کلکتہ: بھارتی شہر کلکتہ میں بھارتیہ جنتا پارٹی کے رہنما نے کرونا سے بچاؤ کے لیے گائے کے پیشاب کی پارٹی دے ڈالی، پولیس نے گرفتار کر لیا۔
بھارتی میڈیا کے مطابق کرونا وائرس سے بچاؤ کے لیے گائے کا پیشاب پلوانے پر بی جے پی رہنما کو گرفتار کر لیا گیا، رہنما نے کرونا سے بچاؤ کے لیے گائے کا پیشاب پینے کی تقریب سجا دی تھی۔
پولیس کا کہنا تھا کہ تقریب میں ایک رضا کار نے گائے کا پیشاب پی لیا، جس پر وہ بیمار پڑ گیا، شہری کی شکایت پر بی جے پی کے مقامی رہنما نارائن چیٹر جی کو حراست میں لے لیا گیا۔ رہنما نے دعویٰ کیا تھا کہ گائے کا پیشاب کرونا وائرس سے بچائے گا اور جو پہلے ہی سے وائرس کا شکار ہیں انھیں صحت یاب کر دے گا۔
خیال رہے کہ کرونا وائرس کے علاج کے لیے گائے کے پیشاب کی تقسیم کے عمل کو مغربی بنگال کی حکمران جماعت کے ساتھ ساتھ انڈیا کی اپوزیشن پارٹی کانگریس کی جانب سے بھی شدید تنقید کا نشانہ بنایا جا رہا ہے۔ ادھر بھارت میں کرونا وائرس سے ہونے والی اموات کی تعداد 3 ہو گئی ہے جب کہ 174 لوگ وائرس سے متاثرہ ہیں۔
کراچی: سندھ حکومت نے کرونا وائرس کے ہنگامی صورت حال سے نمٹنے کے لیے ایکسپو سینٹر کراچی میں پاک فوج کے تعاون سے فیلڈ اسپتال قائم کرنے کا فیصلہ کر کے تیاریاں شروع کر دی ہیں، ادھر کراچی میں کرونا وائرس کے مزید 3 کیس رپورٹ ہوئے ہیں۔
اے آر وائی نیوز کے مطابق کمشنر کراچی افتخار شالوانی نے وفاقی وزارت تجارت کے حکام سے رابطہ کر کے ایکسپو سینٹر کراچی میں فیلڈ اسپتال کے قیام کی تجویز دی، جسے وفاق نے قبول کر لیا۔
ذرایع کا کہنا ہے کہ وفاق کی جانب سے تجویز منظور ہونے کے بعد ایکسپو سینٹر میں کرونا کے مریضوں کے لیے فیلڈ اسپتال قائم کرنے کی تیاریاں شروع کر دی گئی ہیں، وزیر اعلیٰ سندھ مراد علی شاہ نے کمشنر کو فیلڈ اسپتال کے لیے بستر اور دیگر سامان خریدنے کی ہدایت بھی کر دی ہے۔
وزیر اعلیٰ سندھ مراد علی شاہ کی زیر صدارت خصوصی اجلاس میں فیصلہ کیا گیا کہ ایکسپو سینٹر میں اسپتال، آئسولیشن سینٹر پاک فوج کے تعاون سے قائم ہوگا، سندھ حکومت اور کور کمانڈر کراچی کی ٹیمیں مل کر کام کریں گی، سندھ حکومت کی ٹیم کی سربراہی سعید غنی کریں گے، کمشنر کراچی معاونت کریں گے، جب کہ کور کمانڈر کراچی ٹیم کی سربراہی بریگیڈیئر سمیع کریں گے۔ سندھ حکومت نے 20 لاکھ راشن بیگ عوام میں تقسیم کرنے کا بھی اعلان کیا، راشن بیگ میں چاول، آٹا، گھی، چینی، پتی، دال اور مصالحے شامل ہوں گے، وزیر اعلیٰ سندھ نے راشن بیگز تقسیم کرنے کی ہدایت کر دی۔
