ARYNews.tv | Urdu – Har Lamha Bakhabar

Tag: کینیڈا

  • کینیڈا میں انتخابات، جسٹن ٹروڈو کو واضح برتری حاصل

    کینیڈا میں انتخابات، جسٹن ٹروڈو کو واضح برتری حاصل

    اٹاوا: کینیڈا میں ہونے والے عام انتخابات میں ڈالے گئے ووٹوں کی گنتی کا سلسلہ جاری ہے، ابتدائی نتائج میں وزیراعظم جسٹن ٹروڈو کی پارٹی کو واضح برتری حاصل ہے۔

    تفصیلات کے مطابق کینیڈا انتخابات میں ووٹوں کی گنتی اور ابتدائی نتائج کا سلسلہ جاری ہے، اب تک جسٹن ٹروڈو کی لبرل پارٹی کو برتر ی حاصل ہے، اور پارٹی حکومت بنانے کی پوزیشن میں ہے۔

    غیر ملکی خبررساں ادارے کے مطابق کینیڈا کے ایوان زیریں ہاؤس آف کامنز کی تین سواڑتیس نشستوں کے لیے پولنگ ہوئی اور اب ووٹوں کی گنتی کی جارہی ہے۔

    ابتدائی نتائج کے مطابق جسٹن ٹروڈو کی لبرل پارٹی کو برتری حاصل ہے، 338 میں سے 157 سیٹیں حاصل کرلی ہیں جبکہ کنزرویٹوپارٹی صرف 121 نشستیں حاصل کرنے میں کامیاب ہوئی ہے۔

    وزیراعظم کا انتخاب براہ راست نہیں ہوگا بلکہ الیکشن جیتنے والی پارٹی کا سربراہ وزیراعظم کا منصب سنبھالے گا، جبکہ کنزرویٹوپارٹی اور لبرل پارٹی کے درمیان کانٹے کا مقابلہ ہے۔

    انتخابی مہم کے دوران معیشت اور روزگارکی فراہمی انتخابی امیدواروں کے منشور کا بنیادی نکتہ رہی۔ دوہزار پندرہ کے انتخابات میں لبرل پارٹی نے ایک سوچوراسی نشستیں جیت کر حکومت بنائی تھی اور جسٹن ٹروڈووزیراعظم بنے تھے۔

    یاد رہے کہ اکتوبر 2015 میں کینیڈا کے پارلیمانی انتخابات میں جسٹن ٹروڈو کی لبرل پارٹی نے حکمران جماعت کنزرویٹو پارٹی کو بھاری اکثریت سے شکست دی تھی۔

    مذکورہ انتخابات میں سات پاکستانی نژاد امیدواروں نے بھی انتخابات میں حصہ لیا تھا، جن میں مسی ساگا سے لبرل پارٹی کی امیدوار اقراء خالد اور اسکاربورو سے سلمی زاہد نے بھی میدان مارا۔

  • کینیڈا میں عام انتخابات آج ہوں گے

    کینیڈا میں عام انتخابات آج ہوں گے

    اٹاوا: کینیڈا میں تینتالیسویں عام انتخابات کے لیے آج ووٹ ڈالے جائیں گے، وزیراعظم جسٹن ٹروڈو دوسری مدت کے لیے الیکشن لڑرہے ہیں۔

    تفصیلات کے مطابق کینیڈا میں عام انتخابات آج ہوں گے، جس کے لیے تمام تیاریاں مکمل کرلی گئی ہیں، وزیراعظم جسٹن ٹروڈو دوسری مدت کے لیے میدان میں اتریں گے۔

    غیر ملکی خبررساں ادارے کا کہنا ہے کہ وزیراعظم جسٹن ٹروڈو نے الیکشن مہم کے دروان سیکیوٹی خدشات کے باوجود اپنی مہم جاری رکھی، اس الیکشن میں ان کا پلڑا بھاری ہے۔

    جسٹن ٹروڈو کی لبرل پارٹی اور کنزرویٹوپارٹی کے درمیان سخت مقابلے کی توقع ہے۔ کینیڈا کے ایوان زیریں ہاؤس آف کامنز کی تین سواڑتیس نشستوں کے لیے پولنگ ہوگی۔

    وزیراعظم کا انتخاب براہ راست نہیں ہوگا بلکہ الیکشن جیتنے والی پارٹی کا سربراہ وزیراعظم کا منصب سنبھالے گا، جبکہ کنزرویٹوپارٹی اور لبرل پارٹی کے درمیان کانٹے کا مقابلہ ممکن ہے۔

