Tag: کینیڈا

اوٹاوا: کینیڈین پولیس نے نسل پرستی کے خلاف تحریک میں انتشار پھیلانے کی کوشش کرنے والے سفید فام شہری کو گرفتار کرلیا جس نے چہرے پر سیاہی مل کر سیاہ فام کا روپ دھار رکھا تھا۔

غیرملکی خبررساں ادارے کی رپورٹ کے مطابق امریکی پولیس کے ہاتھوں سیاہ فام کی ہلاکت کے بعد دنیا بھر میں مظاہرے پھوٹ پڑے ہیں اور کینیڈا میں بھی احتجاج کیا جارہا ہے۔ مظاہرے کے دوران ایک نسل پرست سفید فام نوجوان منظر عام پر آیا جس نے پورے جسم میں کالی سیاہی مل رکھی تھی۔

رپورٹ کے مطابق مذکورہ شخص نے مظاہرے میں شامل ہوکر سیاہ فام کے خلاف نعرے لگائے اور نسل پرستی کو ہوا دینے کی کوشش کی جس پر پولیس نے ایکشن لیتے ہوئے گرفتار کرلیا۔

سیاہ فام کی ہلاکت کے خلاف امریکا میں احتجاج کا 12واں روز، ٹرمپ کا اہم بیان

یہ واقعہ کینیڈا کے شہر ٹورنٹو میں ہونے والے مظاہرے کے دوران پیش آیا۔ ملزم کی گرفتاری کی ویڈیو سوشل میڈیا پر وائرل ہوگئی، احتجاج کے دوران مذکورہ نوجوان نے مغلظات بھی بکیں۔

گرفتاری کے دوران ملزم چیختے ہوئے کہہ رہا تھا ’ مجھے ہر کام کرنے میں آزادی ہونی چاہیے‘۔ پولیس نے پرامن مظاہرے کو انتشار کا رنگ دینے کی کوشش کے جرم میں ملزم کو گرفتار کرکے مقدمہ درج کرلیا ہے۔

ٹورنٹو: چین کی کسینو بائیو لوجکس کمپنی کی جانب سے کرونا ویکسین کینیڈا میں تیار اور ٹیسٹ کی جاسکتی ہے۔

تفصیلات کے مطابق کینیڈین نیشنل ریسرچ کونسل اور کسینو بائیو لوجکس کمپنی کرونا ویکسین بنانے کے حوالے سے مشترکہ طور پر کام کر رہے ہیں۔نیشنل ریسرچ کونسل کا کہنا ہے کہ چینی کمپنی کو سہولت فراہم کی جا رہی ہے تاکہ وہ ویکسین کے لیے پیداواری عمل کو بڑھا سکے جبکہ کسینو کمپنی ڈرگ ریگولیٹر ہیلتھ کینیڈا کے لیے ویکسین ٹرائل اپیلی کیشن تیار کر رہی ہے۔

کسینو کمپنی کی جانب سے بنائی گئی ویکسین ابتدائی آزمائش میں ہے اور اس حوالے سے فی الحال کچھ نہیں کہا جاسکتا کہ یہ موثر ثابت ہوگی یا نہیں اگر یہ ویکسین کامیاب ہوتی ہے تو کینیڈا کو اس تک رسائی حاصل ہوگی۔

ایک ایسی ویکسین جو لوگوں کو کرونا وائرس سے بچائے اور وبائی مرض کا بھی خاتمہ کرے،لیکن ایسی ویکسین جو کام کرے اسے کافی مقدار میں تیار کرنا بھی ایک بہت بڑا چیلنج ہے۔

کسینو ویکسین ایک سیل لائن کا استعمال کرتے ہوئے کینیڈین نیشنل ریسرچ کونسل کے ساتھ تیار کی گئی ہے، کمپنی نے ایبولا ویکسین تیار کرنے کے لیے اسی سیل لائن کا استعمال کیا تھا۔

کینیڈین نیشنل ریسرچ کونسل اور ہیلتھ کینیڈا نے فوری طور پر ان سوالوں کا جواب نہیں دیا کہ آیا مشترکہ تعاون سے ہیلتھ کینیڈا کے لیے یہ ممکن ہوگا کہ وہ ویکسین کی آزمائش کے لیے چین میں جمع ہونے والے ٹرائل ڈیٹا پر غور کرے۔

لندن: کینیڈا نے کہا ہے کہ وہ شہزادہ ہیری اور ان کی بیوی میگھن مارکل کی سیکورٹی کا خرچ نہیں اٹھائے گا۔

تفصیلات کے مطابق برطانوی شہزادہ ہیری اور میگھن 31 مارچ کو باقاعدہ طور پر شاہی خاندان اور اس سے منسلک سہولیات سے علیحدہ ہو رہے ہیں، اس سلسلے میں کینیڈا نے کہا ہے کہ وہ اس کے بعد سیکورٹی کا خرچ نہیں اٹھائے گا۔

