ARYNews.tv | Urdu – Har Lamha Bakhabar

Tag: کپتان سرفراز احمد

  • بھارت کے خلاف میچ سے قبل چیمپئنز ٹرافی 2017 کے کوچ کا پاکستانی ٹیم کو پیغام

    بھارت کے خلاف میچ سے قبل چیمپئنز ٹرافی 2017 کے کوچ کا پاکستانی ٹیم کو پیغام

    چیمپئنزٹرافی میں بھارت کے خلاف میچ سے قبل چیمپئنز ٹرافی 2017 کے کوچ مکی آرتھر نے پاکستان کرکٹ ٹیم کیلئے اہم پیغام دیا۔

    پاکستان کرکٹ ٹیم کے سابق کوچ مکی آرتھر نے قومی ٹیم کو پیغام میں کہا کہ پاکستان ٹیم کیلئے ضروری ہے کہ وہ تمام منفی چیزیں دماغ سے نکال دیں۔

    انہوں نے کہا کہ بھارت کیخلاف میچ پاکستان کے لئے ڈو آر ڈائی ہے، پاکستانی کھلاڑیوں کواپنی صلاحیتوں پر بھروسہ کرنا ہوگا۔

    سابق کوچ مکی آرتھرنے مزید کہا کہ اگر وہ خود پر یقین رکھیں گے تو ہر جیز ممکن ہوگی، ایک جیت پاکستان کے لیے ٹورنامنٹ کا نقشہ بدل سکتی ہے۔

    دوسری جانب قومی ٹیم کے سابق کپتان سرفراز احمد نے کہا کہ 29 سال بعد پاکستان میں آئی سی سی کا ایونٹ ہورہا ہے، قوم کو اتنے بڑے ٹورنامنٹ کی ضرورت تھی، اس کے لئے بہترین تیاریاں کی گئی ہیں، پاکستان ہوم گراؤنڈ پر ٹرافی کا دفاع کرے گا۔

    واضح رہے کہ آئی سی سی چیمپئنز ٹرافی کے میچز جاری ہیں جس میں اب تک کا سب سے بڑا مقابلہ پاکستان اور بھارت کے درمیان 23 فروری کو دبئی میں کھیلا جائے گا۔

     

    View this post on Instagram

     

    A post shared by ICC (@icc)

  • سرفراز احمد کی ایکسرے رپورٹ آگئی

    سرفراز احمد کی ایکسرے رپورٹ آگئی

    کوئٹہ گلیڈی ایٹرز کے کپتان سرفراز احمد کی ایکسرے رپورٹ آگئی ہے۔

    کوئٹہ گلیڈی کے کپتان سرفراز احمد گزشتہ روز نسیم شاہ کی گیند پر انجرڈ ہوگئے تھے، ان کی انگلی پر گیند لگی جس کے باعث ان کا ایکسرے کرایا گیا جو اب کلیئر آیا ہے۔

    کیا سرفراز پی ایس ایل 8 کے اگلے میچز کھیلیں گے؟

    ذرائع کا کہنا ہےکہ سرفراز احمد کی انگلی میں کوئی فریکچر نہیں ہے  البتہ ان کی انگلی میں سوجن اور درد ہے۔

    ذرائع کا بتانا ہےکہ ڈاکٹرز شام میں ایک بار پھر سرفراز احمد کا معائنہ کریں گے اور ان کی کل کے میچ میں شرکت کا فیصلہ میچ سے قبل میڈیکل ٹیسٹ کے بعد ہوگا۔

  • بہت زیادہ غلطیاں کیں جس کی وجہ سے میچ ہارے: سرفراز احمد کا اعتراف

    بہت زیادہ غلطیاں کیں جس کی وجہ سے میچ ہارے: سرفراز احمد کا اعتراف

    ٹاؤنٹن: ورلڈ کپ 2019 کے 17 ویں میچ میں آسٹریلیا کے ہاتھوں پاکستان کو 41 رنز سے شکست کے بعد کپتان سرفراز نے اعتراف کیا کہ پاکستان ٹیم نے میچ بہت زیادہ غلطیوں کی وجہ سے ہارا۔

