Tag: کویت

  • کویت: کرونا ویکسینیشن کروانے والوں کے لیے خصوصی سرٹیفکیٹ

    کویت: کرونا ویکسینیشن کروانے والوں کے لیے خصوصی سرٹیفکیٹ

    کویت سٹی: کویتی حکام کا کہنا ہے کہ کرونا وائرس ویکسین حاصل کرنے والوں کو ایک خصوصی سرٹیفکیٹ دیا جائے گا جس میں ان کی ویکسی نیشن کے حوالے سے معلومات درج ہوں گی۔

    کویتی میڈیا کے مطابق کویت کے وزیر صحت ڈاکٹر باسل الصباح نے اعلان کیا ہے کہ ویکسی نیشن کروانے والے افراد کو ایک خصوصی سرٹیفکیٹ دیا جائے گا جس میں کرونا وائرس ویکسین کے حوالے سے معلومات ہوں گی۔

    یہ سرٹیفکیٹ ہوائی اڈے یا دیگر مقامات کے لیے ایک پاسپورٹ کے طور پر استعمال ہوگا۔

    وزیر صحت نے کویت ویکسی نیشن سینٹر کے ہال نمبر 6 کے افتتاح کے موقع پر کہا کہ اگر دنیا کے کچھ ممالک نے اس سرٹیفکیٹ کو لازم قرار دے دیا تو یہ ویکسی نیشن سرٹیفکیٹ شہریوں کو سہولت اور آسانی پیدا کرے گا۔

    انہوں نے مزید بتایا کہ کرونا وائرس کے خلاف ویکسین کی پہلی خوراک وصول کرنے والے افراد کی تعداد 20 ہزار سے تجاوز کر گئی ہے، مذکورہ رپورٹ میں اس بات کی نشاندہی کی جائے گی جبکہ دوسری خوراک لینے کی تاریخ بھی درج ہوگی۔

    وزیر صحت کا کہنا تھا کہ اب تک ویکسی نیشن پلیٹ فارم پر رجسٹرڈ افراد کی تعداد معاشرے کے مختلف طبقات سے تعلق رکھنے والے تقریباً ایک چوتھائی افراد تک پہنچ چکی ہے۔

    انہوں نے سب شہریوں اور تارکین وطن کو تاکید کی کہ وہ اس ویکسی نیشن کے حصول کے لیے جلد سے جلد اپنا اندراج کریں۔

  • ڈرائیونگ لائسنس: کویتی حکومت کی شہریوں کے لیے خوشخبری

    ڈرائیونگ لائسنس: کویتی حکومت کی شہریوں کے لیے خوشخبری

    کویت سٹی: کویت میں تمام شہریوں کے لیے اسمارٹ ڈرائیونگ لائسنس کی فراہمی شروع کردی جائے گی جس سے کویتی شہری دنیا کے کسی بھی ملک میں گاڑی چلانے کے اہل ہوں گے۔

    کویتی میڈیا کے مطابق کویت کی وزارت داخلہ اتوار 17 جنوری 2021 سے تمام موٹر سواروں (کویتی اور تارکین وطن) کو اسمارٹ ڈرائیونگ لائسنس کی فراہمی شروع کر دے گی۔

    کویتی میڈیا رپورٹ کے مطابق تمام گورنریٹس میں محکمہ ٹریفک شہریوں اور تارکین وطن کو پرانے ڈرائیونگ لائسنس کے بدلے اسمارٹ چپ کی تنصیب کے ساتھ جدید ٹیکنالوجی سے آراستہ نئے اسمارٹ ڈرائیونگ لائسنس جاری کریں گے جس کی مدد سے وہ دنیا کے کسی بھی ملک میں گاڑی چلانے کے اہل ہوں گے۔