    کینیڈا انتخابات، 2پاکستانی نژاد خواتین نے بھی میدان مار لیا

    انتخابی مہم کے دوران معیشت اور روزگارکی فراہمی انتخابی امیدواروں کے منشورکا بنیادی نکتہ رہی۔ دوہزار پندرہ کے انتخابات میں لبرل پارٹی نے ایک سوچوراسی نشستیں جیت کر حکومت بنائی تھی اور جسٹن ٹروڈووزیراعظم بنے تھے۔

    یاد رہے کہ اکتوبر 2015 میں کینیڈا کے پارلیمانی انتخابات میں جسٹن ٹروڈو کی لبرل پارٹی نے حکمران جماعت کنزرویٹو پارٹی کو بھاری اکثریت سے شکست دی تھی۔

    مذکورہ انتخابات میں سات پاکستانی نژاد امیدواروں نے بھی انتخابات میں حصہ لیا تھا، جن میں مسی ساگا سے لبرل پارٹی کی امیدوار اقراء خالد اور اسکاربورو سے سلمی زاہد نے بھی میدان مارا۔

  • کینیڈین وزیراعظم نے نسل پرستانہ فعل پر معذرت کرلی

    کینیڈین وزیراعظم نے نسل پرستانہ فعل پر معذرت کرلی

    اوٹاوا: کینیڈا کے وزیراعظم جسٹن ٹروڈو نے 18 سال قبل سرزد ہونے والے نسل پرستانہ فعل پر معذرت کرلی۔

    غیرملکی خبررساں ادارے کے مطابق کینیڈین وزیراعظم جسٹن ٹروڈو نے 18 سال قبل سیاہ فام کا روپ دھارے نسل پرستانہ عمل پر شرمندگی کا اظہار کیا ہے۔

    سن 2001 میں ٹروڈو کینیڈا میں ایک اسکول میں بحیثیت معلم اپنی خدمات سر انجام دے رہے تھے جب انہوں نے سیاہ فام کا روپ دھارا تھا۔

    جسٹن ٹروڈو کا کہنا ہے کہ وہ اپنے نسل پرستانہ عمل پر شرمندہ ہیں، تصویر کو اس وقت سامنے لایا گیا ہے جب کینیڈا میں 2019 کے انتخابات کی مہم شروع ہونے میں صرف ایک ہفتہ رہ گیا ہے۔

    اوٹاوا میں میڈیا سے گفتگو کرتے ہوئے ان کا کہنا تھا کہ انسان غلطی ہوجاتی ہے اور ان کے اس عمل سے اگر کسی کی دل آزاری ہوئی ہے تو اس پر کھلے دل سے معافی چاہتے ہیں۔

    کینیڈین وزیراعظم نے کہا کہ وہ نسل پرستی کے سخت خلاف ہیں اور کینیڈا کا وزیراعظم بننے کے بعد انہوں نے معاشرے میں نسلی ہم آہنگی پیدا کرنے کی بھرپور کوشش کی اور اس میں وہ کامیاب بھی رہے ہیں۔

    کینیڈین وزیراعظم نے اپنے نسل پرستانہ عمل پر عہدے سے مستعفی ہونے سے انکار کردیا۔

  • کینیڈا کا مقبوضہ کشمیر کی صورتحال پر تشویش کا اظہار

    کینیڈا کا مقبوضہ کشمیر کی صورتحال پر تشویش کا اظہار

    ٹورنٹو : کینیڈا نے مقبوضہ کشمیر کی صورتحال پر تشویش کا اظہار کرتے ہوئے کہا جموں وکشمیرکی صورتحال کا بغور جائزہ لے رہے ہیں ، تمام فریق سرحدوں پرامن واستحکام کا مظاہرہ کریں۔

    تفصیلات کے مطابق کینیڈین وزیرخارجہ کرسٹیافری لینڈ نے مقبوضہ کشمیر میں انسانی حقوق کی خلاف ورزیوں پر اظہارتشویش کرتے ہوئے کہا جموں وکشمیر کی صورتحال کا بغورجائزہ لے رہے ہیں، اہم مسئلے پر کینیڈا میں مقیم کشمیریوں سے بات چیت کی ہے۔