ادھر کراچی میں کرونا وائرس کے مزید 3 کیس رپورٹ ہو گئے ہیں، محکمہ صحت سندھ کا کہنا ہے کہ کراچی میں تینوں کیسز مقامی ہیں، ان کی کوئی ٹریول ہسٹری نہیں، سندھ میں کرونا وائرس کے کیسز کی تعداد 211 ہو گئی، حیدر آباد میں ایک، کراچی میں وائرس کے کیسز کی تعداد 59 ہے، تفتان سے آئے زائرین سکھر میں 151 کیسز مثبت ہیں۔
آج کرونا وائرس پر اجلاس میں وزیر اعلیٰ سندھ مراد علی شاہ نے کہا کہ وائرس میں مبتلا سندھ میں تیسرا مریض بھی صحت یاب ہو گیا ہے، جو اچھی علامت ہے۔ ہانگ کانگ، سنگاپور، تائیوان اور جنوبی کوریا نے اس انفیکشن کی رفتار پر کنٹرول کیا ہے، صرف کم سے کم سفر اور مسلسل اسکریننگ سے کرونا وائرس کو روکا جا سکتا ہے، بڑے اجتماع پر پابندی، سخت قرنطینہ کا عمل ہونا چاہیے۔
دوسری طرف سکھر کی ضلعی انتظامیہ نے کہا ہے کہ تفتان سے مزید 757 زائرین کی قرنطینہ سینٹر آمد کے بعد تعداد 1060 ہو گئی ہے، اسکرنینگ کا عمل شروع کر دیا گیا ہے، بس کے ڈرائیورز اور کنڈیکٹرز کے سیمپلز اور بایو ڈیٹا لے لیا گیا ہے، مسافر کوچز کے ڈرائیورز، کنڈیکٹرز کی تعداد 60 ہے، زائرین کو رہایش کے ساتھ کھانے پینے کی اشیا دی گئی ہیں، کراچی سے ماہر ڈاکٹروں کی ٹیم بھی سکھر کے قرنطینہ پہنچ چکی ہے۔
اسلام آباد: ایک اور پاکستانی کرونا وائرس کو شکست دینے میں کامیاب ہو گیا، ذرایع کا کہنا ہے کہ پمز اسپتال میں زیرعلاج کرونا کا ایک مریض صحت یاب ہو گیا ہے۔
تفصیلات کے مطابق پمز میں زیر علاج مریض کا کرونا ٹیسٹ نیگیٹیو آ گیا، جس کے بعد مریض کو اسپتال سے ڈسچارج کر دیا گیا، ذرایع کا کہنا ہے کہ گزشتہ 2 ہفتوں میں مریض کے 4 کرونا وائرس ٹیسٹ کیے گئے، پہلا ٹیسٹ منفی، دوسرا مثبت، تیسرا، چوتھا ٹیسٹ منفی نکلا۔
بتایا گیا کہ کرونا سے صحت یاب ہونے والے مریض کی عمر 61 برس ہے اور ان کا تعلق گلگت بلتستان کے علاقے اسکردو سے ہے، مریض کی ٹریولنگ ہسٹری بھی رہی، 2 ہفتے سعودی عرب، دو ہفتے عراق، ایران میں قیام کیا تھا، 23 فروری کو پاکستان پہنچا تھا، 25 فروری کو پمز اسپتال منتقل کیا گیا جب کہ 26 فروری کو کرونا کی تصدیق ہوئی تھی۔
خیال رہے کہ کرونا وائرس سے اب تک پاکستان میں 4 مریض صحت یاب ہو چکے ہیں، جن میں سے دو کراچی میں اور دو اسلام آباد میں صحت یاب ہوئے۔
