Tag: کل طلب

اسلام آباد : وزیراعظم عمران خان نے کامیاب دورہ چین کے بعد وفاقی کابینہ کااجلاس کل طلب کرلیا ہے، جس میں 21 نکاتی ایجنڈے پرغور کیا جائے گا اور دورہ چین کے دوران معاہدوں کی تفصیلات سے آگاہ کیا جائے گا۔

تفصیلات کے مطابق وزیراعظم نے قومی سلامتی کمیٹی کے بعد وفاقی کابینہ کو دورہ چین سے متعلق اعتماد میں لینے کا فیصلہ کرتے ہوئے کل وفاقی کابینہ کااجلاس طلب کرلیا ہے، اجلاس میں 21 نکاتی ایجنڈے پرغور کیا جائے گا۔

اجلاس میں دورہ چین کے دوران معاہدوں کی تفصیلات سے آگاہ کیا جائے گا اور مرکزی قیادت، ترجمانوں کو بھی دورہ چین پر بریفنگ دی جائے گی۔

اجلاس میں چیئرمین ٹریڈنگ کارپوریشن اور چف ایگزیکٹوافسرپبلک پرائیویٹ اتھارٹی کی تقرری کی منظوری دی جائے گی۔

ایجنڈے میں 5 خطرناک افراد کوتحویل میں رکھنے کی منظوری اور برطانیہ اور آئرلینڈ کیساتھ قیدیوں کے تبادلے کے معاہدے کی منظوری بھی شامل ہیں۔

اجلاس میں موجودہ حکومت کے فیصلوں پر عملدرآمد سے متعلق رپورٹ کا جائزہ لیا جائے گا۔

وفاقی کابینہ کے ایجنڈے میں لبرٹی ایئرلائن کیلئے کلاس ٹو کے چارٹرلائسنس کی منظوری، انجینئرنگ ترقیاتی بورڈ کو ختم کرنے کا فیصلہ واپس لے کر بحال کرنے کی منظوری شامل ہیں۔

اجلاس میں ارکان پارلیمان اورعوام کیلئےٹیکس ڈائرکٹری شائع کرنے کی منظوری دی جائے گی۔

مزید پڑھیں : پاکستان کی خوش حالی اور امن قانون کی عمل داری میں ہے: قومی سلامتی کمیٹی

یاد رہے گذشتہ روز وزیراعظم عمران خان کی زیر صدارت قومی سلامتی کمیٹی کا اجلاس ہوا تھا ، جس میں ملکی سلامتی اورداخلی صورتحال پر تبادلہ خیال کیا گیا۔

وزیراعظم نے شرکا کو حالیہ دورہ چین پر اعتماد میں لیا جب کہ ملک میں ہونے والے حالیہ احتجاج کے دوران توڑ پھوڑ کرنے والوں کے خلاف کارروائی سے متعلق بریف کیا گیا۔

اجلاس کے شرکا نے اس عزم کا اظہار کیا کہ پاکستان کی خوش حالی امن و استحکام اور قانون کی عمل داری میں ہے، ملکی سلامتی و ترقی امن اور استحکام سے مشروط ہے۔

اعلامیہ کے مطابق اجلاس میں چیئرمین جوائنٹ چیفس آف سٹاف کمیٹی جنرل زبیر محمود حیات اور آرمی چیف جنرل قمر جاوید باجوہ سمیت دیگر عسکری حکام نے بھی شرکت کی۔

اجلاس میں وزیر خارجہ شاہ محمود قریشی اور وزیر دفاع پرویز خٹک شریک ہوئے جبکہ اجلاس میں شرکت کرنے والی دیگر اہم شخصیات میں وزیر خزانہ اسد عمر، وزیر اطلاعات فواد چودھری اور وزیر مملکت برائے داخلہ شہریار آفریدی بھی اجلاس میں موجود تھے۔