Tag: کویت

  • کویت: صحرا سے اٹھتے گاڑھے سیاہ دھوئیں کی ویڈیو نے لوگوں کو پریشان کردیا

    کویت: صحرا سے اٹھتے گاڑھے سیاہ دھوئیں کی ویڈیو نے لوگوں کو پریشان کردیا

    کویت سٹی: کویت میں پرانے ٹائروں کے گودام سے اٹھتے سیاہ دھوئیں نے سوشل میڈیا پر بحث چھیڑ دی، لوگوں کا کہنا تھا کہ کلائمٹ چینج اور بڑھتی آلودگی کی وجہ سے ماحول دوست اقدامات کی ضرورت ہے، لیکن یہاں ماحول کو مزید نقصان پہنچایا جارہا پے۔

    کویت میں پرانے ٹائروں کے قبرستان کی ایک ویڈیو وائرل ہورہی ہے جس میں گاڑھا سیاہ دھواں اٹھتا دکھائی دے رہا ہے، ویڈیو میں تاحد نگاہ ٹائر ہی ٹائر موجود ہیں جبکہ ایک مقام سے سیاہ دھواں اٹھ رہا ہے۔

    دھوئیں سے ظاہر ہورہا ہے جیسے ٹائروں کو جلا کر تلف کیا جارہا ہے۔

    سوشل میڈیا پر وائرل ہونے کے بعد اس ویڈیو کو سخت تنقید کا نشانہ بنایا جارہا ہے، صارفین کا کہنا ہے کہ زمین کو کلائمٹ چینج اور بڑھتی آلودگی کے چیلنجز کا سامنا ہے اور ایسے میں ٹائروں کو جلانا ان چیلنجز کو مزید بڑھا رہا ہے۔

    کویت میں یہ ٹائروں کا نیا گودام ہے جو پرانے مقام سے یہاں منتقل کیا گیا ہے۔

    پرانا گودام اتنا بڑا تھا کہ خلا سے بھی صحرا میں ایک سیاہ دھبے کی صورت میں نظر آتا تھا لیکن گزشتہ برس اسے سعودی سرحد کے قریب ایک نئے مقام پر منتقل کر دیا گیا جہاں ان کو ری سائیکل کیا جانے کا ارادہ تھا۔

    لیکن حال ہی میں سامنے آںے والی ویڈیو سے ظاہر ہورہا ہے کہ حکام کے پاس پرانے ٹائروں کو ری سائیکل کرنے یا محفوظ طریقے سے تلف کرنے کا کوئی منصوبہ نہیں۔

    ایک سوشل میڈیا صارف کا کہنا تھا کہ کم از کم انہیں جلاتے ہوئے فلٹر ہی استعمال کرلیا جائے تاکہ اس سے ہونے والی آلودگی میں کمی ہوسکے۔

  • کویت: عمارت مالکان کے لیے وارننگ

    کویت: عمارت مالکان کے لیے وارننگ

    کویت: کویت میں رہائشی علاقوں کے عمارت مالکان کو وارننگ دی گئی ہے کہ وہ ان میں پارکنگ بحال کریں۔

    کویت میونسپلٹی کے مطابق عمارتوں میں پارکنگ بحال نہ ہونے پر سرٹیفکیٹ جاری نہیں کیا جائے گا، میونسپلٹی نے مالکان کو پابند کیا ہے کہ وہ عمارت کے اصل ڈھانچے کو بحال کریں۔

    روزنامہ الرای کے مطابق کویت میونسپلٹی کی حولی برانچ میں شعبے کے سربراہ ایاد القحطانی نے تصدیق کی کہ کسی بھی عمارت کے لیے تفصیل کا سرٹیفکیٹ جاری نہیں کیا جائے گا، جب تک کہ تہہ خانے (بیسمنٹ) کو لائسنس کے مطابق پارکنگ لاٹ نہ بنایا جائے۔

    انھوں نے کہا عمارت کے مکینوں کو خدمات کی فراہمی کے لیے ایک جگہ یا عمارت کے سامان کے لیے گودام کی اصل ساخت میں بحالی بھی ضروری ہے۔