    نئے اسمارٹ ڈرائیونگ لائسنس میں سیکیورٹی کی خصوصیات ہیں اور جدید ترین ٹیکنالوجی کے باعث اس میں دھوکہ دہی کی گنجائش نہیں ہوگی۔ اسمارٹ ڈرائیونگ کارڈ میں ایک اسمارٹ چپ تنصیب کی گئی ہے جس میں اس کے مالک کا مکمل ڈیٹا اسٹور کیا جاتا ہے۔

    یہ بات بھی واضح کردی گئی ہے کہ اسمارٹ ڈرائیونگ لائسنس کی فیس میں کوئی اضافہ نہیں کیا گیا۔

    اس سے قبل اسمارٹ ڈرائیونگ لائسنس صرف خلیجی ممالک (جی سی سی) تک ہی محدود تھا تاہم اب محکمہ ٹریفک نے کویتی شہریوں اور غیر ملکیوں کو درپیش مشکلات کا حل تلاش کرلیا ہے اور اب اسی اسمارٹ لائسنس کا استعمال کرکے لائسنس ہولڈر بیرون ملک بھی گاڑی چلانے کے اہل ہوں گے۔

  • کویت نے تارکین وطن کو بڑی خوشخبری سنا دی

    کویت نے تارکین وطن کو بڑی خوشخبری سنا دی

    کویت سٹی: کویتی حکومت نے تارکین وطن کو بڑی خوشخبری سناتے ہوئے 3 لاکھ افراد کے اقاموں کی تجدید کردی، مختلف ممالک میں پھنسے تارکین وطن واپس کویت آسکیں گے۔

    کویتی میڈیا کے مطابق مختلف ممالک میں پھنسے ہوئے تارکین وطن کے لیے 3 لاکھ اقاموں کی تجدید کردی گئی ہے۔

    وزارت داخلہ اور عوامی افرادی قوت کی دو باڈیز اور سول انفارمیشن مشترکہ خود کار نظام کا حصہ ہیں جس میں کرونا وائرس کے نتیجے میں ہوائی اڈوں کی بندش اور ٹکٹوں کے بڑھتے ہوئے اخراجات کی وجہ سے بیرون ملک پھنسے ہوئے تارکین وطن کے 3 لاکھ سے زائد رہائشی اقاموں اور ورک پرمٹ کی تجدید پر عملدر آمد کیا گیا۔

    سرکاری ذرائع کا کہنا ہے کہ دونوں اداروں نے وزارت داخلہ کے تعاون سے بیرون ملک مقیم افراد کے رہائشی اقاموں کی تجدید کی اجازت دینے کے فیصلے کی روشنی میں اور وبائی مرض کی وجہ سے صحت کی ضروریات کے تسلسل کے ساتھ 6 ماہ سے زائد کا عرصہ ملک سے باہر رہنے کے باوجود آن لائن مشترکہ خود کار نظام کے ذریعے تجدید کا طریقہ کار مکمل کرلیا ہے۔

    ذرائع نے تصدیق کی کہ پبلک اتھارٹی برائے افرادی قوت نے کاروباری مالکان پر کارکنوں کے حقوق کی ضمانت اور مالی واجبات کی ادائیگی کے سلسلے میں نئے طریقہ کار کا اطلاق کرنا شروع کردیا ہے۔

    ذرائع کا کہنا تھا کہ نئے ضوابط کے تحت کارکنوں کو خود کار نظام کے ذریعہ معلومات جمع کروانے اور تفویض کردہ نمبروں کے ذریعے ملک سے باہر ہونے پر بھی اپنی شکایات درج کرنے کی اجازت ہوگی۔

    اتھارٹی میں ایمپلائمنٹ پروٹیکشن سیکٹر، کاروباری مالکان کے خلاف مالی واجبات کی ادائیگی اور ماہانہ تنخواہوں کے سلسلے میں درج ہزاروں شکایات کا بھی مطالعہ کر رہا ہے۔

  • کویت: محکمہ ٹریفک کی بڑی کارروائی

    کویت: محکمہ ٹریفک کی بڑی کارروائی

    کویت سٹی: کویت میں گاڑیوں سے سائلنسر تبدیل کرنے کے جرم میں گیراج مالکان قانون کی گرفت میں آگئے، سینکڑوں گیراج مالکان کو چالان جاری کردیے گئے۔

