کراچی: خام کپاس، کاٹن یارن اور مین میڈیا رن کی درآمد میں ہونے والی بے ضابطگیوں پر آل پاکستان ٹیکسٹائل ملز ایسوی ایشن نے ای ایف ایس اسکیم پر شدید تحفظات کا اظہار کر دیا ہے۔
دوسری طرف کراچی میں پاکستان ویلیو ایڈیڈ ٹیکسٹائل فورم اور ٹیکسٹائل کی ایسوسی ایشنز نے مشترکہ پریس کانفرنس کے دوران ایکسپورٹ فیسیلیٹیشن سسٹم کو ملک کے مفاد میں ایک بہترین سسٹم قرار دے دیا۔
ٹیکسٹائل انڈسٹریز اور اسٹیک ہولڈرز نے صنعت کو بچانے کا مطالبہ کر دیا ہے، آل پاکستان ٹیکسٹائل ملز ایسوی ایشن (اپٹما) نے مطالبہ کیا ہے کہ دھاگے اور کپڑے کو ای ایف ایس سے نکالا جائے۔
چیئرمین اپٹما کامران ارشد نے کہا کہ یہ وقت ہے کہ انڈسٹری کو تالا لگانے کی بجائے دوبارہ بحال کیا جائے، کاٹن پر 18 فی صد جی ایس ٹی ختم کی جائے۔ انھوں نے کہا واضح کیا کہ انڈسٹری بھاری بھر کم ٹیکسوں کے ساتھ نہیں چل سکتی۔
سیمنٹ کی فروخت میں اضافہ ہو گیا، تازہ ترین کاروباری رپورٹ
ایف پی سی سی آئی کے نائب صدر آصف انعام اور ایگریکلچر ٹاسک فورس کے چیئرمین شام لال منگلانی نے کہا کہ جی ایس ٹی کی وجہ سے خریدار نہیں آ رہے، تو کاٹن کون خریدے گا۔ ای ایف ایس کی وجہ سے انڈسٹری تباہ ہو رہی ہے۔ ایسا نہ ہو کہ ہم انڈسٹری بند کر دیں، جس سے بے روزگاری اور بڑھ جائے گی
ٹیکسٹائل انڈسٹری کے رہنماؤں نے حکومت سے مطالبہ کیا کہ ای ایف ایس اسکیم کی خامیوں کو دور کیا جائے اور اس کا غلط استعمال روکا جائے۔ انھوں نے کہا کہ اگر صنعت پر بھاری ٹیکسوں اور بلند لاگت کے مسائل حل نہ ہوئے تو ملک کی برآمدات مزید متاثر ہوں گی، اور بے روزگاری بڑھے گی۔
پی ایچ ایم اے کے صدر محمد بابر خان کا کہنا تھا کہ جب ٹیکس واپس کرنا ہے تو صرف ای ایس ایف پر 18 فی صد ٹیکس لگانے کی کیا ضرورت ہے، ای ایف ایس کی وجہ سے غیر ملکی کپڑا اور دھاگا سستا اور معیاری مل رہا ہے، ای ایف ایس نہ ہوتی تو ایکسپورٹ اور کم ہو جاتی بجلی اور گیس کی وجہ سے ایکسپورٹ کو مسائل کا سامنا ہے۔
پاکستان ویلیو ایڈیڈ ٹیکسٹائل فورم اور ٹیکسٹائل نے دعویٰ کیا کہ ای ایف ایس کو نقصان آئرن سیکٹر کی وجہ سے ہوا، ایف بی آر نے آئرن سیکٹر کو ضرورت سے زیادہ لائسنس جاری کیے۔
