کوٹری: پاکستان پیپلز پارٹی کے چیئرمین بلاول بھٹو کا کہنا ہے کہ ہم ان کی جے آئی ٹی اور جیلوں سے نہیں ڈرتے، ہم مشرف کی جیلوں اور جلا وطنی سے نہیں ڈرے۔ سندھ حکومت واحد حکومت ہے جس نے خدمت کو اپنی ترجیح بنایا۔
تفصیلات کے مطابق پاکستان پیپلز پارٹی کے چیئرمین بلاول بھٹو نے جلسہ عام سے خطاب کرتے ہوئے کہا کہ سندھ حکومت کے 2 منصوبے عوام کی فلاح کے لیے بنے، سندھ حکومت واحد حکومت ہے جس نے خدمت کو اپنی ترجیح بنایا۔
انہوں نے کہا کہ لوگوں کو روزگار دینا ہو یا صوبے کو ترقی دینا ہو، سندھ حکومت آگے ہے۔ حکومت نے جتنے دعوے کیے وہ ہوا میں اڑ گئے، حکومتی نمائندوں کی آنکھوں پر غرور کی پٹی ہے۔
بلاول نے کہا کہ صرف زبان چلانے سے عوام کے زخموں پر مرہم نہیں رکھا جا سکتا، کانٹوں کی جھاڑیوں سے دامن تار تار ہو سکتا ہے لیکن سایہ نہیں بنتا۔
انہوں نے کہا کہ ہم ان کی جے آئی ٹی اور جیلوں سے نہیں ڈرتے، ہم مشرف کی جیلوں اور جلا وطنی سے نہیں ڈرے، ’تم زور آزماؤ ہم جگر آزمائیں گے‘۔
خیال رہے کہ گزشتہ روز سندھ کابینہ کے اجلاس کی صدارت کرتے ہوئے بلاول وزرا کی ناقص کارکردگی پر سخت برہم ہوگئے تھے۔ ان کا کہنا تھا کہ مجھے نتائج چاہئیں اس طرح کی بریفنگ پر یقین نہیں رکھتا۔
بلاول بھٹو نے تعلیم، ثقافت، زراعت، ریونیو اور صحت کے محکموں کی کارکردگی پر عدم اعتماد کا اظہار کیا تھا۔ اجلاس کے دوران انہوں نے کاغذات پر مشتمل بریفنگ دینے پر وزرا کی سرزنش کرتے ہوئے کہا تھا کہ کاغذات پر مبنی بریفنگ فرضی ہے۔
انہوں نے کہا تھا کہ یہ شکایات عام ہیں کہ وزرا اپنے دفاتر میں نہیں بیٹھتے اور نہ ہی عوام سے ملتے ہیں، وزرا عوام سے تو دور کی بات ارکان اسمبلی سے بھی نہیں ملتے اور تو اور ارکان اسمبلی کا فون تک اٹینڈ نہیں کرتے، مجھےارکان اسمبلی نے وزرا کے خلاف کئی شکایاتیں کی ہیں۔