    تفصیلات کے مطابق آسٹریلیا سے میچ ہارنے کے بعد میڈیا سے گفتگو کرتے ہوئے کپتان سرفراز احمد نے کہا کہ بہت زیادہ غلطیاں کیں جس کی وجہ سے میچ ہارے، تاہم پارٹنر شپ طویل ہو جاتی تو میچ کی صورت حال مختلف ہوتی۔

    سرفراز احمد کا کہنا تھا کہ شروع اور درمیان کے اوورز میں ہم نے بولنگ اچھی نہیں کی، آخری 20 اوورز بہت اچھے تھے، جن میں ہم نے کم بیک کیا۔

    کپتان نے کہا کہ ہم اچھا کھیل رہے ہیں، بس تھوڑی غلطیاں ہیں جن پہ قابو پانا ہے، تاہم شاداب خان کو ڈراپ کرنے کا افسوس نہیں ہے۔

    یہ بھی پڑھیں:  ورلڈ کپ2019: آسٹریلیا کے ہاتھوں پاکستان کو 41 رنز سے شکست

    سرفراز کا یہ بھی کہنا تھا کہ شعیب ملک اچھا کھیل سکتے ہیں، مجھے اُمید ہے کہ شعیب ملک وننگ اننگز کھیلنے کی صلاحیت رکھتے ہیں۔

    دریں اثنا، کپتان قومی کرکٹ ٹیم سرفراز احمد نے عزم کا اظہار کیا کہ روایتی حریف بھارت سے میچ جیتنے کے لیے اچھا کھیلیں گے۔

    واضح رہے کہ پاکستانی ٹیم کو میگا ایونٹ میں دوسری بار شکست کا سامنا کرنا پڑا ہے، ٹاؤنٹن کے میدان میں آج پاکستانی ٹیم 308 رنز کے ہدف کے تعاقب میں 266 رنز پر آؤٹ ہو گئی، فاسٹ بولر محمد عامر کی پانچ وکٹیں بھی ضایع گئیں۔

  • محمد عامر ٹیم میں کھیلنے کے لیے بالکل تیار ہیں: کپتان سرفراز احمد

    محمد عامر ٹیم میں کھیلنے کے لیے بالکل تیار ہیں: کپتان سرفراز احمد

    لندن: قومی کرکٹ ٹیم کے کپتان سرفراز احمد نے کہا ہے کہ محمد عامر ٹیم میں کھیلنے کے لیے بالکل تیار ہیں اور کل کے میچ کے لیے دستیاب ہیں۔

    تفصیلات کے مطابق نیوز کانفرنس کرتے ہوئے پاکستان کرکٹ ٹیم کے کپتان نے کہا کہ ورلڈ کپ سے قبل میچز کھیل کر اپنی پرفارمنس کا اندازہ ہو گیا ہے، پرفارمنس ٹیسٹ ہمیں ورلڈ کپ میں نا قابل شکست بنائے گا۔

    کپتان کا کہنا تھا کہ امید ہے ہم شکستوں کے تسلسل کو توڑ دیں گے، اگر ہم ٹاس جیت گئے تو پہلے بیٹنگ کریں گے، میں ٹیم میں پانچویں نمبر پر بیٹنگ کروں گا۔

    سرفراز احمد نے کہا کہ ڈیتھ اوورز میں بیٹنگ کرنی پڑی تو پھر ان کی بیٹنگ آرڈر مختلف ہو سکتی ہے۔

    یہ بھی پڑھیں:  ورلڈ کپ 2019: جنوبی افریقہ کا انگلینڈ کے خلاف ٹاس جیت کر فیلڈنگ کا فیصلہ

    انھوں نے کہا کہ پاکستان کی نمائندگی کرتے ہوئے ملکہ برطانیہ سے مل کر اچھا لگا، ملکہ سے ملاقات اعزاز کی بات ہے، قومی لباس کی نمائندگی پر خوشی ہوئی۔

    کپتان کا کہنا تھا کہ کوشش ہوگی کہ بیٹنگ کرتے ہوئے تین سو پلس بنائیں، ہماری بیٹنگ بری نہیں، انگلینڈ اور پاکستان کے کھیلنے کا انداز مختلف ہے۔

