ARYNews.tv | Urdu – Har Lamha Bakhabar

Tag: کوئٹہ میں دھماکا

  • کوئٹہ میں دھماکا، 4 ایف سی اہلکار شہید

    کوئٹہ میں دھماکا، 4 ایف سی اہلکار شہید

    کوئٹہ میں سیکیورٹی فورسز کے بم ڈسپوزل اسکواڈ کی گاڑی کے قریب بم دھماکا ہوا ہے۔

    تفصیلات کے مطابق کوئٹہ کے نواحی علاقے مارگٹ میں سیکیورٹی فورسز کے بم ڈسپوزل اسکواڈ کی گاڑی کے قریب بم دھماکے میں 4 سیکیورٹی اہلکار شہید اور 3 زخمی ہوگئے۔

    کوئٹہ کے ڈپٹی کمشنر سعد بن اسد دھماکے کی تصدیق کرتے ہوئے بتایا کہ دھماکے کے نتیجے میں 3 افراد زخمی بھی ہوئے ہیں، لاشوں اور زخمیوں کو اسپتال منتقل کر دیا گیا ہے۔

    ڈی سی کوئٹہ نے کہا کہ بی ڈی ایس کی گاڑی کے قریب دیسی ساختہ بم کا دھماکا کیا گیا اس واقعے کے بعد سیکیورٹی فورسز نے علاقے کو گھیرے میں لیکر سرچ آپریشن شروع کردیا ہے۔

    یہ بھی پڑھیں: بنوں میں پولیس پوسٹ پر دہشت گردوں کا بڑا حملہ ناکام بنا دیا گیا

    دوسری جانب آج صبح خیبر پختونخوا کے ضلع بنوں میں تھانہ کینٹ کی حدود شین کنڈی میں دھماکا ہوا جس کے نتیجے میں دو پولیس اہلکار زخمی ہوگئے تھے۔

    پولیس حکام اس حوالے سے کہنا تھا کہ دہشتگردوں نے بارودی مواد بی ایچ یو کے ساتھ نصب کیا تھا، جمشید اور صفت نامی زخمی اہلکاروں کو اسپتال منتقل کر دیا گیا۔

  • کوئٹہ میں ریلوے ٹریک پر کریکر دھماکا

    کوئٹہ میں ریلوے ٹریک پر کریکر دھماکا

    کوئٹہ: صوبہ بلوچستان کے دارالحکومت کوئٹہ میں سریاب روڈ ریلوے ٹریک پر کریکر دھماکے کے نتیجے میں ایک شخص زخمی ہوگیا۔

    تفصیلات کے مطابق صوبہ بلوچستان کے دارالحکومت کوئٹہ کے علاقے سریاب روڈ ریلوے ٹریک پر کریکر دھماکا ہوا ، جس کے نتیجے میں ایک شخص زخمی ہوگیا۔

    پولیس اور ریسکیو ٹیمیں جائے وقوعہ پر موجود ہیں ، ریسکیو ٹیمیں نے زخمیوں کو اسپتال منتقل کیا۔

    پولیس کا کہنا ہے کہ سریاب روڈ ریلوے ٹریک پردھماکاکریکر ڈیوائس سےکیاگیا، دھماکےکے بعد علاقے کو مکمل طور پر سیل کر دیا گیا ہے۔

    یاد رہے ستمبر میں صوبہ بلوچستان کے دارالحکومت کوئٹہ میں مستونگ روڈ پر نواحی علاقے میں دھماکا ہوا تھا، جس میں 2 افراد جاں بحق اور متعدد زخمی ہوگئے تھے۔

    اس سے قبل کوئٹہ کے علاقے مشرقی بائی پاس پر دستی بم حملہ ہوا تھا جس میں 1 شخص جاں بحق اور 4 افراد زخمی ہوگئے تھے، پولیس کے مطابق نامعلوم افراد دستی بم پھینک کر فرار ہوئے تھے۔

  • کوئٹہ: پولیس موبائل کے قریب دھماکا، ایک اہل کار شہید

    کوئٹہ: پولیس موبائل کے قریب دھماکا، ایک اہل کار شہید

    کوئٹہ: بلوچستان کے شہر کوئٹہ میں ڈبل روڈ پر پولیس موبائل کے قریب دھماکا ہوا، جس میں ایک اہل کار شہید جب کہ 10 افراد زخمی ہو گئے ہیں۔

    تفصیلات کے مطابق کوئٹہ ایک بار پھر دہشت گردی کا شکار ہو گیا ہے، ڈبل روڈ پر ہونے والے دھماکے میں ایک اہل کار شہید ہو گیا، ترجمان سول اسپتال نے بتایا کہ دھماکے میں دس افراد زخمی ہوئے جنھیں طبی امداد دی جا رہی ہے۔

    پولیس حکام کے مطابق شہر کے وسطی علاقے ڈبل روڈ پر اس وقت زور دار دھماکا ہوا جب پولیس کے ریپڈ رسپانس گروپ کی گاڑی اہل کاروں کو لے کر گزر رہی تھی، دھماکے کے نتیجے میں ایک اہل کار جاں بحق جب کہ چار اہل کاروں سمیت دس افراد زخمی ہو گئے۔