خیال رہے کہ کینیڈا کے اندر شاہی جوڑے اور ان کے بیٹے کی سیکورٹی رائل کینیڈین ماؤنٹڈ پولیس کے ذمے تھی، جنھوں نے اب واضح طور پر بتا دیا ہے کہ مارچ کے بعد وہ سیکورٹی کی سہولیات واپس لے لیں گے۔

کینیڈا کی پبلک سیفٹی منسٹر کی ترجمان نے کہا ہے کہ انٹرنیشنل معاہدے کے تحت شاہی جوڑے کو حفاظت مہیا کی جا رہی تھی جو ان کے اسٹیٹس میں تبدیلی کے بعد روک دی جائے گی، برطانوی میٹروپولیٹن پولیس نے کینیڈین پولیس سے ہیری اور میگھن کی سیکورٹی جاری رکھنے کی درخواست کی تھی۔

شہزادہ ہیری اور اہلیہ کا کینیڈا میں‌ قیام، مقامی میڈیا کا اظہار برہمی

آنے والے وقت میں آنجہانی لیڈی ڈیانا کے چھوٹے بیٹے ہیری اور ان کی اہلیہ کی سیکورٹی کے اخراجات کون اٹھائے گا یہ ابھی تک واضح نہیں ہوا ہے۔

یاد رہے کہ جنوری میں شہزادہ ہیری اور میگھن مارکل کے کینیڈا میں طویل قیام پر مقامی میڈیا نے ناخوشی کا اظہار کرتے ہوئے شاہی جوڑے کے کینیڈا میں قیام کو مقامی قوانین کی خلاف ورزی قرار دیا تھا۔

ٹورنٹو: کینیڈا کے وزیر اعظم جسٹن ٹروڈو نے الزام عائد کیا ہے کہ اگر امریکا خطے میں تناؤ پیدا نہ کرتا تو آج طیارے حادثے میں مرنے والے زندہ ہوتے۔

ایک ٹی وی انٹرویو میں کینیڈین وزیراعظم نے کہا کہ اگر تناؤ میں اضافہ نہ ہوتا اور خطے میں کشیدگی نہ بڑھتی تو آج ایران میں نشانہ بننے والے طیارے کے مسافر زندہ ہوتے اور اپنی فیملیز کے ساتھ گھروں پر ہوتے۔

انہوں نے کہا کہ امریکا نے عراق میں جنرل قاسم سلیمانی کو قتل کرنے کے حوالے سے ہمیں اعتماد میں نہیں لیا تھا اور نہ ہی کارروائی کی پیشگی اطلاع دی۔

جسٹس ٹروڈو نے کہا کہ امریکی کارروائی کے بعد خطے میں کشیدگی بڑھی جس کے جواب میں ایران نے میزائل فائر کیے جس کا نشانہ مسافر طیارہ بن گیا، جب تنازعات بڑھتے ہیں اور جنگ ہوتی ہے تو خمیازہ معصوم عوام کو بھگتنا پڑتا ہے۔

واضح رہے بغداد ائیرپورٹ پر امریکی فضائی حملہ میں ایران کی القدس فورس کے جنرل قاسم سلیمانی کو ہلاک ہوگئے تھے،جس کے بعد ایرانی حکومت نے امریکی حملے کی مذمت کرتے ہوئے بدلہ لینے کا اعلان کیا تھا۔

ایران کی فضائی حدود میں یوکرینی مسافر طیارہ گر کر تباہ ہوگیا تھا جس میں سوار 176 مسافر موقع پر ہی ہلاک ہوگئے تھے، اس جہاز میں کینیڈا سے تعلق رکھنے والے 62 مسافر سوار تھے۔

امریکا، کینیڈا، برطانیہ سمیت دیگر ممالک نے گزشتہ روز الزام عائد کیا تھا کہ ایران نے طیارے کو میزائل سے نشانہ بنایا جس پر ایرانی حکام نے الزام کو بے بنیاد قرار دیا تھا، مگر آج ایرانی ایرواسپیس کمانڈر علی حاجی زادے نے یوکرین طیارےکی تباہی کی ذمےداری قبول کرتے ہوئے اعتراف کیا کہ ’جہاز کو غلطی سے نشانہ بنایا گیا کیونکہ سیکیورٹی حکام اُسے کروز میزائل سمجھ بیٹھے تھے۔

انہوں نے افسوسناک واقعہ پر پوری قوم سے معافی بھی مانگی جبکہ ایران کے سپریم لیڈر خامنہ ای نے بھی واقعے پر افسوس اور شرمندگی کا اظہار کرتے ہوئے عوام سے معافی مانگی۔