ARYNews.tv | Urdu – Har Lamha Bakhabar

Tag: کھیل کی خبریں

  • آئی سی سی رینکنگ: ثنا میر صف اول کی خاتون بولر بن گئیں

    آئی سی سی رینکنگ: ثنا میر صف اول کی خاتون بولر بن گئیں

    دبئی: انٹرنیشل کرکٹ کونسل نے خواتین کی ون ڈے رینکنگ جاری کردی۔ پاکستانی خواتین کرکٹ ٹیم کی سابق کپتان ثنا میر صف اول کی خاتون بولر بن گئیں۔

    تفصیلات کے مطابق انٹرنیشل کرکٹ کونسل نے خواتین کی ون ڈے رینکنگ جاری کردی۔

    خواتین بولرز میں پہلی 3 میں سے 2 پوزیشن پاکستان کے پاس ہیں۔ خواتین کرکٹ ٹیم کی سابق کپتان ثنا میر صف اول کی خاتون بولر بن گئیں۔

    ثنا میر رینکنگ میں 663 ریٹنگ پوائنٹس کے ساتھ سرفہرست ہیں۔

    خیال رہے کہ آسٹریلیا کے خلاف جاری سیریز میں ثنا میر نے 7 وکٹیں حاصل کیں۔

    سنہ 2005 میں سری لنکا کے خلاف اپنے کرکٹ کیریئر کا آغاز کرنے والی ثنا اب تک 108 ون ڈے میچز کھیل چکی ہیں۔

    108 ون ڈے میچز میں ثنا 1 ہزار 4 سو 91 رنز بنا چکی ہیں جبکہ انہوں نے 127 وکٹیں حاصل کی ہیں۔

    دوسری طرف ٹی 20 بولرز کی رینکنگ میں پاکستان ویمن ٹیم کی ایک اور کھلاڑی انعم امین بھی شامل ہیں جو تیسرے نمبر پر ہیں۔

  • تیسری گوادرآف روڈ جیپ ریلی کا آغازہوگیا

    تیسری گوادرآف روڈ جیپ ریلی کا آغازہوگیا

    گوادر میں منعقد ہونے والی تیسری آف روڈ جیپ ریلی 2018کا آج سے آغاز ہوگیا ہے ، ریلی میں خواتین ڈرائیور بھی حصہ لے رہی ہیں۔

    تفصیلات کے مطابق 19 اکتوبر سے 21 اکتوبر تک جاری رہنے والی آف روڈ جیپ ریلی کا افتتاح کردیا گیا ہے ، ریلی پاک آرمی اور ایک نجی ادارے کی معاونت سے منعقد کی گئی ہے۔

    ایونٹ کا کوالیفائنگ راؤنڈ آج ہوگا، ریلی میں 150 سے زائد ڈرائیورز حصہ کے رہے ہیں جن میں ریسنگ کی دنیا کے جانے پہچانے نام نادر مگسی اور صاحبزادہ سلطان بھی شامل ہیں۔

    ریلی میں گوادر ہی سے تعلق رکھنے والے 25 ریسرز بھی شریک ہیں جبکہ ایونٹ میں 5 خواتین ڈرائیورز بھی شریک ہیں جیپ ریلی کی تاریخ میں پہلی بار اتنی بڑی تعداد میں خواتین ڈرائیورز شرکت کررہی ہیں۔

    آف روڈ جیپ ریلی 2018

    جیپ ریلی کا ڈرائیونگ ٹریک 240 کلومیٹر طویل ہے اور گوادر ، پشوکان، گنز اور جیوانی سے ہوتا ہوا گزرتا ہے۔ایونٹ کے اختتام پر میوزک کنسرٹ کا بھی اہتمام کیا گیا ہے جس میں معروف گلوکار عاطف اسلم کی آمد بھی متوقع ہے۔

    یاد رہے کہ اس سے قبل بھی حب، تھل اور خیبر ایجنسی میں جیپ ریلیوں کا انعقاد کیا جاچکا ہے ، ایونٹ کا مقصد پاکستان میں ریسنگ گیم کو فروغ دینا اور ملک کا مثبت تاثر پیش کرنا ہے۔

