ARYNews.tv | Urdu – Har Lamha Bakhabar

Tag: کو وڈ نائنٹین

  • پاکستان میں کرونا وائرس سے اموات بڑھنے لگیں، ایک دن میں 32 جاں بحق

    پاکستان میں کرونا وائرس سے اموات بڑھنے لگیں، ایک دن میں 32 جاں بحق

    اسلام آباد: نئے اور مہلک وائرس کو وِڈ نائنٹین کی عالمگیر وبا سے پاکستان بھر میں اموات کی تعداد 417 ہو گئی ہے، ملک کے مختلف حصوں میں کرونا وائرس کے تصدیق شدہ کیسز کی تعداد بھی بڑھ کر 18,114 ہو گئی۔

    نیشنل کمانڈ اینڈ آپریشن سینٹر کی جانب سے جاری اَپ ڈیٹ کے مطابق پاکستان میں کرونا وائرس کے کیسز تیز رفتاری کے ساتھ بڑھ رہے ہیں، ملک کے مختلف شہروں میں اس وقت کرونا کے زیر علاج مریضوں کی تعداد 12 ہزار 982 ہے، پاکستان میں 24 گھنٹوں کے دوران کرونا کے 1,297 نئے کیسز رپورٹ ہوئے، جب کہ اب تک 4715 مریض وائرس سے لاحق ہونے والی بیماری سے صحت یاب ہو چکے ہیں۔

    کرونا وائرس: ایک دن میں 1 لاکھ نئے کیسز، ساڑھے 5 ہزار اموات

    کمانڈ سینٹر کا کہنا ہے کہ گزشتہ چوبیس گھنٹوں کے دوران ملک میں مزید 32 اموات رپورٹ ہوئیں، سب زیادہ اموات اب تک خیبر پختون خوا میں ہوئی ہیں جن کی تعداد 161 ہے، اس کے بعد سندھ میں 118 اموات، پنجاب میں 115 اموات، بلوچستان میں 16، گلگت بلتستان میں 3 جب کہ اسلام آباد میں 4 اموات ہوئیں۔

    پنجاب میں کرونا کیسز کی تعداد سب سے زیادہ 6,733 ہو گئی، سندھ میں 6,675 کرونا کیسز رپورٹ ہو چکے ہیں، خیبر پختون خوا میں کیسز کی تعداد 2,799، اسلام آباد میں 365 ہو گئی، بلوچستان میں 1,136، گلگت بلتستان میں 340 کرونا کیسز رپورٹ ہوئے (گزشتہ چوبیس گھنٹوں میں صرف 1 کیس)، آزاد کشمیر میں کیسز کی تعداد 66 (کوئی نیا کیس نہیں) ہے۔

    گزشتہ 24 گھنٹوں کے دوران ملک میں 9 ہزار 164 کرونا ٹیسٹ کیے گئے، این سی او سی کے مطابق ملک میں اب تک کرونا کے 1 لاکھ 93 ہزار 859 ٹیسٹ کیے جا چکے ہیں۔

  • کیا کرونا وائرس کسی لیبارٹری میں بنا؟ تحقیق سے کیا سامنے آیا

    کیا کرونا وائرس کسی لیبارٹری میں بنا؟ تحقیق سے کیا سامنے آیا

    واشنگٹن: امریکی صدر کے دعوؤں کے برعکس امریکا کی انٹیلی جنس کمیونٹی نے کرونا وائرس کی تخلیق کے سلسلے میں بڑا اعتراف کر لیا ہے۔

    غیر ملکی میڈیا کے مطابق امریکا کی انٹیلی جنس کمیونٹی نے اعتراف کیا ہے کہ کرونا وائرس انسان کا تیار کردہ یا مصنوعی طریقے سے پیدا کردہ نہیں ہے۔

    امریکا کے آفس آف دی ڈائریکٹر آف نیشنل انٹیلی جنس نے ایک بیان میں کہا ہے کہ کرونا وائرس کے حوالے سے وسیع سائنسی اتفاق رائے پایا جاتا ہے، یہ کمیونٹی بھی اس سے متفق ہے کہ کو وِڈ نائنٹین جینیاتی ترمیم کا نتیجہ نہیں، نہ ہی یہ وائرس انسان نے بنایا ہے۔

    کرونا وبا کا آغاز ووہان انسٹیٹیوٹ آف وائرولوجی سے ہوا: ٹرمپ

    اعلامیے میں کہا گیا ہے کہ انٹیلی جنس کمیونٹی دستیاب معلومات کا باریک بینی سے جائزہ لینے کے بعد اس نتیجے پر پہنچی کہ کرونا وائرس انسان کا تخلیق کردہ یا مصنوعی طریقے سے پیدا کردہ نہیں ہے۔

    یو ایس انٹیلی جنس ڈائریکٹوریٹ کا کہنا ہے کہ پوری انٹیلی جنس کمیونٹی مسلسل امریکی پالیسی سازوں اور کو وِڈ 19 کا مقابلہ کرنے والوں کو مدد فراہم کرتی رہی ہے، کمیونٹی نے ہمیشہ نیشنل سیکورٹی کرائسز کے دوران تحقیق اور تجزیے کے لیے وسائل کی فراہمی میں اضافہ کیا ہے۔