    سعودی عرب: غیر ملکی کارکنان کی رہائش سے متعلق اہم خبر

    القحطانی نے کہا کہ یہ طریقہ کار سرمایہ کاری کے رہائشی علاقوں میں عمارتوں کے مالکان کو اس بات کا پابند کرے گا کہ وہ اصل ڈھانچے کو بحال کریں اور میونسپلٹی کے متعلقہ محکموں کی طرف سے لائسنس یافتہ تہہ خانوں کو استعمال کریں۔

    دوسری طرف میونسپلٹی کے ڈائریکٹر جنرل انجینئر احمد ال منفوحی نے قانون کی پاسداری نہ کرنے والوں کے خلاف قانونی اقدامات کرنے کی اہمیت پر زور دیا۔

  • کویت میں ٹریفک جام کا معاملہ پارلیمنٹ پہنچ گیا

    کویت میں ٹریفک جام کا معاملہ پارلیمنٹ پہنچ گیا

    کویت سٹی: کویت میں سڑکوں پر ٹریفک جام کا معاملہ پارلیمنٹ پہنچ گیا، ارکان پارلیمنٹ نے مسئلے کا حل نکالنے کے لیے لائحہ عمل بنانے پر زور دیا ہے۔

    کویتی پارلیمانی نمائندوں نے حکومت کے سامنے مطالبات کی ایک فہرست پیش کی ہے جس میں کہا گیا ہے کہ ٹریفک جام کا حل تلاش کیا جائے۔

    رکن پارلیمان ڈاکٹر عبدالکریم الکندری نے سروس بیورو سے مطالبہ کیا کہ وہ تمام وزارتوں، سرکاری اداروں اور نجی شعبے کے ساتھ مل کر کام کے لچکدار اوقات کی منظوری دے، ایسا اقدام شہریوں کو ٹریفک جام سے نجات دلانے کے لیے ضروری ہے جو وقت اور توانائی کو ضائع کرتے ہیں اور نفسیاتی دباؤ کا باعث بنتے ہیں۔

    رکن حمدان العجمی نے فوری طور پر پرانے نظام کی واپسی کا مطالبہ کیا تاکہ پرائمری اسکولوں میں دوپہر 12 بجے، مڈل اور سیکنڈری اسکولوں میں دوپہر 1 بجے چھٹی کی جائے جبکہ ڈاکٹر محمد الحوائلہ نے اعلان کیا کہ وہ کام کے اوقات میں کمی کی تجویز دوبارہ پیش کریں گے، تاکہ شہریوں کو فراہم کی جانے والی خدمات متاثر نہ ہوں اور پارٹ ٹائم سسٹم کا آپشن کھولا جا سکے۔

    نمائندہ ڈاکٹر مبارک التاشا نے وزارت داخلہ، تعلیم اور تعمیرات کے وزرا سے اس مسئلے کا فوری اور مستقل حل تلاش کرنے کے لیے مشترکہ رابطہ کاری پر زور دیا جیسے کہ طلبہ کے اوقات کار کو ایڈجسٹ کرنا، ماس ٹرانزٹ اور سڑکوں پر ٹریفک کے مسائل کو حل کرنا شامل ہے۔

    رکن عبد اللہ فہد نے بھی حکومت سے مطالبہ کیا کہ وہ ایک فوری حل وضع کرے جو ٹریفک بحران کو حل کرنے میں معاون ثابت ہو جیسا کہ اوقات کار کے نظام کو لاگو کرنا اور کچھ اسکولوں کے اوقات کار کو تبدیل کرنا۔

    ذرائع کا کہنا ہے کہ سروس بیورو نے ایک سال سے زیادہ عرصہ قبل ایک سرکلر جاری کیا تھا جس کے تحت سرکاری اداروں میں خاتون ملازمین کو 30 منٹ کی رعایتی مدت دی گئی تھی تاکہ وہ کام کے آغاز سے ایک چوتھائی گھنٹہ لیٹ جبکہ کام کے اختتام سے ایک گھنٹے کا چوتھائی پہلے چھٹی کر جائیں۔

