کوٹھیک کرنے کے لیے یہاں ایمرجنسی نافذ کی جانی چاہیے، علی زیدی

    خیال رہے کہ میڈیا میں یہ خبریں گردش کر رہی تھیں کہ کراچی میں علی زیدی کی جانب سےکلین کراچی مہم روک دی گئی ہے اور نالوں کی صفائی کا کام یکم ستمبرسے بند ہے.

    البتہ وفاقی وزیر علی زیدی نے ان کی تردید کرتے ہوئے واضح‌ کیا ہے کہ یہ سلسلہ کراچی کی مکمل صفائی تک جاری رہے گا، فنڈز کی کمی کا تاثر غلط ہے.

    وفاقی وزیرعلی زیدی نے بارشوں کی تباہ کاری کے بعد 4 اگست کوکلین کراچی مہم کا آغاز کیا تھا.

  • علی زیدی کا کراچی کا فضائی جائزہ، صفائی مہم پر اظہارِ اطمینان

    علی زیدی کا کراچی کا فضائی جائزہ، صفائی مہم پر اظہارِ اطمینان

    کراچی: وفاقی وزیر بحری امور علی زیدی نے کراچی کا فضائی جائزہ لیا، وفاقی وزیر نے کراچی کی صفائی کے حوالے سے جاری مہم پر اطمینان کا اظہار کیا۔

    تفصیلات کے مطابق علی زیدی نے شہرِ قائد میں جاری صفائی مہم کے دوران شہر کا فضائی جائزہ لیا، اس موقع پر ایف ڈبلیو او کے ڈی جی بھی وفاقی وزیر کے ساتھ تھے۔

    فضائی جائزے کے بعد علی زیدی اور فرنٹیئر ورکس آرگنائزیشن (ایف ڈبلیو او) کے حکام کے درمیان اجلاس کا انعقاد ہوا، یہ اجلاس کلین اینڈ گرین کراچی کے ہیڈ کوارٹر میں ہوا۔

    اجلاس کے دوران وفاقی وزیر نے ایف ڈبلیو او کا کراچی کی صفائی میں کردار کو سراہا، انھوں نے کہا کہ ایف ڈبلیو او کی افرادی قوت اور مشینری سے ہمیں کافی سہولت ہوئی۔

    وفاقی وزیر نے کراچی کی صفائی کے حوالے سے جاری مہم پر اطمینان کا اظہار کیا اور ایف ڈبلیو او کے ڈی جی اور ان کی ٹیم کا مہم میں حصہ لینے پر شکریہ ادا کیا۔

    یہ بھی پڑھیں:  کراچی میں بہت مسائل ہیں، ایمرجنسی نافذ کرنی پڑے گی، علی زیدی

    علی زیدی نے اپنے عزم کو دہرایا کہ کراچی کے شہریوں سے وعدہ ہے کہ صفائی کا کام مسلسل جاری رہے گا، کراچی کے نالوں اور علاقوں سے کچرا صاف کرنے کا پکا ارادہ ہے۔

    خیال رہے کہ ایک ہفتہ قبل وفاقی وزیر نے کہا تھا کہ شہر میں کچرے اور صفائی سے متعلق بہت مسائل ہیں جن کی وجہ سے ایمرجنسی نافذ کرنی پڑے گی۔

    انھوں نے وزیر اعلیٰ سندھ مراد علی شاہ کا کراچی کے لیے کام کرنے پر شکریہ ادا کرتے ہوئے کہا تھا کہ ہمارا ایک ہی ایجنڈا ہے کہ کراچی کے ہر علاقے سے کچرا اٹھایا جائے، شہر میں صفائی مہم 6 اضلاع میں جاری ہے۔

    علی زیدی نے بحریہ ٹاؤن کی ٹیم کا بھی شکریہ ادا کیا تھا کہ وہ اپنی مشینری لے آئی۔ انھوں نے وزیر بلدیات سندھ سے درخواست کی کچرا کنڈی کے علاوہ کچرا پھینکنے پر پابندی لگائی جائے۔

  • ماضی کی بدانتظامی نے شہرقائدکا روایتی حسن تباہ اورمکینوں کی زندگی اجیرن کردی ہے، وزیراعظم

