Tag: کووڈ 19

گزشتہ دنوں ایک غلط خبر اور فرانس کے نوبل انعام یافتہ سائنس داں کے کرونا ویکسین سے متعلق دعوؤں نے دنیا بھر میں خاص طور پر اُن لوگوں کو خوف زدہ کردیا جو ویکسینیشن کروا چکے ہیں۔

فرانسیسی سائنس داں لک مونٹاگنیئر (Luc Montagnier) سے منسوب کردہ من گھڑت خبر میں سب سے پریشان کُن اور افراتفری پھیلانے والی بات ویکسین لگوانے کے دو سال کے اندر موت واقع ہوجانے کی تھی۔ انھوں نے کہا کہ کرونا ویکسین اس وائرس کے پھیلاؤ کا سبب بن رہی ہے۔

دنیا بھر میں سائنس دانوں نے اس من گھڑت خبر کو مسترد کرتے ہوئے کہا ہے کہ مونٹاگنیئر کی مختصر دورانیے کی ویڈیو میں بیان کردہ مفروضے درست نہیں ہیں۔ یہ بات کہ ویکسین لگوانے والے دو سال کے اندر موت کا شکار ہوسکتے ہیں، ان سے غلط منسوب کی گئی ہے اور مکمل طور پر غلط ہے، لیکن ان کے بیان کردہ چند مفروضوں کی وضاحت ضروری ہے جو ویکسین اور ویکیسینشن کے حوالے سے غلط فہمی پھیلانے کا سبب بن رہے ہیں۔

یہ جان لیں‌ کہ سائنس کی دنیا میں کوئی بھی مفروضہ یا تحقیق اسی صورت لائقِ توجہ اور اہمیت کی حامل ہوتی ہے جب وہ بنیادی اصولوں اور قاعدے کے مطابق ہوں۔ ایسے دعوؤں کی پرکھ اور انھیں لائقِ توجّہ ثابت کرنے کے لیے ٹھوس حقائق پیش کرنا جب کہ کسی مفروضے پر بحث چھیڑنے کے لیے سائنسی بنیادوں پر دلیل اور اس کا جواز فراہم کرنا پڑتا ہے۔

کرونا وائرس کے خلاف تجربہ گاہوں میں‌ متحرک اور فعال سائنس دانوں اور ماہرین کے مطابق مذکورہ بحث قیاس آرائیوں پر مبنی اور انٹرویو سے متعلق عوامی سطح پر پھیلنے والی غلط فہمیوں کا نتیجہ ہے۔

ماہرین کے مطابق سب کو یہ جان لینا چاہیے کہ مونٹاگنیئر نے ہرگز نہیں کہا کہ ویکسین لگوانے والے دو سال کے اندر موت کے منہ میں چلے جائیں گے۔ یہ اُن سے منسوب کردہ جھوٹی بات ہے۔

اس انٹرویو کی بنیاد پر دوسری بڑی غلط فہمی یہ پیدا کی گئی کہ مارچ سے مئی کے دوران حفاظتی ٹیکہ لگوانے کے باوجود امریکا میں 70 ہزار افراد موت کے منہ میں‌ چلے گئے جب کہ ویکسینیشن سے پہلے تین مہینوں کے دوران 25000 اموات ہوئی‌ تھیں اور یہ تعداد وبا کی شدّت کے باوجود بہت کم ہے۔ یہ اعداد و شمار یکسر غلط اور جھوٹ پر مبنی ہیں۔

ماہرین کے مطابق ویکسینیشن سے پہلے برطانیہ، امریکا، جنوبی افریقا، برازیل اور بھارت جیسے ممالک میں کووڈ 19 کا وائرس اپنی شکل تبدیل کرتے ہوئے تیزی سے پھیل رہا تھا، لیکن انہی ممالک میں ویکسین لگانے کے کرونا کے کیسز میں بڑی حد تک کمی دیکھی گئی۔ اسی طرح انسانی جسم پر وائرس کے مختلف شکلوں میں حملہ آور ہونے میں بھی حفاظتی ویکسین رکاوٹ بنی ہے۔

فرانسیسی سائنس داں کا یہ دعویٰ سامنے آیا کہ ویکسین اس وائرس کے پھیلاؤ کا سبب بن سکتی ہے، جسے ماہرین نے بے بنیاد اور مکمل طور پر غلط قرار دیا ہے۔

سائنس دانوں اور طبّی ماہرین کا کہنا ہے کہ وائرس کے پھیلاؤ اور اموات سے متعلق حقائق اور تازہ اعداد و شمار کو دیکھا جائے تو یہ بات سمجھنا مشکل نہیں کہ صورتِ حال بہتر ہو رہی ہے اور دنیا کو اس وبا سے محفوظ رکھنے کا واحد اور مؤثر ذریعہ اس کی ویکسین ہے۔

پاکستان میں کرونا وائرس کی مفت ویکسینیشن کا عمل جاری ہے اور لوگوں کو چاہیے کہ وہ افواہوں پر کان نہ دھریں۔ ویکسین لگوائیں اور اس وبائی مرض سے محفوظ رہیں۔

پاکستان میں مرحلہ وار کووڈ 19 کی ویکسینیشن جاری ہے۔ ملک بھر میں اضلاع اور تحصیل کی سطح پر مراکز قائم کیے گئے ہیں جہاں مفت ویکسین لگائی جا رہی ہے، لیکن ویکسینیشن سے متعلق لوگ خدشات کا شکار بھی ہیں۔

