Tag: کچے کے ڈاکوؤں

گھوٹکی : اینٹی وائلنٹ اینڈ کرائم سیل نے کچے کے ڈاکوؤں کا بڑا نیٹ ورک بریک کردیا اور پانچ سال سے کچے کے ڈاکووں کا کھاتہ سنبھالنے والے سنار کو گرفتار کرلیا۔

تفصیلات کے مطابق کراچی میں اے وی سی سینے تکنیکی بنیادوں پر گھوٹکی میں آپریشن کرتے ہوئے کچے کے ڈاکوؤں کے دیسی بینک منیجر کو گرفتار کرلیا۔

ایس ایس پی اے وی سی سی انیل حیدر نے بتایا کہ زیرحراست ملزم سجاد گھوٹکی اوباڑو میں سنار کا کام کرتا ہے، گھوٹکی پولیس کی مدد سے کارروائی کی گئی۔

ایس ایس پی کا کہنا تھا کہ زیرحراست سنار ڈاکوؤں کے ساتھ 5 سال سے کام کررہا تھا، ڈاکو اغوا برائے تاوان کی رقم ایسے ہی لوگوں کے پاس رکھواتے ہیں، ڈاکوؤں کے پیسوں کا ساراحساب کتاب سنار دیکھتےہیں۔

انیل حیدر کا کہنا تھا کہ کچے کے ڈاکوؤں کا سپورٹ نیٹ ورک توڑ دیا ہے ، کچے کے ڈاکو سنار وں کے پاس کبھی سونا کبھی کیش رکھواتے ہیں، ڈکیت گروہ سناروں سے خود رابطے میں رہتے ہیں اور فیملیز کوبھجواتےہیں۔

انھوں نے بتایا کہ ڈاکوؤں کا اپنا شناختی کارڈ بلاک ہوتا ہے، اسی لیے سہولت کاروں کا استعمال کرتے ہیں، عام شخص جیسے بینک اکاؤنٹ کھولتا ہے ڈاکو ایسے سناروں کے پاس کھاتہ کھلواتے ہیں، فصل، بیج، اناج یا دیگر کی خریداری کے لیے ڈاکوؤں کو پیسے سنار دیتے ہیں۔

صادق آباد : کچے کے بیس سے زائد ڈاکوؤں کی نواز مارکیٹ میں لوٹ مار کے دوران فائرنگ کے نتیجے میں دو دکاندار زخمی ہوگئے۔

تفصیلات کے مطابق صادق آباد کی نواز مارکیٹ میں کچے کے بیس سے زائد ڈاکوؤں نے لوٹ مار کی۔

اس دوران ڈاکوؤں کی فائرنگ سے دودکاندارزخمی ہو گئے جبکہ ڈاکو ایک شخص کواغوا کرکے لے گئے۔

پولیس کا کہنا ہے ڈاکوؤں کی تلاش کیلئےسرچ آپریشن جاری ہے۔

ایم پی اے ممتازچانگ نے کہاپولیس نے بروقت کارروائی نہیں کی، اہل علاقہ نے خود ڈاکوؤں سے مقابلہ کیا، علاقے میں پولیس کی چوکیاں خالی تھیں۔

ان کا کہنا تھا کہ واردات سےپولیس کارکردگی کاپول کھل گیا ہے۔

مزید پڑھیں : کچے میں قائم 50 سے زائد پولیس مورچے اہلکاروں سے خالی

خیال رہے سندھ اور پنجاب کے سرحدی علاقوں میں کچے کے ڈاکوؤں نے دہشت پھیلائی ہوئی ہے اور وہ ہنی ٹریپ کے ذریعے ملک بھر سے معصوم لوگوں کو بلا کر اغوا کرتے اور پھر بھاری تاوان وصول کرتے ہیں۔

ان ڈاکوؤں کی سرگرمیوں کو روکنے اور سرکوبی کے لیے صادق آباد کے کچے کے علاقے میں پولیس مورچے قائم کیے گئے ہیں تاہم ان میں سے 50 سے زائد مورچے پولیس اہلکاروں سے خالی ہیں جس کی ویڈیو بھی سامنے آئی تھی۔

پولیس اہلکاروں کی شہادت کے بعد ملازمین نے ڈیوٹی سے انکار کر دیا تھا۔ پولیس گشت نہ ہونے سے اغوا برائے تاوان اور جرائم کی وارداتوں میں اضافہ ہو گیا ہے۔

کراچی : کچے میں موجود دو گروہوں کی بی ٹیم کراچی میں بھیس بدل کر شہریوں کو اغواء کرنے لگی، تین ماہ میں 9 شہریوں کو کچے تک پہنچایا گیا۔

تفصیلات کے مطابق کچے کے ڈاکوؤں کے سہولت کار کراچی سے شہریوں کو اغوا کرکے کچے میں لے جانے لگے، اس حوالے سے ایس ایس پی انسداد اغوابرائے تاوان سیل انیل حیدر کے اہم انکشافات سامنے آئے۔

یہ انکشاف دو ملزمان کی گرفتاری کے بعد ہوا، جنہوں نے دوران تفتیش انکشاف کیا کہ کس طرح اب ڈاکو بھیس بدل کر فیکٹریوں میں کام کرتے ہیں، کچے لوگوں کی زہن سازی کرتے ہیں اچھی نوکری اور مستقبل کا خواب دکھا کر ٹارگٹ کو اپنے ساتھ کچے تک چھوڑ کر واپس فیکٹری آجاتے ہیں اور پھر ایک نیا شکار ڈھونڈ کر زہن سازی میں لگ جاتے ہیں۔

