Tag: کم سے کم اجرت

لاہور: پاکستان مسلم لیگ ن کی سینئر نائب صدر مریم نواز نے کہا ہے کہ نواز شریف اور میرے دل کی آواز ہے کم سے کم اجرت 40 ہزار ہونی چاہیے، مزدور کی محنت سے ہی پاکستان ترقی کر رہا ہے۔

تفصیلات کے مطابق مریم نواز لاہور میں یوم مزدور کے حوالے سے منعقدہ ایک تقریب میں خطاب کر رہی تھیں، انھوں نے حیرت کا اظہار کیا ’’مجھے پتہ نہیں تھا ن لیگ کا محنت کش وِنگ اتنا متحرک ہے، جس جماعت کا لیبر ونگ اتنا مضبوط ہے اس جماعت کو آنچ نہیں آ سکتی۔‘‘

مریم نواز نے کہا کم سے کم اجرت 40 ہزارر وپے ہونی چاہیے، مشکل اور سخت معاشی حالات کے باوجود شہباز شریف نے کم سے کم اجرت 35 ہزار مقرر کی تھی۔

انھوں نے کہا کہ باہر ممالک میں پاکستانی لگن سے کام کر رہے ہیں لیکن پاکستان میں اتنی صلاحیت ہے کہ باہر جاکر مزدوری کی ضرورت نہ پڑے۔

مریم نواز کا کہنا تھا کہ سازشی طریقوں سے اپنے اقتدار کے راستے کھولنا بند کیا جائے، موجودہ حالات کا ذمہ دار صرف خان نہیں بلکہ پورا ٹولہ ہے، عمران خان کے گینگ میں تمام کرپٹ ترین افراد شامل ہیں، اس میں ثاقب نثار اور فیض بھی شامل ہیں۔

انھوں نے کہا جس نے نواز شریف کو نکالا آج اس کا اپنا بیٹا 1 کروڑ 20 لاکھ رشوت لیتے پکڑا گیا، چور کا بیٹا چور، ابھی یہ ریٹائرڈ ہے سوچیں ثاقب نثار جب کرسی پر تھا کیا کرتا ہوگا، ثاقب نثار کو مخاطب کرتے ہوئے مریم نواز نے کہا ’’تم نے ٹکٹ کے 1 کروڑ 20 لاکھ لیے، نواز شریف کو نکالنے کے کتنے لیے؟‘‘