جماعت اسلامی کراچی کے امیر منعم ظفر نے عیدالاضحیٰ کے بعد کے ای کے خلاف بڑی عوامی تحریک چلانے کا اعلان کر دیا ہے۔
اے آر وائی نیوز کے مطابق امیر جماعت اسلامی کراچی منعم ظفر نے پریس کانفرنس کرتے ہوئے کہا ہے اہل کراچی کو مہنگی بجلی ملنے اور غیر علانیہ لوڈشیڈنگ کے خلاف عید کے بعد بڑی عوامی تحریک چلانے کا اعلان کیا ہے جب کہ کل نیشنل ہائی وے پر احتجاج کیا جائے گا۔
منعم ظفر کا کہنا تھا کہ کراچی کو این ٹی ڈی سی سے 1600 میگا واٹ بجلی مل رہی ہے۔ سرکاری خزانے سے نجی ادارے کو سبسڈی مد میں 174 ارب روپے دیے جاتے ہیں۔ لیکن اہل کراچی کو دیگر ملک سے دگنی قیمت پر فراہم کی جا رہی ہے۔ انہوں نے مطالبہ کیا کہ کراچی میں لوڈشیڈنگ کا خاتمہ اور بجلی سستی کی جائے۔
دریں اثنا کے الیکٹرک ہیڈ آفس گزری کے سامنے احتجاج مظاہرے سے خطاب کرتے ہوئے امیر جماعت اسلامی کراچی نے کہا کہ کے الیکٹرک کی برقی دہشتگردی دن بہ دن بڑھتی جا رہی ہے۔ کراچی کا بڑا حصہ 12 سے 18 گھنٹےکی لوڈشیڈنگ کا شکار ہے اور شہری بجلی کے بھاری بل ادا کرنے کے باوجود لوڈشیڈنگ کا شکار ہیں۔ کے الیکٹرک کو 6 سال کے لیے ملٹی ایئر ٹیرف کے نام پر غندہ ٹیکس کی اجازت دی گئی ہے۔
ان کا کہنا تھا کہ جماعت اسلامی نے جب کل کل نیپرا کے چیئرمین کے نام خط ارسال کیا، تو نیپرا کو بھی خیال آیا کہ کے الیکٹرک کی لوڈشیڈنگ شہریوں پر ظلم ہے۔ نیپرا جو چار روز قبل ریکوری لائن لاسز کے نام پر 40 روپے اضافی یونٹ چارج کی اجازت دے رہا تھا، اب اس نے کے الیکٹرک کو لوڈشیڈنگ کرنے پر پانچ کروڑ روپے جرمانہ لگایا ہے۔
انہوں نے مطالبہ کیا کہ کے الیکٹرک کا لائسنس منسوخ اور فرانزک آڈٹ کیا جائے۔ کراچی کو براہ راست نیشنل گرڈ سے بجلی فراہم کی جائے اور ملٹی ایئر ٹیرف میں یکساں ٹیرف مقرر کیا جائے۔
امیر جماعت اسلامی کراچی نے کل نیشنل ہائی وے ملیر ہالٹ اور قائد آباد پر دھرنے دینے اور پیر کو شہر کی مرکزی شاہراہوں او آئی بی سیز کے باہر احتجاج کرنے کا اعلان کرتے ہوئے متنبہ کیا کہ اگر لوڈشیڈنگ کا خاتمہ نہ کیا گیا تو مرکزی شاہراہوں اور وزیر اعلیٰ ہاؤس پر احتجاج کریں گے۔