  • دانش کنیریا نے 6 سال بعد انگلش کرکٹ بورڈ کے الزمات تسلیم کرلیے

    دانش کنیریا نے 6 سال بعد انگلش کرکٹ بورڈ کے الزمات تسلیم کرلیے

    لندن: سابق پاکستانی لیگ اسپنر دانش کنیریا نے 6 سال بعد انگلش کرکٹ بورڈ کے الزمات تسلیم کرلیے۔ انہوں نے تمام پاکستانیوں، مداحوں اور کاؤنٹی کے ساتھیوں سے معذرت بھی طلب کی۔

    تفصیلات کے مطابق عرب ٹی وی کو انٹرویو میں سابق پاکستانی لیگ اسپنر دانش کنیریا نے اپنےجرائم کا اعتراف کرلیا۔

    کنیریا کا کہنا تھا کہ وہ انگلش کرکٹ بورڈ کے عائد دونوں چارجز میں ملوث ہونے کا اعتراف کرتے ہیں۔

    انہوں نے کہا کہ میرون ویسٹ فیلڈ دولت کمانا چاہتا تھا، میرا فرض تھا کہ برطانوی حکام کو خبردار کرتا، لیکن ایسا نہیں کیا۔

    انہوں نے اعتراف کیا کہ جان بوجھ کر میرون ویسٹ فیلڈ کو مشکوک شخص انو بھٹ سے ملوایا۔

    دانش نے کہا کہ والد کی بیماری کی وجہ سے غلطی کے اعتراف کا حوصلہ نہیں تھا، لیکن جو کچھ ہوا اس پر سخت ندامت ہے، اپنی غلطی سے عزت، مقام اور دوست سب کچھ کھو دیا۔ جھوٹ کے ساتھ ساری زندگی نہیں گزاری جا سکتی۔

    انہوں نے کہا کہ تمام پاکستانیوں، مداحوں اور کاؤنٹی کے ساتھیوں سے معذرت خواہ ہوں۔

    خیال رہے کہ دانش کنیریا پر انگلش کرکٹ بورڈ نے فکسنگ پر اکسانے پر تاحیات پابندی عائد کی تھی۔

    دانش کنیریا نے سنہ 2000 میں بھارت کے خلاف ٹیسٹ ڈیبیو کیا تھا جبکہ 2001 میں زمبابوے کے خلاف ون ڈے ڈیبیو کیا تھا۔ انہوں نے اپنا آخری میچ سنہ 2010 میں آسٹریلیا کے خلاف کھیلا۔

    کنیریا نے مجموعی طور پر 64 ٹیسٹ میچز اور 18 ون ڈے میچز کھیلے۔ ٹیسٹ کرکٹ میں انہوں نے 261 وکٹیں حاصل کی تھیں۔

  • دوسرا ٹیسٹ: امام الحق کی جگہ فخر زمان کو ٹیم میں شامل کرنے کا فیصلہ

    دوسرا ٹیسٹ: امام الحق کی جگہ فخر زمان کو ٹیم میں شامل کرنے کا فیصلہ

    دبئی: آسٹریلیا کے خلاف دوسرے ٹیسٹ میں امام الحق کی جگہ فخر زمان کو اسکواڈ میں شامل کرنے کا فیصلہ کیا گیا ہے۔

    تفصیلات کے مطابق قومی ٹیم کے کپتان سرفراز احمد کا کہنا ہے کہ پہلے ٹیسٹ میں اچھی پرفارمنس رہی لیکن افسوس کہ جیت نہیں سکے۔

    انہوں نے کہا کہ دوسرے ٹیسٹ میں بھی بہترین کھیل پیش کرنے کی کوشش کریں گے، دوسرے ٹیسٹ کو جیتنے کی بھرپور کوشش کریں گے۔ ٹیم کا مورال بلند ہے، پہلے ٹیسٹ سے بہت کچھ سیکھنے کو ملا۔

