لاہور: سابق وزیراعظم نواز شریف کی صاحبزادی مریم نواز کی کوٹ لکھپت منتقلی پر خواتین بیرک کو چمکا دیا گیا، خواتین بیرک میں نئے پردے لگائے گئے ، محکمہ داخلہ پنجاب کی اجازت کے بعد مریم نواز کو بی کلاس دی جائے گی۔
تفصیلات کے مطابق جیل انتظامیہ کی جانب سے سابق وزیراعظم نواز شریف کی صاحبزادی مریم نواز کی کوٹ لکھپت منتقلی پر خواتین بیرک کی صفائی کے خصوصی انتظامات کئے گئے۔
ذرائع کا کہنا ہے کہ مریم نواز کی منتقلی سے پہلے خوشبودار ڈینگی اسپرے کرایا گیا اور خواتین بیرک میں نئے پردے لگائے گئے جبکہ بستر بھی رکھا گیا۔
ذرائع کے مطابق مریم نواز کا ایڈمن بلاک میں ابتدائی طبی معائنہ پھر جیل اندراج کیا گیا، محکمہ داخلہ پنجاب کی اجازت کے بعد مریم نواز کو بی کلاس دی جائے گی۔
مزید پڑھیں : احتساب عدالت نے مریم نواز کا جوڈیشل ریمانڈ دے دیا
یاد رہے احتساب عدالت نے چوہدری شوگرملزمنی لانڈرنگ کیس میں نیب کی مزید ریمانڈ کی استدعا مسترد کرتے ہوئے مریم نواز کو جوڈیشل ریمانڈ پرجیل بھجوادیا تھا۔
جس پرانھیں کیمپ جیل منتقل کیا گیا وہاں خواتین بیرک نہ ہونے پر حکام مریم نواز کو کوٹ لکھپت جیل لے گئے، جہاں نواز شریف اور حمزہ شہباز بھی قید ہیں۔
واضح رہے 8 اگست کو نیب نے چوہدری شوگرملز منی لانڈرنگ کیس میں مریم نوا ز کو تفتیش کے لئے بلایا گیا تھا لیکن وہ نیب دفترمیں پیش ہونے کے بجائے والد سے ملنے کوٹ لکھپت جیل چلی گئیں، مریم نواز ملاقات کر کےنکلیں تو نیب ٹیم نے انھیں گرفتار کرلیا تھا جبکہ نواز شریف کے بھتیجے یوسف عباس کو بھی گرفتار کیاتھا۔