Tag: کویت

 کویت سٹی: منشیات کے استعمال پر ایک کویتی فنکار کو قید و جرمانے کی سزا ہو گئی، فن کار نے ایک عرب ملک میں عکس بندی کے دوران نشے میں مبتلا ہونے کا اعتراف کیا۔

تفصیلات کے مطابق کویت میں فوجداری عدالت نے منشیات استعمال کرنے کا الزام ثابت ہو جانے پر معروف فن کار کو 5 برس قید بامشقت اور 5 ہزار دینار جرمانے کی سزا سنا دی۔

کویتی جرائد میں چھپنے والی خبروں میں کویتی فن کار کا نام ظاہر نہیں کیا گیا ہے، صرف یہ بتایا گیا کہ وہ کویت کا مشہور فن کار ہے اور وہ رمضان سے متعلق ٹی وی پروگرامز میں مرکزی کردار ادا کرتا ہے، تاہم بڑی تعداد میں سوشل میڈیا پر صارفین کا کہنا ہے کہ یہ اداکار علی کاکولی ہیں۔

رپورٹس کے مطابق فن کار بیرون ملک سے کویت پہنچا تھا، تلاشی پر اس کے سامان میں سے نشہ آور اشیا برآمد ہوئی تھیں۔

الحبس 5 سنوات وغرامة 5 آلاف دينار للفنان علي كاكولي عن تهمة تعاطي مخدرات pic.twitter.com/y1oeBecqAU

— شبكة الكويت (@NetworkKw) September 27, 2021

کویتی فن کار پر نشہ آور اشیا کی اسمگلنگ کا بھی الزام تھا، تاہم عدالت نے اس پر منشیات استعمال کرنے پر پانچ ہزار دینار کا جرمانہ کیا، اور منشیات کی اسمگلنگ کے الزام سے بری کر دیا۔

کویتی جریدے الرائی کے مطابق کویت کے انٹرنیشنل ایئر پورٹ پہنچنے پر کویتی فن کار کو حراست میں لیا گیا تھا، پبلک پراسیکیوشن نے ملزم سے پوچھ گچھ کی تو تحقیقات کے دوران اس نے اعتراف کیا کہ وہ ایک عرب ملک میں عکس بندی کے دوران نشے کا عادی ہوا تھا۔

کویت سٹی: کویت میں ورک پرمٹ ویزے کی منسوخی کا نیا الیکٹرانک نظام متعارف کرایا گیا ہے۔

تفصیلات کے مطابق پبلک اتھارٹی برائے افرادی قوت نے اپنی ویب سائٹ پر الیکٹرانک فارم کے ذریعے ورک ویزا پرنٹ کرنے کی سہولت کی فراہمی کے بعد درخواستیں وصول کرنا شروع کر دیں۔

اتھارٹی نے ویزے کو خودکار نظام کے ذریعے پرنٹ کرنے کے حوالے سے شرط بھی رکھی ہے، اگر اس بات کی تصدیق ہو جائے کہ درخواست منظور ہو چکی ہے اور پھر متعلقہ ملازم سے مشورہ بھی کیا جا چکا ہے تو ویزا پرنٹ کیا جا سکے گا۔

پبلک اتھارٹی برائے افرادی قوت نے واضح کیا کہ اگر درخواست کنندہ کی جانب سے دی گئی درخواست منظور ہو گئی ہو تو ویزا خودکار نظام کے ذریعے پرنٹ کیا جا سکتا ہے، جس کے بعد درخواست گزار کو متعلقہ محکمے کا دورہ کرنا ہوگا۔

اتھارٹی نے ورک پرمٹ کی منسوخی کو فعال کرنے کا بھی اعلان کر دیا ہے۔

اگر ویزا فیملی ویزے میں منتقل کرنا ہے اور اس کے لیے ورک پرمٹ منسوخ کرنے کی درخواست دینی ہے، اور اس کے علاوہ سرکاری شعبے سے نجی شعبے آرٹیکل 18 پر ٹرانسفر کے لیے ورک پرمٹ جاری کرنے کی درخواست دینی ہے، تو ان سہولیات کی دستیابی کا بھی اعلان کیا گیا ہے۔