    کینیڈین وزیرخارجہ کا کہنا تھا کہ لاک ڈاؤن،تشددکی خبروں پرتشویش ہے، متاثرہ کمیونٹی کیساتھ بامعنی مذاکرات کی حوصلہ افزائی کریں گے۔

    کرسٹیافری لینڈ نے مزید کہا کہ تمام فریق سرحدوں پرامن واستحکام اور لائن آف کنٹرول پرتحمل کا مظاہرہ کیا جائے۔

    خیال رہے بھارتی فورسزنے مقبوضہ وادی کو دنیا کی سب بڑی جیل بنا رکھا ہے ، اسکول، کالج تجارتی مراکز سب بند ہے اور ہر طرف قابض فورسز کا گشت جاری ہے۔

    قابض انتظامیہ نے سڑکیں بلاک کردیں ہیں اور حریت اور سیاسی رہنما بدستور قید میں ہیں جبکہ کشمیریوں کا بیرونی دنیا سے رابطہ منقطع ہے۔

    یاد رہے پاکستان بھر میں بھارت کے یوم آزادی کے موقع پر آج یوم سیاہ منا یا جارہا ہے ، یوم سیاہ پر کشمیری عوام سے اظہاریکجہتی کے لئے اسلام آباد میں سرکاری عمارتوں پرقومی پرچم سرنگوں کردیئے گئے ہیں۔

  • گلوبل ٹی ٹوینٹی لیگ، بوم بوم آفریدی کی دھوم، بولرز کی درگت بنادی

    گلوبل ٹی ٹوینٹی لیگ، بوم بوم آفریدی کی دھوم، بولرز کی درگت بنادی

    اوٹاوا: کینیڈا میں جاری گلوبل ٹی ٹوینٹی لیگ میں بوم بوم آفریدی نے دھوم مچادی، آفریدی کی دھواں دھار بیٹنگ کی بدولت برامپٹن وولوز نے مونٹریال ٹائیگرز کو 10 وکٹوں سے آؤٹ کلاس کردیا۔

    تفصیلات کے مطابق گلوبل ٹی ٹوینٹی لیگ میں شاہد خان آفریدی نے بولرز کو دھو ڈالا، بوم بوم نے پانچ بلند و بالا چھکوں اور دس چوکوں کی مدد سے صرف 40 گیندوں پر 81 رنز بنا ڈالے۔

    مونٹریال ٹائیگرز کی ٹیم 18.2 اوورز میں 101 رنز پر ڈھیر ہوگئی، ایش سودھی نے 6 رنز دے کر پانچ وکٹیں حاصل کیں۔

    وولوز نے ہدف 6.4 اوورز میں بغیر کسی نقصان کے پورا کرلیا، شاہد خان آفریدی کو شاندار اننگز کھیلنے پر میچ کا بہترین کھلاڑی قرار دیا گیا۔

    دوسرے میچ میں شاداب خان کی ٹیم ٹورنٹو نیشنلز کو ایڈمنٹن رائلز کے خلاف 2 وکٹوں سے شکست کا سامنا کرنا پڑا، شاداب خان کی آل راؤنڈ کارکردگی بھی ٹیم کو شکست سے نہ بچاسکی، محمد حفیظ نے 16 گیندوں پر 17 رنز بنائے۔

    میچ 19 اوورز تک محدود کردیا گیا تھا پہلے بیٹنگ کرتے ہوئے ٹورنٹو نیشنلز نے 6 وکٹ پر 191 رنز بنائے، شاداب خان نے 17 گیندوں پر 36 رنز کی اننگز کھیلی۔

    فاتح ٹیم نے ہدف 17.5 اوورز میں 8 وکٹ پر حاصل کرلیا، ہینریچ کلیسن 45، یووراج سنگھ 35 اور منپریت گونی نے 33 رنز بنائے، شاداب خان نے 42 رنز دے کر دو وکٹیں لیں جبکہ محمد حفیظ نے ایک کھلاڑی کو آؤٹ کیا۔

  • کینیڈا میں دائیں بازو کے انتہا پسند گروہ، دہشت گردوں کی فہرست میں‌ شامل

    کینیڈا میں دائیں بازو کے انتہا پسند گروہ، دہشت گردوں کی فہرست میں‌ شامل

    ٹورنٹو: کینیڈا کی حکومت نے پہلی بار دائیں بازو کے انتہا پسند گروہوں کو بھی دہشت گردی کی فہرست میں شامل کر لیا ہے۔

