Tag: کھیل کھلاڑی

لاہور: پاکستان کے سابق کپتان عامر سہیل نے آل راؤنڈر شاہد خان آفریدی کے حوالے سے کہا ہے کہ ورلڈ کپ 1999 میں ان کا انتخاب تباہ کن فیصلہ تھا۔

تفصیلات کے مطابق بائیں ہاتھ سے کھیلنے والے سابق پاکستانی بیٹسمین عامر سہیل نے حال ہی میں ایک یوٹیوب ویڈیو میں آئی سی سی ورلڈ کپ 1999 میں پاکستان کی ناکامی کے پیچھے موجود وجوہ سے متعلق بات کی ہے۔

53 سالہ سابق کھلاڑی عامر سہیل نے کہا کہ وہ ورلڈ کپ کے لیے آل راؤنڈر شاہد آفریدی کے انتخاب اور سعید انور کے ساتھ اوپنر بھیجے جانے کے خلاف تھے۔

سہیل کے مطابق شاہد خان آفریدی انگلش کنڈیشنز میں بیٹنگ کا آغاز کرنے کے لیے موزوں آپشن نہیں تھے، کیوں کہ وہاں کی کنڈیشنز آفریدی کے کھیل کے انداز کو سپورٹ نہیں کرتی تھیں۔ انھوں نے مزید کہا کہ وہ محمد یوسف کے حق میں تھے کہ وہ پاکستان کے لیے بیٹنگ کا آغاز کریں اور نئی گیند کے خطرے کو دیکھیں۔

انھوں نے کہا کہ جب میں 1998 میں کپتان تھا تو ہم نے سلیکٹرز کے ساتھ یہ فیصلہ کیا تھا کہ ورلڈ کپ کے لیے ہمارے پاس باقاعدہ اوپنرز ہونے چاہیئں، جو وکٹ پر ٹھہر سکتے ہوں اور نئی گیند کے ساتھ کھیل سکتے ہوں۔

عامر سہیل کا خیال ہے کہ یہ بدقسمتی تھی کہ سلیکٹرز نے آفریدی کو مشکل حالات میں بیٹنگ اوپن کرنے کے لیے منتخب کیا۔

انھوں نے کہا بدقسمتی سے شاہد آفریدی کا انتخاب کیا گیا، جب کہ وہ ان پچز پر کھیلنے کی صلاحیت رکھتے تھے جو زیادہ باؤنسی نہ ہوں، جہاں وہ بولرز کی اچھی پٹائی کر سکتے تھے اور مخالف کو دباؤ میں لا سکتے تھے، لیکن مشکل حالات میں یہ ایک بڑا جوا تھا۔

عامر سہیل نے کہا آفریدی نہ تو باؤلنگ کرنے کے قابل تھے نہ ہی بیٹنگ کے، اگر وسیم اکرم کی جگہ میں کپتان ہوتا تو میں ان کی جگہ محمد یوسف کو ترجیح دیتا۔

ان کا کہنا تھا کہ ورلڈ کپ ہارنے کی دو وجوہ تھیں، ایک تو انھوں نے بہترین ٹیم کمبی نیشن نہیں بنایا، اور دوم یہ کہ فائنل میں ٹاس جیتنے کے بعد بیٹنگ کرنے کا فیصلہ کیا، جہاں لندن میں سارا دن بارش ہوتی رہی تھی۔

کراچی: سابق آسٹریلوی کرکٹر بریڈ ہوگ نے انگلینڈ ٹیم کو پاکستانی اسکواڈ کی صلاحیت کے حوالے سے خبردار کر دیا۔

تفصیلات کے مطابق سابق آسٹریلوی اسپنر بریڈ ہوگ نے انگلینڈ کو خبردار کیا ہے کہ پاکستان اسکواڈ اس کے خلاف اپ سیٹ کر سکتا ہے۔

کرکٹ کے تمام فارمیٹ کھیلنے والے سابق آسٹریلوی کرکٹر کا کہنا تھا کہ انگلینڈ ٹور کے لیے منتخب کیا گیا 29 رکنی پاکستانی اسکواڈ میزبان ٹیم کو اس کے میدان میں ہرانے کی صلاحیت رکھتا ہے۔

بریڈ ہوگ دو مرتبہ ورلڈ کپ جیتنے والی آسٹریلوی ٹیم میں شامل رہے ہیں، انھوں نے ایک ٹویٹ میں لکھا کہ مجھے امید ہے گرین شرٹس پوری طرح تیار ہیں اور سیریز بہت دل چسپ رہے گی۔