گزشتہ روز معاونِ خصوصی برائے صحت ڈاکٹر ظفر مرزا نے کرونا وائرس سے 2 پاکستانیوں کی موت کی تصدیق کی ہے، پاکستان بھر میں رپورٹ ہونے والے کیسز کی مجموعی تعداد اضافے کے بعد 292 تک پہنچ چکی ہے۔ مرنے والے ایک شخص کا تعلق مردان سے تھا جو حال ہی میں عمرہ ادائیگی کے بعد وطن واپس پہنچا تھا۔ متاثرہ شخص کو کھانسی، بخار اور سانس لینے میں دشواری کا سامنا تھا، اُس کا ٹیسٹ بھی مثبت آیا تھا۔ کرونا سے مرنے والے دوسرے شخص کا تعلق خیبر پختون خواہ کے علاقے ہنگو سے تھا۔
واشنگٹن: امریکی صدر ڈونلڈ ٹرمپ نے ملک میں جنگی حالات کے نفاذ کا اعلان کر دیا ہے۔
تفصیلات کے مطابق صدر ٹرمپ نے گزشتہ روز کرونا وائرس ٹاسک فورس کے ہمراہ پریس کانفرنس کرتے ہوئے ملک میں جنگی حالات کے نفاذ کا اعلان کیا، انھوں نے کہا کہ کرونا وائرس کے خلاف لڑائی کو جنگ کے طور پر لے رہے ہیں۔
صدر ٹرمپ نے امریکا میں سیاسی پناہ کے خواہش مندوں کے داخلے پر بھی پابندی لگا دی، فیڈرل ڈرگ اتھارٹی کو دواؤں کے لیے شرائط نرم کرنے کی ہدایت بھی جاری کر دی گئی، اسپتالوں کو کہا گیا ہے کہ مخصوص آپریشن اور ڈینٹل سرجریز معطل کی جائیں۔ ٹرمپ نے کہا کہ متعلقہ حکام کو ہزاروں نئے وینٹی لیٹرز حاصل کرنے کی ہدایات جاری کر دی گئی ہیں۔
پریس کانفرنس کے دوران صحافی نے صدر ٹرمپ سے سوال کیا کہ آپ کرونا کو چائنا وائرس کیوں کہتے ہیں، امریکی صدر نے جواب دیا کہ یہ بیماری چین سے آئی ہے اس لیے۔
خیال رہے کہ امریکا میں کرونا وائرس کے مریضوں کی تعداد 7 ہزار سے تجاوز کر گئی ہے، امریکا کی تمام 50 ریاستوں میں وائرس کے مریض سامنے آ گئے، ہلاکتوں کی تعداد 155 ہو گئی، امریکا، کینیڈا سرحد غیر ضروری سفر کے لیے بند کر دی گئی ہے۔
ادھر پنٹاگون کے 89 ملازمین میں کرونا وائرس کی تشخیص ہو گئی ہے، پنٹاگون نے 50 لاکھ ماسک فراہم کرنے کا اعلان کر دیا، وزیر دفاع مارک ایسپر کا کہنا تھا کہ پنٹاگون نے اسپتالوں کے لیے اضافی 2 ہزار وینٹی لیٹرز تیار کر لیے، اسپتالوں کی مدد کے لیے 2 میڈیکل جہاز بھی تیار کر لیے گئے ہیں۔
کورونا وائرس سے متاثرہ ممالک میں جہاں ہر قسم کے ہنگامے اور رونقیں ماند پڑ گئی ہیں، وہیں خوف اور افراتفری کا ماحول ہے۔ ہر شخص اس وبا کی وجہ سے خدشات اور اندیشوں کا شکار نظر آتا ہے۔
مختلف ممالک میں تقاریب اور اجتماعات پر پابندی کے علاوہ چھوٹے بڑے بازار اور تجارتی مراکز کی بندش کا فیصلہ کیا گیا تو گویا شہری مزید پریشان ہو گئے۔ لوگوں نے اشیائے خور و نوش کے ساتھ دیگر ضروری سامان ذخیرہ کرنے کے لیے بازاروں کا رُخ کیا اور………
