Tag: کے پی کے

پشاور: وزیر اعلیٰ خیبر پختون خوا محمود خان نے امید ظاہر کی ہے کہ قبائلی اضلاع کے انتخابات میں پی ٹی آئی کو 10 سے 12 سیٹیں مل سکتی ہیں۔

تفصیلات کے مطابق کے پی کے وزیر اعلیٰ نے کہا ہے کہ انھیں الیکشن میں 10 سے 12 سیٹیں جیتنے کی امید ہے، کیوں کہ تحریک انصاف نے علاقے میں کافی محنت کی ہے۔

محمود خان کا کہنا تھا کہ مجموعی طور پر قبائلی اضلاع میں الیکشن پُر امن اور شفاف ہوئے۔

انھوں نے اے آر وائی نیوز کی خصوصی ٹرانسمیشن میں کہا کہ پہلی بار 162 ارب روپے کی خطیر رقم قبائلی اضلاع کے لیے رکھی گئی ہے، قبائلی اضلاع میں ترقیاتی منصوبوں پر توجہ مرکوز کی ہے۔

یہ بھی پڑھیں:  قبائلی اضلاع میں الیکشن: گنتی کا عمل جاری، غیر سرکاری نتائج کا سلسلہ شروع

ادھر وزیر اطلاعات خیبر پختون خوا شوکت یوسف زئی نے کہا ہے کہ پُر امن انتخابات کا کریڈٹ پاک فوج کو جاتا ہے، نیت صاف اور کوشش ہو تو سب ممکن ہو سکتا تھا، آج کے پرامن انتخابات نے منفی دعؤوں کو غلط ثابت کیا۔

شوکت یوسف زئی کا کہنا تھا کہ ان شاء اللہ عوام کی توقعات سے زیادہ مسائل حل ہوں گے، انتخابات سے پیغام ملا ہے کہ پاکستان اور قبائل پُر امن ہیں۔

خیال رہے کہ صوبۂ خیبر پختون خواہ میں ضم کیے گئے قبائلی اضلاع میں ہونے والے پہلے تاریخ ساز انتخابات میں پولنگ کا وقت اپنے اختتام کو پہنچ چکا ہے۔ گنتی کا عمل اور غیر حتمی نتایج کی آمد کا سلسلہ جاری ہے۔

پشاور: خیبر پختون خوا کے ضم شدہ قبائلی اضلاع میں انتخابات کے لیے تیاریاں عروج پر رہیں، انتخابی مہم کا وقت کل ختم ہو گیا، پولنگ ہفتے کو ہوگی۔

تفصیلات کے مطابق کے پی اسمبلی کی 16 نشستوں پر پولنگ ہفتے کو ہوگی، قبائلی اضلاع کے سولہ انتخابی حلقوں میں انتخابی مہم کا وقت ختم ہو گیا ہے۔

ضلع خیبر سے خاتون امیدوار ناہید آفریدی مخالفین کو ٹف ٹائم دینے کے لیے پر عزم نظر آئیں۔

خیال رہے کہ الیکشن کمیشن کی جانب سے قبائلی اضلاع کی 16 صوبائی نشستوں پر انتخابات کے لیے 28 لاکھ بیلٹ پپیرز چھاپے گئے تھے۔

 یہ بھی پڑھیں:  قبائلی اضلاع میں انتخابات کی تیاریاں

انتخابات کے لیے قبائلی اضلاع میں ایک ہزار 943 پولنگ اسٹیشن قائم کیے گئے ہیں، قبائلی اضلاع کے 26 لاکھ سے زائد ووٹر حق رائے دہی استعمال کریں گے۔

الیکشن میں پولنگ اسٹیشنز کے اندر اور باہر 21 جولائی تک پاک فوج کے جوان تعینات ہوں گے، قبائلی اضلاع میں امن وامان کی صورت حال بہتر رکھنے کے لیے پاک فوج کی اضافی نفری ریزرو رکھی جائے گی۔

بتایا جا رہا ہے کہ 16 قبائلی نشستوں پر انٹرنیٹ نہ ہونے کے سبب آر ٹی ایس سسٹم استعمال نہیں کیا جائے گا، یاد رہے کہ گزشتہ سال منعقدہ عام انتخابات میں آر ٹی ایس سسٹم بیٹھ جانے سے تحفظات پیدا ہوئے تھے۔

پشاور: پی ٹی آئی کے رہنما مراد سعید نے کہا کہ شکست سامنے دیکھ کر پرچی والے چیئرمین نے رونا دھونا شروع کر دیا.

ان خیالات کا اظہار انھوں نے چیئرمین پیپلزپارٹی بلاول بھٹوکی لوئر دیر میں تقریر پر ردعمل دیتے ہوئے کیا.

ان کا کہنا تھا کہ انتخاب لڑنا ان کے بس میں نہیں، نہ ہی عوام انھیں جگہ دینے کے لئے تیار ہیں، ملک بھر کی طرح قبائلی اضلاع کےعوام بھی ان کا حقیقی چہرہ پہچان چکے ہیں.

مراد سعید کا کہنا تھا کہ بلاول نے الیکشن سے پہلے ہی دھاندلی کا رونا شروع کر دیا، بلاول بدترین دھاندلی کرنے والے نوازشریف کے پیچھے کھڑے ہوگئے.

