ARYNews.tv | Urdu – Har Lamha Bakhabar

Tag: کوئٹہ

  • کوئٹہ : کوئلے کی کان میں دھماکا ، 5 کان کن جاں بحق اور 5زخمی

    کوئٹہ : کوئلے کی کان میں دھماکا ، 5 کان کن جاں بحق اور 5زخمی

    کوئٹہ : کوئلے کی کان میں دھماکا کے نتیجے میں 5کان کن جاں بحق اور 5زخمی ہوگئے تاہم دھماکےکی وجوہات معلوم کی جارہی ہیں۔

    تفصیلات کے بلوچستان کے دارلحکومت کوئٹہ کےنواحی علاقےسرہ غڑگی میں کوئلے کی کان میں دھماکا ہوا ، جس کے نتیجے میں 5کان کن جاں بحق اور 5زخمی ہوگئے۔

    ڈی جی پی ڈی ایم کا کہنا ہے کہ 3زخمیوں کوٹراماسینٹرمنتقل کردیاگیا ہے اور دھماکےکی وجوہات معلوم کی جارہی ہیں۔

    واضح رہے کہ کوئٹہ کی کانوں میں آئے روز اس طرح کے حادثات رونما ہوتے رہتے ہیں۔ بلوچستان میں دیگر صنعتیں نہ ہونے کی وجہ سے کوئلہ کی کان کنی یہاں کی ایک بڑی صنعت ہے۔

    یہاں کے متعدد اضلاع لورالائی، کچھی، ہرنائی اور کوئٹہ کے پہاڑی علاقوں میں بڑی تعداد میں کوئلہ کی کانیں ہیں، جن میں لوگوں کی ایک بڑی تعداد کام کرتی ہے۔

  • شدید سردی کی لہر ، کوئٹہ میں درجہ حرارت منفی 4 ڈگری تک گرگیا

    شدید سردی کی لہر ، کوئٹہ میں درجہ حرارت منفی 4 ڈگری تک گرگیا

    کوئٹہ : بلوچستان میں شدید سردی کی لہر بدستور برقرار ہے، کوئٹہ میں درجہ حرارت منفی 4 ڈگری تک گرگیا، محکمہ موسمیات کا کہنا ہے کہ موسم شدید سرد رہے گا۔

    تفصیلات کے مطابق بلوچستان کے بیشتر اضلاع میں موسم کی شدت میں اضافے ہوگیا ، جس کے باعث شہری گھروں میں محصور ہوگئے ہیں۔

    محکمہ موسمیات کا کہنا ہے کہ کوئٹہ میں کم سےکم درجہ حرارت منفی4ڈگری ، زیارت میں کم سےکم درجہ حرارت منفی5ڈگری ریکارڈ کیا گیا۔

    قلات میں کم سےکم درجہ حرارت منفی9 ڈگری ، گوادرمیں کم سےکم درجہ حرارت6ڈگری ، سبی میں کم سے کم درجہ حرارت7ڈگری اور نوکنڈی میں کم سے کم درجہ حرارت منفی1ڈگری ریکارڈ کیا گیا۔

    دوسری جانب ملک کے بیشتر علاقوں میں آج موسم سرد اور خشک رہے گا، محکمہ موسمیات کے مطابق کراچی، لاہور، اسلام آباد اور پشاور میں موسم خشک اور سرد رہے گا۔

    محکمہ موسمیات کا کہنا تھا کہ مظفر آباد میں مطلع جزوی طور پر ابرآلود رہنے کا امکان ہے جبکہ گلگت بلتستان اور بلوچستان کے شمالی علاقوں میں موسم شدید سرد رہے گا۔

  • بلوچستان کے 17 شہروں میں 445 ملی میٹر بارش ریکارڈ

    بلوچستان کے 17 شہروں میں 445 ملی میٹر بارش ریکارڈ

    کوئٹہ: صوبہ بلوچستان کے مختلف شہروں میں بارش کے اعداد و شمار جاری کر دیے گئے، بارشوں سے صوبے میں سیلابی صورتحال پیدا ہوگئی ہے۔

    تفصیلات کے مطابق بلوچستان کے 17 شہروں میں 24 گھنٹے کے دوران بارشوں کے اعداد و شمار جاری کر دیے گئے، 17 شہروں میں 445 ملی میٹر بارش ریکارڈ کی گئی۔

