Tag: کے الیکٹرک

کراچی: شہرِ قائد میں کے الیکٹرک کی جانب سے غیر اعلانیہ لوڈ شیڈنگ کا بد ترین سلسلہ آج بھی جاری رہا، شہری شدید گرمی اور پانی کی قلت سے بے حال رہے۔

تفصیلات کے مطابق کراچی میں مختلف علاقوں میں کئی کئی گھنٹے غیر اعلانیہ لوڈ شیڈنگ ہو رہی ہے، لوڈ شیڈنگ کا یہ سلسلہ گرمی میں اضافے کے ساتھ ہی شروع ہوا۔

اے آر وائی نیوز کے نمائندے کے مطابق لیاری، میراں ناکہ، چاکیواڑہ، بہار کالونی میں 6 گھنٹے سے بجلی غائب ہے۔

اورنگی ٹاؤن، قصبہ کالونی، پہاڑ گنج میں غیر اعلانیہ لوڈ شیڈنگ ہو رہی ہے، نارتھ ناظم آباد، حسرت موہانی سوسائٹی، گلستان جوہر میں بھی لوڈ شیڈنگ کا سلسلہ بدستور جاری ہے۔

گلشن اقبال، عائشہ منزل، صفورہ گوٹھ میں بھی بجلی کی آنکھ مچولی نے علاقہ مکینوں کو بے حال کر دیا ہے، کاٹھور، احسن آباد، گڈاپ، اسکیم 33 اور ابوالحسن اصفحانی روڈ پر بھی لوڈ شیڈنگ جاری ہے۔

یہ بھی پڑھیں:  کے الیکٹرک کا کم گیس پریشر کا دعویٰ غلط ہے: وزیر توانائی

ادھر شہر میں مسلسل غیر اعلانیہ لوڈ شیڈنگ کے باعث واٹر بورڈ تنصیبات بھی متاثر ہوئی ہیں جس کی وجہ سے شہریوں کو پانی کی قلت کا بھی سامنا ہے۔

خیال رہے کہ گزشتہ روز کے الیکٹرک کے ترجمان نے کراچی میں غیر اعلانیہ لوڈ شیڈنگ پر جاری بیان میں دعویٰ کیا تھا کہ ایس ایس جی سی کی جانب سے گیس پریشر میں کمی سے کچھ پلانٹس کی پیداوار متاثر ہوئی ہے، جس کی وجہ سے کچھ جگہوں پر جزوی طور پر لوڈ مینجمنٹ ہو رہی ہے۔

تاہم ایس ایس جی سی اور وفاقی وزیر توانائی نے کے الیکٹرک کا دعویٰ مسترد کرتے ہوئے تصدیق کی ہے کہ کے ای کو طلب سے زیادہ گیس فراہم کی جا رہی ہے۔

دریں اثنا، وزیر بلدیات سعید غنی اور ایم ڈی واٹر بورڈ انجینئر اسد اللہ خان نے شدید گرم موسم میں شہر بھر میں ٹھنڈے پانی کے کیمپ قائم کر دیے گئے ہیں، ان کیمپوں پر شہریوں کو ٹھنڈا پانی اور شربت پلایا جا رہا ہے۔

یہ کیمپ نارتھ ناظم آباد، لانڈھی، نیپا، صفورا، منگھوپیر، بنارس سمیت 16 مقامات پر لگائے گئے ہیں، ایم ڈی واٹر بورڈ نے ہائیڈرنٹس اور ٹینکرز سیل کو مزید کیمپ قائم کرنے کی ہدایت کر دی ہے۔

کراچی: کے الیکٹرک نے گیس پریشر میں کمی کی آڑ میں شدید گرمی میں بد ترین لوڈ شیڈنگ شروع کر دی، ایس ایس جی سی نے کے الیکٹرک کا دعویٰ مسترد کر دیا، دوسری طرف پریشان شہریوں نے احتجاج شروع کر دیا ہے۔

تفصیلات کے مطابق کراچی میں کے الیکٹرک نے شہر بھر میں غیر اعلانیہ لوڈ شیڈنگ بڑھا دی ہے، کئی علاقوں میں 8 سے 15 گھنٹے کی غیر اعلانیہ لوڈ شیڈنگ کی جا رہی ہے، لوڈ شیڈنگ سے مستثنیٰ علاقوں میں بھی کہیں دن میں ایک، ایک گھنٹہ اور کہیں تین گھنٹے بجلی کی بندش جاری ہے۔

کے الیکٹرک اور ایس ایس جی سی گیس پریشر کا تنازع ایک بار پھر کھڑا ہو گیا، تاہم شہریوں کی پریشانی بے رحمی سے نظر انداز کی جا رہی ہے، ایس ایس جی سی نے کے الیکٹرک کا دعویٰ مسترد کر دیا، اور فل پریشر پر گیس فراہمی کا شیڈول بھی جاری کر دیا۔

