وزیر اعلیٰ پنجاب مریم نواز نے دکانوں اور چھوٹے اداروں میں ورکرز کی رجسٹریشن کرنے اور کم سےکم اجرت پر عمل نہ کرنے والوں کیخلاف کریک ڈاؤن کا حکم دیا ہے۔
اے آر وائی نیوز کے مطابق وزیر اعلیٰ پنجاب مریم نواز سے صوبائی وزیر محنت فیصل ایوب کھوکھر نے ملاقات کی۔ اس موقع پر وزیر اعلیٰ نے صوبے بھر میں دکانوں، ورکشاپس اور چھوٹے اداروں کے ورکرز کی رجسٹریشن کرنے اور کم سے کم اجرت پر عمل نہ کرنے والے اداروں کیخلاف کریک ڈاؤن کے احکامات جاری کیے۔
مریم نواز نے دکانوں، پٹرول پمپس اور فیکٹریز میں کم از کم اجرت یقینی بنانےکی ہدایت کی اور کہا کہ ورکرز کو لیبر ڈیپارٹمنٹ میں رجسٹریشن کے بعد گرانٹس اور دیگر مالی فوائد ملیں گے۔
انہوں نے صوبے بھرمیں لیبر رجسٹریشن بڑھانے کا حکم دیتے ہوئے انڈسٹریل یونٹس میں لیبر کے لیے ورکنگ کنڈیشن بہتر بنانے کی ہدایات بھی کیں۔
مریم نواز نے کہا کہ ورکرز کو کام کی جگہوں پر صاف ستھرا اور صحت مند ماحول فراہم کیا جائے۔
علاوہ ازیں وزیر اعلیٰ پنجاب نے لیبر کے لیے راشن کارڈ پروگرام کا جامع پلان بھی طلب کر لیا۔
واضح رہےکہ حکومت نے رواں مالی سال کے لیے مزدور کی کم سےکم اجرت 37 ہزار روپے مقرر کی ہوئی ہے۔