    محکمہ موسمیات کا کہنا ہے کہ صبح 8 بجے تک پسنی میں سب سے زیادہ 115 ملی میٹر بارش ریکارڈ کی گئی، گوادر میں 64، اوماڑہ میں 60، خضدار میں 42، پنجگور میں 29، جیوانی میں 27 اور تربت میں 25 ملی میٹر بارش ریکارڈ کی گئی۔

    محکمہ موسمیات کے مطابق لسبیلہ اور پشین میں 21، 21، کوئٹہ میں 18، قلات میں 18، زیارت میں 9، مسلم باغ میں 8 جبکہ بارکھان اور کوہلو میں 4 ملی میٹر بارش ریکارڈ کی گئی۔

    اسی طرح سبی میں 3 اور لورالائی میں 2 ملی میٹر بارش ریکارڈ کی گئی۔

    یاد رہے کہ موسلا دھار بارشوں سے بلوچستان کے مختلف شہروں میں سیلابی صورتحال ہے جس کے باعث سیاح اور مقامی آبادی شدید مشکلات میں پھنس گئے، گزشتہ روز مختلف علاقوں میں پھنسے سیاحوں اور گاڑیوں کو محفوظ مقامات پر منتقل کیا گیا۔

    کوسٹل ہائی وے پسنی، سور بندر، نگور اور جیوانی میں ریسکیو آپریشن بھی کیا گیا اور اس دوران خوراک ‏کے ساتھ رہائش بھی فراہم کی گئی۔

  • کوئٹہ ویڈیو اسکینڈل کی اصل کہانی اے آر وائی نیوز پر، فرانزک رپورٹ نے سارے راز کھول دیے

    کوئٹہ ویڈیو اسکینڈل کی اصل کہانی اے آر وائی نیوز پر، فرانزک رپورٹ نے سارے راز کھول دیے

    کوئٹہ: کوئٹہ ویڈیو اسکینڈل کی اصل کہانی اے آر وائی نیوز نے حاصل کر لی، فرانزک رپورٹ نے اس کیس کے سارے راز کھول دیے۔

    تفصیلات کے مطابق کوئٹہ ویڈیو اسکینڈل فرانزک رپورٹ نے سب کچھ کھول کر رکھ دیا، ذرائع کا کہنا ہے کہ ویڈیو میں دکھائی دینے والی لڑکیاں ملزمان کے ساتھ ملی ہوئی تھیں، ہدایت اور خلیل نے 4 لڑکیاں مردوں کو ورغلانے کے لیے رکھی تھیں۔

    فرانزک رپورٹ میں کہا گیا ہے کہ ملزم ہدایت کے ساتھ چیٹ کے دوران کریمہ نے راز کھولنے کی دھمکی دی تھی، فرانزک رپورٹ میں اس چیٹ کا حوالہ دیا گیا ہے، جس کے مطابق ملزم ہدایت کے ساتھ اختلاف ہونے پر کریمہ نے سب راز کھولے ہیں، چیٹ میں کریمہ ملزم کو کہتی ہے میں سب کچھ باہر بتا دوں گی۔

    ملزم نے کریمہ کو جوابی دھمکی دیتے ہوئے کہا کہ اگر باہر کچھ بولا تو تمہاری ویڈیوز نیٹ پر چڑھا دوں گا۔

    کوئٹہ ویڈیو اسکینڈل کیس نیا موڑ اختیار کرگیا

    ذرائع کا کہنا ہے کہ مذکورہ ملزمان پارٹی کے نام پر لوگوں کو بلاتے تھے، اور لڑکیوں سمیت سب کو نشہ پلاتے تھے، اس کے بعد وہ نشے کی حالت میں غیر اخلاقی ویڈیوز بناتے تھے، انھی ویڈیوز کی بنیاد پر مہمانوں اور لڑکیوں کو بلیک میل کیا جاتا تھا، اور مہمانوں سے رقم وصول کی جاتی تھی۔

    رپورٹ کے مطابق ملنے والی 280 میں سے 254 ویڈیوز اوریجنل ہیں، جب کہ باقی ویڈیوز میں تھوڑی ایڈیٹنگ ہوئی ہے، تاہم موصول ہونے والی ویڈیوز میں زیادتی نظر نہیں آ رہی، پولیس ذرائع کا یہ بھی کہنا ہے کہ ویڈیوز اور چیٹ میں بچوں کا کوئی ذکر نہیں ہے۔