    کویتی ویب سائٹ کے مطابق گیراجوں اور گاڑیوں کے آلات بیچنے والی دکانوں پر آواز تبدیل کرنے والے سائلنسر فروخت کرنے کے جرم میں مالکان کے خلاف قانونی کارروائیوں کا آغاز کردیا گیا۔

    سیکریٹری برائے داخلہ لیفٹننٹ جنرل عسام النہم کی ہدایت پر دکانوں اور گیراجوں کے مالکان کو صوتی آلات نصب کرنے کے جرم میں 57 چالان جاری کیے گئے۔ یہ چالان وزارت داخلہ نے وزارت تجارت و صنعت کے تعاون سے جاری کیے ہیں۔

    ان صوتی آلات کی تنصیب کے نتیجے میں گاڑیوں سے دوران ڈرائیونگ تیز آواز نکلتی ہے جو دوسروں کو اذیت پہنچاتی ہے۔

    محکمہ ٹریفک کے جنرل محکمہ نے کہا ہے کہ محکمہ اس غیر معمولی رجحان کو ختم کرنے کے لیے پرعزم ہے اور لاپرواہ ڈرائیورز کے خلاف قانونی اقدامات اٹھاتا رہے گا۔

    جی ڈی ٹی کے مطابق خلاف ورزی کرنے والوں کو جرمانے ہوں گے اور انہیں جیل کی سلاخوں کے پیچھے ڈال دیا جائے گا۔

  • کویت میں تیل کے نئے ذخائر دریافت

    کویت میں تیل کے نئے ذخائر دریافت

    کویت سٹی: کویت کے وزیر تیل و بجلی نے تیل کی نئی فیلڈز دریافت ہونے کا اعلان کیا ہے، اس کے ساتھ پرانی آئل فیلڈز میں بھی توسیع کا اعلان کیا ہے۔

    کویتی میڈیا کے مطابق وزیر تیل و بجلی اور پانی ڈاکٹر محمد الفارس نے کویت آئل کمپنی کے ذریعے ملک کے مختلف خطوں کی جراسک لیرز میں تیل کی 2 نئی فیلڈز کی دریافت کے انکشافات کے علاوہ فیلڈ کی ترقیاتی کارروائیوں کے حصے کے طور پر بڑی برقان فیلڈ کے شمالی حصے میں توسیع کا بھی اعلان کیا ہے۔

    وزیر کا کہنا تھا کہ پہلی دریافت حومہ فیلڈ میں کی گئی جو کویت کے شمال مغربی حصے میں واقع ہے جس پر حال ہی میں ایک تھری ڈائمینشنل تکنیک کا استعمال کرتے ہوئے سروے کیا گیا تھا۔

    ڈرلنگ کے بعد پتہ چلا کہ اس فیلڈ کا رقبہ 70 مربع کلو میٹر تک پھیلا ہوا ہے جس کی پیداواری صلاحیت روزانہ 14 سو 52 بیرل ہلکے تیل کی ہے۔

    انہوں نے کہا کہ اس دریافت کو بہت معاشی اہمیت حاصل ہے کیونکہ اس نے کویت کے مغربی اور شمال مغربی حصوں میں واقع ان بڑے علاقوں کی طرف اشارہ کیا ہے جو کویت آئل کمپنی کے 2 ہزار 40 اسٹریٹجک منصوبے کے مطابق تیل کے ذخائر اور پیداوار کی صلاحیت میں اضافہ کرنے میں براہ راست حصہ ڈالتے ہیں۔

    کویتی وزیر کے مطابق 2 نئی دریافتوں سے ملک کے شمالی حصے میں اسٹریٹجک اہمیت بڑھ گئی ہے کیونکہ ان علاقوں کی دریافت پہلے نہیں کی گئی تھی۔

