ARYNews.tv | Urdu – Har Lamha Bakhabar

Tag: کینیڈین وزیراعظم جسٹن ٹروڈو

  • کینیڈین وزیراعظم جسٹن ٹروڈو کا رواں ہفتے مستعفی ہونے کا امکان

    کینیڈین وزیراعظم جسٹن ٹروڈو کا رواں ہفتے مستعفی ہونے کا امکان

    کینیڈا کے وزیرِ اعظم جسٹن ٹروڈو رواں ہفتے استعفیٰ دینے کا اعلان کر سکتے ہیں۔

    رائٹرز کے مطابق ’دی گلوب اینڈ میل‘ نے اس خبر کی تصدیق کی ہے کہ جسٹن ٹروڈو لبرل پارٹی کے رہنما کے طور پر جَلد مستعفی ہو جائیں گے، جسٹن ٹروڈو سے استعفے کا اعلان رواں ہفتے قومی کاکس کے اہم اجلاس سے پہلے متوقع ہے۔

    ایلون مسک نے جسٹن ٹروڈو کے سیاسی مستقبل کی پیشگوئی کر دی

    یاد رہے گزشتہ سال دسمبر میں اطلاعات سامنے آئی تھیں کہ جسٹن ٹروڈو پر اپنے ہی قانون سازوں کی جانب سے استعفیٰ دینے اور کسی اور شخص کو اقتدار سونپنے کا دباؤ بڑھ رہا ہے۔

    پچاس سے زیادہ لبرلز اراکینِ پارلیمنٹ اس بات پر متفق ہیں ٹروڈو کو مستعفی ہو جانا چاہیے، نو سال تک اقتدار میں رہنے والی حکمراں جماعت لبرلز کو مہنگائی اور ہاؤسنگ بحران کی وجہ سے آئندہ الیکشن میں عوام کے غم و غصے کا سامنا ہے۔

    واضح رہے کہ ٹروڈو 2013 سے لبرل پارٹی آف کینیڈا کے رہنما ہیں اور وہ 2015 سے اب تک 9 سال تک کینیڈا کے وزیر اعظم رہے ہیں، پارٹی کے آئین کے تحت رہنما کسی بھی وقت اپنا استعفیٰ پیش کر سکتا ہے۔ تاہم، ٹروڈو نے اب تک اس بات کا کوئی اشارہ نہیں دیا ہے کہ وہ کسی وقت رضاکارانہ طور پر مستعفی ہو جائیں گے۔

  • امریکا کے بھارت کے خلاف پیش کردہ حقائق نے کینیڈین وزیراعظم کے الزامات کو سچ ثابت کر دیا

    امریکا کے بھارت کے خلاف پیش کردہ حقائق نے کینیڈین وزیراعظم کے الزامات کو سچ ثابت کر دیا

    امریکا کے بعد کینیڈا نے بھی بھارت پر سنگین الزام کی تحقیقات کا بیان جاری کردیا، کینیڈین وزیراعظم جسٹن ٹروڈو کا کہنا ہے کہ یقین ہے بھارتی ایجنٹس کینیڈا کی سرزمین پرکینیڈین شہری کے قتل میں ملوث ہیں۔

    تفصیلات کے مطابق امریکا کے بھارت کے خلاف پیش کردہ حقائق نے کینیڈین الزامات کو سچ ثابت کر دیا ، ستمبر2023 میں کینیڈین وزیراعظم نے بھارت پرکینیڈین سرزمین میں دہشت گردی کا الزام لگایا تھا۔

    جس کے بعد امریکی انٹیلی جنس ایجنسی نے سکھ رہنماؤں کے قتل میں بھارتی ایجنٹس کےملوث ہونےکابڑا انکشاف کیا ،امریکی انٹیلی جنس ایجنسی شواہد سمیت سکھ رہنماؤں کےقتل کے پس پردہ حقائق منظرعام پر لائی۔

    امریکی انٹیلی جنس ایجنسی کے انکشاف نے کینیڈین وزیراعظم کے الزام کی تصدیق کر دی، اس اہم خبر کے بعد کینیڈین وزیراعظم جسٹن ٹروڈو کی جانب سے بھی بیان جاری کیا گیا ہے۔