A squad that can cause an upset. Hopefully they can get some quality practice in before they leave for England. It’s looks to be a great tour. #EngvPak #ciricket #ECB #Pakistancricket https://t.co/iQHEhJfoOs

— Brad Hogg (@Brad_Hogg) June 12, 2020

انھوں نے پاکستانی اسکواڈ سے امید وابستہ کرتے ہوئے کہا کہ یہ اپ سیٹ کر سکتا ہے، اور امید ہے کہ انگلینڈ کے لیے روانہ ہونے سے قبل اسے معیاری پریکٹس بھی ملے گی۔

قومی کرکٹ ٹیم کی انگلینڈ روانگی کا شیڈول تیار

دریں اثنا، پاکستان انڈر 19 کے بیٹسمین حیدر علی کو بھی انگلینڈ کے خلاف 3 ٹیسٹ اور 3 ٹی ٹوئنٹی میچز سیریز کے لیے 29 رکنی اسکواڈ میں شامل کیا گیا ہے، جو اگست اور ستمبر میں کھیلی جائیں گی۔

Well done on you’re international call up!!🇵🇰 @iamhaideraly pic.twitter.com/vUZpIuEIfH

— Tom Banton (@TBanton18) June 12, 2020

انگلینڈ ٹیم کے دھواں دار بلے باز اور پشاور زلمی میں حیدر علی کے ساتھی کھلاڑی ٹام بینٹن نے انگلینڈ کے خلاف پاکستانی اسکواڈ میں شامل کیے جانے پر حیدر علی کو مبارک باد دی ہے۔ ٹام بینٹن نے ٹویٹر اکاؤنٹ پر لکھا کہ انٹرنیشنل کال پر آپ کو شاباش ہے۔

واضح رہے کہ حیدر علی کا 2019-20 کا سیزن زبردست رہا، جس کی وجہ سے انھیں 2020-21 سیزن کا کنٹریکٹ بھی ملا۔

بلغراد: سربیا کے ایک مشہور فٹبالر نے ڈپریشن سے تنگ آ کر خود کشی کر لی۔

غیر ملکی میڈیا کے مطابق سربیا کے 38 سالہ فٹبال کھلاڑی میلیان مرداکووِچ نے اپنے سر میں گولی مار کر خود کشی کر لی ہے، وہ کچھ عرصے سے ذہنی دباؤ اور پریشانیوں میں مبتلا تھے۔

متعدد فٹبال کلبز کی جانب سے کھیلنے والے ریٹائرڈ معروف اسٹرائیکر بلغراد کے اپارٹمنٹ میں مردہ پائے گئے تھے، ان کی دوست کا کہنا تھا کہ میلیان نے بہت زیادہ شراب نوشی شروع کر دی تھی اور وہ ذہنی دباؤ کا شکار تھے۔

میلیان کی دوست اور سنگر ایوانا اسٹانک کا کہنا تھا کہ وہ ڈپریشن میں مبتلا ہو گیا تھا، جس کی وجہ سے اس نے خود کشی کر لی۔

انھوں نے میڈیا کو بتایا کہ کیریئر کے خاتمے پر وہ پیدا ہونے والے مسائل سے نبرد آزما تھا، کیوں کہ فٹبال ہی اس کے لیے سب کچھ تھا، اس نے ایجنٹ کے طور پر کام شروع کیا لیکن یہ ایسا کام ہے جس میں کبھی آمدن ہوتی ہے اور کبھی نہیں، جس کی وجہ سے وہ ذہنی پریشانی کا شکار ہو گیا تھا۔

ایوانا کا کہنا تھا کہ خودکشی سے ایک دن قبل میلیان نے کچھ زیادہ ہی شراب پی لی تھی، مجھے لگا کہ کچھ غلط ہونے کو ہے، اگلی صبح اس نے پھر شراب پی، ایسے میں جب میں نے ایک پستول اس کے سرہانے دیکھی تو میں سناٹے میں آ گئی۔ میں نے روتے ہوئے اس سے کہا کہ پستول یہاں سے ہٹا دے، اور پھر اس کی ماں کو بھی فون کر کے بیٹے سے بات کرنے کو کہا۔

ایوانا کے مطابق انھیں اس بات کا دھڑکا لگا ہوا تھا کہ میلیان کہیں کچھ کر نہ بیٹھے، میں اپارٹمنٹ ہی میں تھی اور بار بار اس پر نگاہ دوڑا رہی تھی کہ وہ کیا کر رہا ہے، پھر اچانک گولی چلنے کی آواز آئی، میں دوڑ کر باہر گئی اور طبی امداد طلب کی، لیکن وہ مرچکا تھا۔