    انہوں نے بتایا کہ بڑی برقان فیلڈ کے شمال وراہ، مودود اور برقان کے ذخیروں میں بھی روایتی تیل دریافت کیا گیا ہے کیونکہ اس فیلڈ کی یومیہ حد کا تعین کرنے کے لیے گزشتہ برس 2020 میں کھودے گئے کئی کنوؤں سے تیل تجارتی مقدار میں بہہ رہا تھا، اس کی 2000 بیرل سے زائد کی پیداواری شرح تھی جو کہ مزید ذخائر شامل کرنے کی راہ ہموار کرتی ہے۔

    وزیر کا کہنا تھا کہ نتائج کویت آئل کمپنی کو آسان اور کم لاگت کے ذخائر تک رسائی فراہم کرتے ہیں جو ممالک اور تیل کمپنیوں کے مابین اپنے مسابقتی فائدے کو برقرار رکھنے کے لیے کمپنی کی کوششوں کی حمایت کرتا ہے جس سے یہ ظاہر ہوتا ہے کہ پیداوار کی مقدار میں اضافہ کرنے کے لیے کمپنی دریافت شدہ فیلڈ میں نئے کنویں کھودے گی۔

    الفارس نے سال 2020 میں کویت آئل کمپنی کی ان تینوں دریافتوں کے حصول میں کامیابی کی تعریف کی، انہوں نے کویت کے ایک روشن مستقبل کو یقینی بنانے کے لیے کویت آئل کمپنی کی تلاش اور ترقیاتی کاموں میں لچک اور واضح عزم کو نوٹ کرتے ہوئے تاریک ترین حالات میں تیل کے شعبے کی صلاحیت پر بھی زور دیا۔

  • کویت آنے والے تمام مسافروں کے لیے بڑی سہولت کا اعلان

    کویت آنے والے تمام مسافروں کے لیے بڑی سہولت کا اعلان

    کویت سٹی: کویت میں آنے والے تمام مسافروں کو مفت پی سی آر ٹیسٹ کی سہولت دے دی گئی، تمام آنے والوں مسافروں کے ٹیسٹ ریاست اور وزارت صحت کے خرچ پر بلا معاوضہ ہوں گے۔

    کویتی میڈیا کے مطابق کویت آنے والے تمام مسافروں کے لیے مفت پی سی آر ٹیسٹ کرونا وائرس کے پھیلاؤ کو روکنے کے لیے میڈیکل پروٹوکول کا ایک حصہ ہے۔

    پی سی آر کے ٹیسٹ تمام آنے والے مسافروں کے لیے ریاست اور وزارت صحت کے خرچ پر بلا معاوضہ ہوں گے۔

    ذرائع کے مطابق اس سے ملک میں صحت کی حفاظت کو یقینی بنانا ہے کیونکہ طبی ٹیمیں کویت آنے والے ہر مسافر کی جانچ پڑتال کریں گی جو صحت کے تمام ضروری اقدامات پر عمل پیرا ہیں۔

    ذرائع کا کہنا ہے کہ ماضی کے طریقہ کار میں ہر پرواز سے کویت آنے والوں میں سے 10 فیصد مسافروں کا بے ترتیب ٹیسٹ شامل تھا لیکن اب کے طریقہ کار میں ہر پرواز سے آنے والے تمام مسافروں کا ٹیسٹ کیا جائے گا۔

    ذرائع کا مزید کہنا ہے کہ ہوائی اڈے پر پی سی آر کے امتحان میں گزشتہ صحت کی ضروریات کے مطابق مسافر کو ملک آنے پر پی سی آر سرٹیفکیٹ لانے سے مستثنیٰ نہیں رکھا گیا تھا۔

  • کویت: بیرون ملک پھنسے کویتی شہریوں کی واپسی میں مزید سہولت

    کویت: بیرون ملک پھنسے کویتی شہریوں کی واپسی میں مزید سہولت

    کویت سٹی: کویت کی سول ایوی ایشن نے بیرون ملک پھنسے کویتی شہریوں کی واپسی کے لیے مزید سہولت فراہم کرنے کا اعلان کردیا۔