    جسٹن ٹروڈو نے کہا ہے کہ اگست سے امریکی ہم منصبوں سے ملکر بھارت پر سنگین الزامات کی تحقیقات کر رہے ہیں، یقین ہے بھارتی ایجنٹس کینیڈین سرزمین پر کینیڈین شہری کےقتل میں ملوث ہیں۔

    کینیڈین وزیراعظم کا کہنا تھا کہ ہم شروع سے کہہ رہے ہیں بھارت کو معاملے کو سنجیدگی سے لینے کی ضرورت ہے، بھارتی حکومت کو اس معاملے میں تعاون کرنے کی ضرورت ہے، ہماری ذمہ داری کینیڈین شہریوں کو محفوظ رکھنا ہے۔

    امریکی انٹیلی جنس ایجنسی نے گروپتونت سنگھ کے قتل کی سازش بے نقاب کی اور امریکی حکام نے انڈین سینٹرل ریزرو پولیس کے اہلکار کے ملوث ہونے کا شواہد کیساتھ انکشاف کیا۔

    مئی 2023میں مودی سرکار نے اپنے ایجنٹس کو تحریک خالصتان کے رہنماؤں کے قتل کیلئےتعینات کرایا تھا۔

    آج امریکی وزیرخارجہ انٹونی بلنکن نے خالصتانی رہنما پنوں کے قتل کی سازش پر بیان جاری کیا، جس میں کہا گیا ہے کہ ہم اس معاملے کو سنجیدگی سے لے رہے ہیں، گزشتہ ہفتے براہ راست ہندوستانی حکومت کی توجہ معاملےپرمبذول کرائی تھی، ہندوستانی حکومت نے اعلان کیا ہے تحقیقات کر رہی ہے اور ہم نتائج کے منتظر ہیں، امریکا ہندوستان کیخلاف الزامات اور تحقیقات میں بہت سنجیدہ ہے۔

  • اسرائیل حماس جنگ : کینیڈین وزیراعظم جسٹن ٹروڈو نے بڑا اعلان کردیا

    اسرائیل حماس جنگ : کینیڈین وزیراعظم جسٹن ٹروڈو نے بڑا اعلان کردیا

    اونٹاریو: کینیڈین وزیراعظم جسٹن ٹروڈو نے غزہ کیلئے 10 ملین ڈالر دینے کااعلان کرتے ہوئے فوری انسانی ہمدردی کی راہداری کا مطالبہ کردیا۔

    تفصیلات کے مطابق کینیڈا نے غزہ کیلئے 10 ملین ڈالر دینے کا اعلان کردیا، ۔کینیڈین وزیرِ اعظم جسٹن ٹروڈو نے غزہ میں فوری راہداری کا مطالبہ کرتے ہوئے کہا کہ غزہ میں بلا روک ٹوک انسانی ہمدردی کی رسائی دی جائے۔

    جسٹن ٹروڈو نے متاثرہ علاقے میں امداد کی منتقلی نہ ہونے پر افسوس کااظہار کرتے ہوئے کہا محصورعلاقےمیں انسانی بحران پر گہری تشویش ہے، امداد سامان نہ پہنچنا مطلب ہمارے سفارتکاری ناکام ہوگئی ۔

    غزہ میں ہر گزرتے دن کے ساتھ حالات سنگین ہوتے جارہے ہیں ، غزہ کے شہریوں تک خوراک، ایندھن اور پانی جیسی ضروری امداد پہنچائی جائے۔

  • امریکا کے بعد کینیڈا کی فضا میں ‘پراسرار شے’ کی پرواز، فورسز نے مار گرایا

    امریکا کے بعد کینیڈا کی فضا میں ‘پراسرار شے’ کی پرواز، فورسز نے مار گرایا

    اونٹاریو: امریکا کے بعد کینیڈا میں بھی اڑتی ناقابل شناخت شے کو مار گرایا گیا، کینیڈین فورسز ناقابل شناخت شے کی باقیات کو ڈھونڈیں گی اور اس کا جائزہ لیں گی۔

    تفصیلات کے مطابق امریکا کے بعد کینیڈا کے فضائی حدود میں پرواز کرتی ‘پراسرار شے’ کو مار گرایا گیا۔

