کراچی: کمشنر کراچی کی زیر صدارت اجلاس میں فیصلہ کیا گیا ہے کہ بغیر اجازت شہرِ قائد کی سڑکوں کی کھدائی کرنے والے اداروں کے خلاف کارروائی کی جائے گی۔

تفصیلات کے مطابق کمشنر کراچی کی زیر صدارت سڑکوں کی کھدائی اور مرمت کے اقدامات پر اجلاس منعقد ہوا، جس میں بغیر اجازت شہر کی سڑکیں کھودنے والے اداروں کے خلاف کارروائی کا فیصلہ کیا گیا۔

کمشنر کراچی نے اجلاس میں کہا کہ ڈپٹی کمشنرز کی اجازت کے بغیر یوٹیلٹی ادارے سڑک کی کھدائی نہیں کریں گے، یونین کونسل کو سڑک کی کھدائی کی اجازت دینے کا اختیار حاصل نہیں ہے۔

یہ بھی پڑھیں:  کراچی کا بڑا حصہ کچرے کا ڈھیر بن گیا، وزیر بلدیات نے تسلیم کر لیا

کمشنر کراچی کا کہنا تھا تھا کہ 6 ماہ قبل تعمیر ہونے والی یونی ورسٹی روڈ کی کھدائی افسوس نا ک ہے، واٹر بورڈ جلد کام مکمل کرے تاکہ سڑک ٹریفک کے لیے بحال ہو۔

اجلاس میں فیصلہ کیا گیا کہ واٹر بورڈ اور دیگر ادارے کھدائی سے پہلے روڈ کٹنگ کی ادائیگی کریں گے، ایم ڈی واٹر بورڈ نے یونی ورسٹی روڈ کی کھدائی کے لیے رقم جاری کرنے کی یقین دہانی کرائی۔

یہ بھی پڑھیں:  کراچی:‌ بجلی کے غیرقانونی کنکشنز اور کنڈا مافیا کے خلاف آپریشن کا آغاز

اجلاس میں فیصلہ کیا گیا کہ ضلعی انتظامیہ بغیر اجازت کھدائی کرنے والے اداروں کے خلاف کارروائی کرے گی، اور کھدائی کرنے والے ٹھیکے دار کے خلاف مقدمہ درج کیا جائے گا۔

واضح رہے کہ شہرِ قائد میں سڑکوں کی غیر قانونی کھدائی کا مسئلہ تشویش ناک حد تک بڑھا ہوا ہے، ادھر سڑکیں تعمیر کی جاتی ہیں اور ادھر کوئی ادارہ آ کر اسے پھر کھود کر رکھ دیتا ہے۔

کراچی: شہرِ قائد میں شادی کی تقریبات پر رات 11 بجے کے بعد مکمل پابندی عاید ہوگی، اس سلسلے میں شادی کی تقریبات گیارہ بجے رات کو ختم کرنے کا ہدایت نامہ جاری کر دیا گیا۔

تفصیلات کے مطابق کمشنر کراچی افتخار شالوانی کی زیرِ صدارت اجلاس میں فیصلہ کیا گیا ہے کہ شادی کی تقریبات پر رات 11 بجے کے بعد پابندی ہوگی۔

کمشنر کراچی نے کہا کہ 11 بجے کے بعد بھی کھلے رہنے والے ہالز کے خلاف کارروائی کی جائے گی، پابندی پر سختی سے عمل کرایا جائے گا۔

افتخار شالوانی نے کہا کہ رات گیارہ بجے کے بعد بھی کھلے رہنے والے شادی ہالز کے خلاف مہم 2 ہفتے بعد شروع کی جائے گی، ہال مالکان کو وارننگ جاری کر دی گئی ہے۔

انھوں نے کہا کہ شادی ہالز کے مالکان فیصلے پر عمل درآمد کرانے کے پابند ہوں گے، جو ہالز مالکان عمل نہیں کریں گے ان کے ہالز سیل کر دیے جائیں گے۔

یہ بھی پڑھیں:  لاہور : شادی ہالزکی بندش کے اوقات کو رات11بجے تک کیا جائے، چیف جسٹس

کمشنر کراچی نے کہا کہ تمام متعلقہ اداروں کو مہم میں شامل کیا جائے گا، مہم کی تفصیلات کو حتمی شکل دینے کے لیے اگلے ہفتے پھر اجلاس ہوگا۔

اجلاس میں تقریبات کی وجہ سے پیدا ہونے والے ٹریفک کے مسائل کے حل کے لیے بھی اقدامات پر غور کیا گیا، خیال رہے کہ فی الوقت کراچی میں شادی ہالز رات 12 بجے دروازے بند کرنے کے پابند ہیں۔

کراچی: ایم کیو ایم پاکستان کے رہنما ڈاکٹر فاروق ستار نے کہا ہے کہ سیاست دانوں کو بھیڑ بکری سمجھ رکھا ہے، سیکیورٹی کیوں نہیں دیتے، سیکیورٹی صرف پیپلزپارٹی کے وزرا اور لیڈروں کے لیے ہے۔