    ذرائع کے مطابق شیڈول کام کے اوقات کی تعداد کو برقرار رکھتے ہوئے شفٹوں کے آغاز اور اختتامی اوقات کا اطلاق کر کے کام کے لچکدار اوقات کو نافذ کرنے کا امکان ہے۔

  • کویت میں موسم سرما کی ویکسینیشن مہم کا اعلان

    کویت میں موسم سرما کی ویکسینیشن مہم کا اعلان

    کویت سٹی: کویت میں موسم سرما کی انفلوئنزا ویکسینیشن مہم کا اعلان کیا گیا ہے۔

    کویتی وزارت صحت کے مطابق کویت میں آج سے تمام گورنریٹس میں 46 مراکز صحت کے ذریعے 2022 اور 2023 کے موسم سرما کی انفلوئنزا ویکسینیشن مہم شروع کر دی گئی ہے۔

    وزارت کے ترجمان ڈاکٹر عبداللہ السند کے مطابق اس مہم میں موسمی انفلوئنزا کی ویکسینیشن اور شدید بیکٹیریل نمونیا (نیموکوکل) کے خلاف ویکسینیشن شامل ہیں۔

    وزارت صحت کا کہنا ہے کہ تمام ویکسینیشن مراکز پر انفلوئنزا ویکسین دستیاب ہے، اس سروس سے فیض یاب ہونے کے لیے وزارت کی ویب سائٹ پر جا کر ایڈوانس بکنگ کر کے رجسٹریشن کرانی ہوگی۔

    متعدی امراض کے کنٹرول کے شعبے کے سربراہ ڈاکٹر حماد بستکی نے کہا کہ موسمی ویکسینیشن انفیکشن کے امکان اور انفیکشن کی صورت میں اس کی پیچیدگیوں کو محدود اور ان پیچیدگیوں کی وجہ سے اسپتال میں داخل ہونے کے امکانات کو کم کرتی ہے۔

    وزارت کے مطابق حاملہ خواتین بھی حمل کے کسی بھی وقت انفلوئنزا ویکسینیشن (نموکوکل ویکسینیشن نہیں) کروا سکتی ہیں۔

    بچوں کو دودھ پلانے والی خواتین سمیت 6 ماہ کی عمر سے لے کر 5 سال کی عمر تک کے بچے بھی یہ ویکسین لگوا سکتے ہیں، اور وہ لوگ بھی جو دیگر دائمی بیماریوں میں مبتلا ہیں۔

  • بیرون ملک پیدا ہونے والے بچے ماؤں کے ساتھ کویت واپس آنے سے قاصر

    بیرون ملک پیدا ہونے والے بچے ماؤں کے ساتھ کویت واپس آنے سے قاصر

    کویت سٹی: کویت میں رہائشی افراد کے حال ہی میں بیرون ملک پیدا ہونے والے بچے کویت آنے سے قاصر ہوگئے جس سے 400 خاندان شدید مشکلات کا شکار ہیں۔

    کویت نیوز کے مطابق درجنوں تارکین وطن کو ایک شدید انسانی مسئلے کا سامنا ہے جس کی بڑی وجہ ان کی اپنے نوزائیدہ بچوں کو کویت لانے میں ناکامی ہے کیونکہ وہ حال ہی میں پیدا ہوئے تھے جب مائیں گرمیوں کی چھٹیوں پر تھیں۔

    ایسا اس لیے ہو رہا ہے کیونکہ وزارت داخلہ نے اگلے نوٹس تک فیملی ڈیپنڈنٹ اور وزٹ ویزوں سمیت ہر قسم کے ویزوں کے اجرا پر پابندی لگانے کا فیصلہ جاری کیا ہے۔

    ان والدین نے ایک مقامی عربی روزنامے کے ساتھ اپنے انٹرویو کے دوران وزارت داخلہ سے درخواست کی ہے کہ وہ نوزائیدہ بچوں کو انسانی ہمدردی کے پہلو کو مدنظر رکھتے ہوئے اپنے فیصلے سے مستثنیٰ قرار دے۔