    کینیڈا اور امریکا نے مشترکہ کارروائی کرتے ہوئے الاسکا کی سرحد کے قریب یوکون کے علاقے میں پراسرار شے کو مار گرایا۔

    کینیڈین وزیراعظم جسٹن ٹروڈو نے اپنے ٹویٹ میں لکھا کہ ‘میں نے کینیڈا کی فضائی حدود کی خلاف ورزی کرنے والی ایک نامعلوم چیز کو مار گرانے کا حکم دیا، جس کے بعد امریکی اور کینیڈین طیاروں نے مشترکہ طور پر آپریشن کرتے ہوئے یوکون کے اوپر اڑتی شے کو مار گرایا۔

    جسٹن ٹروڈو کا کہنا تھا کہ امریکی صدر سے بات کی ہے کینیڈین فورسز ناقابل شناخت شے کی باقیات کو ڈھونڈیں گی اور اس کا جائزہ لیں گی۔

    جسٹن ٹروڈو کی ٹوئٹ سے قبل شمالی امریکی دفاعی کمان نے کہا تھا کہ کینیڈا کی فضائی حدود میں ایک ناقابل شناخت شے کو اڑتے ہوئے دیکھا گیا ہے۔

    یاد رہے جمعہ کے روز ریاست الاسکا کی فضا میں موجود پر اسرار چیز کو امریکی لڑاکا طیارے نے مار گرایا تھا اور بتایا جا رہا تھا کہ امریکی صدر جو بائیڈن کے حکم پر پُر اسرار چیز کو مار گرایا گیا۔

    ترجمان امریکی قومی سلامتی جان کربی کا کہنا تھا کہ کار کی سائز کی چیز ریاست الاسکا میں 40 ہزار کی فٹ کی بلندی پر دیکھی گئی تھی، آبجیکٹ کی اصلیت کا ابھی پتا نہیں چل سکا۔

  • کینیڈین وزیراعظم کا آمدِ رمضان پر مسلمانوں کیلئے اہم پیغام

    کینیڈین وزیراعظم کا آمدِ رمضان پر مسلمانوں کیلئے اہم پیغام

    اوٹاوا : کینیڈین وزیراعظم جسٹن ٹروڈو نے دنیا بھر کے مسلمانوں کو رمضان کی مبارکباد دیتے ہوئے کہا کہ عالمگیر وبا کورونا کے باعث امسال مسلم کمیونٹی ماہ رمضان کا اہتمام گھروں پر کریں۔

    تفصیلات کے مطابق کینیڈین وزیراعظم جسٹن ٹروڈو نے سماجی رابطے کی ویب سائٹ ٹوئٹر پر دنیا بھر کے مسلمانوں کو رمضان کی مبارکباد دیتے ہوئے نیک خواہشات کا اظہار کیا ۔

    جسٹن ٹروڈو نے کہا میں جانتا ہوں اس سال کا رمضان سب کے لیے پہلے سے مختلف ہو گا لیکن مسلم کمیونٹی نے کینیڈا کو ہمیشہ بہتر اور مضبوط بنایا ہے، اس لیے ہم اپنے رضاکاروں کے ذریعے پوری کوشش کریں گے کہ سب کی اشیاء ضروریہ کا خیال رکھیں۔

    انہوں نے کہا کہ عالمگیر وبا کورونا کے باعث امسال مسلم کمیونٹی ماہ رمضان کا اہتمام گھروں پر کریں، ہم یہاں کی مسلم کمیونٹی اور کینیڈا کے لیے اُن کی خدمات کا اعتراف کرتے ہیں اور رمضان المبارک کی آمد پر بہت خوش ہیں۔

    اس سے قبل امریکی صدر ڈونلڈ ٹرمپ نےرمضان کے آغاز پرمسلمانوں کو مبارک باد پیش کی تھی ، وائٹ ہاؤس کے جاری کردہ بیان کے مطابق صدر ٹرمپ نے کہا کہ دنیا بھر میں لاکھوں لوگوں کے لیے یہ ماہ مقدس ایک موقع ہے کہ وہ روزے رکھیں، عبادات کریں، قرآن کی تلاوت ، دوسروں کی مدد کریں اور اس طرح اپنا ایمان تازہ کریں۔

