کراچی: کورنگی کریک میں لگی آگ بجھانے کے لیے امریکی ماہرین کی خدمات حاصل کر لی گئی ہیں۔
تفصیلات کے مطابق کورنگی کریک میں آگ لگنے اور گیس کے اخراج کے معاملے میں چیف سیکریٹری کی مداخلت پر امریکی ماہرین کی خدمات حاصل کر لی گئی ہیں۔
ترجمان چیف سیکریٹری سندھ نے بتایا کہ امریکی کمپنی کی خدمات وزارت پیٹرولیم نے حاصل کی ہیں، پاکستان پیٹرولیم اور یو ای پی ایل کی تکنیکی ٹیموں نے متاثرہ مقام کا مشترکہ دورہ کیا، ڈرلنگ، کمپلیشن، سیفٹی پر مشتمل ماہرین کی ٹیم نے سائٹ کا جائزہ لیا، معائنے کے دوران آگ کی شدت میں کمی نہ آنے کا مشاہدہ کیا گیا۔
ترجمان کے مطابق گیس کے حجم کے باعث گڑھا مزید پھیل گیا ہے، اور وہاں سے گرم پانی کا اخراج جاری ہے، ماہرین اس بات پر مشاورت کر رہے ہیں کہ گڑھے میں سیمنٹ بھرنے کی حکمت عملی اختیار کی جائے۔
ترجمان نے بتایا کہ نئی ویل کھودنے اور گیس کے منبع تک پہنچنے کا فیصلہ ماہرین کی رپورٹ پر ہوگا، فی الوقت گیس کی مقدار جاننے اور درجہ حرارت کے لیے جدید آلات منگوائے جا رہے ہیں، نیز سندھ حکومت ہنگامی صورت حال سے نمٹنے کے لیے اداروں سے رابطے میں ہے۔
واضح رہے کہ ذرائع کا کہنا ہے کہ کورنگی کریک میں آگ لگنے کے اطراف گڑھے کا سائز 150 فٹ ہو گیا ہے۔ حکام کا کہنا ہے کہ وزارت پیٹرولیم نے میتھین گیس کی جانچ کے لیے کمیٹی تشکیل دے دی ہے، اور مزید منرل ٹیسٹ کے لیے اداروں سے رابطہ کر لیا گیا ہے۔
یاد رہے کہ کراچی کے علاقے کورنگی میں آگ لگنے کے مقام سے لیے گئی پانی کے نمونوں کی کیمیائی تجزیاتی رپورٹ میں ہائیڈروکاربن کی مقدار طے شدہ حد سے کم نکلی تھی۔ ابتدائی کیمیائی تجزیاتی رپورٹ کے مطابق پانی میں بینزین (Benzene)، ٹولوین (Toluene)، اور ٹیٹرا کلوروتھین (Tetrachloroethane) کی زائد مقدار پائی گئی ہے، جب کہ او زائلین (o-Xylene) بھی معمولی مقدار میں زائد پایا گیا تھا۔
