اسلام آباد : سابق سیکریٹری الیکشن کمیشن کنور دلشاد کا کہنا ہے کہ پی ٹی آئی کو مخصوص نشستیں ملنے کی گنجائش موجود ہے ، ماضی میں بھی ایسی سہولت دی گئی تھی، امید ہے الیکشن کمیشن آف پاکستان اس پر غور کرے گا۔
تفصیلات کے مطابق سابق سیکریٹری الیکشن کمیشن کنوردلشاد نے اے آر وائی نیوز کے پروگرام باخبر سویرا میں گفتگو کرتے ہوئے کہا کہ پی ٹی آئی الیکشن کمیشن کو درخواست دے کہ نئی پارٹی سے معاہدہ ہوگیا ہے تو ریلیف مل سکتا ہے۔
کنور دلشاد کا کہنا تھا کہ اگر الیکشن کمیشن تحریک انصاف کی درخواست مستردکرتا ہے تو سپریم کورٹ حل نکال سکتی ہے، قانون جو بھی بنتے ہیں عوام کی سہولت کے لئے بنتے ہیں۔
سابق سیکریٹری الیکشن کمیشن نے کہا کہ وکلااپنی سیاست چھوڑ کر الیکشن کمیشن آف پاکستان جائیں اور الیکشن کمیشن کودرخواست دیں کہ ماضی میں بھی سیاسی جماعتوں کر ریلیف دیا گیا ہے۔
ان کا کہنا تھا کہ کسی سے الحاق نہیں ہوتا توتحریک انصاف والے آزاد گروپ بنالیں، پنجاب میں تحریک انصاف کے حمایت یافتہ امیدوارواضح اکثریت سے جیتےہیں، پنجاب میں حکومت سازی کیلئے ن لیگ کے نمبرز پی ٹی آئی سےکم ہیں۔
مخصوص نشستوں کے حوالے سے کنور دلشاد نے کہا کہ پی ٹی آئی کو مخصوص نشستیں ملنے کی گنجائش موجود ہے، پی ٹی آئی درخواست کرے تو الیکشن کمیشن گنجائش نکال سکتا ہے، ماضی میں بھی ایسی سہولت دی گئی تھی، امید ہے الیکشن کمیشن آف پاکستان اس پر غور کرے گا،الیکشن کمیشن غورنہیں کرتا تو پی ٹی آئی سپریم کورٹ جاسکتی ہے۔