    امریکی صدر کا کہنا تھا کہ یہ تمام کام امن، ہمدردی، محبت اور دوسروں کے احترام جیسے آفاقی اقدار سے ہم آہنگ ہیں، جن کی اسلام تبلیغ کرتا ہے۔

    صدر ٹرمپ کا کہنا تھا کہ گزشتہ چند ماہ کے دوران انہوں نے دیکھا ہے کہ مشکل وقت میں دعا کی طاقت کس قدر اہمیت رکھتی ہے۔ اور وہ دعا کرتے ہیں جو لوگ ان مقدس لمحات میں عبادت کریں، ان کی زندگی میں سکون آئے اور مذہب سے ان کا رشتہ مزید مضبوط ہو۔

  • امریکی خاتون اوّل میلانیا کینیڈین وزیراعظم جسٹن ٹروڈو کو دل دے بیٹھیں

    امریکی خاتون اوّل میلانیا کینیڈین وزیراعظم جسٹن ٹروڈو کو دل دے بیٹھیں

    واشنگٹن : فرانس میں جی 7 کانفرنس میں امریکی خاتون اوّل میلانیا ٹرمپ کی کینیڈین وزیراعظم کے ساتھ تصویر سوشل میڈیا پر وائرل ہوگئیں ، صارفین کا کہنا ہے کہ امریکی خاتون اوّل کینیڈین وزیراعظم کو دل دے بیٹھیں۔

    تفصیلات کے مطابق فرانس میں جی 7 کانفرنس کے دوران عالمی رہنماؤں اور ان کی شریک حیات کی تصاویر لی گئیں مگر امریکی خاتون اول میلانیا ٹرمپ کی جانب سے کینیڈین وزیراعظم  جسٹن ٹروڈوکے خیرمقدم کی تصویر انٹرنیٹ صارفین کی توجہ کا مرکز بن گئی۔

    ٹوئٹر پر اس تصویر پر متعدد افراد نے اپنی رائے دی کیونکہ انہیں لگ رہا تھا کہ میلانیا ٹرمپ کینیڈا کے وزیراعظم کو پسند کرنے لگی ہیں، ایک صارف نے لکھا کہ میلانیا کی اس تصویر کے بعد عالمی جنگ 3 کے شروع ہونے کا خطرہ ہے۔

    اس تصویر کے وائرل ہونے کے بعد ٹوئٹر پر ایک ٹرینڈ ”میلانیا لوزٹرڈو“ بھی شروع کیا گیا ہے۔

    دلچسپ بات یہ ہے کہ 2 سال قبل یعنی فروری 2017 میں کینیڈا کے وزیراعظم جسٹن ٹروڈو وائٹ ہاﺅس میں گول میز کانفرنس میں شریک تھے اور صدر ٹرمپ کی بیٹی ایوانکا کے ان کو دیکھنے کی تصاویر بھی وائرل ہوئی تھیں اور اس وقت بھی لوگوں کو لگا تھا کہ ایوانکا کینیڈین وزیراعظم کو پسند کرنے لگی ہیں۔

    یہ امر بھی قابل ذکر ہے کہ ماضی میں مختلف میڈیا رپورٹس میں دعوی کیا گیا تھا کہ میلانیا اور ڈونلڈ ٹرمپ کے درمیان تعلقات کشیدہ ہیں، کئی مقامات پر ڈونلڈ ٹرمپ کو دیکھا گیا کہ انہوں نے بیرون ملک دوروں کے دوران اپنے خصوصی طیارے سے اترتے ہوئے میلانیا کا ہاتھ تھامنے کی کوشش کی مگر ملانیہ اکثر ان کا ہاتھ جھڑکتی نظر آئیں۔

  • کینیڈین وزیراعظم جسٹن ٹروڈو کی مسلمانوں کوعید کی مبارکباد

    کینیڈین وزیراعظم جسٹن ٹروڈو کی مسلمانوں کوعید کی مبارکباد

    ٹورنٹو : کینیڈا کے وزیراعظم جسٹن ٹروڈو نے مسلمانوں کوعید کی مبارکباد دیتے ہوئے اسلام فوبیا اورنفرت کیخلاف جنگ جاری رکھنے کے عزم کا اظہار کیا۔

