بھارت میں ہونے والے کمبھ کے میلے کے باعث 300 کلومیٹر طویل بدترین ٹریفک جام میں ہزاروں یاتری پھنس گئے، 48 گھنٹے تک گاڑیوں کی قطاریں لگی رہیں۔
بھارتی میڈیا کا اس حوالے سے کہنا ہے کہ مہا کمبھ کے میلے میں شرکت کے خواہش مند ہزاروں افراد 300 کلو میٹر طویل ٹریفک جام میں پھنس کر رہ گئے۔ اس دوران بہت سی گاڑیوں کا فیول بھی ختم ہوگیا۔
رپورٹس کے مطابق ریاست مدھیا پردیش کے کئی اضلاع میں پولیس نے ریاست اتر پردیش کے شہر پریاگ راج (سابقہ الہٰ آباد) جانے والے راستے پر گاڑیوں کی آمد و رفت بند کردی۔
بھارتی پولیس کا اس حوالے سے کہنا ہے کہ مطابق پریاگ راج کی طرف جانا ناممکن ہے کیونکہ وہاں 200 سے 300 کلومیٹر طویل ٹریفک جام ہے، جس کے باعث راستہ بالکل بند ہے۔
ٹریفک جام کی وجہ بتاتے ہوئے بھارتی پولیس نے کہا ہے کہ یہ ٹریفک جام ہفتے کے آخر میں رش کے باعث ہوا تھا، کچھ دنوں میں صورتِ حال معمول پر آجائے گی۔
بھارتی میڈیا رپورٹس کے مطابق ٹریفک جام میں پھنسے ایک شخص کا کہنا تھا کہ ٹریفک جام میں گاڑیاں 48 گھنٹوں سے پھنسی ہوئی ہیں کیونکہ صرف 50 کلومیٹر کا فاصلہ طے کرنے میں تقریباً 10سے 12 گھنٹے لگ رہے ہیں۔
رپورٹس کے مطابق بھارت کے وارانسی، لکھنؤ اور کانپور سے پریاگ راج جانے والے راستوں پر 25 کلومیٹر تک ٹریفک جام رہنے کی اطلاع موصول ہوئی ہے یہاں تک کہ شہر کے اندر جہاں مہا کمبھ میلہ جاری ہے وہاں بھی بدترین ٹریفک جام کی صورتحال ہے۔
غزہ پر قبضے سے متعلق ٹرمپ کے بیان پر ترک صدر کا رد عمل
بھارتی میڈیا کا کہنا ہے کہ کسی بھی ناخوش گوار واقعے سے محفوظ رہنے کے لئے پریاگ راج سنگم ریلوے اسٹیشن کو بھی بند کر دیا گیا۔