    خیال رہے کہ عالمی کرکٹ کے میگا ایونٹ کا با قاعدہ آغاز آج سے اوول لندن میں ہو گیا ہے، افتتاحی میچ انگلینڈ اور جنوبی افریقا کے درمیان کھیلا جا رہا ہے، افتتاحی میچ میں جنوبی افریقا نے ٹاس جیت کر میزبان انگلینڈ کے خلاف فیلڈنگ کا فیصلہ کیا ہے۔

    پاکستان کرکٹ ٹیم اپنا میچ 31 مئی کو ویسٹ انڈیز کے خلاف کھیلے گی جو پاکستانی وقت کے مطابق دوپہر ڈھائی بجے شروع ہوگا۔

  • ورلڈ کپ میں قومی ٹیم مایوس نہیں کرے گی: کپتان سرفراز احمد

    ورلڈ کپ میں قومی ٹیم مایوس نہیں کرے گی: کپتان سرفراز احمد

    کراچی: پاکستان کرکٹ ٹیم کے عوام میں مقبول چیمپئن کپتان سرفراز احمد اے آر وائی نیوز کے مہمان بن گئے، اے آر وائی اسٹوڈیو میں انھوں نے کیک کاٹا۔

    تفصیلات کے مطابق پاکستان کرکٹ ٹیم کے کپتان سرفراز احمد نے کراچی میں اے آر وائی نیوز کے اسٹوڈیو آ کر اے آر وائی نیوز کے لوگو والا کیک کاٹا اور سیلفیاں بنائیں۔

    سرفراز احمد نے اس موقع پر کہا کہ عوام دعا کریں، ورلڈ کپ میں قومی ٹیم مایوس نہیں کرے گی۔

    خیال رہے کہ چیمپئن کپتان اے آر وائی نیوز کے مہمان بنے تھے، اے آر وائی آمد پر قومی ٹیم کے کپتان کو گل دستہ پیش کیا گیا۔ انھوں نے عوام سے ورلڈ کپ میں پاکستانی ٹیم کے لیے دعا کی درخواست کی۔

    یہ بھی پڑھیں:  مشن ورلڈ کپ، پی سی بی کا پلیئرز فٹنس ٹیسٹ کا اعلان، 23 کھلاڑی طلب

    سرفراز احمد نے اے آر وائی نیوز کا شکریہ ادا کرتے ہوئے کہا ’وعدہ کرتے ہیں کہ پوری کوشش کریں گے، پاکستان کے لیے اچھی پرفارمنس دیں گے۔‘

    خیال رہے کہ گرین شرٹس سرفراز کی قیادت میں مشن ورلڈ کپ 2019 کے لیے 23 اپریل کو انگلینڈ روانہ ہوں گے، جس کے لیے پی سی بی نے پلیئرز فٹنس ٹیسٹ کا اعلان کر دیا ہے اور 23 کھلاڑیوں کو طلب کر لیا گیا ہے۔

    پی سی بی کے مطابق فٹنس ٹیسٹ 15 اور 16 اپریل کو لیا جائے گا، عالمی کپ کے لیے قومی کرکٹ ٹیم کا اعلان 18 اپریل کو کیا جائے گا۔

  • آئی سی سی نے سرفرازاحمد پر4 میچوں کی پابندی لگا دی

    آئی سی سی نے سرفرازاحمد پر4 میچوں کی پابندی لگا دی

    دبئی : آئی سی سی نے نسل پرستانہ جملے کسنے پر قومی کرکٹ ٹیم کے کپتان سرفراز احمد پر 4 میچوں کی پابندی عائد کردی۔

    تفصیلات کے مطابق انٹرنیشنل کرکٹ کونسل نے سماجی رابطے کی ویب سائٹ ٹویٹر پراپنے پیغام میں کہا کہ سرفراز احمد پر4 میچزکی پابندی عائد کردی گئی ہے۔

    سرفراز احمد جنوبی افریقہ کے خلاف ون ڈے سیریز کے بقیہ میچز سمیت 3 ٹی ٹوئنٹی میچز کی سیریز کے ابتدائی دو میچ نہیں کھیل سکیں گے۔

    انٹرنیشنل کرکٹ کونسل کی جانب سے سرفراز احمد پرلگائی گئی پابندی کا باضابطہ اعلان کیا جا چکا ہے۔