    تفصیلات کے مطابق سعودی عرب ،متحدہ عرب امارات سمیت کئی ملکوں میں عید الفطر جوش وخروش سے منائی جارہی ہے، کینیڈین وزیر اعظم جسٹن ٹروڈونے کینیڈا میں مقیم مسلمانوں سمیت مسلمِ آمہ کو مسرت بھری عید کی مبارکباد پیش کی اور اپنے ویڈیو پیغام کا آغاز اسلام علیکم سے کیا۔

    انہوں نے اس تہوار کو فیملی اور دوستوں کے ساتھ پر جوش انداز میں گزارنے پر مباکباد دی اور اس دن کو یکجہتی اور محبتیں بانٹنے کا دن قرار دیا۔

    ٹروڈو نے کینیڈین مسلمانوں کے لئے نیک تمناوں کا اظہار کیا اور اس موقع پر تمام کمیونیٹیزاور اپنی اہلِخانہ کی جانب سے تمام دنیا کے مسلمانوں کو مبارکباد پیش کرتے ہوئے اسلام فوبیا اورنفرت کیخلاف جنگ جاری رکھنے کے عزم کا اظہار کیا۔

  • ملالہ یوسف زئی کی کینیڈین وزیراعظم جسٹن ٹروڈو سے ملاقات

    ملالہ یوسف زئی کی کینیڈین وزیراعظم جسٹن ٹروڈو سے ملاقات

    اوٹاوا : نوبل انعام یافتہ ملالہ یوسف زئی نے کینیڈین وزیراعظم جسٹن ٹروڈو سے ملاقات کی، ملاقات میں دنیا بھر میں زیادہ سے زیادہ لڑکیوں کے اسکول جانے کے لئے کوششوں پر اتفاق کیاگیا۔

    تفصیلات کے مطابق کینیڈا کے وزیراعظم نے سماجی رابطے کی ویب سائٹ ٹوئٹر پر نوبل انعام یافتہ ملالہ یوسف زئی کے ساتھ تصویر شیئر کرتے ہوئے ملاقات کو زبردست قرار دیا۔

    اپنے ٹوئٹر پیغام میں جسٹن ٹروڈو نے کہا ملالہ سے ملاقات میں جی 7 جینڈر ایکولیٹی ایڈوائزری کونسل سے متعلق تبادلہ خیال کیا اور دنیا بھر میں زیادہ سے زیادہ لڑکیوں کے اسکول جانے کیلئے کوششوں پر اتفاق ہوا۔

    ملالہ یوسف زئی نے بھی اپنے ٹوئٹر پیغام میں وزیراعظم جسٹن ٹروڈو کا ملاقات کیلئے وقت دینے اور لڑکیوں اور ہر بچے کی تعلیم کے لئے عزم کا شکریہ ادا کیا۔

    واضح رہے 2012 میں مینگورہ میں ملالہ یوسف زئی پر اسکول سے گھر جاتے ہوئے طالبان نے حملہ کردیا تھا، جس میں وہ شدید زخمی ہوئی تھیں، ابتدائی طورپر ملالہ کو پاکستان میں ہی طبی امداد دی گئی تاہم بعد میں انہیں برطانیہ کے اسپتال میں منتقل کردیا گیا تھا۔

    امن کا نوبیل انعام حاصل کرنے کے علاوہ متعدد ایوارڈ حاصل کرنے والی 20 سالہ ملالہ اس وقت برطانیہ کی آکسفورڈ یونیورسٹی میں زیرتعلیم ہیں۔

    ملالہ یوسف زئی 3 سال تک دنیا کی بااثرترین شخصیات کی فہرست میں شامل رہیں جبکہ ان کو کینیڈا کی اعزازی شہریت بھی دی گئی۔

  • اداکارہ حریم فاروقی کی کینیڈین وزیراعظم جسٹن ٹروڈو سے ملاقات

    اداکارہ حریم فاروقی کی کینیڈین وزیراعظم جسٹن ٹروڈو سے ملاقات

    اوٹاوا : پاکستانی خوبرو اداکارہ حریم فاروقی  نے کینیڈین وزیراعظم جسٹن ٹروڈو سے ملاقات کی اور کہا کہ وہ میرے کیریئر کا بہترین لمحہ تھا ،جب مجھے دلکش اور کرشماتی شخصیت جسٹن ٹروڈو سے ملاقات کا موقع ملا۔

