Tag: کمرشل بینک

کراچی: سندھ حکومت نے فصلوں کی انشورنس کا انقلابی منصوبہ پیش کر دیا۔

تفصیلات کے مطابق سندھ میں اب مخصوص فصلوں کی انشورنس کرائی جائے گی، اس سلسلے میں محکمہ زراعت نے مرکزی مالیاتی بینک اور کمرشل بینکوں سے رابطے شروع کر دیے ہیں۔

منصوبے کے تحت موسمی فصلوں، کیش کراپس اور ایڈیبل آئل فصلوں کی انشورنس کی تجویز دی گئی ہے، فصلوں کی انشورنس سے کسانوں کو نقصانات کی صورت ازالہ ممکن ہوگا۔

دوسری طرف سندھ حکومت نے اپنے فنڈز سے فصلوں کی انشورنس کا منصوبہ ترک کر دیا ہے، اب فصلوں کی انشورنس کمرشل بینکوں اور انشورنس کمپنیوں سے کرائی جائے گی۔

ویر زراعت اسماعیل راہو نے ایک ویڈیو پیغام میں کہا ہے کہ سندھ حکومت اپنے فنڈز سے فصلوں کی انشورنس کرانا چاہتی تھی، لیکن سندھ حکومت کے مالی وسائل محدود ہونے کی وجہ سے متعدد سماجی تحفظ پروگرام روکنا پڑ گئے ہیں۔

انھوں نے کہا انشورنس کمپنیوں اور بینکوں سے فصلوں کی انشورنس کے لیے رابطہ کیا گیا ہے۔

واضح رہے کہ پنجاب میں جنوری 2019 میں حکومت پنجاب نے کاشت کاروں کے معاشی استحکام اور تحفظ کی فراہمی کے لیے فصلوں کی انشورنس اسکیم کا آغاز کیا تھا، جس کے تحت قدرتی آفات سے فصلوں اور باغات کو ہونے والے نقصان کا معاوضہ کاشت کار کو ادا کیا جاتا ہے۔