    سرفراز احمد نے بتایا کہ وہاب ریاض کی جگہ شاداب خان کو موقع دیا جائے گا، میر حمزہ کو بھی ڈیبیو کا موقع دیا جا سکتا ہے۔

    انہوں نے کہا کہ ابو ظہبی کی وکٹ بھی دبئی جیسی ہوگی، شکست کا کوئی خوف نہیں، پر اعتماد ہو کر کھیلیں گے۔

    سرفراز احمد نے کہا کہ جانتا ہوں میں اسکور نہیں کر رہا لیکن کم بیک کے لیے محنت کر رہا ہوں، ’میرے مزاج میں کوئی تبدیلی نہیں آئی ہے‘۔

    خیال رہے کہ پاکستان اور آسٹریلیا کے درمیان ٹیسٹ میچوں کی سیریز جاری ہے جس میں سے پہلا بے نتیجہ ختم ہوگیا تھا۔

  • آسٹریلیا کا شان دار کم بیک، سنسنی خیز مقابلے کے بعد دبئی ٹیسٹ بے نتیجہ ختم

    آسٹریلیا کا شان دار کم بیک، سنسنی خیز مقابلے کے بعد دبئی ٹیسٹ بے نتیجہ ختم

    دبئی: پاکستان اور آسٹریلیا کا ٹیسٹ میچ  سنسنی خیز مقابلے کے بعد بغیر کسی نتیجے کے ختم ہوگیا۔

    تفصیلات کے مطابق دبئی میں جاری ٹیسٹ میچ میں آسٹریلیا نے شان دار بیٹنگ کرتے ہوئے حیران کن کم بیک کیا۔

    پاکستان نےآسٹریلیاکوجیت کے لئے462 رنزکاہدف دیا تھا۔ آخری دن کے آغاز پر  پاکستان کو جیت کے لیے 7 وکٹیں، آسٹریلیا کو 326 رنز درکار تھے۔

    بہ ظاہر پاکستان کا پلڑا بھاری تھا، البتہ آسٹریلیا نے اعتماد سے بیٹنگ کی۔ عثمان خواجہ 141 رنزبناکرنمایاں رہے، آسٹریلوی کپتان ٹِم پین61 رنز بناکر ناٹ آؤٹ رہے۔  دوسری اننگز میں یاسرشاہ نے چار، محمدعباس نے تین وکٹیں حاصل کیں۔

    آخری دس اوورز میں پاکستان کو دو وکٹیں درکار تھیں، مگر آسٹریلوی بلے باز اعتماد سے بیٹنگ کرتے رہے۔  میچ کے اختتام پر آسٹریلیانے 8 وکٹوں پر 362رنزبنائے۔

    گذشتہ روز آسٹریلیا نے 462 رنز ہدف کے تعاقب کے لیے اننگز کا آغاز کیا تو اوپنرز نے اچھی شراکت قائم کی آسٹریلیا کی پہلی وکٹ 87 رنز پر گری جب ایرون فنچ 49 رنز بنا کر آؤٹ ہوئے، شان مارش اور مچل مارش بغیر کوئی رن بنائے پویلین لوٹ گئے۔

    عثمان خواجہ 50 اور ہیڈ 34 رنز کے ساتھ کریز پر موجود ہیں، پاکستان کی جانب سے محمد عباس نے شاندار بولنگ کا مظاہرہ کرتے ہوئے تین کینگروز کھلاڑیوں کو پویلین کی راہ دکھائی۔

    قبل ازیں پاکستان نے دوسری اننگز 181 رنز پر ڈکلیئر کردی ہے اور آسٹریلیا کو جیت کے لیے 462 رنز کا ہدف دیا ہے۔

    خیال رہے کہ پاکستانی ٹیم پہلی اننگ میں حارث سہیل اور محمد حفیظ کی شاندار سنچری کی بدولت 482 رنز پر آل آؤٹ ہوگئی۔