ادھر سخت گرمی میں لوڈ شیڈنگ کے ستائے شہریوں کا پارہ چڑھ گیا ہے، لانڈھی کے مکینوں نے دوسرے دن بھی لوڈ شیڈنگ کے خلاف شدید احتجاج کیا، مکینوں نے کے الیکٹرک کے دفتر کے باہر احتجاج کرتے ہوئے توڑ پھوڑ کی، مشتعل افراد نے پارکنگ میں کھڑی کئی موٹر سائیکلوں کو جزوی نقصان پہنچایا، تاہم پولیس نے پہنچ کر صورت حال کنٹرول کر کے مشتعل مظاہرین کو منشتر کر دیا۔

یہ بھی پڑھیں:  کے الیکٹرک کو طلب سے زیادہ گیس فراہم کر رہے ہیں: ایس ایس جی سی

دوسری طرف کے الیکٹرک کی جانب سے ملیر، کلفٹن، ڈیفنس، شاہ فیصل اور مضافاتی علاقوں میں لوڈ شیڈنگ کا دورانیہ ساڑھے 3 گھنٹے کر دیا ہے، سائٹ، میٹروول، سرجانی، نارتھ کراچی، گلستان جوہر، کریم آباد، گلبرگ، پی ای سی ایچ ایس، بفر زون، شادمان ٹاؤن، نارتھ ناظم آباد، گلشن اقبال، لیاقت آباد، صدر اور ملحقہ علاقے بھی بد ترین لوڈ شیڈنگ کی لپیٹ میں لائے جا چکے ہیں۔

لوڈ شیڈنگ کی خبریں آتے ہی کے الیکٹرک نے بے بنیاد دعوے شروع کر دیے، تاہم کے الیکٹرک پلانٹس کی ڈیمانڈ سپلائی بتانے میں نا کام ہو گئی ہے۔

ادھر وایو طوفان کے اثرات بڑھ گئے ہیں، شہر قائد میں آج بھی گرمی کا راج رہا، طوفان کے باعث سمندری ہوائیں جنوب مشرق کی جانب بڑھ گئیں، محکمہ موسمیات کا کہنا ہے کہ ہیٹ ویو کی وجہ نمی کا تناسب بڑھنا اور سمندری ہوائیں بند ہونا ہے۔

محکمہ موسمیات نے کہا کہ کراچی کا درجہ حرارت 41 ڈگری سینٹی گریڈ رہا لیکن 50 ڈگری سینٹی گریڈ محسوس کیا گیا، 3 کلو میٹر فی گھنٹہ کی رفتار سے ہوائیں چل رہی ہیں، نمی کا تناسب 39 فی صد ہے، 15جون تک شہر قائد میں موسم گرم اور مرطوب رہنے کا امکان ہے۔

کراچی: سوئی سدرن گیس کمپنی (ایس ایس جی سی) نے کے الیکٹرک کے دعوے مسترد کر دیے، کمپنی کے ترجمان نے کہا ہے کہ کے الیکٹرک کو ڈیمانڈ سے زیادہ گیس فراہم کر رہے ہیں۔

تفصیلات کے مطابق شہرِ قائد میں کے الیکٹرک اور ایس ایس جی سی ایک بار پھر روبرو آ گئے ہیں، گیس کمپنی نے کے الیکٹرک کے اس دعوے کو مسترد کر دیا ہے کہ ان کی طرف سے گیس پریشر میں کمی کی گئی ہے۔

کے الیکٹرک کے ترجمان نے کہا تھا کہ گیس پریشر میں کمی سے ان کے کچھ پلانٹس کی پیداوار متاثر ہوئی ہے، تاہم ایس ایس جی سی ترجمان کا کہنا ہے کہ کے الیکٹرک کی 190 ایم ایم سی ایف ڈی ڈیمانڈ ہے، جب کہ انھیں طلب سے زیادہ گیس دی جا رہی ہے۔

ترجمان ایس ایس جی سی نے کہا کہ موسم گرما کے پیشِ نظر کے الیکٹرک کو 194 ایم ایم سی ایف ڈی گیس فراہم کی جا رہی ہے۔

یہ بھی پڑھیں:  گیس پریشر میں کمی سے کچھ پلانٹس کی پیداوار متاثر ہوئی ہے: کے الیکٹرک

خیال رہے کہ آج کے الیکٹرک کے ترجمان نے کراچی میں غیر اعلانیہ لوڈ شیڈنگ پر جاری بیان میں دعویٰ کیا تھا کہ ایس ایس جی سی کی جانب سے گیس پریشر میں کمی سے کچھ پلانٹس کی پیداوار متاثر ہوئی ہے، جس کی وجہ سے کچھ جگہوں پر جزوی طور پر لوڈ مینجمنٹ ہو رہی ہے۔

ترجمان نے کہا تھا کہ شہر میں گرمی کی بڑھنے کی وجہ سے بجلی کی طلب میں اضافہ ہوا ہے، جسے پورا کرنے کے لیے کے الیکٹرک کوشاں ہے۔