Tag: کویت

کویت سٹی: کویت کے وزیر صحت باسل الصباح نے براہ راست پروازوں کی تجویز پر غور کرنے کا وعدہ کر لیا ہے۔

تفصیلات کے مطابق کویت کے وزیر صحت ڈاکٹر باسل الصباح نے براہ راست پروازوں سے کویت پہنچنے کی تجویز پر غور شروع کر دیا ہے۔

گزشتہ روز کویت ایئرویز نے اعلان کیا تھا کہ وزیر صحت نے کویت ایئرویز اور جزیرا ایئرویز کے نمائندوں کے ساتھ اس سلسلے میں خصوصی ملاقات کی ہے، جس میں براہ راست پروازوں کی اجازت کے سلسلے میں گفتگو ہوئی۔

کویت ایئر ویز کا کہنا تھا کہ وزیر صحت کو براہ راست پروازوں کے ذریعے کویت پہنچنے والے مسافروں کے سلسلے میں وزارت صحت کے منظور شدہ اقدامات کے اطلاق کے حوالے سے تجاویز دی گئیں، جس پر تفصیلی تبادلہ خیال کیا گیا۔

تجاویز میں یہ بھی شامل تھا کہ ایئر پورٹس کو ڈائریکٹ فلائٹس کے لیے کھولا جائے اور مذکورہ دو ایئر لائنز سے کویت آنے والے مسافروں سے ایئرپورٹ پر اترتے ہی کرونا کے 2 پی سی آر ٹیسٹس کے پیسے وصول کیے جائیں یا پھر ٹکٹ میں اسے شامل کیا جائے۔

وزیر صحت نے مذکورہ ایئرلائنز کی تجاویز کے سلسلے میں اپنے مکمل تعاون کا اظہار کیا اور کہا کہ ان پر جلد غور کیا جائے گا۔ ڈاکٹر باسل الصباح نے کہا کہ وزارت صحت کا تکنیکی عملہ ان تجاویز کا ہر طرح سے جائزہ لے گا۔

کویت کے وزیر صحت سے ایئر لائنز کے نمائندوں کی اس ملاقات کے بعد یہ توقع کی جا رہی ہے کہ کویت میں براہ راست پروازوں کا سلسلہ شروع ہو جائے گا۔

کویت سٹی: کویت میں فیس ماسک نہ پہننے پر اب جرمانہ کیا جائے گا۔

تفصیلات کے مطابق کویت کی کابینہ نے فیس ماسک نہ پہننے والوں پر جرمانہ عائد کرنے کا فیصلہ کر لیا ہے۔

اس سلسلے میں کویتی کابینہ نے فتویٰ اور قانون سازی کی کمیٹی کو ایک مسودہ پیش کیا ہے جس میں تجویز دی گئی ہے کہ صحت کے سلسلے میں مقرر قواعد کی خلاف ورزی پر اور کرونا وبا کے پیش نظر ماسک نہ پہننے والوں پر فوری جرمانہ عائد کیا جائے۔

قانونی مسودے کی تجویز کے مطابق کرونا ایمرجنسی کے سلسلے میں فیس ماسک نہ پہننے والوں پر عائد کیا جانے والا فوری جرمانہ 50 سے 100 دینار کے درمیان ہوگا۔

کویت میں قوانین کی خلاف ورزی پر بڑی کارروائی

کابینہ نے گھروں سے باہر موسم بہار کے کیمپوں کے انعقاد پر بھی پابندی کی سفارش کر دی ہے۔

کابینہ میں پیش ہونے والی اس سفارش کو بھی منظور کر لیا گیا ہے کہ شاپنگ مالز، کمپلیکس، کیفے، ریستوران اور ہیلتھ فٹنس کلبز میں داخلہ ایڈوانس بکنگ سے مشروط ہوگا، اس سلسلے میں ہدایات بھی جاری کر دی گئی ہیں کہ مالز، کلبز اور ریستورانز ایڈوانس بکنگ کے بغیر گاہکوں کو قبول نہ کریں۔

ذرایع کے مطابق ملک میں اجتماعات سے نمٹنے اور انھیں روکنے کے لیے وزرا کونسل کی جانب سے وزارت داخلہ کو اختیارات دیے جائیں گے۔

کویت سٹی: کویت کے بینکوں نے رواں ماہ ہی سے تنخواہوں سے قرض کی قسطوں کی کٹوتی کا فیصلہ کر لیا ہے۔

تفصیلات کے مطابق کویت میں بینکوں کی اقساط میں کٹوتی اسی ماہ اکتوبر سے شروع ہوگی، قرضوں کی اقساط کی ادائیگی کی مدت میں توسیع کے سلسلے میں مرکزی یا دوسرے بینکوں کی جانب سے تاحال کوئی ہدایت نامہ جاری نہیں ہوا۔

یہ کہا جا رہا ہے کہ اگر قرضوں کی قسطوں کی ادائیگی میں اس طرح کی کوئی توسیع کی گئی تو اس سے بینکوں کا خسارہ دگنا ہو کر 750 ملین کویتی دینار ہو جائے گا، جس سے بینکوں کے بجٹ پر ناقابل برداشت بوجھ پڑ جائے گا۔

بینکوں کو پہلے ہی اس حوالے سے بہت نقصان اٹھانا پڑا ہے کہ حکومت کی جانب سے کرونا وبا کے پیش نظر کاروبار بند کیے گئے تھے۔