افراتفری، خدشات اور اندیشوں میں گھری ہوئی "خریداری” کی یہ تصاویر دیکھیے۔
حکومت اور انتظامیہ کا کہنا ہے کہ شہری طبی ماہرین کی ہدایات پر عمل کریں، بیمار ہونے کی صورت میں صرف مستند اور ماہر معالج سے رجوع کریں اور کورونا سے متعلق جعلی اور من گھڑت خبروں یا باتوں پر دھیان نہ دیں۔
سان فرانسسکو: پیغام رسانی کی سب سے بڑی موبائل ایپ لیکیشن واٹس ایپ نے کرونا وائرس سے متعلق پھیلنے والی بے بنیاد معلومات کی حوصلہ شکنی کرنے کے لیے اہم اعلان کردیا۔
واٹس ایپ صارفین کی جانب سے کرونا وائرس کے حوالے سے ایک دوسرے کو غیر تصدیق شدہ معلومات اور احتیاطی تدابیر بذریعہ میسج ارسال کی جارہی تھیں جس کی وجہ سے پیغام موصول کرنے والا شخص بیشتر اوقات پریشان بھی ہوجاتا تھا۔
ٹیکنالوجی پر نظر رکھنے والے ماہرین کے مطابق واٹس ایپ پر چالیس فیصد سے زائد صارفین ایک دوسرے کو غیر تصدیق شدہ پیغامات ارسال کررہے تھے، جن میں مریضوں کی تعداد میں اضافہ، ہلاکتیں، لاک ڈاؤن اور کرونا کی علامات و احتیاطی تدابیر کے حوالے سے آگاہ کیا جارہا تھا۔
فیس بک، انسٹاگرام کے بعد اب واٹس ایپ نے بھی اپنے پلیٹ فارم پر جعلی پیغامات ارسال کرنے والوں کی حوصلی شکنی کے لیے اہم اقدامات کرنے کا اعلان کردیا۔ کمپنی نے اعلان کیا ہے کہ عالمی ادارہ صحت (ڈبلیو ایچ او)، یونیسیف، یو این ڈی پی کے اشتراک سے واٹس ایپ کرونا وائرس سے متعلق معلومات فراہم کرنے کا مرکز بن گیا جہاں صارفین کو مستند معلومات فراہم کی جائیں گی۔
اس ضمن میں واٹس ایپ نے ایک پورٹل متعارف کرایا جہاں صارفین کو کرونا وبا سے متعلق ہر قسم کی معلومات فراہم کی جائیں گی اور یہی معلومات صارف کو فیس بک ، انسٹاگرام پر بھی دستیاب ہوں گی۔
واٹس ایپ، ویب سائٹ
علاوہ ازیں واٹس ایپ نے جعلی معلومات اور بے بنیاد خبروں کو روکنے کے لیے انٹرنیشنل فیکٹ چیکنگ نیٹ ورک کے ماہرین کی خدمات حاصل کی ہیں، اس مقصد کے لیے واٹس ایپ نے دس لاکھ ڈالر کی رقم مختص کرنے کا اعلان کیا۔
کمپنی کی جانب سے جاری ہونے والے اعلامیے میں کہا گیا ہے کہ ’ہم اس بات سے بخوبی واقف ہیں کہ ہمارے صارفین کرونا بحران کے حوالے سے پریشان ہیں اور وہ اپنے دوستوں، بہن بھائیوں کی وقتاً فوقتاً خیریت جاننا چاہتے ہیں، ڈاکٹر، مریض، طالب علم اور استاد ایک دوسرے سے رابطے رکھنے کے لیے واٹس ایپ استعمال کررہے ہیں‘۔
