ہنوئی: شمالی کوریا کے رہنما کم جونگ ان امریکی صدر ڈونلڈ ٹرمپ سے ملاقات کے لیے ویتنام پہنچ گئے ہیں۔
غیرملکی خبررساں ادارے کے مطابق شمالی کوریا کے رہنما کم جونگ ان ویتنام پہنچ گئے ہیں جہاں ان کی امریکی صدر ڈونلڈ ٹرمپ کے ساتھ جوہری مذاکرات سے متعلق سربراہ ملاقات ہوگی۔
شمالی کوریا کے رہنما کم جونگ ان ڈونگ ڈانگ ریلوے اسٹیشن پہنچے جہاں ان کا استقبال کیا گیا۔
شمالی کورین اور امریکی سربراہان کی ملاقاتیں 27 اور 28 فروری کو طے ہیں جن میں جوہری تنازعات پر دونوں ممالک کے مابین مذاکرات ہوں گے، اس سے قبل دونوں رہنما سنگاپور میں ملاقات کرچکے ہیں۔
مزید پڑھیں: ٹرمپ اور کم جونگ کی ممنکہ ملاقات، مخالفین میدان میں آگئے
واضح رہے کہ امریکی صدر ڈونلڈ ٹرمپ شمالی کوریا رہنما سے ملاقات کے لیے ہنوئی روانہ ہوچکے ہیں۔
امریکی صدر شمالی کوریا کو جوہری ہتھیاروں سے پاک کرنے سے متعلق معاہدے کے لیے شمالی کوریا کے اپنے ہم منصب کم جونگ ان سے دوسری مرتبہ براہ راست مذاکرات کریں گے۔
نیشنل سیکورٹی کے مشیر جان بولٹن نے دو ماہ قبل کہا تھا کہ پچھلے سال جون میں سنگاپور میں جو وعدے کیے گئے تھے، شمالی کوریا کو ابھی ان پر عمل کرنا ہے جس کے لیے دوسری سربراہی ملاقات کی ضرورت ہے۔
دوسری جانب امریکی نشریاتی ادارے کا کہنا تھا کہ دوسری سربراہی ملاقات میں کوئی بڑی پیش رفت نہ ہونے کی صورت میں صدر ٹرمپ کو سیاسی طور پر نقصان ہو سکتا ہے۔
خیال رہے کہ کئی امریکی ناقدین نے کم جونگ ان اور ٹرمپ کی 27 فروری کو ہونے والی ملاقات کو بے سود قرار دیا ہے۔