    تیسرے روز آسٹریلیا کی ٹیم 202 رنز پر ڈھیر ہوگئی، پاکستان نے کینگروز کو فالو آن نہ کروا کر خود بیٹنگ کا فیصلہ کیا تو 45 رنز پر تین وکٹیں گر گئیں، تیسرے روز کھیل کے اختتام پر قومی ٹیم نے 325 رنز کی برتری حاصل کرلی۔

    یاد رہے کہ پاکستان اور آسٹریلیا کے درمیان پہلے ٹیسٹ میچ کے لیے پاکستانی ٹیم میں امام الحق، اظہر علی، محمد حفیظ، بابر اعظم، اسد شفیق، حارث سہیل، کپتان سرفراز احمد، بلال آصف، یاسر شاہ، وہاب ریاض، محمد عباس اور میر حمزہ بطور 12 ویں کھلاڑی شامل ہیں۔

    آسٹریلوی ٹیم میں 3 کھلاڑیوں نے ڈیبیو کیا جن میں ایرون فنچ، ٹریوس ہیڈ اور مارنس لیوسکا گنی شامل ہیں۔

    آسٹریلوی ٹیم کی کپتانی ٹم پین کر رہے ہیں جبکہ شان مارش ان کے نائب کے فرائض انجام دیتے ہوئے دکھائی دیے۔ دیگر کھلاڑیوں میں ایرون فنچ، عثمان خواجہ، مچل مارش، مارنس لیوسکاگنی، ٹریوس ہیڈ، مچل اسٹارک، نیتھن لیون پیٹرسڈل اور جان ہولینڈ شامل ہیں۔

    آسٹریلیا کی بال ٹیمپرنگ کے معاملے کے بعد یہ پہلی ٹیسٹ سیریز ہے اور اسے ٹیم کے لیے کرکٹ کے میدان میں اپنی کھوئی ہوئی ساخت واپس بحال کرنے کے لیے اہم میچ سمجھا جا رہا ہے۔

  • آسٹریلوی ٹیم میں تجربہ کار اور پاکستانی ٹیم میں نئے کھلاڑی ہیں: سرفراز احمد

    آسٹریلوی ٹیم میں تجربہ کار اور پاکستانی ٹیم میں نئے کھلاڑی ہیں: سرفراز احمد

    لاہور: قومی کرکٹ ٹیم کے کپتان سرفراز کا کہنا ہے کہ آسٹریلیا کی ٹیم میں تجربہ کار کھلاڑی ہیں جبکہ پاکستان کی ٹیم نئے کھلاڑیوں پر مشتمل ہے۔ ایشیا کپ ماضی کا حصہ بن چکی ہے۔

    تفصیلات کے مطابق قومی کرکٹ ٹیم کے کپتان سرفراز احمد کا کہنا ہے کہ آسٹریلیا کی ٹیم میں تجربہ کار کھلاڑی ہیں، پاکستان کی ٹیم نئے کھلاڑیوں پر مشتمل ہے۔ ٹیسٹ کرکٹ مختلف فارمٹ ہے، محتاط ہو کر کھیلنا ہوگا۔

    انہوں نے کہا کہ بولنگ اور بیٹنگ میں بہتری کے لیے حکمت عملی بنائی ہے، ایشیا کپ ماضی کا حصہ بن چکی ہے۔ ٹیم سلیکشن سب کی مشاورت سے کی جاتی ہے۔

    قومی ٹیم کے کپتان کا کہنا تھا کہ ہم نے ابھی 8 ٹیسٹ کھیلنے ہیں، تجربہ حاصل ہوگا۔ ٹیسٹ کرکٹ کھیلنے سے کارکردگی میں بہتری آتی ہے۔ آسٹریلوی ٹیم اچھی ہے، امید ہے ہم ان کے خلاف بہتر کھیلیں گے۔

    انہوں نے کہا کہ میچز میں کامیابی کے لیے بلے بازوں کو بڑی اننگز کھیلنا ہوگی۔ وقت کے ساتھ بہت کچھ سیکھا ہے۔ کوشش ہے کہ آسٹریلیا کے خلاف اچھا پرفارم کریں۔