    آئی سی سی نے ٹویٹر پر اپنے پیغام میں کہا سرفراز احمد کے خلاف نسل پرستانہ جملوں پر کارروائی کی اور آئی سی سی اینٹی ریس از کوڈ کی خلاف ورزی کے مرتکب پائے گئے ہیں۔

    خیال رہے کہ سرفرازاحمد کی جگہ شعیب ملک قومی کرکٹ ٹیم کی کپتانی کریں گے۔

    سرفرازکی جنوبی افریقا کے کھلاڑی فلک کوائیو سے ملاقات، جملے کسنے پر معافی مانگ لی

    واضح رہے کہ دوسرے ون ڈے میچ کے دوران قومی کرکٹ ٹیم کے کپتان جنوبی افریقی کھلاڑی فلک کوائیو کے خلاف سخت جملے کسنے پر تنقید کی زد میں رہے۔

  • سرفراز واقعے نے کھلاڑیوں کی ہر سطح پر تعلیم کی اہمیت بڑھا دی ہے: پی سی بی

    سرفراز واقعے نے کھلاڑیوں کی ہر سطح پر تعلیم کی اہمیت بڑھا دی ہے: پی سی بی

    لاہور: قومی کرکٹ ٹیم کے کپتان سرفراز احمد کے واقعے پر پی سی بی نے اپنا ردِ عمل ظاہر کر دیا ہے، قومی کرکٹ بورڈ نے نسلی تعصب پر مبنی تبصروں کو نا قابلِ برداشت قرار دے دیا۔

    تفصیلات کےمطابق پاکستان اور جنوبی افریقا کے درمیان ہونے والے دوسرے ون ڈے میچ کے دوران سرفراز احمد نے جنوبی افریقی بلے باز پھلوکوایو پر نسل پرستانہ جملے کسے تھے۔

    [bs-quote quote=”سرفراز قابلِ اعتماد کرکٹر ہے مگر بہ طور کپتان انھوں نے جو کیا وہ درست نہیں۔” style=”style-7″ align=”left” color=”#dd3333″ author_name=”ترجمان پی سی بی”][/bs-quote]

    ڈربن واقعے پر پاکستان کرکٹ بورڈ نے اظہارِ افسوس کرتے ہوئے کہا کہ نسلی تعصب پی سی بی کے لیے نا قابلِ برداشت ہے، کپتان کے کلمات پر افسوس ہوا۔

    پی سی بی کے ترجمان نے کہا کہ سرفراز احمد کے کلمات کی کسی طور پر حمایت نہیں کی جا سکتی، واقعے نے کھلاڑیوں کی ہر سطح پر تعلیم کی اہمیت بڑھا دی ہے۔

    پی سی بی کا کہنا ہے کہ سرفراز قابلِ اعتماد کرکٹر ہے مگر بہ طور کپتان انھوں نے جو کیا وہ درست نہیں، امید ہے سرفراز احمد سے متعلق واقعے کا سیریز پر اثر نہیں پڑے گا۔

    یاد رہے کہ گزشتہ روز دوسرے ون ڈے میچ میں پاکستان کے ہاتھوں سے میچ نکلنے کے بعد کپتان سرفراز احمد دل بر داشتہ ہوئے اور جنوبی افریقا کے بلے باز پھلوکوایو پر نسل پرستانہ جملے کس دیے۔

    یہ بھی پڑھیں:  سرفراز احمد کو نسل پرستانہ جملے کسنا مہنگا پڑ گیا، پابندی کی تلوار لٹکنے لگی

    میچ ریفری رنجن مدھگالے نے اپنی رپورٹ آئی سی سی کو بھیج دی ہے، جس پر سرفراز احمد کو آئی سی سی کی جانب سے تین سے پانچ میچوں کی پابندی کا سامنا کرنا پڑسکتا ہے۔

    واضح رہے کہ قومی کرکٹ ٹیم کے کپتان سرفراز احمد نے جنوبی افریقی کھلاڑی پر نسل پرستانہ جملے کسنے پر سماجی رابطوں کی ویب سائٹ ٹویٹر پر معافی بھی مانگ لی۔