    تفصیلات کے مطابق پاکستانی اداکارہ حریم فاروقی نے کینیڈین وزیراعظم جسٹن ٹروڈو سے اوٹاوا میں ملاقات کی، ملاقات میں ثقافتی سرگرمیوں اور فلمسازی پر تبادلے کے حوالے سے گفتگو کی۔

    حریم فاروقی نے سماجی رابطے کی ویب سائٹ انسٹا گرام پر سب کے پسندیدہ جسٹن ٹروڈو کے ساتھ ایک تصویر شیئر کی اور لکھا کہ کینیڈا کے دورے میں میرے کیریئر کا سب سے بہترین لمحہ وہ تھا، جب مجھے دلکش اور کرشماتی جسٹن ٹروڈو سے ملنے کا موقع ملا۔

    اداکارہ نے مزید کہا کہ جسٹن ٹروڈو سے ملاقات میں پاکستان انٹرٹینمنٹ انڈسٹری پر گفتگو کی اور ساتھ ہم کس طرح دونوں ممالک فلموں، ڈراموں، موسیقی اور ٹیلنٹ کےزریعے تعاون کے ساتھ مل کر کام کر سکتے ہیں، میں بطور اداکارہ اور پروڈیوسر اپنے کام سے محبت کرتی ہوں ، جو میرے لئے ایسے دروازے کھولتا ہیں۔

    حریم نے دنیا بھر میں اپنے تمام مداحوں کی محبت اور ان کے تعاون کا شکریہ ادا بھی کیا۔

    خیال رہے کہ حریم فاروقی کا شمار پاکستان کی مشہور اداکاراؤں میں ہوتا ہے، ان کی رواں سال ریلیز ہونے والی فلم پرچی نے کامیابی کے جھنڈے گاڑھے جبکہ اس سے قبل متعدد ڈراموں کے ساتھ ساتھ فلم ‘دوبارہ پھر سے‘ میں بھی اداکاری کے جوہر دکھا چکی ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • کینیڈین وزیراعظم نے جھگڑے پر معافی مانگ لی

    کینیڈین وزیراعظم نے جھگڑے پر معافی مانگ لی

    اوٹاوا: کینیڈین وزیراعظم جسٹن ٹروڈو نے اتفاقی طور پر اپوزیشن خاتون رکن کو کہنی لگنے پر معافی مانگ لی،ان کا کہنا تھا کہ میرا خاتون رکن کو تکلیف پہچانے کا ارادہ نہیں تھا.

    تفصیلات کے مطابق بدھ کے روز پارلیمنٹ میں ڈاکٹر کے تعاون سے خودکشی کرنے کے قانون سازی پر بحث کی جارہی تھی، اسی دوران کینڈین وزیراعظم اپنی سیٹ سے اُٹھ کر گئے اور اپوزیشن رکن گورڈ براؤن کو پکڑ کر اپنے ساتھ لے گئے تاکہ ووٹنگ کے ذریعے قانون سازی کی جاسکے.

    ڈیموکریٹک پارٹی کی خاتون رکن ایلن کا کہنا تھا کہ ان کو وزیراعظم کی کہنی لگی جب وہ اپوزشن رکن گورڈ براؤن کو لیکر جارہے تھے.

    ڈیموکریٹک پارٹی کے سربراہ ٹام نے وزیراعظم جسٹن ٹروڈو پر شدید تنقید کی جس کے بعد پارلیمنٹ میں ماحول گرم ہوگیا.

    Canada Parliament

    وزیراعظم نےبعد میں وضاحت کرتے ہوئے کہا کہ وہ اراکین سے بات چیت کے لیے آئے تھے اور جب وہ اپوزیشن رکن کو اپنے ساتھ لے کر جارہے تھے کہ ان کی کہنی خاتون رکن کو لگ گئی اُن کا کسی کو مارنے کا کوئی ارادہ نہیں تھا، لیکن میں اُن سے معذرت کرتا ہوں.

    یہ ناخوشگوار واقعہ اس وقت پیش آیا تھا جب حکومت کی جانب سے پارلیمنٹ میں قانون سازی کی جارہی تھی کہ بالغ مریضوں کو ڈاکٹرز کے تعاون کے ساتھ زندگی ختم کرنےکی اجازت دی جائے.