لاہور : پنجاب میں کورونا کیسز میں اضافے کے پیش نظر ویکسینیشن اہداف حاصل کے لیے حکمت عملی مزید سخت کرنے کا فیصلہ کرلیا گیا۔
تفصیلات کے مطابق پنجاب میں کرونا وائرس کے کیسز کی تعداد میں مسلسل اضافے کے پیش نظر سیکرٹری صحت پنجاب عمران سکندر بلوچ نے نئے احکامات جاری کر دئیے۔
اس سلسلے میں سیکرٹری صحت پنجاب نے ویکسینیشن کے مقرر کردہ اہداف حاصل کرنے کے لئے حکمت عملی مزید سخت کرنے کا فیصلہ کرتے ہوئے کہا ہے کہ 28 ستمبر کو خصوصی طور پر شادی ہالز اور مارکیز کی خصوصی چیکنگ عمل میں لائی جائے گی۔
عمران سکندر بلوچ کا کہنا تھا کہ شادی ہال انتظامیہ اپنے طور پر مندرجہ ذیل انتظامات کی پابند ہوگی، داخلی راستوں اور نمایاں جگہوں پر ویکسی عوامی آگاہی کے لیے معلومات آویزاں کرے گی اور نمایاں جگہوں پر ہال کے اندر سٹینڈی فلیکس پر معلومات فراہم کرے گی۔
سیکرٹری صحت پنجاب نے مزید کہا کہ کسی بھی نان ویکسی نیٹڈ شخص کے داخلے پر مکمل پابندی ہو گی، تمام عملہ ویکسی نیٹڈ ہونے کا بیج لگائیں گے جبکہ داخلی راستوں پر معقول آئی ٹی نظام کی مدد سے آنے والے مہمانوں کاویکسی نیشن سٹیٹس 1166 کے ذریعے چیک کیا جائے گا۔
ان کا کہنا تھا کہ ویکسی نیشن کارڈ کا QR کوڈ سکین کر کے چیک کیا جائے گا ، جس کے بعد ویکسی نیشن سرٹیفیکیٹ کا نمبر nims.nadra.gov.pk پر بھیج کر تصدیق کیا جائے گی۔
سیکرٹری صحت پنجاب کے مطابق ویکسینیشن اہداف حاصل کرنے کے لئے تمام محکموں اور سیکٹرز کو مختلف تاریخیں تفویض کی گئی ہیں ، ہال میں ویکسی نیشن کی آگاہی سے متعلق پیغامات چلائے جائیں گے، ہال کے باہر اور دعوت نامہ پر صرف ویکسی نیٹڈ مہمانوں کو ہی آنے کی تلقین کی جائے گی۔
عمران سکندر بلوچ نے کہا کہ ضلعی انتظامیہ کو دکھانے کے لیے تمام مہمانوں کی ویکسی نیشن کا ڈیٹا محفوظ کیا جائے گا اور تمام سیکٹرز اپنی تفویض کردہ تاریخوں کے مطابق مکمل ویکسینیشن یقینی بنائیں
ان کا مزید کہنا تھا کہ مقرر کردہ آخری تاریخ کے بعد تمام سیکٹرز میں بغیر ویکسینیشن کسی فرد کو کوئی سہولت نہیں دی جائے گی، محکمہ تعلیم سے منسلک افراد( اساتذہ، انتظامیہ اور ٹرانسپورٹ سٹاف) 30 ستمبر تک مکمل ویکسینشن یقینی بنائیں گے۔
سیکرٹری صحت پنجاب نے کہا کہ کاروباری مراکز میں داخلے اور ہوٹلز اور ریسٹ ہاوسز میں بوکنگ ، انڈور ڈائننگ، شادیوں اور ریسٹورنٹس کے لیے 30 ستمبر تک مکمل ویکسی نیشن لازم ہے جبکہ تمام نجی اور سرکاری دفاتر میں کام کرنے والے افراد کے لئے 15 اکتوبر تک ویکسینیشن کروانا لازم ہو گا۔
عمران سکندر بلوچ کے مطابق ٹرین اور موٹروے پر سفر کے لئے 15 اکتوبر تک مکمل ویکسینیشن لگوانے کی شرط عائد کی گئی ہے اور قومی شاہراہوں پر پبلک ٹرانسپورٹ، ( بین الصوبائی، شہروں کے اندر اور مابین چلنے والی گاڑیوں) میٹرو، بی آرٹی ، اورینج ٹرین میں سفر کے لئے 31 اکتوبر تک مکمل ویکسین لگوانا لازم ہوگا۔
انھوں نے بتایا کہ ہر قسم کی پبلک ٹرانسپورٹ میں اور ٹرمینلز پر کام کرنے والے افراد کے لئے 15 اکتوبر تک مکمل ویکسینیشن لگوانا لازم ہو گا جبکہ 18 سال سے زائد عمر کے افراد کے لئے15 نومبرتک ویکسینیشن مکمل کروانے کی شرط عائد کی گئی ہے۔
سیکرٹری صحت پنجاب کے مطابق بیرون اور اندرون ملک سفر کرنے والے افراد اورہوٹلز ،ریسٹورنٹس اور شادی ہالز میں داخلے کے لئے 30 ستمبرتک کی تاریخ مقرر کی گئی ہے ، بیرون ملک سےآنے والے تمام افراد جو 30 ستمبر سے پہلے آئے ہوں، 31 اکتوبر تک ویکسین مکمل کروائیں۔ سیکرٹری عمران سکندر بلوچ
ٹریفک ، موٹروے، ہائی وے پولیس اور ضلعی انتظامیہ ان قوانین پر عملدرآمد اور چیکنگ کی ذمہ دار ہو گی اور مقررہ تاریخ کے بعد ویکسینیشن کے بغیر کسی بھی سیکٹر میں کوئی سہولت فراہم نہیں کی جائے گی۔