  • بھارت کے خلاف کام یابی کے لیے 100 فی صد پرفارمنس دینا ہوگی، سرفراز احمد

    بھارت کے خلاف کام یابی کے لیے 100 فی صد پرفارمنس دینا ہوگی، سرفراز احمد

    دبئی: پاکستان کے ایشیا کپ 2018 میں فاتحانہ آغاز کے بعد کپتان سرفراز احمد نے کہا ہے کہ ٹیم کو بھارت کے خلاف کام یابی کے لیے 100 فی صد پرفارمنس دینا ہوگی۔

    تفصیلات کے مطابق آج پاکستان کرکٹ ٹیم نے ایشیا کپ میں فاتحانہ آغاز کرتے ہوئے دوسرے گروپ میچ میں ہانگ کانگ کو آٹھ وکٹوں سے شکست دے دی، کپتان نے فتح کے بعد میڈیا سے بات چیت کرتے ہوئے کہا کہ بھارت کے خلاف سو فی صد پرفارمنس دینا ہوگی۔

    قومی ٹیم کے کپتان سرفراز احمد نے کہا کہ ایونٹ میں شروعات اچھی رہی، ہانگ کانگ کے خلاف کھلاڑیوں نے عمدہ کارکردگی دکھائی۔

    کپتان کا کہنا تھا کہ انڈیا کے ساتھ جب بھی میچ ہوتا ہے اہم ہوتا ہے، ہم کوشش کریں گے کہ اس کے ساتھ پہلے میچ میں مومنٹم حاصل کریں، انڈیا کے خلاف پوری تیاری کے ساتھ جائیں گے۔

    خیال رہے کہ میچ سے قبل کپتان سرفراز کا کہنا تھا کہ قومی ٹیم بھرپور تیاری کے ساتھ میدان میں اتر رہی ہے، کسی بھی ٹیم کو فائنل تک رسائی حاصل کرنے کے لیے 5 سے 6 میچ ضرور جیتنے ہوں گے، تمام ٹیمیں ٹائٹل حاصل کرنے کے لیے اچھی کارکردگی دکھائیں گی۔

    یہ بھی پڑھیں:  ایشیا کپ 2018: پاکستان نے ہانگ کانگ کو 8 وکٹوں سے شکست دے دی

    واضح رہے کہ آج دوسرے گروپ میچ میں ہانگ کانگ نے پہلے بیٹنگ کرتے ہوئے 116 رنز بنائے تھے، پاکستان نے 2 وکٹوں کے نقصان پر 24 ویں اوور ہی میں ہدف حاصل کرلیا۔

    بابر اعظم 45 اننگز میں دو ہزار رنز بنانے والے دوسرے پاکستانی بن گئے، اس سے قبل 45 اننگز میں دوہزار رنز کا اعزاز صرف ایشین بریڈ مین ظہیرعباس کے پاس تھا۔

  • سہ ملکی ٹی ٹوینٹی سیریز جیتنے پر سیاست دانوں کی مبارک بادیں اور ٹویٹس

    سہ ملکی ٹی ٹوینٹی سیریز جیتنے پر سیاست دانوں کی مبارک بادیں اور ٹویٹس

    کراچی: پاکستان ٹیم نے آسٹریلیا کو چھ وکٹوں سے شکست دے کر سہ ملکی ٹی 20 سیریز جیت لی، سیاست دانوں نے ٹیم کو مبارک بادیں دیں۔

    تفصیلات کے مطابق چیئرمین پی ٹی آئی عمران خان نے قومی ٹیم کوجیت پر مبارک باد دیتے ہوئے کہا کہ قومی ٹیم نے عمدہ کھیل کا مظاہرہ کیا۔

    عمران خان نے کہا ’میری دعائیں اور نیک تمنائیں قومی ٹیم کے ساتھ ہیں، جیت پر کپتان سرفراز کو خصوصی مبارک باد دیتا ہوں، سرفراز احمد نے ٹیم کی بہترین انداز میں قیادت کی۔‘

    چیئرمین پی پی بلاول بھٹو زرداری کی جانب سے بھی قومی کرکٹ ٹیم کو مبارک باد دی گئی، انھوں نے بیان جاری کرتے ہوئے کہا ’قومی ٹیم نے سہ فریقی سیریز جیت کر عوام کو خوش کر دیا ہے۔‘

