کراچی : ترجمان کے الیکٹرک نے شہر کا 70 فیصد حصہ لوڈشیڈنگ فری ہونے کا دعویٰ کردیا تاہم شہر میں 16 سے 18 گھنٹے لوڈشیڈنگ جاری ہے۔
تفصیلات کے مطابق کراچی کے مختلف علاقوں میں بجلی کی بدترین لوڈ شیدنگ جاری ہے، ترجمان کے الیکٹرک کی جانب سے بیان میں کہا گیا کہ جن فیڈرز پر بجلی بلوں کی پوری ادائیگی کی جاتی ہے، وہاں پوری بجلی فراہم کی جاتی ہے۔
ترجمان کے ای نے دعویٰ کیا کہ شہر میں کے الیکٹرک کے نیٹورک کا ستر فیصد لوڈ شیڈنگ سے مستثنیٰ ہے، مفت بجلی کی فراہمی ممکن نہیں ہے۔
ترجمان کا کہنا تھا کہ بجلی صارفین کا ٹیرف پورے پاکستان میں یکساں ہے، جو حکومت پاکستان اور ریگولیٹری اتھارٹی کا دائرہ اختیار ہے، کراچی کے صارفین وہی قیمت ادا کرتے ہیں جو پاکستان کے دیگر حصوں میں ادا کی جاتی ہے۔
کے اے کے ترجمان نے بتایا کہ کراچی کی کمرشل مارکیٹیں جو 70 فیصد لوڈشیڈنگ فری فیڈرز پر ہیں، وہاں بجلی سپلائی میں کوئی تعطل نہیں آتا۔
مزید پڑھیں : نیپرا نے کے الیکٹرک کو فوری طور پر لوڈشیڈنگ ختم کرنے کی ہدایت کردی
اس کے علاوہ موبائل مارکیٹ، الیکٹرانک مارکیٹ، ایمپریس روڈ، لکی اسٹار، بولٹن مارکیٹ، لائٹ ہاؤس، ایم اے جناح روڈ، عبداللہ ہارون روڈ، زینب مارکیٹ لوڈشیڈنگ فری ہیں جبکہ صدر بازار، بوہری بازار اور داؤد پوتہ روڈ، طارق روڈ، کھارادر، میٹھا در، ویسٹ وارف اور دیگر کمرشل مراکز میں بھی لوڈ شیڈنگ صفر ہے۔
بقیہ تیس فیصد کےالیکٹرک نیٹورک پربجلی چوری اوربلوں کی عدم ادائیگی کے تناسب سے لوڈشیڈنگ کا اعلانیہ شیڈول نافذ ہے، جو کمپنی ویب سائٹ پر موجود ہے۔