    سرفراز نے بتایا کہ یاسر شاہ فرسٹ کلاس کرکٹ کھیل رہے تھے، فرسٹ کلاس کرکٹ میں یاسر شاہ کی کارکردگی اچھی رہی۔ یاسر شاہ ماضی کی طرح اب بھی کامیابی میں اہم کردار ادا کریں گے۔

    انہوں نے کہا کہ محمدحفیظ کی کارکردگی اچھی ہے اسی لیے ٹیم میں شامل کیا، آسٹریلیا کے خلاف دونوں ٹیسٹ میچز میں کامیاب ہوں گے۔

    خیال رہے کہ پاک آسٹریلیا ٹی 20 سیریز کا آغاز 7 اکتوبر سے ابوظہبی میں ہوگا، دوسرا ٹیسٹ 16 اکتوبر سے ہوگا۔

    ادھر قومی کرکٹ ٹیم کے لیگ اسپنر شاداب خان انجری کے باعث آسٹریلیا کے خلاف پہلے ٹیسٹ میچ سے باہر ہوگئے ہیں۔

  • یاک پولو- ایسا کھیل جو صرف پاکستان میں کھیلا جاتا ہے

    یاک پولو- ایسا کھیل جو صرف پاکستان میں کھیلا جاتا ہے

    چترال: بادشاہوں کا کھیل یعنی پولو عام طور پر گھوڑوں کی پشت پر سوار ہوکر دنیا بھر میں ہر جگہ کھیلا جاتا ہے ، مگر یاک یعنی جنگلی بیل پر پولو صرف اور صرف وادی بروغل میں کھیلا جاتا ہے جو سطح سمندر سے 12500 فٹ کی بلندی پر واقع ہے۔

    یاک پولو میں بھی حسب معمو ل چھ ، چھ کھلاڑی ہوتے ہیں مگر یہ سواری اتنی تیز نہیں ہوتی جتنا گھوڑا تیز دوڑ کر بال کو قابو کرتا ہے۔چترال کے انتہائی دور افتادہ علاقے بروغل میں یاک پولو کے اس دلچسپ کھیل کو دیکھنے کے لیے ہر سال بڑی تعداد میں سیاح اس وادی کا رخ کرتے ہیں۔

    داد خدا ایک طالب علم ہے مگر شوقیہ طور پر یاک پولو بھی کھیلتا ہے، اس نے اے آروائی نیوز کے نمائندے سے گفتگو کرتے ہوئے بتایا کہ’ایک تو یاک پر پولو کھیلنا نہایت مشکل کھیل ہے کیونکہ یاک میں گھوڑے کی طرح قابوکرنے کے لیے لگام نہیں ہوتی جسے ہم جلب کہتے ہیں بلکہ یاک کو صرف ایک ہی رسی سے پکڑا اور ہانکا جاتا ہے،جبکہ گھوڑے کو قابو کرنے کیلئے دونوں جانب چمڑے سے بنے ہوئے پٹے ہوتے ہیں جسے سوار اپنی مرضی سے دائیں بائیں مڑواسکتا ہے اور جہاں بال پڑتا ہے کھلاڑی گھوڑے کو اسی جگہہ دوڑاکر بال پر سٹیک مارتا ہے‘۔

    ان کا مزید کہنا تھا کہ ’یاک کا معاملہ کچھ اور ہے ایک تو یہ بہت بھاری جانور ہے ،دوسرےیہ تیز نہیں دوڑسکتا اور تیسرا یہ گھوڑے کی طرح اتنا تربیت یافتہ نہیں ہوتا ۔ پولو میں استعمال ہونے والے گھوڑوں کی تربیت کی جاتی ہے اور ایک تربیت یافتہ گھوڑا کھیل کے دوران خود پر سوار کھلاڑی کی بہت مدد کرتا ہے۔

    یاک پولو کے دوران مقامی فن کار موسیقی بجاتے ہیں اور اس میں بانسری اور دف بہت مشہور ہے۔ کھلاڑی کوشش کرتا ہے کہ محالف ٹیم کی بال اپنے قابو میں کرلے اور اسے اس جگہ تک لے جائے جہاں دو لکڑیوں کے درمیان سے بال گزار کر گول ہوجاتا ہے۔

