Tag: کوٹ لکھپت جیل

اسلام آباد: سپریم کورٹ نے ڈینئل پرل قتل کیس کے ملزم عمر شیخ کو کوٹ لکھپت جیل منتقل کرنےکی اجازت دیتے علاج کیلئے تمام سہولتیں فراہم کرنے کی ہدایت کردی۔

تفصیلات کے مطابق سپریم کورٹ میں ڈینئل پرل قتل کیس کے ملزمان کی رہائی سے متعلق کیس کی سماعت ہوئی، جسٹس عمر عطا بندیال کی سربراہی میں 3رکنی بینچ نے کیس کی سماعت کی۔

ایڈیشنل اےجی پنجاب نے عدالت کو بتایا کہ ملزم کی جانب سے پنجاب منتقل کرنے کی درخواست کی گئی ، جس پرجسٹس عمر عطا بندیال نے کہا جی او آ ر بھی ہائی سیکورٹی علاقہ ہے ، پنجاب حکومت عدالتی احکامات پر افراد کو سہولتیں فراہم کرے، ان افراد کی رہائی کے بعد لگاتار حراست پرعدالت مطمئن نہیں۔

ایڈیشنل اےجی پنجاب کا کہنا تھا کہ احمد عمر شیخ کو جیل ملازمین کی کالونی میں رکھنے کا فیصلہ کیا ہے، جس پر جسٹس سجاد علی شاہ نے استفسار کیا جیل حدود میں ہی رکھنا ہےتوپھر مہلت کیوں مانگ رہےہیں ؟ بتائیں احمد عمر کو کب پنجاب میں منتقل کریں گے۔

اٹارنی جنرل نے عدالت کو یقین دہانی کرائی کہ ایک ہفتے میں احمد عمر شیخ کومنتقل کر دیں گے ، وکیل احمد عمر شیخ کا کہنا تھا کہ جیل کی حدود تو جیل ہوتی ہے آنا جانا مشکل ہوگا، عادل شیخ بیمار ہے اس کو علاج کی ضرورت ہے۔

سپریم کورٹ نے عمرشیخ کو علاج کیلئے تمام سہولتیں فراہم کرنے کی ہدایت کرتے ہوئے وفاقی ،صوبائی حکومتوں سے عدالتی احکامات پر عملدرآمد رپورٹس چیمبرز میں طلب کرلی۔

سپریم کورٹ نے ملزم عمر شیخ کو کوٹ لکھپت جیل منتقل کرنےکی اجازت دیتے آئندہ سماعت پرچیف سیکریٹری پنجاب کو بھی طلب کرلیا۔

بعد ازاں سپریم کورٹ نے کیس کی مزید سماعت 2ہفتوں کےلئے ملتوی کردی۔

لاہور: احتساب عدالت نے شہباز شریف کو جیل میں بستر فراہم کرنے کی درخواست نمٹا دی، اپوزیشن لیڈر کو بیڈ، ٹیبل اور کرسی فراہم کر دی گئی۔

جیل رپورٹ کے مطابق احتساب عدالت کے حکم پر کوٹ لکھپت جیل میں شہباز شریف کو بیڈ، ٹیبل اور کرسی فراہم کر دی گئی، عدالت نے جیل حکام کی رپورٹ کی روشنی میں درخواست نمٹا دی، درخواست کی سماعت احتساب عدالت کے جج جواد الحسن نے کی۔

دریں اثنا، احتساب عدالت میں شہباز شریف کی جیل میں میڈیکل بورڈ تشکیل دینے کی درخواست پر سماعت ہوئی، عدالت نے اس سلسلے میں نیب سے رپورٹ طلب کر لی۔

احتساب عدالت کے ایڈمن جج جواد الحسن نے نیب پراسیکیوٹر سے استفسار کیا کہ رپورٹ کیوں جمع نہیں ہوئی، نیب پراسیکیوٹر نے عدالت کو بتایا کہ تفتیشی افسر سپریم کورٹ میں مصروف ہیں، آئندہ سماعت پر جواب جمع کروا دیں گے۔

عدالت نے پراسیکیوٹر کی استدعا پر سماعت 13 جنوری تک ملتوی کر دی، فاضل جج نے شہباز شریف کے ایسوسی ایٹ وکیل کو کہا کہ شہباز شریف پیشی پر کمرہ عدالت میں پریس کانفرنس شروع کر دیتے ہیں جس سے عدالتی وقت برباد ہوتا ہے، ہم اس کیس کو بہت باریکی سے دیکھ رہے ہیں۔

فاضل جج کا کہنا تھا کہ امجد پرویز ایڈووکیٹ کو سمجھا دیا ہے کہ اب شہباز شریف یہاں صرف کیس سے متعلق ہی بات کریں کیوں کہ ہر بار پیشی پر دو تین گھنٹے ضایع ہو جاتے ہیں۔

عدالت نے تحفظات کا اظہار کیا کہ کرونا وائرس کا بھی ڈر ہے، ہر پیشی پر کمرہ عدالت کو بھر دیا جاتا ہے، اللہ نہ کرے کسی ایک کو کرونا ہو گیا تو پوری عدالت متاثر ہوگی۔

لاہور: پاکستان مسلم لیگ ن کے گرفتار رہنما حمزہ شہباز جیل میں گھر یا جیل کا کھانا کھائیں گے، اس سلسلے میں احتساب عدالت نے اپنا فرمان جاری کر دیا ہے۔

اے آر وائی نیوز کے مطابق لاہور کی احتساب عدالت نے حمزہ شہباز کی جیل میں گھر کے کھانے کی درخواست پر تحریری حکم جاری کر دیا۔

احتساب عدالت کے ایڈمن جج جواد الحسن نے 2 صفحات پر مشتمل تحریری حکم میں کہا ہے کہ عدالت سپرنٹنڈنٹ جیل کو حمزہ شہباز کو گھر کا کھانا فراہم کرنے کا حکم دیتی ہے۔

احتساب عدالت نے کوٹ لکھپت جیل کے سپرنٹنڈنٹ کو آئندہ سماعت پر حمزہ شہباز کو گھر کا کھانا فراہم نہ کرنے سے متعلق رپورٹ پیش کرنے کا بھی حکم جاری کیا۔

جج نے ریمارکس دیے کہ سپرنٹنڈنٹ کس قانون کے تحت گھر کا کھانا دینے سے منع کرتا ہے، عدالت حمزہ شہباز کو گھر کا کھانا فراہم کرنے کی اجازت دیتی ہے۔

اسپتال منتقلی کی حمزہ شہباز کی درخواست مسترد ہو گئی

یاد رہے کہ گزشتہ ماہ کوٹ لکھپت جیل میں قید کے دوران پنجاب اسمبلی میں قائد حزب اختلاف اور پاکستان مسلم لیگ ن کے رہنما حمزہ شہباز شریف کی طبیعت خراب ہو گئی تھی، انھیں پیٹ میں درد اور قے کی شکایات تھیں، ٹیسٹ کرائے گئے تو حمزہ کا کرونا ٹیسٹ مثبت آ گیا۔

مسلم لیگ ن کی جانب سے حمزہ شہباز کو کرونا ہونے پر اتفاق اسپتال منتقلی کی درخواست دی گئی تھی، تاہم صوبائی محکمہ داخلہ نے اسے مسترد کر دیا تھا۔ واضح رہے کہ حمزہ شہباز کو آمدن سے زائد اثاثہ جات اور منی لانڈرنگ کیس میں جوڈیشل ریمانڈ پر کوٹ لکھپت جیل میں رکھا گیا ہے۔