’ہم چاہتے ہیں کہ آسان اور سادہ طریقے سے صارفین کو مستند معلومات فراہم کریں، اس حوالے سے کمپنی نے اقدامات شروع کردیے تاکہ پلیٹ فارم کو افواہوں اور غیر تصدیق شدہ خبروں سے محفوظ رکھا جاسکے، واٹس ایپ جعلی پیغامات کی نہ صرف حوصلہ شکنی کرے گا بلکہ ہم ان کی تصدیق کے لیے بین الاقوامی اداروں سے رابطے بھی کریں گے تاکہ درست معلومات کی فراہمی کو یقینی بنایا جاسکے‘۔
واٹس ایپ معلوماتی مرکز کی سہولت کو کیسے استعمال کیا جاسکتا ہے؟
کرونا وائرس کے حوالے سے واٹس ایپ کی جانب سے بنائے جانے والے معلوماتی پورٹل کو صارف whatsapp.com/coronavirus پر جا کر استعمال کرسکتا ہے جہاں اُن کو مکمل رہنمائی فراہم کی جائے گی۔
جوہانسبرگ: دورہ بھارت منسوخ کر کے وطن لوٹنے والی جنوبی افریقی ٹیم کے کھلاڑیوں کو 14 روز کے لیے سیلف آئیسولیشن میں رکھنے کی ہدایت کردی گئی۔
دنیا بھر میں تیزی سے پھیلنے والے ہلاکت خیز کورونا وائرس سے باعث جنوبی افریقی ٹیم دورہ بھارت منسوخ کر کے وطن لوٹ رہی ہے، جنوبی افریقا کرکٹ بورڈ کے میڈیکل آفیسر شعیب مانجرا نے تمام کھلاڑیوں کو کورونا وائرس کے ممکنہ خطرات سے محفوظ رکھنے کے لیے سیلف آئیسولیشن میں رہنے کی تجویز دی تھی۔
میڈیکل آفیسر کا کہنا ہے کہ ہم نے کھلاڑیوں کو مشورہ دیا ہے کہ وطن واپسی پر کم از کم 14 روز خود کو آئیسولیٹ کر لیں اور سماجی میل جول کم کریں تاکہ مہلک وبا سے محفوظ رہا جائے۔
ان کا کہنا ہے کہ سیلف آئیسولیشن کے دوران کسی کھلاڑی میں کورونا کی علامات یا تشویش کے دیگر عوامل سامنے آئے تو ان کی فوری طور پر تحقیقات کی جائیں گی اور دستیاب سہولیات کے مطابق انہیں ٹریٹ کیا جائے گا۔
جنوبی افریقی ٹیم نے 12 سے 18 مارچ کے دوران بھارت کے خلاف 3 ون ڈے میچز کھیلنے تھے، دھرمشالا میں پہلے ون ڈے میچ کے بعد بھارتی بورڈ نے کورونا وائرس کے خطرات کے باعث سیریز منسوخ کرنے کا فیصلہ کیا تھا۔
جنوبی افریقا میں کورونا وائرس کی وجہ سے تمام تر کرکٹ کی سرگرمیاں 2 ماہ کے لیے منسوخ کردی گئی ہیں اور کھلاڑیوں کو مہلک وبا سے بچنے کے لیے خصوصی ہدایات دی گئی ہیں۔
کراچی: ترجمان سندھ حکومت مرتضیٰ وہاب نے کہا ہے کہ سندھ بھر میں 181 لوگ کرونا وائرس کا شکار ہیں، تفتان سے آئے لوگوں میں تقریباً 50 فی صد کے ٹیسٹ مثبت آئے ہیں۔
آج کراچی میں پریس کانفرنس کرتے ہوئے سندھ حکومت کے ترجمان نے کہا کہ اب تک 290 ٹیسٹس کا نتیجہ آ چکا ہے، 147 افراد میں کرونا وائرس کی تشخیص نہیں ہوئی، جب کہ 143 افراد کا ٹیسٹ مثبت آیا، 290 افراد تفتان سے سکھر کے قرنطینہ سینٹر لائے گئے تھے۔
