کراچی میں کچھ گھنٹوں کے دوران فائرنگ کے مختلف واقعات میں 2 افراد جاں بحق اور متعدد افراد زخمی ہوگئے۔
تفصیلات کے مطابق کراچی کے علاقہ کورنگی زمان ٹاؤن میں ہوائی فائرنگ کی گئی، پولیس نے ایک شخص کو حراست میں لے کر اسلحہ برآمد کرلیا۔
پولیس کا کہنا ہے کہ تقریب سے واپسی پر بارات میں شامل کچھ افراد ہوائی فائرنگ کر رہے تھے، بارات میں شامل ایک شخص گاڑی سےگر کر جاں بحق ہو گیا، متوفی گاڑی کے پچھلے حصے میں بیٹھا تھا، متوفی کی موت گردن ٹوٹنے سے ہوئی ہے۔
دوسری جانب کراچی کے علاقہ سرجانی ٹاؤن ریسٹورانٹ کے قریب فائرنگ سے رکشہ ڈرائیور جاں بحق ہوگیا، قریب کھڑے ایک اور رکشے میں سوار ماں بیٹا بھی گولی لگے سے زخمی ہوئے۔
ریسٹورانٹ کے مالک کو چند روز قبل بھتے کی کال آئی تھی، ملزمان نے رکشے کو ٹارگٹ کر کے فائرنگ کی، پولیس کا کہنا ہے کہ واقعہ کی دونوں پہلوؤں سے تحقیقات کر رہی ہے۔
https://urdu.arynews.tv/karachi-extortion-gang-leader-shah-latif-town/
پولیس کا کہنا ہے کہ دو موٹر سائیکلوں پر ملزمان سوار تھے، ریسٹورانٹ کا ایک ملازم بھی زخمی ہوا ہے، پولیس کو جائے وقوعہ سے نائن ایم ایم کے نو خول ملے ہیں۔
پولیس کے مطابق واقعہ میں ایک شخص جاں بحق اور پانچ زخمی ہوئے، وقوعہ کے اطراف کی سی سی ٹی وی فوٹیج حاصل کی جا رہی ہے۔
اس کے علاوہ اورنگی ٹاؤن میں بھی فائرنگ سے خاتون اور بچہ زخمی ہوئے، ملیر اور فرنٹئیر کالونی میں فائرنگ کے واقعات میں خاتون سمیت 2 افراد زخمی ہوئے، تمام زخمیوں کو ہسپتال منتقل کردیا گیا ہے۔