اتھارٹی نے رہائشیوں، خلیجی شہریوں اور غیر قانونی رہائشیوں سے مطالبہ کیا کہ وہ متعلقہ محکمے کا جائزہ لینے کے لیے اسٹیٹس سرٹیفکیٹ جاری کریں، جب کہ سرکاری اداروں کے درمیان الیکٹرانک رابطے کے ذریعے شہریوں کو یہ سروس خود بخود فراہم کی گئی ہے۔

کویت سٹی: کویت میں بھاری تنخواہیں وصول کرنے والے غیر ملکیوں کے لیے ورک پرمٹ جاری نہ کرنے کا منصوبہ زیر غور ہے۔

تفصیلات کے مطابق کویت کی وزرا کونسل کویتائزیشن پالیسی کے تحت کئی منصوبے زیر غور لا رہی ہے، ایک منصوبہ نجی شعبے میں بھاری تنخواہوں والے مناصب کا بھی ہے، جن پر کویتی شہریوں کو سرکاری شعبے کے ہم منصبوں کے برابر مالی فائدہ دیا جائے گا۔

روزنامہ الجریدہ کے مطابق حکومت ان تارکین وطن کے لیے ورک پرمٹ کے اجرا پر پابندی عائد کرنے کا بھی ارادہ رکھتی ہے جو بھاری تنخواہیں وصول کر رہے ہیں، تاکہ نجی شعبے میں کویتی شہری ان کی جگہ لے سکیں۔

پبلک اتھارٹی برائے افرادی قوت برائے قومی لیبر امور کے ڈپٹی ڈائریکٹر جنرل نے اس حوالے سے کہا کہ اگلے دو سالوں میں نجی شعبے میں شہریوں کے لیے 12 ہزار ملازمتیں پیدا کی جائیں گی۔

یاد رہے کہ دنیا بھر میں کرونا مرض پھیلنے کے بعد کویت سمیت تمام خلیجی ممالک میں سرکاری و پرائیویٹ سیکٹر میں مقامی شہریوں کی زیادہ سے زیادہ کھپت کا فیصلہ کیا گیا، جس کے تحت اب غیر ملکی کارکنان کی جگہ اپنے شہریوں کو نوکری دینے کو ترجیح دی جا رہی ہے۔

اس پالیسی کی وجہ سے خلیجی ممالک میں کام کرنے والے غیر ملکیوں کی ایک بڑی تعداد اپنی نوکریوں سے ہاتھ دھو بیٹھی ہے، اور یہ سلسلہ تاحال جاری ہے۔

کویت سٹی: کویت میں نرسوں کے الاؤنس میں اضافے کا اعلان کیا گیا ہے۔

تفصیلات کے مطابق کویت میں نرسوں کے لیے 450 سے 850 دینار الاؤنس کا اعلان کیا گیا ہے، یہ اضافہ سرکاری اداروں میں کام کرنے اور کویتی شہریت رکھنے والی نرسز کے الاؤنسز میں کیا گیا ہے۔

کویت میں بہترین کام پر ایوارڈز

وزارت صحت کویت نے کہا ہے کہ جن لوگوں کو ’بہترین کام کے ایوارڈز‘ کے بارے میں شکایات ہیں وہ 16 ستمبر 2021 سے پہلے وزارت کی سرکاری ویب سائٹ پر آن لائن درج کروا سکتے ہیں، اس کے بعد کوئی شکایت قبول نہیں کی جائے گی۔

ایک بار شکایت درج ہونے کے بعد متعلقہ ملازم شکایت کی وصولی کو تسلیم کرتے ہوئے 24 گھنٹوں کے اندر ایک ٹیکسٹ میسج وصول کرے گا۔

شرائط کے طور پر شکایت پیش کرتے وقت 2020 کے کام کی تشخیص کی فائل پی ڈی ایف فارمیٹ میں منسلک ہونی چاہیے، اور پورے سال کے دوران ان کے خلاف کوئی تادیبی کارروائی نہیں کی گئی ہو۔

بیماری کی وجہ سے 15 دن سے زیادہ اسپتال میں داخل ہونے کے علاوہ ملازم کی چھٹیاں 15 دن سے زیادہ نہیں ہونی چاہیئں، اور سال 2020 کے لیے اسے ’بہترین کام‘ کے لیے ادائیگی نہیں کی گئی ہو، اور کارکنوں کے کام کے ایام کی تعداد 180 دن ہونے چاہئیں۔

