واشنگٹن : ترجمان امریکی محکمہ خارجہ میتھیو ملر نے گزشتہ دنوں کینیڈا میں ہونے والے سکھ رہنما ہردیپ سنگھ نِجر کے قتل میں ملوث بھارتی شہریوں کی گرفتاری پر اپنے ردعمل کا اظہار کردیا۔
واشنگٹن میں کی جانے والی پریس کانفرنس میں اے آر وائی نیوز کے نمائندے جہانزیب علی نے میتھیو ملر سے کینیڈا میں سکھ رہنما کے قتل میں ملوث بھارتی شہریوں کی گرفتاری پر سوال کیا۔
امریکی ترجمان سے امریکا میں خالصتان تحریک کے سکھ رہنما ہردیپ سنگھ نِجر کی قتل کی سازش میں بھارت کے ملوث ہونے پر بھی سوال کیا گیا، جس کے جواب میں میتھیو ملر نے کہا کہ کینیڈا میں حالیہ گرفتاریوں پر میں آپ کو کینیڈا کے حکام سے رجوع کرنے کا کہتا ہوں۔
ترجمان امریکی محکمہ خارجہ کا کہنا تھا کہ امریکا سے متعلق محکمہ انصاف تفصیل سے بات کرسکتا ہے، انہوں نے کہا کہ بھارت کو ان معاملات کو سنجیدگی سے لیتے ہوئے الزامات کی تحقیقات کرنی چاہیے اس معاملے پر کمیٹی کی تفتیش جاری ہے۔
ترجمان کا مزید کہنا تھا کہ ہم بھارتی تفتیش کے نتائج دیکھنے کا انتظار کریں گے، معاملے کو سنجیدگی سے لیتے ہیں اور بھارت کو بھی یہ معاملہ سنجیدگی سے لینا چاہیے۔
سکھ رہنما کے قتل میں گرفتار بھارتیوں کی شناخت
واضح رہے کہ گزشتہ روز کینیڈا میں بھارت کے گھناؤنے کھیل کے کردار پکڑے گئے، کینیڈا پولیس نے خالصتان تحریک کے رہنما ہردیپ سنگھ نجر کے قتل کے الزام میں تین بھارتی شہریوں کو گرفتار کیا ہے۔
گزشتہ روز رائل کینیڈین ماؤنٹڈ پولیس نے پریس بریفنگ میں بتایا تھا کہ ملزمان کی شناخت کرن پریت سنگھ اور کمل پریت سنگھ کے نام سے کی گئی ہے، گرفتار تیسرے بھارتی شہری کی شناخت کرن برار کے طور پر ہوئی ہے۔
