لاہور : کمشنر راولپنڈی لیاقت علی چٹھہ کی استعفے کی کاپی منظر عام پر آگئی ، جس میں انھوں نے کہا میں نے اپنے عہدے اور لوگوں کے ساتھ ظلم کیا اور عام انتخابات صاف شفاف کروانے میں ناکام رہا۔
تفصیلات کے مطابق کمشنرراولپنڈی لیاقت علی چٹھہ کی استعفے کی کاپی اےآروائی نیوز کو موصول ہوگئی ، استعفے کے متن میں کہا گیا کہ میں پاکستان کو توڑنے والوں کا حصہ نہیں بن سکتا، عام انتخابات صاف شفاف کروانے میں ناکام رہا۔
کمشنرراولپنڈی کا استعفے میں کہنا تھا کہ میں نے اپنے عہدے اور لوگوں کے ساتھ ظلم کیاہے، مجھ پر غیر قانونی کام کروانے کیلئےشدید دباؤ ڈالا گیا۔
کمشنرراولپنڈی نے اپنا استعفیٰ وزیراعلیٰ پنجاب، گورنر، چیف سیکرٹری پنجاب کو ارسال کردیا ہے۔
یاد رہے کمشنر راولپنڈی لیاقت علی چٹھہ نے عام انتخابات میں دھاندلی کا اعتراف کرتے ہوئے کہا تھا کہ الیکشن ٹھیک نہیں کرواسکا،عہدے سے استعفیٰ دیتاہوں۔
لیاقت علی چٹھہ کا کہنا تھا کہ راولپنڈی کی ایم این اے کی تیرہ نشستوں پر ہارے ہوئے لوگوں کو جتوایا، جعلی مہریں لگا کر ستر ستر ہزارووٹوں کی لیڈ والوں کوہروایا، میں ماتحت ریٹرننگ افسران سے معذرت چاہتا ہوں، انھیں غلط کام کیلئے کہہ رہا تھا اور وہ نہیں کرنا چاہتے تھے۔
کمشنر راولپنڈی نے کہا تھا کہ اس وقت بھی راولپنڈی میں جعلی مہریں لگائی جارہی ہیں۔ جو کام میں نے کئے وہ مجھے زیب نہیں دیتے، تمام غلط کاموں کی ذمہ داری میں خود لیتا ہوں، میں نے جو ظلم کیا اس کی سزا مجھے ملنی چاہیے۔
ان کا کہنا تھا کہ اس کام میں چیف الیکشن کمشنربھی ملوث ہیں، میں نے ملک کی پیٹھ پرچھراگھونپا،اس میں ملوث لوگوں کوبھی سخت سزا ملنی چاہیے۔
لیاقت علی چٹھہ نے بتایا تھا کہ دھاندلی پر پہلے خود کشی کا سوچا پھر سوچاحرام کی موت کیوں مروں، کیوں نہ ساری چیزیں عوام کےسامنےلاؤں، اپنے ملک اور دین کے ساتھ اتنی بڑی غداری اور بے ضمیری نہیں کرنی چاہئے۔