    تفصیلات کے مطابق ملکی دنیا بھر کے ممالک دہشت گردی سے نمٹنے کےلیے مختلف قسم کے اقدامات اٹھا رہے ہیں تاکہ اپنے شہریوں کو نہ صرف شدت پسند دانہ کارروائیوں کا نشانہ بنانے سے بچاسکےبلکہ انہیں ایسی تنظیموں یا گروہوں میں شمولیت سے بھی روک سکیں، کینیڈین سیکیورٹی حکام کی جانب سے بھی اپنے شہریوں کی حفاظت کے پیش نظر انتہا پسند گروہوں کے خلاف اقدامات اٹھائے جارہے ہیں۔

    کینیڈین سکیورٹی حکام نے بتایا کہ ان گروپوں میں سے ایک تو دائیں بازو کی انتہا پسند تنظیم بلڈ اینڈ آنر ہے اور دوسرا اسی تنظیم کا مسلح بازو آرم کومبیٹ ایٹین۔

    کینیڈین حکومت نے الزام لگایاکہ ان گروپوں کے اراکین میں سے ‘بلڈ اینڈ آنر‘ کے انتہا پسند ارکان شمالی امریکا اور یورپ میں کیے جانے والے متعدد حملوں میں بھی ملوث رہے ہیں۔

    غیر ملکی خبر رساں ادارے کے مطابق کینیڈین حکومت کی طرف سے مرتب کردہ دہشت گردوں کی فہرست میں مجموعی طور پر دنیا بھر سے تقریبا ساٹھ شدت پسند اور انتہا پسند گروہ شامل ہیں۔

  • کینیڈا میں فتح کا جشن، جسٹن ٹروڈو فائرنگ سے بال بال بچ گئے، چار زخمی

    کینیڈا میں فتح کا جشن، جسٹن ٹروڈو فائرنگ سے بال بال بچ گئے، چار زخمی

    ٹورنٹو: کینیڈین وزیراعظم جسٹن ٹروڈو فائرنگ کے واقعے میں بال بال بچ گئے البتہ واقعے میں چار افراد زخمی ہوئے، پولیس نے چار ملزمان کو گرفتار کرلیا جن سے تفتیش جاری ہے۔

    تفصیلات کے مطابق کینڈا کے دارالحکومت میں باسکٹ بال کی ٹیم کی فتح پر منعقدہ جشن کی تقریب میں فائرنگ کا واقعہ پیش آیا جس میں چار افراد زخمی ہوئے جبکہ پولیس نے وزیراعظم جسٹن ٹروڈو کو تحویل میں لے کر باحفاظت نکال لیا۔

    غیرملکی خبررساں ادارے کی رپورٹ میں بتایا گیا ہے کہ باسکٹ بال ٹیم ٹورنٹو ریپٹرز کی فتح پر تاریخی جشن منایا گیا اس ضمن میں ایک تقریب کا بھی انعقاد کیا گیا جس میں 20 لاکھ سے زائد شہریوں نے شرکت کی۔

    کینڈین وزیراعظم جسٹن ٹروڈ بھی خوشی کے موقع پر اپنی کابینہ کے ہمراہ تقریب میں موجود تھے کہ وہاں اچانک فائرنگ شروع ہوگئی جس کے باعث بھگدڑ مچ گئی۔ شہریوں کی بڑی تعداد نے جانیں بچانے کے لیے محفوظ مقام تلاش کیا اور وہ بھاگنے کے دوران ایک دوسرے پر چڑھ دوڑے جس کے نتیجے میں چار افراد زخمی ہوئے۔

    افراتفری مچنے کے بعد محافظوں نے جسٹس ٹروڈ اور کابینہ اراکین کو حفاظتی حصار میں لے کر محفوظ مقام پر پہنچایا جبکہ پولیس نے کارروائی کرتے ہوئے چار مشتبہ ملزمان کو کو اسلحہ سمیت گرفتار کرلیا۔

    پولیس نے گرفتار ہونے والے ملزمان کی شناخت ظاہر نہیں کی تاہم ابھی تک تفتیشی ادارے فائرنگ کی وجہ تلاش نہ کرسکے۔ حکام کے مطابق زخمی ہونے والوں میں خاتون بھی شامل ہیں جبکہ تمام زخمیوں کی حالت بھی خطرے سے باہر بتائی گئی ہے۔