بینک اس صورت میں قرض کی قسطوں کو ملتوی کر سکتے ہیں اگر حکومت اس کی قیمت برداشت کرے، تاہم اس امر کا امکان اس لیے نہیں ہے کیوں کہ اس کی لاگت بہت زیادہ ہے، گزشتہ ماہ ختم ہونے والی 6 ماہ کی مدت کے دوران یہ لاگت تقریباً 380 ملین کویتی دینار تھی۔

ادھر کویتی حکومت فی الوقت اس اضافی اخراجات کو اس لیے برداشت کرنے سے قاصر ہے کہ اسے عوامی اخراجات کے لیے دستیاب کیش لیکویڈیٹی میں شدید کمی کا سامنا ہے، دوسری طرف خسارہ بھی تاریخی سطح پر بڑھ چکا ہے۔

یہ بھی بتایا جا رہا ہے کہ بینکوں کی جانب سے تنخواہوں میں قسطوں کی کٹوتی کو ملتوی کرنے کی خبریں محض افواہیں ہیں۔

کویت سٹی: کویت میں یہ افواہیں گردش کر رہی تھیں کہ کرونا وائرس کی وبا کی روک تھام کے لیے ایک بار پھر جزوی کرفیو لگایا جا رہا ہے تاہم وزارتِ صحت کی جانب سے اس پر واضح بیان سامنے آ گیا ہے۔

تفصیلات کے مطابق کویت کے وزیر صحت ڈاکٹر باسل الصباح نے ملک میں جزوی کرفیو کے سلسلے میں پھیلی افواہوں پر سخت ردِ عمل ظاہر کرتے ہوئے اپنے ایک بیان میں کہا ہے کہ ایسا کوئی فیصلہ نہیں کیا گیا ہے۔

انھوں نے صحت حکام کے ساتھ ملاقات کے دوران ملک میں ایک بار پھر جزوی پابندی کے اطلاق سے متعلق افواہوں کو مسترد کر دیا۔

کویت کا جزوی کرفیو ختم کرنے کا اعلان

ڈاکٹر باسل نے اپنے وضاحتی بیان میں کہا کہ وزارت صحت کی میٹنگ اتوار کو ہونی تھی جس میں اہم فیصلے متوقع ہیں، تاہم جب کوئی میٹنگ ہی نہیں ہوئی تو جزوی کرفیو سے متعلق فیصلہ کیسے اور کس نے کیا، یہ محض افواہ ہے۔

عاجل/ باسل الصباح لـ«الراي»: عودة الحظر الجزئي إشاعة https://t.co/botd9cQvXN

— الراي (@AlraiMediaGroup) October 10, 2020

یاد رہے کہ کویت نے 31 اگست کو ملک میں 3 ماہ سے جاری جزوی کرفیو ختم کر دیا تھا، یہ جزوی لاک ڈاؤن 28 مئی کو نافذ کیا گیا تھا۔ جزوی لاک ڈاؤن کے تحت شام 6 سے صبح 6 بجے تک جزوی کرفیو ہوتا تھا۔

کویت نے اس سے قبل 20 اپریل سے ملک بھر میں 16 گھنٹے کرفیو نافذ کر دیا تھا، بعد ازاں اس کا دورانیہ مزید بڑھا دیا گیا تھا البتہ اس دوران شام 4 سے رات 8 بجے تک چند محکموں اور اداروں کو کام کرنے کی اجازت تھی۔

کویت: کویتی وزارتِ خزانہ کا کہنا ہے کہ مملکت کو انفرا اسٹرکچر اور تعمیراتی منصوبوں کے لیے تیس برس میں 66 ارب ڈالر کا قرضہ درکار ہوگا۔

تفصیلات کے مطابق کویتی وزیر خزانہ براک الشیتان نے کہا ہے کہ آئندہ 30 برس کے دوران ملک کو 66 ارب ڈالر کے قرضے کی اشد ضرورت ہوگی-

گزشتہ روز کویتی پارلیمنٹ میں مالیاتی و اقتصادی کمیٹی سے ملاقات کے بعد صحافیوں سے گفتگو کرتے ہوئے کویتی وزیر خزانہ نے کہا قومی قرضہ مجموعی قومی پیداوار کا 60 فی صد سے زیادہ نہیں ہوگا۔

ان کا کہنا تھا کہ قرضے کی رقم بنیادی ڈھانچے اور تعمیراتی منصوبوں پر خرچ کی جائے گی۔

کویتی وزیر خزانہ نے بتایا پارلیمانی مالیاتی کمیٹی نے تجویز دی ہے کہ قومی قرضے کی انتہائی حد اور اس کا دورانیہ کم کیا جائے، کویتی حکومت اس تجویز کا جائزہ لے کر جلد جواب دے گی، پارلیمنٹ سے قرضے کا قانون منظور کرانے کے لیے فریقین کے درمیان تعاون ضروری ہے۔

واضح رہے کہ اس سے قبل کویتی وزیر خزانہ نے ارکان پارلیمنٹ کو خبردار کیا تھا کہ سرکاری خزانے میں صرف اکتوبر تک ملازمین کی تنخواہیں دینے کی گنجائش ہے۔

وہ یہ بھی کہہ چکے ہیں کہ تیل کے نرخوں میں کمی اور کرونا بحران وجہ سے قومی بجٹ کا خسارہ 14 ارب دینار تک پہنچ جائے گا، ان مسائل کی وجہ سے کویت بد ترین اقتصادی بحران سے گزر رہا ہے۔