تفصیلات کے مطابق ایم کیو ایم پاکستان کے رہنما ڈاکٹر فاروق ستار نے کمشنر کراچی اور ہوم سیکریٹری سے دوبارہ رابطہ کیا اور کہا کہ آپ لوگ چاہتے کیا ہیں، کب سیکیورٹی دی جائے گی۔

[bs-quote quote=”لسٹ وزارت داخلہ اور آئی جی سندھ سید کلیم امام کو بھیج دی تھی، فیصلہ حکومت نے کرنا ہے” style=”style-6″ align=”left” author_name=”کمشنر کراچی کا جواب”][/bs-quote]

فاروق ستار نے کہا کہ دو مرتبہ مل چکے ہیں، وفاق کو خط لکھ چکے کب کردار ادا کریں گے، ہم اپنے رسک پر سیاست کررہے ہیں۔

کمشنر کراچی نے جواب دیتے ہوئے کہا کہ آپ کی لسٹ وزارت داخلہ اور آئی جی سندھ سید کلیم امام کو بھیج دی تھی، فیصلہ حکومت نے کرنا ہے۔

واضح رہے کہ چند روز قبل فاروق ستار کا کہنا تھا کہ علی رضا عابدی کو سازش کے تحت قتل کیا گیا، قاتلوں کی گرفتاری تک خاموش نہیں بیٹھیں گے اور احتجاج کا سلسلہ جاری رکھیں گے۔

مزید پڑھیں: علی رضا عابدی کے قاتلوں کی گرفتاری تک خاموش نہیں بیٹھیں گے ،فاروق ستار

ان کا کہنا تھا کہ علی رضاعابدی کیس میں میراکوئی بیان نہیں لیاگیانہ شامل تفتیش کیاگیا، ہمیں تعاون کے لئے بلایاگیا، پوچھاگیا کسی پر شک ہے یا نہیں، بظاہر علی رضا کا کوئی دشمن نہیں تھا، سچ بولنا اسکا جرم ہو سکتا ہے، علی رضاعابدی کو خطرہ تھا اور دھمکیاں ملی تھیں۔

فاروق ستار کا کہنا تھا کہ علی رضاعابدی سب سے زیادہ مجھ سےقریب تھا، کہا قتل کے محرک کو تلاش کریں کھلے ذہن سے انکوائری کریں، قتل سے کس کو فائدہ ہوسکتا ہے، ہر پہلو پر غور ہونا چاہیے۔

کراچی: سپریم کورٹ کے حکم پر شہرِ قائد میں سرکلر ریلوے کی بحالی کے سلسلے میں انتظامیہ نے متحرک ہو کر ریلوے لائنز پر قائم تجاوزات کے خاتمے کے لیے منصوبہ بندی شروع کر دی۔

تفصیلات کے مطابق کراچی سرکلر ریلوے کی بحالی کے سلسلے میں کمشنر کراچی نے ریلوے لائنوں پر قائم تجاوزات کا جائزہ لینے کے لیے مختلف علاقوں کا دورہ کیا۔

[bs-quote quote=”سرکلر ریلوے ٹریک کے اطراف میں تجاوزات کا خاتمہ کر کے ٹریک کو بحال کریں گے۔” style=”style-7″ align=”left” color=”#dd3333″ author_name=”وسیم اختر” author_job=”میئر کراچی”][/bs-quote]

دریں اثنا میئر کراچی وسیم اختر نے بھی اعلان کیا کہ سرکلر ریلوے ٹریک کے اطراف انسدادِ تجاوزات کے لیے منصوبہ بندی شروع کر دی گئی ہے۔

وسیم اختر نے کہا ’ہمارا عزم ہے کہ کراچی کو اس کی اصل شکل میں واپس لائیں گے، محکمہ ریلوے، پولیس اور دیگر اداروں سے رابطے کر رہے ہیں۔‘

میئر کراچی نے مزید کہا کہ ہم مل کر تجاوزات کو ہٹائیں گے اور ریلوے ٹریک کو بحال کریں گے، اس سلسلے میں متعلقہ اداروں کو میرا پورا تعاون، مشینری اور افرادی قوت حاضر ہیں۔

دوسری طرف ریلوے لائنز پر قائم تجاوزات کے حوالے سے جائزہ لینے کے لیے کمشنر کراچی افتخار احمد شلوانی نے ماڑی پور روڈ، وزیر مینشن، شاہ لطیف ٹاؤن اور سائٹ ایریا کا دورہ کیا۔

یہ بھی پڑھیں:  سپريم کورٹ کا کراچی سرکلر ريلوے اور ٹرام لائن کو بحال کرنے کا حکم

کمشنر کراچی نے اس موقع پر کہا کہ ان کے دورے کا مقصد سرکلر ریلوے کی بحالی سے متعلق حکمتِ عملی بنانا ہے، سرکلر ریلوے کی بحالی کے لیے جلد آپریشن کا آغاز کیا جائے گا۔

واضح رہے کہ گزشتہ روز سپريم کورٹ نے کراچی سرکلر ريلوے اور ٹرام لائن کو فوری بحال کرنے کا حکم دیا ہے، عدالت نے ريلوے لائن کو قبضہ مافیا سے واگزار کرانے کی بھی ہدايت کی۔