  • کوئٹہ میں موسم سرما کی پہلی برف باری، کراچی میں بوندا باندی

    کوئٹہ میں موسم سرما کی پہلی برف باری، کراچی میں بوندا باندی

    کوئٹہ / کراچی: صوبہ بلوچستان کے دارالحکومت کوئٹہ میں پہاڑوں پر موسم سرما کی پہلی برف باری شروع ہوگئی، دوسری جانب صوبہ سندھ کے دارالحکومت کراچی کے مختلف علاقوں میں بھی بوندا باندی شروع ہوگئی۔

    تفصیلات کے مطابق صوبہ بلوچستان کے دارالحکومت کوئٹہ میں پہاڑوں پر موسم سرما کی پہلی برف باری شروع ہوگئی، شہر میں رات کو بارش کے بعد مطلع جزوی طور پر ابر آلود ہے جبکہ موسم بھی سرد ہے۔

    محکمہ موسمیات کا کہنا ہے کہ کوئٹہ میں درجہ حرارت 1 ڈگری سینٹی گریڈ ریکارڈ کیا گیا ہے، بلوچستان کے بیشتر اضلاع میں موسم سرد اور ابر آلود رہے گا۔

    محکمہ موسمیات کا کہنا ہے کہ کوئٹہ، قلات، زیارت، کوہلو، سبی، بارکھان، خضدار اور ژوب میں بھی برفباری متوقع ہے جبکہ لسبیلہ اور مکران کے ساحلی علاقوں میں بارش کا بھی امکان ہے۔

    دوسری جانب صوبہ سندھ کے دارالحکومت کراچی کے مختلف علاقوں میں بوندا باندی شروع ہوگئی۔

    محکمہ موسمیات کا کہنا ہے کہ مغربی ہواؤں کا دباؤ شہر میں ہلکی بارش کا سبب بن سکتا ہے، مغربی ہواؤں کا سسٹم ایران کے راستے بلوچستان میں داخل ہوا ہے۔

  • سسرال والوں کے ظلم سے تنگ خاتون نے آئی جی بلوچستان سے مدد مانگ لی

    سسرال والوں کے ظلم سے تنگ خاتون نے آئی جی بلوچستان سے مدد مانگ لی

    کوئٹہ: بلوچستان کے دارالحکومت کوئٹہ میں سسرال والوں کے ظلم سے تنگ خاتون نے آئی جی بلوچستان سے مدد مانگ لی، خاتون کا کہنا ہے کہ ان کے سسرال والے ان کے ڈھائی سال کے بیٹے کو چھین کر کراچی فرار ہوگئے ہیں۔

    تفصیلات کے مطابق صوبہ بلوچستان کے دارالحکومت کوئٹہ کی رہائشی خاتون نے سسرالیوں کے ظلم سے تنگ آ کر انسپکٹر جنرل (آئی جی) بلوچستان سے مدد مانگ لی۔

    شکیلہ نعمت نامی متاثرہ خاتون نے اپنی ویڈیوز اور تصاویر سوشل میڈیا پر جاری کردیں، خاتون اور ان کی بیٹی کو سسرالیوں نے مبینہ تشدد کا نشانہ بنایا ہے۔

    خاتون کا کہنا ہے کہ ان کے سسرال والے ڈھائی سال کے بیٹے کو ان سے چھین کر کراچی فرار ہوگئے ہیں، کراچی میں ان کے شوہر نے دوسری شادی رچالی۔

    خاتون کا کہنا ہے کہ سسرالیوں نے انہیں اور ان کی 6 بیٹیوں کو گھر چھوڑنے کو کہا، گھر نہ چھوڑنے پر انہیں جان سے مارنے کی دھمکیاں دی جارہی ہیں۔

  • ملزم سے 16 ہزار ایکٹو سمیں، 4 ہزار سلیکون انگوٹھے برآمد

    ملزم سے 16 ہزار ایکٹو سمیں، 4 ہزار سلیکون انگوٹھے برآمد

    کراچی: فیڈرل انویسٹگیشن ایجنسی (ایف آئی اے) نے غیر قانونی طور پر موبائل سِم ایکٹو کرنے والے ایک گروہ کو بے نقاب کر دیا ہے۔