    تقریباً 400 کے قریب کیسز جن میں زیادہ تر تعداد اسکول ٹیچرز کی ہے اس درخواست کے ساتھ مجاز محکمے کو جمع کروائے گئے ہیں جن میں کہا گیا ہے کہ نومولود بچوں کو اس فیصلے سے خارج کیا جائے۔

    درجنوں تارکین وطن نے وزارت داخلہ سے مطالبہ کیا کہ وہ ایک ایسے انسانی مسئلے کو دیکھیں جو ان کے لیے تشویش کا باعث ہے اور ان کے بیرون ملک پیدا ہونے والے نوزائیدہ بچوں سے متعلق ان کو پریشان کر رہا ہے۔

    ان کا کہنا ہے کہ ان کے مذکورہ بچے ان کے آبائی ممالک میں موسم گرما کی تعطیلات کے دوران پیدا ہوئے ہیں اور یہ کویت میں مجاز حکام کے لیے نئے طریقہ کار کے ساتھ موافق ہے جو اس وقت نافذ العمل ہیں جس کی وجہ سے ایسے ماں یا باپ ملازمت چھوڑنے اور کویت سے باہر نومولود کے ساتھ رہنے پر مجبور ہو رہے ہیں۔

    تارکین وطن کا کہنا ہے کہ وہ اپنی آواز مجاز اتھارٹی تک پہنچانے، اپنے نوزائیدہ بچوں کی ملک میں داخلے کے حوالے سے استثنیٰ حاصل کرنے اور ان کی خاندانی زندگی کو لاحق خطرے کی روشنی میں ان کے حالات کو ہمدردی اور انسانیت کے ساتھ دیکھنے کی خواہش کرتے ہیں۔

  • کویت: پوری دنیا میں سب سے سستا پٹرول

    کویت: پوری دنیا میں سب سے سستا پٹرول

    کویت: ایک رپورٹ میں کہا گیا ہے کہ اس وقت خلیجی ممالک سمیت دنیا بھر میں سب سے سسٹا پٹرول کویت میں مل رہا ہے۔

    تفصیلات کے مطابق کویت ایندھن (پٹرول و ڈیزل) کی فروخت کی قیمت کے لحاظ سے دنیا کے سستے ترین ممالک میں سے ایک ہے، جہاں ایک لیٹر کی اوسط فروخت 95 فلس ہے۔

    سعودی عرب میں یہ شرح 175 ہے، قطر میں 335، متحدہ عرب امارات میں 135، بحرین میں 135 جب کہ امریکا اور برطانیہ میں 700 فلس ہے۔

    کویت میں اس کم قیمت کی وجہ حکومت کی طرف سے تمام صارفین، شہریوں اور غیر ملکیوں کو فراہم کردہ سبسڈی ہے، تاکہ وہ کم قیمت سے فائدہ اٹھا سکیں۔

    اعداد و شمار کے مطابق کویت میں ایندھن (پٹرول و ڈیزل) کی سالانہ قیمت تقریباً 976 ملین دینار ہے، جب کہ فروخت کی قیمت تقریباً 651 ملین ہے، یعنی یہ فرق 300 ملین دینار سے زیادہ ہے۔

    ایندھن کی فروخت سے حاصل ہونے والی آمدنی کے مقابلے کویت اور دیگر ممالک کے درمیان فرق نمایاں طور پر بہت بڑا ہے، اگر کویت سالانہ تقریباً 652 ملین دینار میں ایندھن فروخت کرتا ہے تو سعودی عرب اتنا ہی ایندھن 973 ملین، قطر 1.15 بلین اور بحرین 976 ملین میں فروخت کرتا ہے۔

    متحدہ عرب امارات میں اس کی مالیت تقریباً 2.23 بلین تک پہنچ جاتی ہے جب کہ برطانیہ اور امریکا میں یہ مالیت 3 بلین تک ہے۔

  • کویت: ویزے کی تجارت کرنے والے ایجنٹ پھر سے سرگرم

    کویت: ویزے کی تجارت کرنے والے ایجنٹ پھر سے سرگرم

    کویت سٹی: ویزے کی تجارت کرنے والے ایجنٹ ایک بار پھر کویت میں سرگرم ہو گئے ہیں۔

    تفصیلات کے مطابق کرونا وبا کے بعد حکام کو پریشان کرنے کے لیے ایک بار پھر کویت میں ویزے کی تجارت کرنے والے ایجنٹس متحرک ہو گئے۔

