Tag: کے پی کے اسمبلی

پشاور: خیبر پختون خوا اسمبلی کا اجلاس ہنگامہ آرائی کی نذر ہوگیا، اجلاس میں گو عمران گو کے نعرے لگ گئے۔

اے آر وائی نیوز کے نمائندہ پشاور ظفر اقبال کے مطابق قومی اسمبلی کے اجلاس میں ہنگامہ آرائی کے اگلے دن آج خیبر پختون خواہ اسمبلی کا اجلاس بھی ہنگامہ آرائی کی نذر ہوگیا۔

رپورٹر کے مطابق ہنگامہ آرائی کا آغاز اس وقت ہوا جب پاکستان مسلم لیگ کے پارلیمانی لیڈرسردار اورنگزیب نے حکومت سے مطالبہ کیا کہ اراکین میں فنڈز کی تقسیم برابری کی بنیاد پر کی جائے۔

جواب میں رکن مشتاق غنی نے کہا کہ پہلے ذرا پنجاب اسمبلی میں حکومتی اور اپوزیشن رکن کو دیے جانے والے فنڈز کا موازنہ کیا جائے تاہم اس دوران مسلم لیگ کی جانب سے گو عمران گو کے نعرے لگائے جاتے رہے۔

ایوان میں حکومتی ارکان کی جانب سے بھی گو نواز گو اورگو پاناما گو کے نعرے لگائے گئے۔

بعدازاں اسپیکر نے اجلاس 20 فروری تک ملتوی کردیا۔

یہ پڑھیں: قومی اسمبلی کا اجلاس، حکومتی اور پی ٹی آئی ارکان میں‌ مار پیٹ

یاد رہے گزشتہ روز قومی اسمبلی کے اجلاس میں تحریک انصاف کے پارلیمانی لیڈر شاہ محمود قریشی نے گو نواز گو کے نعرے لگوائے تھے  جس پر لیگی ارکان سخت ناراض ہوئے بعدازاں حکومتی رکن شاہد خاقان عباسی اپوزیشن ارکان کی طرف آئے تو دونوں پارٹیوں کے ارکان لڑ پڑے اور ہاتھا پائی ہوئی۔