    ماضی کی بدانتظامی نے شہرقائدکا روایتی حسن تباہ اورمکینوں کی زندگی اجیرن کردی ہے، وزیراعظم

    کراچی : وزیراعظم عمران خان نے کراچی سے منتخب ممبران قومی و صوبائی اسمبلی کو بھی کلین کراچی مہم میں بڑھ چڑھ کر حصہ لینے کی ہدایت کرتے ہوئے کہا ماضی کی بد انتظامی نے شہر قائد کا روایتی حسن تباہ کیااور کراچی کے مکینوں کی زندگی کو اجیرن کر دیا ہے۔

    تفصیلات کے مطابق وزیراعظم عمران خان سے وزیر برائے بحری امور سید علی زیدی نے وزیراعظم آفس میں ملاقات کی، جس میں وزیر بحری امور نے وزیراعظم کو کلین کراچی مہم کے تحت شہر قائد میں صفائی ستھرائی کے حوالے سے ہونے والی پیش رفت پر تفصیلی بریفنگ دی۔

    وزیراعظم نے کراچی جیسے بڑے اور اہم شہر میں کچرے کے لیے گاربیج ٹرانسفر اسٹیشن کی کم تعداد کا نوٹس لیتے ہوئے ان کی تعداد کو ایک مربط حکمت عملی کے تحت بڑھانے اور کوڑا کرکٹ کو مناسب طریقے سے ٹھکانے لگانے کو یقینی بنانے کی ہدایت کی۔

    وزیر اعظم نے کہاکہ کراچی ملک کا اقتصادی مرکز ہے، ماضی کی بد انتظامی نے شہر قائد کا روایتی حسن تباہ کیااور کراچی کے مکینوں کی زندگی کو اجیرن کر دیا ہے۔ اس صورت حال کا مکمل تدارک ضروری ہے ۔

    عمران خان نے کراچی سے منتخب ہونے والے پاکستان تحریک انصاف کے ممبران قومی و صوبائی اسمبلی کو بھی مہم میں بڑھ چڑھ کر حصہ لینے کی ہدایت کی۔

    مزید پڑھیں : کراچی صاف کرنا ہے، میدان میں اتریں: وزیراعظم کی ایم این ایز کو ہدایت

    یاد رہے رواں ماہ کے آغاز میں وزیر اعظم عمران خان نے ایم این ایز کو ہدایت کی تھی کہ کراچی صاف کرنا ہے، اس مقصد کے لیے میدان میں اتریں اور مہم کو اسے کامیاب بنائیں۔

    واضح رہے کراچی کو کراچی بنانےکے مشن کے حوالے سے علی زیدی ان ایکشن نظر آئے اور انہوں نے وزیراعظم کی ہدایت پر صفائی کا بیڑا اٹھانے کا اعلان کیا تھا۔

  • کلین کراچی مہم: حبیب بینک کا 5 کروڑ، کے الیکٹرک کا 2 کروڑ فنڈ دینے کا اعلان

    کلین کراچی مہم: حبیب بینک کا 5 کروڑ، کے الیکٹرک کا 2 کروڑ فنڈ دینے کا اعلان

    کراچی: وفاقی حکومت کی کلین کراچی مہم میں بڑی پیش رفت ہوئی ہے، حبیب بینک نے 5 کروڑ اور کے الیکٹرک نے 2 کروڑ روپے فنڈ دینے کا اعلان کر دیا ہے۔

    تفصیلات کے مطابق کراچی کو کچرے سے صاف کرنے کی مہم میں قومی ادارے بھی اپنا حصہ ڈالنے لگے ہیں، اس سے قبل کرکٹ اور فلم انڈسٹری کی معروف شخصیات نے بھی مہم کو سپورٹ کیا۔

    حبیب بینک لمیٹڈ نے ٹویٹر اکاؤنٹ پر اعلان کیا کہ وہ کراچی کلین اپ مہم میں سپورٹ کے لیے پچاس ملین روپے دے رہی ہے۔

    بینک کا کہنا تھا کہ کلین کراچی مہم میں حصہ لینا دراصل بینک کی معاشرے کی خدمت کی فلاسفی کے عین مطابق ہے۔