    رپورٹس کے مطابق ویزا ایجنٹس اشتہارات کے ذریعے لوگوں کو راغب کر رہے ہیں، اور اندرون و بیرون ملک ورک پرمٹ ویزے فروخت کرنے کی پیشکش کر رہے ہیں۔

    دوسری طرف کویت کی وزارت داخلہ اور پبلک اتھارٹی برائے افرادی قوت قوانین کی اس خلاف ورزی کے خلاف مسلسل تنبیہ کر رہے ہیں۔

    حکام کی جانب سے ملوث افراد کے خلاف کارروائیاں بھی جاری ہیں، متعدد ویزا ایجنٹس کے کیسز عدالت بھی بھیجے گئے۔

    رپورٹس کے مطابق تمام تر کارروائیوں کے باوجود سوشل میڈیا پر اشتہارات دیے جا رہے ہیں اور واٹس ایپ پر ویزوں کی پیشکش کی جا رہی ہے، جس کی قیمت 1,500 سے 2,300 دینار کے درمیان ہے۔

    واضح رہے کہ کویت میں کاریگروں کی کمی کے باوجود بے ترتیب روزگار کے رجحان کی حوصلہ شکنی کی جا رہی ہے، ذرائع کے مطابق سوشل میڈیا پلیٹ فارمز پر زیادہ تر اشتہارات مصریوں کے لیے ہیں جو کویت کے اندر جعلی اکاؤنٹس کے ذریعے یا مصری واٹس ایپ نمبرز کے ذریعے سامنے آتے ہیں، ان کا شکار ہو کر جو شامی اور سوڈانی کویت آنا چاہتے ہیں ان سے 5000 دینار تک لیے جاتے ہیں۔

  • کویت: 8 ہزار غیر ملکیوں کا ڈرائیونگ لائسنس منسوخ

    کویت: 8 ہزار غیر ملکیوں کا ڈرائیونگ لائسنس منسوخ

    کویت سٹی: کویت میں 8 ہزار غیر ملکیوں کے ڈرائیونگ لائسنس ضبط کر لیے گئے، کویت میں ڈرائیونگ لائسنس حاصل کرنے کے لیے سخت اصول مقرر کیے گئے ہیں۔

    کویت کی جنرل ڈائریکٹوریٹ آف ٹریفک نے انکشاف کیا کہ اس سال کی پہلی ششماہی میں غیر ملکیوں کے 8 ہزار 600 ڈرائیونگ لائسنس واپس لے لیے گئے کیونکہ وہ غیر ملکی انہیں لینے کی شرائط پر پورا نہیں اترتے تھے، اس کے علاوہ کویتی شہریوں کے 50 ڈرائیونگ لائسنس ان کی بصری یا ذہنی معذوری کی وجہ سے بلاک کیے گئے۔

    ڈرائیونگ لائسنس حاصل کرنے کے لیے تنخواہ، پیشہ اور یونیورسٹی کی ڈگری جیسی شرائط کے طور پر ہزاروں ڈرائیونگ لائسنس واپس لے لیے گئے لیکن ملازمت کا عنوان تبدیل کرنے اور تنخواہ کم کرنے کے بعد لائسنس خود بخود واپس لے لیے گئے۔

    ذرائع کا کہنا ہے کہ وزارت داخلہ نے ڈرائیونگ لائسنس کے اجرا کو مزید سخت کرنے اور کویت ڈرائیونگ لائسنس کے حصول کے لیے تمام شرائط پوری کرنے والوں کو محدود کرنے کی ہدایت کی ہے۔

    وزارتوں کے درمیان نظام کو آپس میں جوڑنے اور ڈیٹا کے اشتراک نے ڈرائیونگ لائسنس کے حصول کے لیے ہیرا پھیری کو کم کرنے میں بہت زیادہ تعاون کیا ہے۔