ملک کے چھوٹے بڑے شہروں میں ہر عمر اور طبقے سے تعلق رکھنے والے، ناخواندہ اور تعلیم یافتہ افراد بھی ویکسینیشن کے حوالے سے ہچکچاہٹ کا مظاہرہ کررہے ہیں جس کا سبب ویکسین اور ویکسینیشن سے متعلق بعض افواہیں اور سوشل میڈیا کے ذریعے پھیلنے والی غیرمصدقہ خبریں اور غیر مستند معلومات ہیں۔ تاہم متعلقہ سائنس داں اور ماہرین ویکسینیشن کو مؤثر اور محفوظ عمل قرار دیتے ہیں۔

یہاں ہم آپ کو ویکسینیشن کے بارے میں بنیادی اور ضروری معلومات فراہم کررہے ہیں۔

پاکستان میں ویکسینیشن کا نظام اور طریقہ کار کیا ہے؟

کرونا کا پھیلاؤ روکنے اور ہر فرد کو اس سے محفوظ رکھنے کے لیے مفت ویکسین لگانے کا سلسلہ جاری ہے۔

کرونا ویکسین کی رجسٹریشن اور اس کے انتظام کی نگرانی نیشنل کمانڈ اینڈ آپریشن سینٹر (این سی او سی) کررہا ہے اور اس کے لیے ایک باقاعدہ نظام وضع کیا گیا ہے۔ ویکسینیشن کے لیے رجسٹریشن اسی نظام کے تحت ایک طریقۂ کار کے مطابق کی جارہی ہے۔

یاد رکھیے!

امراض کی ادویّہ اور ویکسین کی تیّاری کے بعد اس بات کو یقینی بنایا جاتا ہے کہ یہ مرض کے خلاف مؤثر اور انسانی جسم کے لیے محفوظ بھی ہوں۔ اس کے لیے ماہرین لیبارٹری کی سطح پر تجربات کرتے ہیں اور سب سے پہلے جانوروں یا انسانی خلیوں پر کسی بھی دوا کا اثر دیکھا جاتا ہے۔ اس کے مؤثر اور مثبت نتائج سامنے آنے کے بعد ہی کوئی دوا انسانوں پر استعمال کرنے کی اجازت دی جاتی ہے۔

کووڈ 19 کی ویکسین لگوانا کیوں‌ ضروری ہے؟

یہ ایک وبائی مرض ہے جو پاکستان میں تیزی سے پھیل رہا ہے۔ کرونا وائرس کے پھیلاؤ کو روکنے کے لیے جہاں احتیاطی تدابیر پر عمل کرنا ضروری ہے جن میں اجتماعات اور میل جول سے گریز، ماسک کا استعمال شامل ہے، وہیں ویکسین لگانے سے اس وائرس سے محفوظ رہنے کے امکانات کئی گنا بڑھ جاتے ہیں۔

خصوصی مراکز پر ویکسینیشن کا عمل کیسے انجام دیا جارہا ہے؟

کرونا ویکسین سرنج(ٹیکے) کی مدد سے بازو پر لگائی جاتی ہے۔ مستند ڈاکٹر کی نگرانی میں ویکسینیشن سینٹروں پر ماہر طبّی عملہ یہ کام انجام دیتا ہے۔ یہ عمل چند ہفتوں کے وقفے سے دہرایا جاتا ہے۔ ویکسین کی پہلی ڈوز لینے والے کو متعلقہ عملہ یہ بتا دیتا ہے کہ اسے اگلی ڈوز کس تاریخ کو لگوانی ہے۔

ویکسینیشن سے قبل کون سی باتیں متعلقہ عملے کو ضرور بتانا چاہییں؟

آپ کو شدید الرجی ہو یا آپ کسی دوسرے خطرناک مرض میں مبتلا ہوں، جیسے ذیابیطس، گردے یا جگر کی خرابی، یا حال ہی میں‌ کوئی بڑا آپریشن اور سرجری وغیرہ کروائی ہو۔ عورت اگر حاملہ ہو یا کوئی بھی فرد جسے شدید بخار ہو، اس کے علاوہ وہ افراد جو کرونا کا شکار ہوچکے ہیں، ان سب کو چاہیے کہ ویکسین لگوانے سے پہلے اس بارے میں طبّی عملے کو آگاہ کریں۔

کیا ویکسینیشن کے بعد کسی قسم کا طبّی مسئلہ یا کوئی جسمانی تکلیف لاحق ہوسکتی ہے؟

یہ ایک عام بات ہے کہ آپ کو ویکسینیشن کے بعد بازو پر معمولی درد اور اس کی وجہ سے بے چینی کا احساس ہوگا۔ طبّی ماہرین کے مطابق تھکن، سَر یا جسم میں درد کے علاوہ کچھ لوگوں کو بخار بھی ہوسکتا ہے، لیکن یہ کیفیت جلد دور ہوجاتی ہے۔ اگر آپ کو غیرمعمولی تکلیف اور شدید بخار کی شکایت ہو تو فوراً کسی مستند معالج سے رجوع کریں یا کسی بھی قریبی ویکسینیشن سینٹر کو اس سے آگاہ کریں۔