    کویتی میڈیا کے مطابق سول ایوی ایشن کا کہنا ہے کہ تجارتی پروازوں کی بحالی کے بعد بیرون ملک پھنسے ہوئے شہریوں کی واپسی کے لیے اضافی پروازوں کے عمل میں سہولت فراہم کی جائے گی۔

    جنرل ایڈمنسٹریشن آف سول ایوی ایشن کے ڈائریکٹر جنرل یوسف الفوزان نے اعلان کیا ہے کہ وہ ان ممالک سے ایئر لائنز کے لیے اضافی پروازوں کے عمل میں سہولت فراہم کریں گے جہاں پھنسے ہوئے شہریوں کے لیے اگلے ہفتے سے تجارتی پروازوں کی بحالی دوبارہ شروع کی جانی ہیں۔

    الفوزان کا کہنا تھا کہ اس اقدام کا مقصد مسافروں کی واپسی کو ان غیر معمولی حالات خصوصاً کویت بین الاقوامی ہوائی اڈے پر آنے اور جانے والے مسافروں کی پروازوں کو 10 دن کے لیے روکنے کے بعد دوبارہ عمل میں لانا ہے۔

    سول ایوی ایشن کی جنرل ایڈمنسٹریشن کے سرکاری ذرائع کے مطابق صرف برطانیہ سے کویت واپس آنے کے خواہشمند کویتی شہریوں اور کویت سے واپس برطانیہ جانے والے برطانوی شہریوں کے مابین ایئر لائنز دوبارہ کھول دی گئیں ہیں۔

    یہ سہولت صرف کویتی اور برطانوی شہریوں کو دی گئی ہے تاکہ وہ اپنے ممالک سفر کے حصول کو ممکن بنا سکیں۔

    انہوں نے مزید کہا کہ پروازوں کا دوبارہ آغاز پہلے کی طرح ہی جاری رہے گا جیسا کہ کویت بین الاقوامی ہوائی اڈے پر آنے اور جانے والی تجارتی پروازوں کو معطل کرنے کے حکام کے فیصلے سے پہلے تھا۔

    یہ فیصلہ آج بھی جاری ہے جیسا کہ 10 دن پہلے تھا جس کا مطلب یہ ہے کہ 35 ممالک پر پابندی فی الحال برقرار رہے گی۔

  • کویت: خادمہ کو قتل کرنے والی خاتون کو سزائے موت

    کویت: خادمہ کو قتل کرنے والی خاتون کو سزائے موت

    کویت سٹی: کویت میں خادمہ کو قتل کرنے والی مقامی خاتون کو سزائے موت جبکہ ان کے شوہر کو 4 سال قید کی سزا سنا دی گئی۔

    کویتی میڈیا کے مطابق کویت کی فوجداری عدالت نے ایک فلپائنی خادمہ جینلن ولاونڈے کے قتل کے جرم میں ایک کویتی خاتون کو پھانسی جبکہ ان کے شوہر کو 4 سال قید کی سزا سنائی۔ سفارتخانے کے قانونی نمائندے کی اتاشی شیخہ فوزیہ الصباح ایک سال سے اس کیس سے منسلک تھیں۔

    مذکورہ خادمہ کویتی خاندان کے گھر ملازم تھی جنہیں تشدد کا نشانہ بنا کر موت کے گھاٹ اتار دیا گیا۔ پوسٹ مارٹم کی رپورٹ میں انکشاف ہوا کہ ملازمہ پر تشدد کے ساتھ کئی ہفتوں تک جنسی اور جسمانی زیادتی بی کی گئی۔

    ملازمہ نے دسمبر 2019 میں اپنی موت سے چند ماہ قبل نہ صرف اپنی ایجنسی بلکہ کفیل کو بھی گھر واپس بھیجنے کے لیے کہا تھا لیکن اس کی درخواستوں کا کوئی جواب نہیں دیا گیا۔ رپورٹس میں بتایا گیا کہ ملازمہ کا کفیل کویت کی وزارت داخلہ کے لیے کام کرتا تھا۔

