کراچی: وزیراعلیٰ سندھ مراد علی شاہ نے صوبے میں بچوں کے انتہائی نگہداشت یونٹس کو مزید بڑھانے کا اعلان کیا ہے۔
تفصیلات کے مطابق کراچی کے علاقے کورنگی نمبر پانچ میں چلڈرن اسپتال کے افتتاحی تقریب میں شرکت کی جہاں وزیراعلیٰ سندھ نے اسپتال کے مختلف وارڈز ، لیبارٹری اور او پی ڈی کا دورہ کیا۔
اس موقع پر ایگزیکٹو ڈائریکٹر جمال رضا نے کورنگی اسپتال کے حوالے سے وزیراعلیٰ سندھ کو بریفنگ دی۔
تقریب سے خطاب کرتے ہوئے وزیراعلیٰ سندھ مراد علی شاہ نے کہا کہ کورنگی کے لوگوں کو چلڈرن اسپتال کے قیام پر مبارکباد پیش کرتا ہوں، ساتھ ہی سندھ انسٹی ٹیوٹ آف چائلڈ ہیلتھ اینڈ نیونیٹولوجی کو بھی ایسی بہترین سہولت کے قیام پر خراج تحسین پیش کرتا ہوں۔
وزیراعلیٰ سندھ نے کہا کہ پیپلز پارٹی کی حکومت کی جانب سے یہ اسپتال ضلع کورنگی کے عوام کیلئے تحفہ ہے، سندھ حکومت نے کورنگی کیلئے بہترین روڈ انفراسٹرکچر اور ٹرانسپورٹ دے کر انکی خدمت کی ہے۔
مراد علی شاہ نے کہا کہ پریزنٹیشن سے پتہ چلا کہ حکومت کو نوزائیدہ بچوں کی دیکھ بھال کیلئے مزید کوششیں کرنا ہوں گی، ہمیں بتایا گیا کہ پاکستان میں ہر ایک ہزار پیدائشی بچوں میں 45.6 نوزائیدہ اموات ہوتی ہیں، مناسب سہولیات سے نوزائیدہ اموات میں سے 80 فیصد کو روکا جا سکتا ہے۔
انہوں نے کہا کہ نوزائیدہ اموات کی شرح کو کم کرنے کیلئے تھری ٹائر سسٹم ( انورٹڈ پیرامڈ اسٹرکچر) تجویز کیا گیا ہے، تحصیل سطح پر ثانوی نگہداشت یونٹس شامل ہیں جن میں کینگرو مدر بھی شامل ہیں۔
تقریب سے خطاب کرتے ہوئے وزیراعلیٰ سندھ نے کہا کہ ہمیں بتایا گیا کہ سندھ انسٹی ٹیوٹ آف چائلڈ ہیلتھ اینڈ نیونیٹولوجی کے 86فیصد مریض صحتیاب ہو چکے،اسپتال میں تمام سروسز میں اوسط کامیابی کا تناسب 80 فیصد سے زیادہ ہے،اٹھائیس بستروں پر مشتمل پیڈیاٹرک انتہائی نگہداشت یونٹ صوبہ سندھ میں سب سے بڑی سہولت ہے،کورنگی چلڈرن ہسپتال پیڈیاٹرک انٹینسیو کیئر یونٹ (پی آئی سی یو ) میں کامیابی کی شرح 90 فیصد ہے یہ شرح عام پیڈیاٹرک اور او پی ڈی کیسز میں سو فیصد کے قریب ہے۔
وزیراعلیٰ سندھ کا مزید کہنا تھا کہ کورنگی چلڈرن اسپتال کے منصوبے کے تحت ہم پیڈیاٹرک سرجیکل یونٹ، لیبارٹریوں کو وسعت دینے اور موجودہ انفراسٹرکچر کو اپ گریڈ کرنے جا رہے ہیں تاکہ اس پروجیکٹ کو صوبے بھر میں پھیلا جاسکے۔