    جسٹن ٹروڈ نے سماجی رابطے کی ویب سائٹ پر قوم کو پُرامن رہنے کی تلقین کرتے ہوئے واقعے کی شدید الفاظ میں مذمت کی۔ اُن کا کہنا تھا کہ واقعے کی شفافانہ تحقیقات کی جائیں گی اور ایک کسی بھی وجہ سے ٹیم کی جیت یا شہریوں کے عزم کو متاثر نہیں ہونے دیں گے۔

    کینیڈا میں فائرنگ کے دو مختلف واقعات میں 4 افراد ہلاک

    یاد رہے کہ رواں سال 16 اپریل کو کینیڈا کے صوبے برٹس کولمبیا میں فائرنگ کے دو مختلف واقعات میں 4 افراد جان کی بازی ہار گئے تھے۔

    پولیس حکام نے بتایا تھا کہ فائرنگ کے واقعات کی تحقیقات کے دوران ایک شخص کو گرفتار کیا گیا ہے تاہم حراست میں لیے گئے ملزم کی شناخت ظاہر نہیں کی گئی تھی۔

  • کینیڈا کا ایک مرتبہ استعمال ہونے والی پلاسٹک اشیا پر پابندی کا فیصلہ

    کینیڈا کا ایک مرتبہ استعمال ہونے والی پلاسٹک اشیا پر پابندی کا فیصلہ

    اوٹاوا : کینیڈا نے ایک مرتبہ استعمال ہونے والی پلاسٹک اشیا پر پابندی کا فیصلہ کرلیا ، وزیراعظم جسٹن ٹروڈو نے کہا 2021 سے قبل کینیڈا، ساحلی بندرگاہوں پر ایک مرتبہ استعمال ہونے والی نقصان دہ پلاسٹک پر پابندی عائد کردے گا۔

    تفصیلات کے مطابق کینیڈا کے وزیراعظم جسٹن ٹروڈو نے کہا 2021 تک ملک میں ایک مرتبہ استعمال ہونے والی پلاسٹک کی مصنوعات کے استعمال پر مکمل پابندی عائد کردی جائے گی۔

    جسٹن ٹروڈو کا کہنا تھا سائنسی بنیادوں پر جائزے کی بنیاد پر مخصوص اشیا پر پابندی کا فیصلہ کیا جائے گا، لیکن حکومت پانی کی بوتلوں، پلاسٹک کی تھیلیوں اور اسٹراز پر غور کر رہی ہے۔

    کینیڈین وزیراعظم نے کہا کہ2021 سے قبل کینیڈا، ساحلی بندرگاہوں پر ایک مرتبہ استعمال ہونے والی نقصان دہ پلاسٹک پر پابندی عائد کردے گا، کینیڈا کی حکومت نے یورپی یونین کی پارلیمنٹ سے متاثر ہو کر یہ فیصلہ کیا جس نے مارچ میں ایک مرتبہ استعمال ہونے والی پلاسٹک مصنوعات کی وجہ سے ہونے والی آلودگی کے خلاف ان پر بڑے پیمانے پر پابندی عائد کی تھی۔

    ان کا کہنا تھا یورپی یونین کے رکن ممالک سے وابستہ قانون سازوں کو اس اقدام کے اطلاق سے قبل لازمی طور پر رائے شماری کرنی چاہیے۔

    جسٹن ٹروڈو نے کہا کہ اکثر ممالک ایسا کررہے ہیں اور کینیڈا بھی ان میں سے ایک ہوگا، یہ ایک بڑا قدم ہوگا اور ہم جانتے ہیں کہ 2021 تک ہم یہ کرسکتے ہیں۔

    خیال رہے کہ کینیڈا میں استعمال ہونے والے پلاسٹک کا 10 فیصد سے بھی کم حصہ ری سائیکلنگ کے ذریعے دوبارہ استعمال کیا جاتا ہےجبکہ کینیڈا کی حکومت کا کہنا ہے کہ دنیا بھر میں ہر سال تقریبا 10 لاکھ پرندے اور ایک لاکھ سمندری جانور پلاسٹک کھانے یا اپنے گرد لپٹنے کی وجہ سے زخمی ہوتے یا مر جاتے ہیں۔

  • امریکا میں اب امیگریشن کیلئے کینیڈا کی طرح پوائنٹس بیسڈ سسٹم متعارف کرایاجائے گا