انھوں نے بتایا کہ کرونا وائرس میں مبتلا کراچی میں 36 لوگوں کو قرنطینہ میں رکھا گیا ہے، یہ تعداد 38 تھی تاہم 2 مریض صحت یاب ہو کر گھر جا چکے ہیں، مجموعی طور پر سندھ بھر میں 181 لوگ کرونا وائرس کا شکار ہیں۔
مرتضیٰ وہاب نے بتایا کہ سندھ بھر میں اب تک 3 اسپتالوں میں 844 لوگوں کے ٹیسٹ کیے جا چکے ہیں، آغا خان میں 506، اوجھا کیمپس میں 61، انڈس اسپتال میں 277 ٹیسٹ ہوئے۔ وفاق نے آغا خان اور اوجھا کیمپس کو صرف 100 ، 100 کٹس دیں۔ سندھ حکومت نے 10 ہزار ٹیسٹس کرنے کی سہولت امپورٹ کی ہے، وفاق سے ہمیں ابھی تک صرف 200 کٹس موصول ہوئی ہیں۔
انھوں نے عوام سے اپیل کی کہ اجتماعی بھلائی کے لیے سندھ حکومت کے ریسٹورنٹس اور شاپنگ مالز بندش اور دیگر فیصلوں پر ساتھ دیا جائے، سب سے آسان طریقہ یہ ہے کہ ہم خود کو 14 دن کے لیے قرنطینہ کر لیں۔ بندش کے فیصلے کا اطلاق دواؤں، پرچون، کریانوں، گروسری کی دکانوں پر نہیں ہوگا، سندھ حکومت کے فیصلے پر ابھی تک 100 فی صد عمل درآمد نہیں ہوا، دکانوں کو بند کرنے کے لیے کمشنر کراچی، پولیس حکام کو واضح احکامات ہیں، سخت اقدامات اٹھانے پر مجبور کیا گیا تو سخت اقدامات کریں گے۔
ترجمان کا کہنا تھا کہ سندھ حکومت کی جانب سے کرونا وائرس پر فنڈ قائم کر رہے ہیں، جس میں سندھ حکومت 3 ارب روپے دے رہی ہے، پیپلز پارٹی کے اراکین اسمبلی نے ایک ماہ کی پوری تنخواہ فنڈ کے حوالے کی ہے، نیک لوگوں نے سندھ حکومت سے رجوع کیا اور مدد کی پیش کش کی، فنڈز کے استعمال کے لیے 5 رکنی کمیٹی تشکیل دی گئی ہے، جس کی سربراہی چیف سیکریٹری سندھ کریں گے، دوسرے رکن سیکریٹری خزانہ ہوں گے، کمیٹی میں پرائیوٹ سیکٹر کے بھی 3 نمایندے شامل ہوں گے۔
کراچی: آج سے سندھ بھر کے اسپتالوں میں او پی ڈی سروس میں کام نہیں ہوگا، سندھ کے تمام سرکاری اسپتالوں میں کورنٹین یونٹس اور ایمرجنسی میں ڈیوٹی دی جائے گی۔
اے آر وائی نیوز کے مطابق وزیر اعلیٰ سندھ کے احکامات پر عمل درآمد شروع ہو گیا، آج سے سندھ کے تمام سرکاری اسپتالوں میں معمول کی او پی ڈی کو پندرہ دن کے لیے معطل کر دیا گیا ہے، شہر کراچی میں قائم سندھ حکومت کے 6 اسپتالوں میں او پی ڈی بند کر دی گئی ہے، شہر کے بیش تر نجی اسپتالوں میں بھی او پی ڈی سروس معطل ہے، تمام سرکاری اسپتالوں میں ایمر جنسی سروس جاری ہے۔