    تفصیلات کے مطابق وفاقی تحقیقاتی ادارے نے ڈیر غازی خان میں کارروائی کر کے سمیں ایکٹو کرنے والے گروہ کے ایک اور کارندے کو گرفتار کر لیا ہے۔

    ایڈیشنل ڈائریکٹر ایف آئی اے سائبر کرائم نے بتایا کہ اس گروہ کے 3 کارندے اکتوبر میں کوئٹہ سے پکڑے گئے تھے، ڈی جی خان سے گرفتار ہونے والا ملزم سلیکون انگھوٹے کے نشان سے سِم کھولتا تھا۔

    کراچی میں ایڈیشنل ڈائریکٹر ایف آئی اے سائبر کرائم ونگ عمران ریاض نے پریس کانفرنس میں بتایا کہ ملزم سے 16 ہزار ایکٹوسمیں، اور 30 بی وی ایس مشینوں کے ساتھ 4 ہزار سلیکون انگوٹھے بھی برآمد ہوئے۔

    عمران ریاض نے بتایا کہ جعلی سمز کے خلاف شہریوں کی شکات پر کارروائیاں جاری ہیں، جن میں اب تک 9 افراد گرفتار ہو چکے ہیں، 7 فرنچائز سیل کر دیے گئے ہیں۔

    ایڈیشنل ڈائریکٹر کے مطابق ملزمان سلیکون تھمب سے سم ایکٹو کرتے تھے، گروہ میں اوکاڑہ، لاہور کے افراد بھی ملوث پائے گئے ہیں، ملزمان نمبر ایک شخص کے نام سے رجسٹر کرتے تھے، اور اسی نمبر کا والیٹ اکاؤنٹ دوسرے شخص کے نام پر بناتے تھے، یہ واٹس ایپ نمبر بھی فروخت کرتے تھے۔

    انھوں نے بتایا کہ غیر قانونی سمیں بھتہ خوری، قتل اور اغوا کی وارداتوں میں استعمال ہوتی ہیں، عمران ریاض نے مزید کہا کہ انٹرنیٹ سروس پرووائڈرز کو سائبر ٹیم واچ کر رہی ہے، ہمیں پتا ہے یہ لوگ کس طریقے سے کام کر رہے ہیں، غیر قانونی سمز ہر جگہ مل رہی ہیں، ہماری کارروائیاں بھی جاری ہیں۔

  • کوئٹہ میں ریلوے ٹریک پر کریکر دھماکا

    کوئٹہ میں ریلوے ٹریک پر کریکر دھماکا

    کوئٹہ: صوبہ بلوچستان کے دارالحکومت کوئٹہ میں سریاب روڈ ریلوے ٹریک پر کریکر دھماکے کے نتیجے میں ایک شخص زخمی ہوگیا۔

    تفصیلات کے مطابق صوبہ بلوچستان کے دارالحکومت کوئٹہ کے علاقے سریاب روڈ ریلوے ٹریک پر کریکر دھماکا ہوا ، جس کے نتیجے میں ایک شخص زخمی ہوگیا۔

    پولیس اور ریسکیو ٹیمیں جائے وقوعہ پر موجود ہیں ، ریسکیو ٹیمیں نے زخمیوں کو اسپتال منتقل کیا۔

    پولیس کا کہنا ہے کہ سریاب روڈ ریلوے ٹریک پردھماکاکریکر ڈیوائس سےکیاگیا، دھماکےکے بعد علاقے کو مکمل طور پر سیل کر دیا گیا ہے۔

    یاد رہے ستمبر میں صوبہ بلوچستان کے دارالحکومت کوئٹہ میں مستونگ روڈ پر نواحی علاقے میں دھماکا ہوا تھا، جس میں 2 افراد جاں بحق اور متعدد زخمی ہوگئے تھے۔

    اس سے قبل کوئٹہ کے علاقے مشرقی بائی پاس پر دستی بم حملہ ہوا تھا جس میں 1 شخص جاں بحق اور 4 افراد زخمی ہوگئے تھے، پولیس کے مطابق نامعلوم افراد دستی بم پھینک کر فرار ہوئے تھے۔

