Tag: کم عمری کی شادی

احمدپورشرقیہ : کم عمری کی شادی پر مقدمہ درج کرلیا گیا، مقدمے میں دلہن، دولہا اور نکاح خواں کو نامزد کیا گیا ہے۔

تفصیلات کے مطابق احمدپورشرقیہ میں کم عمری کی شادی پر تھانہ اوچ شریف میں مقدمہ درج کرلیا گیا، ایف آئی آرمیں دلہن، دولہا اور نکاح خواں کو نامزد کیا گیا ہے۔

گواہان اور نکاح رجسٹرار کے خلاف بھی مقدمہ درج کیا ہے، مقدمہ لاہور ہائیکورٹ بہاولپور بینچ کے حکم پر درج کیا گیا۔

پولیس نے بتایا کہ لڑکی کا پیدائشی سرٹیفکیٹ، میڈیکل رپورٹ آنے پرا یف آئی آر کا اندراج کیا گیا ، میڈیکل رپورٹ میں بچی کی عمر 14 سے 15 سال ثابت ہوئی۔

لڑکی نے گھر سے بھاگ کر من پسند کی شادی کی تھی ، جس کے بعد عدالت میں لڑکی کی والدہ نے رٹ پٹیشن دائر کی تھی۔

پولیس کا کہنا تھا کہ عدالتی فیصلے کے مطابق نابالغ لڑکی کودارالامان منتقل کردیا گیا ہے۔

مزید پڑھیں : کم عمری کی شادی کی ممانعت کے بل پر دستخط

یاد رہے صدر مملکت آصف زرداری نے 18 سال سے کم عمری کی شادی کی ممانعت کے بل پر دستخط کئے تھے۔

قانون کے تحت کم عمر بچوں کی شادی کرانے کا جرم ناقابل ضمانت ہوگا، عدالت کیس کی کارروائی 90روز میں مکمل کرے گی۔

قانون میں کہا گیا تھا کہ نکاح خواں ایسا نکاح نہیں پڑھائے گا، جہاں فریق 18 سال سےکم عمرہوں، خلاف ورزی پر نکاح خواں کو ایک سال قید اورایک لاکھ جرمانہ ہوسکتاہے۔

18سال سے بڑی عمر کے مرد کو کم عمر لڑکی سے شادی پر 3 سال تک قید با مشقت ہوگی اور کم عمری کی شادی کا علم ہونے پر اسے روکنے کا حکم دے گی۔

اسلام آباد: جےیو آئی ف کے سربراہ مولانا فضل الرحمان نے کہا ہے کہ آپ ایسا بل لائیں گے جو شریعت کے مطابق نہیں تو تنازع پیدا ہوگا۔

تفصیلات کے مطابق 18 سال سے کم عمری کی شادی کی ممانعت کا بل سینیٹ سے منظور کرلیا گیا ہے، قومی اسمبلی اجلاس کے دوران گفتگو کرتے ہوئے مولانا فضل الرحمان نے کہا کہ کیا 18سال سے کم عمر بچوں کی شادی سے متعلق بل لانے کا یہ وقت تھا؟ آپ پھر کہیں گے مولانا ملک کے حالات دیکھیں۔

مولانا فضل الرحمان نے کہا کہ ایسے حالات میں فائدہ اٹھانے کی اجازت نہیں دیں گے، بل میں جو چیز آئین و قانون کے منافی ہو وہ ہمارے گلے سے نہیں اتر رہے، اسمبلیاں بانجھ نہیں، قرآن و سنت کیخلاف کوئی چیز ہو تو وہ اسمبلی میں نہ آئے۔

یکجہتی کا تقاضا ہے کہ اس قسم کی حرکت نہ کی جائے، اسپیکر صاحب آپ سے پیار ہے، رولنگ دیں کہ یہ بل فوری روک دیا جائے، اسپیکر صاحب ہمت کریں آپ کی رولنگ بہت کچھ کرسکتی ہے۔

کم عمری کی شادی کو جرم قرار دینے کا بل منظور: ’یہ مذہبی معاملہ نہیں‘

انھوں نے کہا کہ سنجیدہ تجاویز ہیں، ایک دوسرے کے گریبان میں ہاتھ ڈالنے کے متحمل نہیں ہوسکتے، ہم یکجہتی کے محتاج ہیں اس کیلئے بھیک بھی مانگنی پڑے تو مانگنی چاہیے۔

سربراہ جے یو آئی ف نے مزید کہا کہ ہمیں مجبور نہ کریں کہ احتجاج کیلئے نکل آئیں، ہم پاکستان اور آئین کے ساتھ ہیں۔

مولانا فضل الرحمان نے کہا کہ ہم آئین کی پاسداری کا حلف اٹھا چکے ہیں، اس قسم کی قانون سازی روک کر اسلامی نظریاتی کونسل بھیجیں۔

https://urdu.arynews.tv/bill-prohibiting-marriage-of-children-below-18-years-of-age/

کراچی: کم عمر لڑکی سے شادی کرنے والے لڑکے کو عدالت نے جیل بھجوا دیا۔

تفصیلات کے مطابق کم عمری کی شادی کے کیس کی سندھ ہائی کورٹ میں سماعت ہوئی، عدالت نے شادی کرنے والی کم عمر لڑکی کو پناہ گاہ شیلٹر ہوم بھیج دیا، جب کہ لڑکی کی عمر کے تعین کے لیے میڈیکل بورڈ تشکیل دینے کی ہدایت کر دی۔

عدالت نے 10 روز میں لڑکی کی عمر کا تعین کر کے رپورٹ پیش کرنے کا حکم دے دیا ہے، اور فرسٹ ایئر کی طالبہ سے شادی کرنے والے لڑکے کو گرفتار کرنے کا حکم دیا، جس پر پولیس نے لڑکے کو کمرہ عدالت سے گرفتار کر لیا۔

عدالت نے اپنے فیصلے میں کم عمر لڑکی سے شادی کرنے والے لڑکے کو جیل بھیجنے کا حکم جاری کیا، عدالتی دستاویز کے مطابق پنوں عاقل کی رہائشی لڑکی کے والدین نے بیٹی کے اغوا کا مقدمہ درج کرایا تھا، جس پر عدالت نے فیصلہ جاری کیا۔

لڑکی نے 11 نومبر کو شادی کی تھی، تاہم مقدمہ درج ہونے پر لڑکے اور لڑکی نے مقدمہ ختم کرانے اور تحفظ کے لیے سندھ ہائیکورٹ سے رجوع کیا تھا۔