    عوامی مسلم لیگ کے صدر شیخ رشید نے ٹویٹ کرتے ہوئے پاکستان زندہ باد کا نعرہ لگایا اور کہا ”لڑکے اچھا کھیلے.“ انھوں نے گراؤنڈ ریالٹی نامی یوزر کی ٹویٹ کو بھی ری ٹویٹ کیا جس میں لکھا تھا کہ ”فخر آسٹریلیا کے خلاف اس طرح کھیلا جس طرح خلائی مخلوق مسلم لیگ ن کے خلاف کھیلی۔“

    پاکستان نے سہ ملکی ٹی ٹوینٹی سیریز جیت لی،آرمی چیف کی مبارکباد

    تحریک انصاف کی خاتون رہنما شیریں مزاری نے ٹویٹ کرتے ہوئے کہا کہ پاکستان ٹیم نے زبردست کارکردگی سے سہ ملکی سیریز میں فتح حاصل کی، بالخصوص آسٹریلیا کے خلاف شان دار جیت دیکھ کر بہت خوشی ہوئی۔

    واضح رہے کہ آج ہرارے میں کھیلے جانے والی سہ ملکی ٹی ٹوینٹی سیریز میں آسٹریلیا کو ہرا کر ٹرافی اپنے نام کرلی، آسٹریلیا نے پاکستان کو جیت کے لیے 184 رنز کا ہدف دیا تھا، جواب میں پاکستان کا آغاز مایوس کن رہا تاہم فخر زمان کی شان دار 91 رنز کی بلے بازی کی مدد سے پاکستان نے آسٹریلیا کو چھ وکٹوں سے شکست دے دی۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • دورانِ میچ کپتان کی ڈانٹ کو اصلاح سمجھتا ہوں، حسن علی

    دورانِ میچ کپتان کی ڈانٹ کو اصلاح سمجھتا ہوں، حسن علی

    اسلام آباد : ابھرتے ہوئے پاکستانی فاسٹ باؤلر حسن علی نے کہا کہ دورانِ میچ کپتان سرفراز احمد کی ڈانٹ سے خفا نہیں ہوتا بلکہ اس سے لطف و اندوز ہوتا ہوں کیوں کہ اس ڈانٹ میں ہماری غلطیوں کی نشاندہی ہوتی ہے۔

    ان خیالات کا اظہار انہوں نے اپنے انٹرویو میں سوال کا جواب دیتے ہوئے کیا، حسن علی کا کہنا تھا کہ کپتان سرفراز احمد کا دوران میچ ڈانٹ ڈپٹ کرنا ہمیں اپنی کارکردگی پر یکسوئی رکھنے میں مددگار ہوتا ہے۔

    ایک روزہ میچ کے بہترین باؤلرز کی فہرست میں اول نمبر پر براجمان حسن علی نے کہا کہ سچی بات یہ ہے کہ مجھے کپتان سرفراز کا یہ انداز بہت پسند ہے میں اُن کی ڈانٹ سے پُر عزم پوتا ہوں اور مزید بہتر کارکردگی دکھانے کی کوشش کرتا ہوں۔

    حسن علی نے کہا کہ ٹیم کے دیگرکھلاڑی بھی اسی طرح برتاؤ کرتے ہیں اور کپتان کی ڈانٹ کو ہدایت سمجھتے ہوئے اس پر پوری طرح عمل درآمد کرنے کی کوشش کرتے ہیں اور کپتان کا یہ انداز ناراضی کا اظہار نہیں بلکہ ان کا سمجھانے کا انداز ہے۔

     باصلاحیت باؤلر کا کہنا تھا کہ میں زندگی سے لطف و اندوز ہوتا ہوں اور کرکٹ میرا عشق اور جنون ہے جب کہ دوران میچ کھلاڑیوں سے ذہنی ہم آہنگی ہے اور پوری ٹیم اپنے کپتان کے ساتھ کھیل میں لطف اندوز ہوتی ہے۔

     خیال رہے کہ سرفراز احمد دوران میچ بہت متحرک نظر آتے ہیں اور وکٹوں کے پیچھے جہاں گیند پر نگاہیں جمائے رکھتے ہیں وہیں وہ کھلاڑیوں پر بھی سخت نگاہ رکھتے ہیں اور غلطی کرنے میں کھلاڑیوں کو ڈانٹتے ہوئے بھی نظر آتے ہیں۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