    اس کے علاوہ وہ لوگ جنہوں نے پہلے ڈرائیونگ لائسنس حاصل کیے تھے اور اپنے پیشے تبدیل کرتے ہوئے حالات کا استحصال کیا، وزارت کا خود کار نظام تمام ڈرائیونگ لائسنسوں کا جائزہ لیتا ہے جو غیر ملکیوں کو دیے گئے تھے۔

    محکمہ ٹریفک نے اپنی تعلیم مکمل کرنے والے غیر ملکی طلبا کے ڈرائیونگ لائسنس بلاک کر دیے ہیں، نیز گھریلو ملازمین جو کفیلوں سے مفرور تھے اور ہوم ڈیلیوری کے طور پر کام کرتے ہیں ان کے ڈرائیونگ لائسنس بھی منسوخ کر دیے گئے ہیں۔

    خود کار نظاموں کی وجہ سے اسے حاصل کرنا یا اس کی تجدید کرنا مشکل ہوگیا ہے، محکمہ ٹریفک باقاعدہ حفاظتی مہم چلاتا ہے جہاں وہ ان ڈرائیونگ لائسنسوں کو بلاک کرنے یا منسوخ کرنے کے لیے ایپلی کیشن کا استعمال کرتے ہیں۔

    محکمہ ٹریفک اور آپریشنز کے انڈر سیکریٹری میجر جنرل جمال الصایغ نے ہدایت دی کہ غیر ملکیوں کو ڈرائیونگ لائسنس دینے میں نرمی نہ برتی جائے اور اس بات کو یقینی بنایا جائے کہ وزارت کی طرف سے مقرر کردہ تمام شرائط جیسے ملازمت کا عنوان، پیشہ، تنخواہ، یونیورسٹی کی ڈگری اور اپنے ملک میں ڈرائیور کا لائسنس کو پورا کیا جائے۔

    ان اقدامات کی وجہ سے موجودہ سال میں غیر ملکیوں کے لیے ڈرائیونگ لائسنس حاصل کرنے میں 50 فیصد کمی واقع ہوئی ہے۔

    یاد رہے کہ کویت میں ڈرائیونگ لائسنس کے حصول کے لیے کیے جانے والے ڈرائیونگ ٹیسٹ نہایت سخت ہوتے ہیں، جبکہ لائسنس صرف ان لوگوں کو دیا جاتا ہے جو تھیوری اور پریکٹیکل ٹیسٹ پاس کرتے ہیں تاکہ ڈرائیور اور سڑک پر گاڑی چلانے والے دیگر افراد کی حفاظت کو یقینی بنایا جا سکے۔

  • کویت: اسکولوں کی فیسوں میں اضافہ نہ کرنے کا اعلان

    کویت: اسکولوں کی فیسوں میں اضافہ نہ کرنے کا اعلان

    کویت سٹی: کویت میں ملکی اور غیر ملکی اسکولوں کی فیسوں میں اضافہ نہ کرنے کا اعلان کیا گیا ہے، نیا تعلیمی سال 28 اگست سے شروع ہورہا ہے۔

    مقامی میڈیا رپورٹ کے مطابق کویت میں نجی بین الاقوامی اسکولوں نے اعلان کیا ہے کہ 23-2022 کا تعلیمی سال اتوار 28 اگست سے منگل 30 اگست تک مرحلہ وار شروع ہوگا۔

    اسکولوں کا کہنا ہے کہ ہر چیز کی قیمتوں میں اضافے کے باوجود آئندہ تعلیمی سال کی ٹیوشن فیس میں اضافہ نہیں کیا جائے گا۔

    پرائیویٹ اسکولز یونین کی صدر نورا الغانم کا کہنا ہے کہ بعض عرب اور غیر ملکی اسکولوں میں تدریسی اور غیر تدریسی عملے کی کمی بلا روک ٹوک جاری ہے، اس سلسلے میں انہوں نے متعلقہ حکام پر زور دیا کہ وہ تعلیمی اور صحت کے شعبوں میں کام کرنے والوں کو اپنی فیملی کو ملک میں لانے کی اجازت دینے کے لیے اقدامات کریں۔