کویت سٹی: گھریلو ملازمین کا کویت میں داخلہ مشکل ہو گیا ہے۔

تفصیلات کے مطابق کویت میں گھریلو ملازمین کی آمد مسئلہ بن گئی ہے، کویت میں آمد کے لیے 390 سے 490 کویتی دینار تک کے اخراجات مختص کر دیے گئے ہیں۔

کویت میں گھریلو لیبر مارکیٹ کے حالات کا مطالعہ کرنے کے لیے بنائی گئی تکنیکی رضاکارانہ کمیٹی کے سربراہ بسام الشمری نے میڈیا کو بتایا کہ فلپائن سے آنے والے گھریلو ملازمین کے ٹکٹوں کی قیمتوں میں بے حد اضافہ ہوا ہے اور ٹکٹ ایک ہزار دینار تک پہنچ گیا۔

تاہم انھوں نے واضح کیا کہ منیلا یا کسی دوسرے ملک سے گھریلو ملازمین کے لیے بسلامہ پلیٹ فارم پر قیمتیں مخصوص ہیں اور فی الحال تبدیل نہیں ہوں گی۔

فلپائن سے آنے والوں کے لیے اخراجات 490 دینار مقرر کیے گئے ہیں، فلائٹ کے ٹکٹوں کے علاوہ، اس رقم میں جنھوں نے ویکسین نہیں لگوائی یا ویکسین حال ہی میں لگانے والوں کے لیے دو ہفتے کی مدت کی مطلوبہ قرنطینہ بھی شامل ہے، جب کہ بھارتی اور دیگر قومیتوں کے ملازمین کی بھرتیوں کی قیمت 390 دینار مقرر کی گئی ہے۔

واضح رہے کہ کویت میں یہ تجویز سامنے آئی ہے کہ کویت کی منظور شدہ ویکسین حاصل کرنے والے گھریلو ملازمین کو ملک میں بسلامہ ایپلی کیشن پر رجسٹر کیے بغیر اور دو ہفتوں کے ادارہ جاتی قرنطینہ کی شرط پوری کیے بغیر داخلے کی اجازت دی جائے۔

اس تجویز کے مطابق گھریلو ملازمین کو بیرون ملک سے رہائشیوں کی واپسی کے لیے مقرر کردہ تقاضوں کو پورا کرنا لازم ہوگا، ان تقاضوں میں صرف ان لوگوں کے لیے اندراج شامل ہے جنھوں نے منظور شدہ ویکسین کی دو ڈوز حاصل کی ہیں اور جن کی امیون ایپلی کیشن میں سبز اسٹیٹس موجود ہے۔

کویت سٹی: حکام نے کویت میں ممنوعہ ممالک سے داخلے کے لیے شرائط و ضوابط کے چارٹ جاری کر دیے ہیں۔

تفصیلات کے مطابق کویت میں داخلے کے لیے ممنوعہ ممالک سے آنے والے تارکین وطن کو نیچے دیے گئے چارٹس کی ہدایات پر عمل کرنا ہوگا۔

یہ طریقہ کار وزارت صحت کی جانب سے پیش کردہ اصولوں کے مطابق ہے، جس کی منظوری کویت کی وزرا کونسل نے دی ہے۔

چارٹس میں دی گئی ہدایات اور ضوابط ان تمام تارکین وطن پر لاگو ہوتے ہیں، جو ممنوعہ ممالک سے کویت میں داخلے کے خواہش مند ہیں، اور کویت کا جائز رہائشی اقامہ رکھتے ہیں۔

دوسری جانب کویت ایئر پورٹ پر پہنچنے والے ممنوعہ ممالک کے تارکین وطن کو کس طرح وصول کیا جائے گا، اور ان کی انٹری وغیرہ کس طرح کی جائے گی، اس کی ہدایات فی الحال کویت بین الاقوامی ہوائی اڈے کے حکام کو ابھی تک جاری نہیں کی گئیں، جو کہ ممکنہ طور پر جلد ہی جاری کر دی جائیں گی۔

خیال رہے کہ کویت وزرا کونسل نے 6 ممنوعہ ممالک پاکستان، بھارت، مصر، بنگلا دیش، سری لنکا اور نیپال سے کویت کے لیے براہ راست پروازیں چلانے کی منظوری دے دی ہے، جن کا آغاز آئندہ چند دنوں میں کر دیا جائے گا۔