لودھراں: کہروڑ پکا میں بجلی کی ہائی ٹینشن تار گرنے سے ایک ہی خاندان کے 4 افراد جاں بحق ہوگئے۔
تفصیلات کے مطابق لودھراں کی تحصیل کہروڑ پکا کے علاقے حاصل والا کے رہائشی بیوی اور بچوں کے ہمراہ کھیتوں پر کام کے لیے جا رہے تھے کہ بجلی کی ہائی ٹینشن تار ٹوٹ کر بیل گاڑی پر گرگئی۔
افسوس ناک حادثے میں غلام یاسین اس کی بیوی صغراں بی بی، بیٹی اور بیٹا جان کی بازی ہار گئے۔
پولیس حکام کے مطابق چاروں افراد کی لاشوں کو ضابطے کی کارروائی کے بعد لواحقین کے حوالے کردیا گیا ہے۔
دوسری جانب بجلی کی مرمت کے لیے متعلقہ حکام بھی پہنچ گئے ہیں۔
یاد رہے کہ رواں سال جنوری میں گھوٹکی کی تحصیل اوباڑو میں بجلی کی تار گرنے کے باعث گنے کی فصل میں آگ لگ گئی تھی جس سے 2 نوجوان جھلس کر جاں بحق ہوگئے تھے۔
واضح رہے کہ 16 ستمبر 2018 کو کراچی کے علاقے قائد آباد میں بجلی کی زمین پر پڑے تار کو چھونے سے نوجوان جاں بحق ہوگیا تھا۔