    انہوں نے وضاحت کی کہ بہت سے غیر ملکی اساتذہ اپنے اہل خانہ کے بغیر کویت آنے سے انکار کرتے ہیں اور یہ کہ موجودہ حکومتی فیصلے سوائے کچھ غیر معمولی معاملات کے اساتذہ کے اہلخانہ کو داخلے کی اجازت نہیں دیتے۔

    یونین صدر کا کہنا تھا کہ تعلیمی اداروں کو صرف ایک استاد اور ڈائریکٹر کی ضرورت نہیں ہے بلکہ انہیں دوسرے کارکنوں کی بھی ضرورت ہے، تاہم کویت میں فی الحال دستیاب لیبر کی قیمت بہت زیادہ ہے اور بہت سے لوگ اسکولوں میں کام کرنے کے اہل نہیں ہیں۔

    انہوں نے کووڈ 19 کے بحران کے دوران وزارت داخلہ اور افرادی قوت کی عوامی اتھارٹی کے زبردست ردعمل کی تعریف کی اور امید ظاہر کی کہ یہ لچک نجی اسکولوں میں کام کرنے کے لیے غیر ملکی کارکنوں کی بھرتی میں برقرار رہے گی۔

    صدر نے یہ بھی کہا کہ غیر ملکی اساتذہ اور ان کی بیویاں، اگر وہ کویت میں کام کرتی ہیں تو انہیں اپنے 14 سال سے زیادہ عمر کے بچوں کو کویت لانے کی اجازت دی جائے، استاد اور اس کی بیوی کے لیے یہ ممکن نہیں ہے کہ وہ اپنے 15 اور 16 سال کے بچوں کو اکیلا چھوڑ کر آئیں۔

  • کویت: کلینک میں صفائی کا ملازم، مریضوں کا علاج کرتے ہوئے گرفتار

    کویت: کلینک میں صفائی کا ملازم، مریضوں کا علاج کرتے ہوئے گرفتار

    کویت سٹی: کویت میں ایک نجی طبی مرکز میں کام کرنے والا خاکروب ڈاکٹر کی خدمات سرانجام دیتے ہوئے پکڑا گیا، حکام نے مرکز کو سیل کردیا۔

    بین الاقوامی ویب سائٹ کے مطابق کویتی وزارت صحت کی اسسٹنٹ انڈر سیکریٹری برائے پرائیوٹ میڈیکل سروسز امور ڈاکٹر فاطمہ النجر کا کہنا ہے کہ سالمیہ میں ایک نجی طبی مرکز نے متعدد خلاف ورزیوں کا ارتکاب کیا۔

    سیکریٹری کا کہنا تھا کہ ہیلتھ لائسنسنگ ڈپارٹمنٹ، وزارت صحت کے میڈیسن انسپکشن ڈپارٹمنٹ اور پبلک اتھارٹی برائے افرادی قوت کے ارکان پر مشتمل کمیٹی نے کویت کے گنجان آباد علاقے سالمیہ میں کارروائی کی۔

    انہوں نے بتایا کہ ایک صفائی کارکن جو بغیر لائسنس کے لیزر ڈیوائس چلاتے ہوئے پکڑا گیا تھا جس کی وجہ سے متعلقہ پرائیوٹ میڈیکل سینٹر کو سیل کر دیا گیا ہے۔

    ڈاکٹر النجر کا کہنا تھا کہ ایک ڈاکٹر اور کچھ کارکنوں کو بغیر لائسنس کے کام کرنے پر گرفتار کیا گیا ہے، اس کے علاوہ میعاد ختم ہونے والی ادویات بھی ضبط کی گئی ہیں۔

    انہوں نے مزید کہا کہ گرفتار کیے گئے تمام افراد کو قانونی کارروائی کے لیے پبلک پراسیکیوشن اور میڈیکل متعلقہ اتھارٹی کے پاس بھیجا جائے گا، انہوں نے وضاحت کی کہ چھاپہ خلاف ورزیوں کے بارے میں رپورٹ موصول ہونے کے بعد کیا گیا تھا۔