Tag: کٹی پہاڑی

کراچی: چار دن قبل کراچی کے علاقے نارتھ ناظم آباد، شارع نور جہاں میں ٹینکر کا ایک خوف ناک حادثہ پیش آیا تھا، جس کی سی سی ٹی فوٹیج سامنے آ گئی ہے۔

تفصیلات کے مطابق 9 نومبر کو نارتھ ناظم آباد میں شارع نور جہاں تھانے کے سامنے ایک ٹینکر تیز رفتاری سے آتے ہوئے بینک میں جا گھسا تھا، اس حادثے میں ایک شخص جاں بحق اور 5 افراد زخمی ہو گئے تھے۔

یہ حادثہ کیسے پیش آیا، اور ٹینکر ڈرائیور کیسے کئی لوگوں کو کچل کر بھاگا، اے آر وائی نیوز نے اس کی سی سی ٹی وی فوٹیج حاصل کر لی، جس میں حادثے کا خوف ناک  منظر دیکھا جا سکتا ہے۔

اُس دن معمول کے مطابق لوگ بل جمع کرنے قطار میں کھڑے تھے جب کٹی پہاڑی سے اترنے والا ٹینکر بے قابو ہو کر تیزی سے بڑھتا ہوا بینک میں جا گھسا، فوٹیج میں بینک کے باہر عوام کو یوٹیلیٹی بل کاؤنٹر پر دیکھا جا سکتا ہے۔

کراچی : تیزرفتار ٹینکر بینک کے اندر جا گھسا، ایک شخص جاں بحق ،5 زخمی

فوٹیج میں دوسری جانب بینک کا سیکورٹی گارڈ بھی دکھائی دے رہا ہے، سیکورٹی گارڈ اور دیگر افراد نے ٹینکر کو بینک کی جانب آتے دیکھا، کئی افراد ادھر ادھر بھاگنے لگے، گارڈ نے بھی بھاگنے کی کوشش کی۔

فوٹیج کے مطابق جیسے ہی حادثہ ہوا، اور ٹینکر بینک میں گھسا، ٹینکر کی ونڈ اسکرین چکناچور ہو گئی، اور ڈرائیور نے کوئی موقع ضایع کیے بغیر فوری طور پر وہاں سے نکل کر راہ فرار اختیار کر لی۔

رپورٹ کے مطابق پولیس تاحال فرار ہونے والے ڈرائیور کر گرفتار نہیں کر سکی ہے۔