جناح، سول، قومی ادارہ صحت اطفال اور قومی ادارہ امراض قلب میں بھی سروس بند ہے، یہ اقدام کرونا وائرس کے ممکنہ پھیلاؤ کو روکنے کے پیش نظر اٹھایا گیا ہے۔ گزشتہ روز ینگ ڈاکٹرز کا کہنا تھا کہ او پی ڈی آنے والے ہزاروں مریض ہائی رسک پر ہیں۔
اس سلسلے میں ینگ ڈاکٹرز کے رہنماؤں نے تمام سرکاری اسپتالوں کی انتظامیہ اور سندھ بھر میں اپنے تنظیمی یونٹس کو صورت حال سے آگاہ کر کے کہا کہ کرونا صورت حال کے پیش سندھ حکومت کے ساتھ مکمل تعاون کیا جائے گا، یہ ایک عالمی چیلنج ہے اور اس کا سامنا سب مل کر کریں گے، شہریوں سے اپیل ہے کہ پر سکون رہیں، معمولی نزلہ زکام اور کھانسی میں مبتلا افراد گھروں میں رہنے کو ترجیج دیں، تازہ پھل اور سوپ کا استعمال زیادہ کریں۔
چیئرمین ینگ ڈاکٹرز ایسو سی ایشن ڈاکٹر عمر سطان کا کہنا تھا کہ شہری طبعیت زیادہ خراب ہونے کی صورت میں کسی بھی سرکاری اسپتال کے کورنٹین سینٹر میں فوری رپورٹ کریں۔
خیال رہے کہ شہر قائد میں آج (بدھ) سے ریسٹور نٹ، شاپنگ مالز، سینٹرز، مار کیٹیں، الیکٹرانکس مارکیٹس، آٹو پارٹس، کپڑے کی دکانیں، اور فرنیچر مارکیٹس 15 دن کے لیے بند ہوں گی، اس سلسلے میں کمشنر کراچی کی جانب سے نوٹیفکیشن بھی جاری کر دیا گیا ہے۔
کراچی: عالمی ریٹنگ ایجنسی موڈیز نے پاکستان سمیت ایشیائی ممالک کی معاشی شرح نمو میں کمی کی پیش گوئی کی ہے۔
تفصیلات کے مطابق دنیا بھر میں کرونا وائرس کے تباہ کن پھیلاؤ کے باعث معاشی سرگرمیاں ماند پڑ چکی ہیں، عالمی ریٹنگ ایجنسی موڈیز نے اپنی تازہ پیش گوئی میں کہا ہے کہ پاکستان کی معاشی شرح نمو 2 اعشاریہ 5 فی صد رہے گی۔ دسمبر میں موڈیز نے پاکستان کی معاشی شرح نمو 2.9 فی صد رہنے کی پیش گوئی کی تھی۔
موڈیز نے چین، جاپان، ملائیشیا، ویتنام کی معاشی شرح نمو میں بھی کمی کی پیش گوئی کی ہے، فلپائن، ہانگ کانگ، سنگاپور، نیوزی لینڈ کی معاشی شرح نمو میں بھی کمی ہوگی۔ موڈیز کے مطابق کمی کی وجہ طلب میں کمی، کراس بارڈر ٹریڈ اور سپلائی چین میں تعطل ہے۔
موڈیز کا کہنا ہے کہ برآمدات میں کمی بھی معاشی شرح نمو میں کمی کی بنیادی وجہ ہے، خام تیل کی قیمت میں کمی آئل برآمد کرنے والے ممالک کے لیے مشکلات کا باعث بنے گا۔ موڈیز نے جاپان کی معاشی شرح نمو صفر رہنے کی بھی پیش گوئی کر دی ہے، مجموعی طور پر ایشیا کی معاشی شرح نمو 2.8 فی صد رہے گی۔
خیال رہے کہ دسمبر میں موڈیز نے پاکستان کی کریڈٹ ریٹنگ بہتر کرتے ہوئے آؤٹ لک کو منفی سے مستحکم کر دیا تھا، موڈیز نے پاکستان کی ریٹنگ بی 3 پر برقرار رکھی تاہم پہلے آؤٹ لک منفی تھا۔