    امریکا میں اب امیگریشن کیلئے کینیڈا کی طرح پوائنٹس بیسڈ سسٹم متعارف کرایاجائے گا

    واشنگٹن : امریکامیں امیگریشن کیلئے کینیڈا کی طرح پوائنٹس بیسڈ سسٹم متعارف کرانے کی تیاری کرلی گئی ،امریکی صدر کا کہنا ہے اب میرٹ اورپیشہ وارانہ مہارت کی بنیادپرامیگریشن دی جائےگی ،اگر ڈیموکریٹس نے مخالفت کی توآئندہ سال ریپبلکن ایوان سے بل منظور کرالیں گے۔

    تفصیلات کے مطابق امریکی صدر ڈونلڈ ٹرمپ نے مجوزہ امیگریشن اصلاحات پیش کردیں، جس کے تحت امریکامیں اب امیگریشن کیلئے کینیڈا کی طرح پوائنٹس بیسڈ سسٹم متعارف کرایاجائے گا۔

    امریکی صدر ٹرمپ نے وائٹ ہاؤس میں پریس کانفرنس کرتے ہوئے کہا اب میرٹ اورپیشہ وارانہ مہارت کی بنیادپرامریکا میں امیگریشن دی جائے گی ، اگرڈیموکریٹس نےمخالفت کی توآئندہ سال ریپبلکن ایوان سےبل منظورکرالیں گے۔

    ٹرمپ کا کہنا تھا اس منصوبےکےتحت گرین کارڈز کی تعدادگزشتہ سالوں کے برابر ہی رکھی جائے گی ، نیا امیگریشن سسٹم دنیا میں ہمیں قابل فخر بنائےگا۔

    دوسری جانب ڈیموکریٹس نےصدرٹرمپ کےمجوزہ امیگریشن اصلاحات کو مسترد کردیا ہے ، ایوان نمائندگان کی ڈیموکریٹ اسپیکرنینسی پلوسی نے ویڈیو بیان میں بھی سخت تنقید کی۔

    مزید پڑھیں : امیگریشن پالیسی پر اختلافات، امریکی وزیرداخلہ مستعفی ہوگئیں

    نینسی پلوسی نے کہا ٹرمپ کی امیگریشن پالیسی میرٹ پرنہیں بلکہ اپنی ذاتی پسند ہے، کیا خاندانوں کو ایک دوسرے سے جدا کرنامیرٹ ہے؟۔ وائٹ ہاؤس نے بدترین اور ناکام امیگریشن منصوبوں کونیاچہرہ دیا ہے۔

    یاد رہے گذشتہ ماہ امریکی صدر ڈونلڈ ٹرمپ کی امیگریشن پالیسی پر اختلافات کے باعث ملکی وزیرداخلہ کرسجن نیلسن مستعفی ہوگئیں تھیں۔

    امریکی صدر ڈونلڈ ٹرمپ نے دوٹوک موقف اختیار کیا ہے کہ امریکا مکمل طور پر بھر چکا ہے اور اب غیرقانونی تارکین وطن اور پناہ گزینوں کے رہنے کے لیے کوئی جگہ باقی نہیں بچی۔

  • دنیا کے سب سے طویل اور تیز رفتار رولر کوسٹر کا افتتاح

    دنیا کے سب سے طویل اور تیز رفتار رولر کوسٹر کا افتتاح

    بلند و بالا رولر کوسٹرز میں بیٹھنا ایک نہایت دلچسپ اور سنسنی خیز لمحہ ہوتا ہے اور رولر کوسٹر جتنی زیادہ بلند ہوگی لوگ اتنا ہی لطف اندوز ہوتے ہیں۔

    کینیڈا میں بھی مہم جوئی اور تھرل کے شوقین افراد کے لیے دنیا کے سب سے طویل اور تیز رفتار رولر کوسٹر کا افتتاح کردیا گیا

    ٹورنٹو کے ونڈر لینڈ تھیم پارک میں موجود یہ طویل ترین اور تیز رفتار ترین رولر کوسٹر صرف 3 منٹ میں 250 فٹ طویل ٹریک پر سفر کرتا ہے۔

    اس سفر کے دوران یہ 36 سو فٹ کی اونچائی پر جاتاہے۔ اس رولر کوسٹر نے تیز رفتاری کا نیا ریکارڈ بھی بنایا ہے۔

    کیا آپ اس رولر کوسٹر رائیڈ کا تجربہ کرنا چاہیں گے؟