    مقامی کھلاڑیوں کا کہنا ہے کہ جس طرح پولو کو اہمیت حاصل ہے اور اس کو حکومت کی سرپرستی بھی حاصل ہے اگر یاک پولو کو بھی حکومت تقویت دے اس پر توجہ دے تو یہ کھیل اس علاقے کی تقدیر بدل دے گا کیونکہ یاک ہر جگہ ہوتا نہیں ہے یہ صرف وادی بروغل میں پائے جاتے ہیں ۔ یاد رہے کہ یاک نہایت گرم مزاج جانور ہیں اور زیادہ تر برف پوش میدان میں ہی رہ سکتا ہے ، کہیں اور اسے رکھنے کےلیے خصوصی اقدامات کی ضرورت پیش آتی ہے۔

    مقامی لوگوں کا کہنا ہے کہ اگر حکومت پولو کے ساتھ یاک پولو کو بھی ترقی دینے کے لیے اقدامات اٹھائے تو یہ دلچسپ کھیل اس پسماندہ ترین وادی سے غربت کے خاتمے میں کلیدی کردار ادا کرے گا۔

  • نیروبی میں تاریخی اننگز نے میری زندگی بدل دی تھی ، شاہدآفریدی کا ٹوئٹ

    نیروبی میں تاریخی اننگز نے میری زندگی بدل دی تھی ، شاہدآفریدی کا ٹوئٹ

    لاہور : پاکستان کرکٹ ٹیم کے سابق کپتان شاہد آفریدی کی نیروبی میں تاریخی اننگزکوبائیس سال مکمل ہوگئے، آفریدی کا کہنا ہے کہ ایک اننگز نے ان کی زندگی بدل دی تھی۔

    تفصیلات کے مطابق پاکستان کرکٹ ٹیم کے سابق کپتان شاہد آفریدی نے سماجی رابطے کی ویب سائٹ ٹوئٹر پر اپنے پیغام میں کہا نیروبی میں تاریخی اننگز کو بائیس سال مکمل ہوگئے، جس کی یادیں آج بھی تازہ ہیں، اس لمحے نے میری زندگی بدل دی تھی، آپ سب کی سپورٹ اورمحبت کا شکریہ۔

    شاہدآفریدی نے کہا کہ بھروسہ کرنے پر ساتھیوں کا شکرگزار ہوں۔

    یاد رہے کہ نیروبی کے میدان میں بائیس سال پہلے چار اکتوبر انیس سو چھیانوے کو شاہد خان آفریدی پاکستان کرکٹ کی پہنچان بنے تھے۔

    شاہد آفریدی نے بائیس سال پہلے نیروبی میں سری لنکا کے خلاف صرف سنتیس گیندوں پراس وقت دنیا کی تیزترین سنچری اسکور کرکے ون ڈے کھیل کو نئی جدت دی۔

    آفریدی نے گیارہ چھکوں اور چھ چوکوں کی مدد سے ایک سو دو رنز کی ناقابل فراموش اننگز کھیلی تھی۔

  • سنسنی خیزمیچ دیکھنے کے لئے تیار رہیں، نوجوت سنگھ سدھو کا فیصل جاوید کو فون

    سنسنی خیزمیچ دیکھنے کے لئے تیار رہیں، نوجوت سنگھ سدھو کا فیصل جاوید کو فون

    اسلام آباد : ایشیاکپ میں پاکستان اوربھارت ٹاکرے کے موقع پر سابق بھارتی کرکٹرنوجوت سنگھ سدھو پاکستان تحریک انصاف کے سینیٹرفیصل جاوید سے رابطہ کیا اور کہا سنسنی خیز میچ دیکھنے کے لئے تیار رہیں۔

    تٖفصیلات کے مطابق ایشیا کپ کا سب سے بڑا مقابلہ کچھ گھنٹوں کی دوری پر ہے ، سابق بھارتی کرکٹرنوجوت سنگھ سدھو نے پاکستان تحریک انصاف کے سینیٹر فیصل جاوید سے ٹیلی فونک رابطہ کیا اور آج ہونیوالے پاک بھارت میچ پر تبادلہ خیال کیا۔