    وکیل شیخہ فوزیہ کا کہنا تھا کہ آج کا عدالتی فیصلہ منصفانہ ہے، ملازمہ کو حسد کی وجہ سے تشدد کا نشانہ بنایا گیا اور کئی دن تک کمرے میں بند رکھا گیا جبکہ کسی قسم کی طبی امداد دینے سے بھی انکار کر دیا گیا جس کی وجہ سے اس کی موت واقع ہوگئی۔

    دوسری جانب کویت میں فلپائن کے سفیر محمد نور دین پینڈو سینا لموندت ملک میں لاک ڈاؤن سے قبل ہی قتل کے الزام میں گرفتار ہونے والے کویتی جوڑے کے خلاف کیس کی پیروی کر رہے تھے۔

    سفیر کا کہنا تھا کہ ہم مقتولہ کے لیے انصاف کے حصول کی امید رکھتے ہیں اور انصاف کی فراہمی کے لیے کویت کبھی بھی پیچھے نہیں ہٹا۔ سفیر فلپائن نے اس کیس میں فتح اور حمایت کے لیے وکیل شیخہ فوزیہ الصباح، سیکریٹری برائے امور خارجہ ٹیڈی لوکسن اور فلپائن کے صدر روڈریگو کا تہہ دل سے شکریہ ادا کیا۔

  • مختلف ممالک میں پھنسے اساتذہ کو کویت واپسی کی اجازت مل گئی

    مختلف ممالک میں پھنسے اساتذہ کو کویت واپسی کی اجازت مل گئی

    کویت سٹی: کویت نے 34 ممالک میں پھنسے ہوئے 330 اساتذہ کو کویت واپسی کی اجازت دے دی جبکہ 600 اساتذہ کو نوکریوں سے برطرف کر دیا گیا ہے۔

    کویتی میڈیا کے مطابق وزارت تعلیم نے ہائر ہیلتھ کمیٹی کے تعاون سے انٹری ویزا جاری کر کے پھنسے ہوئے اساتذہ میں سے 330 اساتذہ کو وطن واپس لانے پر کام کرنے کا فیصلہ کیا ہے۔

    وزارت نے اس کے ساتھ ساتھ 600 ایسے اساتذہ کی نوکریوں کو بھی ختم کرنے کا فیصلہ کیا ہے جو بیرون ملک پھنسے ہوئے ہیں۔

    ذرائع کے مطابق پبلک ایجوکیشن سیکٹر نے بیرون ملک پھنسے ہوئے ایسے اساتذہ کے ناموں کی فہرست پر کام کرنا ختم کردیا ہے جو اضافی عملے کے ساتھ تعلیمی خصوصیات میں کام کرتے ہیں۔

    600 کے قریب ان اساتذہ میں کمپیوٹر، انٹیریئر ڈیزائن اور اسلامی تعلیم میں مہارت رکھنے والے اساتذہ شامل ہیں کیونکہ یہ ایسی مہارتیں ہیں جس کے لیے شہریوں، کویتی خواتین کے غیر کویتی بچوں، خلیجی شہریوں اور بیرون رہائشیوں کے ساتھ مقامی معاہدوں کے ذریعے ان کی سہولیات حاصل کی جاسکتی ہیں۔

    آخری مرحلے کے دوران اس شعبے نے تعلیمی زون سے درخواست کی ہے کہ وہ ان اساتذہ کے نام بتائیں جو اضافی تدریسی عملے کے ساتھ کام کرتے ہیں کیونکہ ان کاموں کے لیے مقامی طور پر اساتذہ دستیاب ہیں۔