    ادھر بجلی کی تقسیم کار کمپنی کراچی الیکٹرک نے بھی کراچی کلین اپ مہم میں بیس ملین روپے فنڈ کا اعلان کیا ہے، اور کہا ہے کہ کے ای کراچی کی ایک اہم اسٹیک ہولڈر ہے، جو شہر کی خوش حالی میں مختلف سماجی امدادی مہمات کے ذریعے شامل ہوتی رہتی ہے۔

    واضح رہے کہ کلین کراچی مہم کی نگرانی وفاقی وزیر علی زیدی کر رہے ہیں، جس کے تحت وزیر اعظم کی ہدایت پر 2 ہفتے کی صفائی مہم شروع ہو گئی ہے۔

    یہ بھی پڑھیں:  کلین کراچی مہم، وسیم اکرم بھی حمایت میں کھڑے ہوگئے

    قومی کرکٹ ٹیم کے سابق کپتان وسیم اکرم بھی کلین کراچی مہم کی حمایت میں سامنے آ چکے ہیں، انھوں نے ٹویٹ کیا کہ علی زیدی کمال کی کوشش کر رہے ہیں، کراچی سب کا گھر ہے، وقت آ گیا ہے کہ اپنی ساری محبتیں اس شہر پر نچھاور کر دی جائیں۔

    معروف اداکارہ مہوش حیات نے وفاقی وزیر علی زیدی کے اقدام کو سراہتے ہوئے ٹویٹر پر لکھا کہ اپنے زبردست شہر کی صفائی کی ذمہ داری اٹھانے کا وقت آ گیا ہے، کراچی کو صاف کرو، کیا ہم واقعی گندگی کے ڈھیر میں جینا چاہیں گے۔

  • کراچی کو صاف کرو، اداکارہ مہوش حیات کا ٹویٹ

    کراچی کو صاف کرو، اداکارہ مہوش حیات کا ٹویٹ

    کراچی: معروف اداکارہ مہوش حیات نے کہا ہے کہ اپنے زبردست شہر کی صفائی کی ذمہ داری اٹھانے کا وقت آگیا ہے۔

    تفصیلات کے مطابق معروف اداکارہ مہوش حیات نے سماجی رابطے ویب سائٹ ٹویٹر پر اپنے پیغام میں کہا ہے کہ کراچی کو صاف کرو، کیا ہم واقعی گندگی کے ڈھیر میں جینا چاہیں گے۔

    اداکارہ مہوش حیات نے کراچی کی صفائی کا بیڑا اٹھانے پر وفاقی وزیر علی زیدی کے اقدامات کو سراہا۔

    انہوں نے لکھا کہ کراچی کی صفائی مہم میں اپنا حصہ ڈالنے کے لیے ہر ایک کو باہر نکلنا ہوگا، کراچی میں گندگی ہم نے ہی پھیلائی ہے اسے صاف کرنا ہوگا۔

    یاد رہے کہ کلین کراچی مہم کا آغاز وفاقی وزیر برائے بحری امور علی زیدی نے کیا تھا ، اس مہم کے لیے ضلع غربی میں 48 مقامات اور ضلع جنوبی و شرقی میں 70 مقامات کی نشاندہی کی گئی ہے۔ مہم کے پہلے مرحلے میں 6 اضلاع میں بڑے نالوں کی صفائی کی جائے گی۔

    یہ پڑھیئں: کلین کراچی مہم کا افتتاح، سوچ بدلے بغیرکراچی کے مسائل حل نہیں ہوں گے

    خیال رہے کہ معروف ڈرامہ و مزاح نگار انور مقصود نے بھی صفائی مہم کی حمایت کا اعلان کرتے ہوئے کہا تھا کہ ’’ہم لوگ قومی خزانہ صاف کردیتے ہیں مگر نالے صاف نہیں کرسکتے، کراچی میں بارش کا پانی نالوں سے ہی نکل سکتا ہے، آئیے سب مل کر کراچی کے نالے صاف کریں‘‘۔

    علاوہ ازیں معروف میوزیکل بینڈ اسٹرنگز نے بھی صفائی مہم میں حصہ لینے کا اعلان کیا تھا جبکہ سماجی تنظیم فکس اٹ، کے الیکٹرک، میئر کراچی سمیت دیگر تنظیموں نے بھی اپنے مکمل تعاون کی یقین دہانی کرائی۔