نیویارک: دنیا کا ابتدائی اور نایاب کمپیوٹر ماؤس کروڑوں روپے میں فروخت ہو گیا۔
تفصیلات کے مطابق ایک نایاب کمپیوٹر ماؤس جس نے اسٹیو جابز کو ایپل کا پہلا ماؤس بنانے کی ترغیب دی تھی، ایک نیلامی میں ایک لاکھ 78 ہزار 936 ڈالر میں فروخت ہو گیا ہے۔
یہ ابتدائی ماؤس اور کوڈنگ کِی سیٹ کمپیوٹنگ لیجنڈ ڈگلس اینجل بارٹ نے بنائے تھے، جو کنٹرولر سسٹم کے بانی تھے، اور یہ اب سے 55 برس قبل بنائے گئے تھے، پاکستانی روپوں میں نیلامی کی رقم 5 کروڑ روپے سے زائد بنتی ہے۔
کمپیوٹر ماؤس اور کوڈنگ سیٹ کی نیلامی جمعرات کو ہوئی، فروخت کنندگان کا خیال تھا کہ یہ چیزیں 14 ہزار 640 ڈالر میں فروخت ہو جائیں گی لیکن یہ اس اندازے سے 12 گناہ زیادہ قیمت پر فروخت ہو گئیں۔
اینجل بارٹ کے ڈیزائن کردہ اس نایاب ماؤس پر تین بٹن لگے ہوئے ہیں، اور اس میں دو دھاتی ڈسکوں کا استعمال کیا گیا ہے جس سے کرسر کی پوزیشن کا پتا لگایا جاتا تھا، اس کے بعد اس کی جگہ ایک گیند یا آپٹیکل لائٹ نے لے لی تھی۔
اسی طرح کوڈنگ کِی سیٹ میں پانچ کِیز استعمال ہوئی ہیں، جن سے کمانڈز ٹائپ کرنے کے لیے 31 کِی پریس کمبنیشنز ممکن ہیں۔
اینجل بارٹ کی اس ایجاد کو دیکھتے ہوئے ایپل کمپنی کے بانی نے اس کا پیٹنٹ 40 ہزار ڈالر میں خریدا تھا، اس طرح ماؤس کو پر لگ گئے اور وہ اربوں کی تعداد میں فروخت ہوئے، اس کا ایک اور پہلا پروٹوٹاپ دسمبر 2020 میں 34 ہزار ڈالر میں نیلام ہوا تھا۔
مارچ 2022 میں بھی اینجل بارٹ کا تیار کردہ ایک اور ماؤس اور کوڈنگ سیٹ 46 ہزار ڈالر میں فروخت ہوا تھا، وقت کے ساتھ ساتھ کمپیوٹر ماؤس میں بہتری لائی جاتی رہی، اور آج یہ جدید ترین شکل میں ہمارے سامنے ہے۔