    بم ڈسپوزل اسکواڈ کے ذرایع کے مطابق دھماکا موٹر سائیکل میں نصب بم سے ریمورٹ کنٹرول کے ذریعے کیا گیا۔ دھماکے سے ایک رکشا اور 5 موٹر سائیکلوں کو بھی نقصان پہنچا، 4 گاڑیوں میں لگی آگ پر قابو پا لیا گیا، پولیس نے جائے وقوع پر پہنچ کر دھماکے کی تحقیقات شروع کر دی ہیں۔

    یہ بھی پڑھیں:  کوئٹہ: مدرسے میں نماز جمعہ کے دوران دھماکہ، 7 افراد جاں بحق

    تمام زخمیوں کو سول اسپتال کے ٹراما سینٹر میں طبی امداد فراہم کی جا رہی ہے، بلوچستان حکومت کے ترجمان لیاقت شاہوانی نے دھماکے کی مذمت کی ہے۔

    یاد رہے 16 اگست کو کوئٹہ، کچلاک میں مدرسے میں نماز جمعہ کے دوران دھماکا ہوا جس میں 7 افراد جاں بحق جب کہ 22 زخمی ہو گئے تھے۔

  • کوئٹہ میں دھماکا، دو پولیس اہلکاروں سمیت تین زخمی

    کوئٹہ میں دھماکا، دو پولیس اہلکاروں سمیت تین زخمی

    کوئٹہ: بلوچستان کے دارالحکومت میں بم دھماکا ہوا جس کے نتیجے میں تین افراد زخمی ہوئے جنہیں اسپتال منتقل کردیا گیا۔

    پولیس حکام کے مطابق کوئٹہ کے مشرقی بائی پاس کے قریب دھماکا اُس وقت ہوا جب پولیس موبائل گشت پر تھی، دھماکے میں اہلکاروں کو ہی نشانہ بنانے کی کوشش کی گئی۔

    دھماکا خیز مواد موٹر سائیکل میں نصب کیا گیا تھا جسے ریموٹ کنٹرول کے ذریعے اڑایا گیا، دھماکے کے نتیجے میں دو  پولیس اہلکاروں سمیت تین افراد زخمی ہوئے۔

    سیکیورٹی فورسز اور بم ڈسپوزل اسکواڈ نے جائے وقوعہ کو گھیرے میں لے کر شواہد جمع کرلیے۔

    یاد رہے کہ 6 اگست کو کوئٹہ کی شو مارکیٹ میں ہونے والے دھماکے میں ایک شخص جاں بحق جبکہ 12 کے قریب زخمی ہوئے تھے۔ صوبائی وزیر داخلہ میر ضیاء اللہ لانگو نے دہشت گردی کے واقعے کی تصدیق بھی کی تھی۔

  • کوئٹہ: سٹی تھانے کے قریب دھماکا، 5 افراد جاں بحق، 28 زخمی

    کوئٹہ: سٹی تھانے کے قریب دھماکا، 5 افراد جاں بحق، 28 زخمی

    کوئٹہ: بلوچستان کے شہر کوئٹہ کے علاقے سٹی تھانے کے قریب لیاقت بازار میں دھماکا ہوا ہے جس میں 5 افراد جاں بحق جب کہ 28 افراد شدید زخمی ہو گئے ہیں۔

    تفصیلات کے مطابق کوئٹہ کے علاقے لیاقت بازار میں سٹی تھانے کے قریب دھماکے میں پانچ افراد جاں بحق جب کہ بچوں اور خواتین سمیت 28 زخمی ہو گئے ہیں۔

     بتایا گیا ہے کہ زخمیوں میں ایڈیشنل ایس ایچ او بھی شامل ہیں جنھیں ٹراما سینٹر منتقل کر دیا گیا ہے۔ جاں بحق افراد میں 2 پولیس اہل کار بھی شامل ہیں۔

    ریسکیو ذرایع کا کہنا ہے کہ زخمیوں کو قریبی اسپتال منتقل کر دیا گیا ہے، جب کہ سیکورٹی اہل کاروں نے دھماکے کی جگہ کو گھیرے میں لے لیا ہے۔

    پولیس کے مطابق دھماکے میں پولیس کی ایک گاڑی کو نشانہ بنایا گیا تھا، آس پاس کھڑی گاڑیوں اور موٹر سائیکلوں کو بھی دھماکے سے نقصان پہنچا۔

    ابتدائی معلومات کے مطابق پولیس کا کہنا ہے کہ دھماکا خیز مواد موٹر سائیکل میں نصب کر کے اسے پولیس موبائل کے قریب کھڑا کیا گیا تھا۔

    ڈی آئی جی عبد الرزاق چیمہ نے کہا ہے کہ دھماکے کی تحقیقات جاری ہیں جلد پیش رفت ہوگی، دھماکے میں ایڈیشنل ایس ایچ او شفاعت علی شدید زخمی ہیں۔