کراچی: نامور پاکستانی اداکار شہریار منور نے حال ہی میں کینسر میں مبتلا بچوں سے ملاقات کی اور انہیں زندگی کا اصل ہیرو قرار دیا۔
تفصیلات کے مطابق فلم ہومن جہاں اور پرے ہٹ لو میں اداکاری کے جوہر دکھانے والے نامور پاکستانی اداکار شہریار منور نے حال ہی میں انڈس اسپتال کا دورہ کیا اور کینسر جیسے موذی مرض میں مبتلا بچوں سے ملاقات کی اور انہیں زندگی کا اصل ہیرو قرار دیتے ہوئے ان کا حوصلہ بڑھایا۔
شہریار منور نے کینسر میں مبتلا بہادر بچوں سے ملاقات کے اس خوشگوار تجربے کو اپنے مداحوں کے ساتھ شیئر کیا اور کہا کہ میں خوش قسمت ہوں کہ مجھے ان بچوں کے ساتھ وقت گزارنے کا موقع ملا۔
اداکار نے کہا کہ مجھے ان بچوں کی امید، طاقت اور مثبت سوچ نے بے حد متاثر کیا ہے، یہ بہادر بچے چہرے پر مسکراہت بکھیرے مسلسل موذی مرض سے لڑ رہے ہیں۔
یاد رہے کہ ستمبر کا مہینہ بچوں میں کینسر کی بیماری کی آگاہی کو اجاگر کرنے کے لیے مختص ہے، لہٰذا شہریار منور نے اس ما بچوں میں کینسر سے آگاہی سے متعلق شعور اجاگر کرنے کا فیصلہ کیا اور کینسر میں مبتلا بچوں سے ملاقات کی۔