  • انٹیلی جنس کا میجر بن کے جعل سازی کرنے والا ملزم گرفتار

    انٹیلی جنس کا میجر بن کے جعل سازی کرنے والا ملزم گرفتار

    کوئٹہ: محکمہ انسداد دہشت گردی (سی ٹی ڈی) کراچی نے کوئٹہ سے خود کو انٹیلی جنس کا میجر ظاہر کر کے جعل سازی کرنے والے ملزم کو گرفتار کرلیا۔

    تفصیلات کے مطابق محکمہ انسداد دہشت گردی (سی ٹی ڈی) کراچی نے صوبہ بلوچستان کے دارالحکومت کوئٹہ میں کارروائی کرتے ہوئے عثمان شاہ عرف میجر عثمان نامی ملزم کو گرفتار کرلیا۔

    ترجمان سی ٹی ڈی کا کہنا تھا کہ ملزم نے ساتھیوں سے مل کر فضل نامی شخص کو قتل کیا تھا۔ گرفتار ملزم عثمان شاہ کا تعلق چھالیہ مافیا سے ہے، ملزم اپنے آپ کو انٹیلی جنس کا میجر ظاہر کرتا تھا۔

    ترجمان کے مطابق ملزم نے فضل کو 7 کروڑ کی چھالیہ کسٹمز انٹیلی جنس میں پکڑوانے پر قتل کیا، فضل سے متعلق اطلاع بھی کسٹم اہلکار نے عثمان شاہ کو دی تھی۔

    ترجمان کا مزید کہنا ہے کہ گرفتار ملزم عثمان سے مزید تفتیش جاری ہے۔

  • کوئٹہ: ناراض اراکین کی اکثریت سامنے آ گئی

    کوئٹہ: ناراض اراکین کی اکثریت سامنے آ گئی

    کوئٹہ: بلوچستان کے ناراض اور اپوزیشن جماعتوں کے اراکین کے اجلاس میں ناراض اراکین نے اکثریت واضح کر دی۔

    تفصیلات کے مطابق بلوچستان سیاسی بحران ایک اہم موڑ پر آ گیا ہے، آج کوئٹہ میں ایک بڑا اجلاس منعقد ہوا، جس میں ناراض اور اپوزیشن پر مبنی 36 اراکین شریک ہوئے، جب کہ وزیر اعلیٰ جام کمال کے خلاف عدم اعتماد کی تحریک کی کامیابی کے لیے 33 ووٹ درکار ہیں۔

    اجلاس کے بعد بی اے پی کے قائم مقام صدر ظہور بلیدی نے میڈیا سے گفتگو کرتے ہوئے کہا بلوچستان میں کافی دنوں سے سیاسی بحران چل رہا ہے، کل اسمبلی میں جام کمال کے خلاف تحریک عدم اعتماد پیش کر دیں گے۔

    میر ظہور بلیدی نے کہا آج کے اجلاس میں 36 اراکین شریک ہوئے، 4 مزید اراکین کل اسمبلی میں آ رہے ہیں، کُل 65 کے ایوان میں ہمیں 40 راکین کی حمایت حاصل ہے، ہماری اکثریت واضح ہے، جام کمال کے پاس وقت ہے استعفیٰ دے دیں۔

    انھوں نے کہا وزیر اعلیٰ کے استعفیٰ نہ دینے پر ان کے خلاف کل تحریک عدم اعتماد پیش کر دیں گے۔

    پارلیمانی لیڈر جے یو آئی سکندر ایڈووکیٹ نے اس موقع پر کہا کہ وہ تحریک عدم اعتماد کی حمایت کرتے ہیں، وزیر اعلیٰ جام کمال فوری مستعفی ہو جائیں۔

    اسد بلوچ نے کہا جام کمال کی ناکامی کی وجہ لالچ اور قول و فعل میں تضاد ہے، ان کو رات 12 بجے تک کا وقت دیتے ہیں، مستعفی ہو جائیں، وزیر اعلیٰ ہٹ دھرمی چھوڑ دیں اور استعفیٰ دے دیں۔

    دوسری طرف وزیر اعلیٰ بلوچستان جام کمال اپنے مؤقف پر قائم ہیں، انھوں نے ایک بیان میں کہا کہ اپوزیشن کے چند ممبران اپنے عزائم میں کامیاب نہیں ہوں گے، مخالفین کا اصل مقصد بلوچستان کو تباہی کی طرف لے جانا ہے۔