لاہور : کیپٹن (ر)صفدر نے قمر جاوید باجوہ کو ایکسٹینشن کا ووٹ دینے کو نوازشریف کی بڑی غلطی قرار دے دیا اور غلط فیصلوں پر اپنی ہی قیادت پر برس پڑے۔
تفصیلات کے مطابق ن لیگ کے سینئر رہنما کیپٹن (ر)صفدر نے اےآروائی نیوز کو خصوصی انٹرویو دیتے ہوئے کہا کہ ارکان اسمبلی کو وفاداریاں تبدیل نہیں کرنی چاہیے، جیتوتم عمران کی ٹکٹ پر اورپھراقتدارنظرآئےتوتم ادھر آجاؤ، جس کےساتھ کھڑےہوپھر گرم پانی ہویا ٹھنڈا کھڑے رہو۔
کیپٹن (ر)صفدر کا کہنا تھا کہ میں خود کو پارٹی میں کہیں بھی نہیں سمجھتا اورنہ ہی خواہش کی، خواہشوں کےپیچھےبھاگتا تو کسی بڑے عہدے پر ہوتا۔
ن لیگ کے سینئر رہنما نے ایکسٹینشن کا ووٹ دینے کو نوازشریف کی بڑی غلطی قرار دیتے ہوئے کہا کہ جس دن ہم نےقمرباجوہ کو ایکسٹینشن کا ووٹ دیا توہمارابیانیہ دفن ہوگیا،
ہم نے ووٹ کوعزت دو کےبیانیےکوبےعزت کردیا، ووٹ کو عزت دو کا بیانیہ اب نہیں چلےگا۔
انھوں نے بتایا کہ پرویز رشید کے سوا جس نےبھی ایکسٹینشن کوووٹ دیاوہ مجرم ہے، کیہ کوئی بات ہےکہ آپ لیڈر کےآگےکھڑےہی نہیں ہوسکتے،یہ توسارے لالچی ہیں، ٹکٹ مل جائے، چاپلوسی کرلیں۔
ان کا کہنا تھا کہ گھٹنوں کو ہاتھ لگا کر گاؤں کے ایم این اے بن جائیں تو کیا فائدہ، آپ نظریات کا تحفظ نہیں کرسکتے تو ایسے ایم این اے کو کیا کرنا، میاں صاحب کو بھی ایکسٹینشن کےووٹ کا نہیں کہناچاہیے تھا۔
کیپٹن (ر)صفدر نے کہا کہ نوازشریف وہی شخص تھا جس نے ان کو للکارا تھا، میاں صاحب کو ورغلایاگیا اور ان سے جھوٹ بولتے تھے، میں انکےنام بھی لوں گا جنہوں نے نوازشریف سےفراڈکیا۔
رہنما ن لیگ کا کہنا تھا کہ ورغلانےوالی وہی ٹیم ہے جو میاں صاحب کے گھٹنے پکڑتے تھے، یہی لوگ جاکر بتاتے تھےکہ اس طرح کرلیں تواس طرح ہوجائےگا، جوبھی ہےنوازشریف کو بتاناچاہیےکس نے غلط فیصلہ کرایا۔
کیپٹن (ر)صفدر نے اے آر وائی نیوز کے نمائندے سے سوال کیا کہ ووٹ کو عزت دو کا مجھ سےکیوں پوچھ رہےہو، میں نےتوبورڈ پر لکھ کر لوگوں کو یاد کرایاتھا۔
انھوں نے مزید بتایا کہ 28 نومبرسے پہلے حکومت باجوہ صاحب کے نیچے دبی ہوئی تھی، سیاستدانوں والا پتہ ٹھیک کھیلا کہ رکےنہیں اور اگے چل پڑے، ابھی صوبوں میں انتخابات نہیں ہونے چاہیے، میں توکہتاہوں انتخابات 2025 میں ہوں ،پہلےمعیشت بہتر کرلیں
کیپٹن (ر)صفدر نے کہا کہ سیاسی مقابلہ سیاست سے ہونا چاہیے، یہاں توہر طرف گند ہے، مفتاح کا دل نہ دکھے اس لیے میں نے یوتھ ونگ سےاستعفیٰ دے دیا،شاہد خاقان عظیم انسان ہے، جس نےمشرف کا مقابلہ کیا ،اٹک قلعےمیں رہا۔
ن لیگی رہنما نے شاہدخاقان عباسی کو عہدوں سے بڑی شخصیت قرار دے دیا اور کہا حمزہ شہبازمیرا چھوٹابھائی ہےوہ مجھ سےیاکسی سے ناراض نہیں، میں بڑابھائی ہوں ان کو کہوں گا کہ واپس آجائیں۔