    تقریباً 330 اساتذہ ایسے ہیں جو ریاضی، کیمسٹری، فزکس اور انگریزی زبان جیسے مضامین میں مہارت رکھتے ہیں اور ملک ایسے مضامین میں مہارت رکھنے والے مقامی اساتذہ کی کمی کا شکار ہے۔

    وزارت ان کے کام پر واپس آنے کے لیے خصوصی انٹری ویزا جاری کرنے کے لیے متعلقہ حکام سے رابطہ کرے گی۔ نوکری سے برخاست کیے جانے والے بیرون ممالک پھنسے ہوئے اساتذہ کے بارے میں سی ایس سی سے ہم آہنگی کے بعد ان کے واجبات کی ادائیگی کا مناسب طریقہ تلاش کیا جائے گا جس کا امکان ان کے ممالک میں کویتی سفارت خانے کے ذریعہ ہوگا۔

  • کویت نے پروازیں بحال کرنے کا اعلان کردیا

    کویت نے پروازیں بحال کرنے کا اعلان کردیا

    کویت سٹی: کویت کی وزرا کونسل نے یکم جنوری سے بین الاقوامی پروازیں بحال کرنے کا اعلان کردیا، کویت میں کرونا وائرس کی صورتحال قابو میں ہے۔

    کویتی میڈیا کے مطابق وزرا کونسل کا وزیر اعظم کویت شیخ صباح الخالد کی زیر صدارت سیف پیلس میں ہفتہ وار اجلاس منعقد ہوا۔

    کونسل کو بتایا گیا کہ عزت مآب شیخ نواف الاحمد کو برادر مملکت سعودی عرب کے بادشاہ کی طرف سے پیغام موصول ہوا جس میں امیر کویت کو خلیج تعاون کونسل رہنماؤں کی مجلس اور اعلیٰ کونسل کے اجلاس میں شرکت کی دعوت شامل ہے۔

    وزرا کی کونسل نے مثبت برادرانہ ماحول پر گہرے اطمینان کا اظہار کیا جو اس سربراہی اجلاس کے ذریعے خلیج کے اتحاد کو مضبوط بنانے اور خلیج تعاون کونسل کے اتحاد کو یکجہتی اور اتحاد کو بڑھانے کی اہمیت میں ذمہ داری اور خلوص عقیدے کی عکاسی کرتا ہے۔

    کابینہ نے دنیا بھر میں کووڈ 19 کی تازہ ترین پیشرفتوں کے بارے میں وزیر صحت کی طرف سے فراہم کردہ وضاحت کو بھی سنا۔

    کونسل کے مطابق اعداد و شمار کی بنیاد پر ملک میں صحت کی صورتحال مستحکم ہوگئی ہے، اعداد و شمار سے مریضوں اور اموات کی تعداد میں کمی کا اشارہ ملتا ہے کیونکہ اس وبا کے پھیلنے کے بعد سے ریکارڈ شدہ کیسز کی مجموعی تعداد 1 لاکھ 49 ہزار 653 ہے۔

    کونسل کے مطابق 1 لاکھ 45 ہزار 579 مریض صحت یاب ہوئے جبکہ 931 مریض جاں بحق ہوئے۔

    وزیر صحت نے تصدیق کی کہ یکم جنوری کو سفری پابندی ختم کرنے کا فیصلے کیا گیا ہے۔ کونسل نے اگلے ہفتے کے روز یعنی 2 جنوری سے روزانہ کی بنیاد پر صبح 9 بجے سے شام 3 بجے تک سمندری اور زمینی سرحدوں کو کھولنے کا فیصلہ بھی کیا ہے۔

    وزیر صحت نے کونسل کو وزیر اعظم کی سرپرستی میں تجرباتی ویکسین کا استعمال کر کے ویکسی نیشن مہم کو نافذ کرنے کے لیے کی جانے والی کوششوں سے بھی آگاہ کیا۔

    اجلاس میں بتایا گیا کہ ویکسین لینے والوں پر کسی بھی قسم کے غیر متوقع منفی اثرات کا کوئی کیس سامنے نہیں آیا۔