    بیان میں مزید کہا گیا ہے کہ انٹیلی جنس کمیونٹی سامنے آنے والی خفیہ معلومات کا بھی باریک بینی سے جائزہ لے گی تاکہ یہ معلوم کیا جا سکے کہ کرونا کسی متاثرہ جانور سے پھیلا یا ووہان کی ایک لیبارٹری میں ایک حادثے کا نتیجہ تھا۔

    واضح رہے کہ اس وائرس کے بارے میں پہلے خیال تھا کہ یہ ووہان میں جانوروں کی مارکیٹ سے پھیلا تاہم اب خیال ظاہر کیا جا رہا ہے کہ یہ ممکنہ طور پر قریبی وائرس ریسرچ لیبارٹری سے پھیلا۔

  • عالمگیر وبا نے دنیا تہ و بالا کر کے رکھ دی، مزید ہلاکتیں

    عالمگیر وبا نے دنیا تہ و بالا کر کے رکھ دی، مزید ہلاکتیں

    کراچی: نئے اور مہلک وائرس کو وِڈ نائنٹین سے پھیلنے والی عالمگیر وبا نے دنیا تہ و بالا کر کے رکھ دی ہے، بڑی تعداد میں مزید ہلاکتوں کے بعد مجموعی اموات 1 لاکھ 8 ہزار 837 تک پہنچ گئیں۔

    تفصیلات کے مطابق دنیا بھر میں کرونا کے متاثرہ افراد کی تعداد 17 لاکھ 80 ہزار سے تجاوز کر گئی، وائرس سے اموات 108,837 ہو گئیں جب کہ وائرس سے 4 لاکھ 4 ہزارسے زائد مریض صحت یاب ہو گئے ہیں۔

    امریکا وائرس سے اموات اور متاثرہ افراد کی تعداد کے لحاظ سے سب سے زیادہ متاثرہ ملک ہے، جہاں اب 20 ہزار 580 افراد ہلاک ہو چکے ہیں، جب کہ 5 لاکھ 33 ہزار سے زائد افراد وائرس سے متاثر ہو چکے ہیں۔ دوسرے نمبر پر سب سے متاثرہ ملک اٹلی ہے جہاں کرونا وائرس کے 19,468 مریض جانوں سے ہاتھ دھو چکے ہیں، جب کہ 1 لاکھ 52 ہزار سے زائد افراد متاثر ہوئے ہیں۔

    اسپین میں بھی تیزی سے ہلاکتوں کا اضافہ دیکھنے میں آیا جس کے بعد اب وہ تیسرا ملک بن چکا ہے جہاں سے سب سے زیادہ ہلاکتیں ہوئیں، اب تک 16,606 افراد کو وِڈ نائنٹین کا شکار ہو کر مر چکے ہیں جب کہ 1 لاکھ 63 ہزار سے زائد افراد متاثر ہیں۔ فرانس ہلاکتوں کی تعداد کے لحاظ سے چوتھا سر فہرست ملک ہے جہاں 13,832 مریض ہلاک ہوئے ہیں اور متاثرہ افراد کی تعداد 1 لاکھ 29 ہزار سے زائد ہے۔

    تازہ ترین: کرونا وائرس سے پاکستان میں 86 اموات، کیسز کی تعداد 5038 ہو گئی

    برطانیہ میں کرونا وائرس سے اموات 9875 ہو گئیں، 78 ہزار سے زائد متاثر ہیں، ایران میں کرونا وائرس سے اموات کی تعداد 4375 ہو گئی، جب کہ 70 ہزار سے زائد متاثر ہیں، وائرس سے بیلجیئم میں 3346 افراد ہلاک ہوئے اور 28 ہزار سے زائد متاثر ہیں۔ چین میں اب تک 3339 افراد کرونا وائرس سے ہلاک ہو چکے ہیں جب کہ مجموعی طور پر 82 ہزار سے زائد متاثر ہوئے، خیال رہے کہ کرونا وائرس چین کے شہر ووہان سے دنیا بھر میں پھیلا۔

    جرمنی میں یہ وائرس 2871 جانیں نگل گیا ہے، اور ایک لاکھ 25 ہزار سے زائد متاثر ہیں، نیدرلینڈز میں 2643 جانیں تلف ہو چکی ہیں جب کہ 24 ہزار سے زائد متاثر ہوئے، برازیل میں کرونا سے 1140 اموات ہوئیں اور 20 ہزار سے زائد افراد متاثر ہیں، ترکی میں وائرس 1101 جانیں نگل چکا ہے جب کہ 52 ہزار سے زائد متاثر ہیں، سوئٹزرلینڈ میں 1036 افراد کرونا وائرس سے ہلاک ہوئے اور 25 ہزار سے زائد متاثر ہیں۔

    سوئیڈن میں 887، کینیڈا میں 653، پرتگال میں 470، آسٹریا میں 337، انڈونیشیا میں 327، ایکواڈور میں 315، بھارت میں 288، سعودی عرب میں 52 اموات ہو چکی ہیں۔