انیل حیدر نے بتایا کہ کراچی میں تین ماہ کے دوران 9 افراد کو کچے تک اغواء کرکے پہنچایا گیا جن میں سے چارمغویوں کو بازیاب کروالیا گیا اور 5 ابھی بھی قید میں ہیں۔

یہ صرف وہ کیسز ہیں جو رپورٹ ہوئے تھے، ڈاکووں کی جانب سے 1 کروڑ سے زائد تاوان مانگا جاتا ہے اور اب تاوان میں مہنگے والے موبائل فون بھی مانگتے ہیں۔

ان کا کہنا تھا کہ ہنی ٹریپ کے زریعے شادی نوکری اور دیگر کا لالچ دے کربھی اغواء کیا جارہا ہے، کراچی میں موجود سہولت کار باقاعدہ ٹارگٹ کا جائزہ لیتے ہیں، وہ بتاتے ہیں کہ ٹارگٹ کی خواہش کیا ہے وہ کیا چاہتا ہے، واٹس ایپ پر ہدف کو وہی میسج آتا ہے جو وہ سوچ رہا ہوتا ہے۔

انیل حیدر نے یہ بھی انکشاف کیا کہ شادی کے جھانسے میں اغواء ہونے والے زیادہ تر بزرگ ہیں، لوگ اپنوں پر نظر رکھیں جو موبائل چھپ کر زیادہ استعمال کررہا ہے کہیں وہ ڈاکو یا ہنی ٹریپ کا شکار نا ہورہا ہے۔

سکھر : کچے کے ڈاکوؤں نےرشتے کا جھانسہ دے کر پورا خاندان اغوا کرلیا، جس میں دو مرد دو خواتین اور چار بچے شامل ہیں۔

تفصیلات کے مطابق سکھر کے رہائشی خاندان کو رشتے کا جھانسہ دیکر مبینہ طور پر اغوا کرلیا گیا، مائیکرو کالونی کے رہائشی اعجاز سیال نے خاندان کے 8 افراد کے لاپتہ ہونے کی نیوپند تھانے پر اطلاع دی ہے۔

سکھر پولیس نے بتایا کہ مائیکرو کالونی کے رہائشی خاندان کو شکارپور میں رشتے کا جھانسہ دیکر بلایا گیا لاپتہ ہونے والے خاندان کے آٹھ افراد کو شکارپور کے ناپر کوٹ تھانے کی حدود سے اغوا کیا گیا ہے۔

مبینہ طور پر اغوا ہونے والوں میں دو مرد دو خواتین اور چار بچے شامل ہیں، اغوا ہونے والوں میں 16 سالہ مجیب ، 30 سالہ فھیم ، 28 سالہ امبرین 50 سالہ غزالہ ، 5 سالہ عائشہ ، چار سالہ سارا ، 4 سالہ یوسف اور ایک سال کی سمرین شامل ہیں۔

رشتہ دیکھنے کیلئے جانے والا خاندان انڈس ہائی وے پر کرمپور لاڑو کے مقام پر پہنچا، جہاں سے انہیں ایک شخص اپنے ساتھ لے گیا جس کے بعد خواتین نے کال کر کے سکھر میں گھر والوں کو بتایا کہ انہیں اغوا کرلیا گیا ہے۔

پولیس نے تحقیقات شروع کردی ہے اور موبائل نمبرز کے ذریعے لوکیشن معلوم کر رہے ہیں جبکہ شکارپور پولیس سے بھی مسلسل رابطہ کر کے مغویوں کی باحفاظت بازیابی کیلئے کوششیں کر رہے ہیں۔

مردان کے رہائشی کو مبینہ طور پر کچے کے ڈاکوؤں نے اغوا کرلیا، اغوا ہونے والے کی اہلیہ نے بتایا دس لاکھ روپے تاوان مانگ رہے ہیں۔

تفصیلات کے مطابق مردان کا رہائشی مبینہ طور پر سندھ میں کچے کے ڈاکوؤں کے ہاتھوں اغوا ہوگیا، اغوا ہونے والے کی اہلیہ کا کہنا ہے ڈاکوؤں نے پہلے پانچ لاکھ روپے تاوان مانگا تھا، اب دس لاکھ روپے تاوان مانگ رہے ہیں۔

اغوا ہونے والے شہری کی اہلیہ نے نیوزکانفرنس میں بتایا ان کے شوہر شاہ نسیم کو ایک ماہ قبل فیس بک پرکسی نے روزگار کے بہانے بلایا تھا، کچھ دنوں بعد نامعلوم شخص کا ٹیلی فون آیا، جس نے کہا شاہ نسیم ہمارےقبضےمیں ہے، زندہ دیکھنا چاہتی ہو تو پچاس لاکھ روپےکا انتظام کرو۔

خاتون کا کہنا ہے وہ گھروں میں برتن مانجھ کربچوں کی پرورش کررہی ہے، لاکھوں روپے تاوان کہاں سے لائے۔

خاتون کے مطابق پانچ دن پہلے شوہرکا فون آیا تھا، اس نے بتایاجنگل میں قید ہوں، ڈاکوؤں کی تشدد سے ٹانگ ٹوٹ گئی ہے۔

ان کا کہنا تھا کہ اغواکاروں کے نمبرکا پتاچلایا تووہ حیدرآباد کے کسی شخص کےنام ہے، ڈاکو اب دس لاکھ تاوان مانگ رہے ہیں۔