    نوجوت سنگھ سدھو نے کہا سنسنی خیزمیچ دیکھنے کے لئے تیار رہیں، آج کے میچ میں کانٹے دار مقابلہ ہوگا۔

    سینیٹر فیصل جاوید کا کہنا تھا کہ پاک بھارت کرکٹ دونوں ملکوں کو قریب لاسکتی ہے، پاکستانی کرکٹ ٹیم کو چیمپئن ٹرافی جیتنے کا فائدہ حاصل ہے۔

    خیال رہے ایشیا کپ کا سب سے بڑا مقابلہ آج ہوگا، پاکستان اور بھارت کی ٹیمیں اب سے کچھ دیر بعد دبئی کرکٹ اسٹیڈیم میں ٹکرائیں گی۔

    پاکستان کو بھارت پر نفسیاتی اورعددی برتری حاصل ہے، یو اے ای میں شاہینوں نے چھبیس میچوں میں سے انیس بار بھارت کو شکست کا مزہ چکھایا جبکہ بھارت سات بار کامیاب ہوئی۔

    ون ڈے میں روایتی حریف ایک سو انتیس مرتبہ ٹکرائے اور گرین شرٹس تہتر فتوحات کے ساتھ آگے ہیں۔

  • بھارت کے خلاف اچھے کھیل کا مظاہرہ کریں گے: سرفراز احمد

    بھارت کے خلاف اچھے کھیل کا مظاہرہ کریں گے: سرفراز احمد

    دبئی: قومی کرکٹ ٹیم کے کپتان سرفراز احمد کا کہنا ہے کہ ماضی گزر گیا، حالیہ میچ پر فوکس ہے۔ کھلاڑی کے طور پر ہماری کوشش ہوتی ہے ہر میچ جیتیں، بھارت کے خلاف بھی اچھے کھیل کا مظاہرہ کریں گے۔

    تفصیلات کے مطابق قومی کرکٹ ٹیم کے کپتان سرفراز احمد نے میڈیا سے گفتگو کرتے ہوئے کہا کہ تمام پلیئرز کلیئر ہیں، بھرپور کارکردگی کا مظاہرہ کریں گے۔

    انہوں نے کہا کہ ماضی گزر گیا، حالیہ میچ پر فوکس ہے۔ کوشش کریں گے اچھے کھیل کا مظاہرہ کریں۔ کھلاڑی کے طور پر ہماری کوشش ہوتی ہے ہر میچ جیتیں، بھارت کے خلاف بھی اچھے کھیل کا مظاہرہ کریں گے۔

    سرفراز کا کہنا تھا کہ دنیا کو پاکستان اور بھارت کے میچ میں اچھی کرکٹ دیکھنے کو ملے گی، کنڈیشن مختلف نہیں، ہوم گراؤنڈ جیسا کھیل پیش کریں گے۔ وزیر اعظم عمران خان اسٹار کرکٹر رہے ان کے بہت فین ہیں، ’وزیر اعظم میچ دیکھنے آئے تو ان کے بھی بہت فین آئیں گے‘۔

    ان کا کہنا تھا کہ پاکستان اور بھارت کے میچ میں ویسے بھی فین بہت ہوتے ہیں، پاکستان اور بھارت دونوں ٹیموں کی ایک دوسرے کے خلاف تیاری مکمل ہے۔

    سرفراز احمد نے مزید کہا کہ ضروری نہیں ہر بار وکٹ لینے والا ہی اچھا بولر کہلائے۔ بعض اوقات بولر وکٹ نہیں لیتا اور اسکور بھی نہیں دیتا۔

    خیال رہے کہ ایشیا کپ 2018 میں روایتی حریف پاکستان اور بھارت کل آپس میں مدمقابل آئیں گے۔ اس موقع پر وزیر اعظم عمران خان بھی میچ دیکھیں گے۔