مزید پڑھیں: ملک کی معیشت کو آئی ایم ایف کے پاس گروی رکھ دیا گیا، بلاول بھٹو زرداری

مراد سعید نے کہا کہ پرچی والے چیئرمین کوغلط فہمی ہے کہ قبائلی عوام کی یاداشت کمزور ہے، بلاول بھٹو کے والد نے قبائلی عوام کے خون کا امریکیوں سے سودا کیا، امریکیوں نے ہی اس کا رازفاش کیا.

وفاقی وزیرمراد سعید نے مزید کہا کہ کوئی سیاسی نعرہ یا الزام کرپشن اور لوٹ مارپرپڑی افتاد ٹال نہیں سکتا.

انھوں نے کہا کہ ملک بھرکی طرح قبائلی اضلاع کےعوام بھی کرپشن سے نفرت کرتے ہیں، قبائلی عوام انشااللہ زرباباکی سیاست کےتابوت میں آخری کیل ٹھونکیں گے.

مردان: خیبر پختون خوا کے تاریخی علاقے تخت بھائی میں 8 سال کے طالب علم کی ہلاکت کے واقعے پر ایس پی انویسٹی گیشن کی سربراہی میں جے آئی ٹی تشکیل دے دی گئی۔

تفصیلات کے مطابق مردان کے علاقے تخت بھائی میں 8 سالہ بچہ مصطفیٰ گھر کے باہر سے لا پتا ہوا تھا، جسے زیادتی کے بعد قتل کر دیا گیا تھا۔

قتل کی تفتیش اور قاتلوں کی گرفتاری کے لیے ایس پی انویسٹی گیشن کی سربراہی میں جوائنٹ انویسٹی گیشن ٹیم بنا لی گئی ہے۔

مردان کے ڈی پی او کا کہنا ہے کہ علاقے کی جیو فینسنگ بھی کی جا رہی ہے، مشکوک افراد کے خون کے نمونے اکٹھے کیے جا رہے ہیں۔

پولیس کا کہنا ہے کہ پوسٹ مارٹم رپورٹ کے مطابق آٹھ سالہ بچے کی موت گلا دبانے سے ہوئی، پوسٹ مارٹم رپورٹ میں زیادتی کے امکان کو رد نہیں کیا گیا۔

یاد رہے کہ گزشتہ سال مردان کے نواحی علاقے گوجر گڑھی میں چار سال کی بچی اسما کا افسوس ناک کیس بھی سامنے آیا تھا، جسے گھر کے سامنے سے اغوا کیا گیا تھا او زیادتی کے بعد اس کا گلا گھونٹ کر بے دردی سے قتل کر دیا گیا تھا۔

بچی کی لاش کھیتوں میں پھینک دی گئی تھی، میڈیکل رپورٹ میں بچی کے ساتھ زیادتی کی تصدیق کی گئی، بچی کے جسم پر تشدد کے نشانات بھی تھے۔

پشاور: پاکستان تحریک انصاف نے قبائلی اضلاع میں صوبائی اسمبلی کی نشستوں کے لیے امیدواروں کے تعین کے لیے درخواست گزاروں کے انٹرویوز کا فیصلہ کر لیا ہے۔

تفصیلات کے مطابق قبائلی اضلاع میں صوبائی اسمبلی نشستوں کے لیے امیدواروں کے انٹرویوز کیے جائیں گے، اس سلسلے میں پی ٹی آئی کی جانب سے انٹرویوز کا با ضابطہ شیڈول بھی جاری کر دیا گیا ہے۔

مخصوص نشستوں کے لیے انٹرویوز 8 جولائی کو اسلام آباد میں ہوں گے، انٹرویوز ارشد داد، نور الحق قادری اور محمود خان پر مشتمل پارلیمانی بورڈ کرے گا۔

انٹرویوز کے لیے اہل امیدواروں کی تحریری فہرست بھی جاری کر دی گئی ہے، جس میں انیتا محسود، مہرین رؤف آفریدی، حمیدہ شاہد، فلک ناز، تبسم، گل رخ شامل ہیں۔

یہ بھی پڑھیں:  قبائلی اضلاع میں انتخابات کے لیے بیلٹ پیپرکی چھپائی شروع

فہرست کے مطابق راحیلہ شکیل، جیسیکا جون، کنزا اقتدار، نائلہ وسیم اور روبینہ گل بھی اہل امیدواروں میں شامل ہیں۔

انٹرویوز کی تکمیل پر کام یاب امیدواروں کی حتمی فہرست کا اعلان کیا جائے گا۔

یاد رہے کہ الیکشن کمیشن آف پاکستان نے قبائلی اضلاع میں الیکشن کی تیاریاں آگے بڑھاتے ہوئے بیلٹ پیپرز کی چھپائی شروع کردی ہے، الیکشن کمیشن کی جانب سے قبائلی اضلاع کی 16 صوبائی نشتوں پر انتخابات کے لیے 28 لاکھ بیلٹ پپیرز چھاپے جائیں گے، یہ عمل 3سے 4دن میں مکمل ہوگا۔

انتخابات کے لیے قبائلی اضلاع میں ایک ہزار 943 پولنگ اسٹیشن قایم ہوں گے، قبائلی اضلاع کے 26 لاکھ سے زاید ووٹر حق رائے دہی استعمال کریں گے۔

مہمند: پاکستان پیپلز پارٹی کے چیئرمین بلاول بھٹو زرداری نے کہا ہے کہ قبائلی علاقوں کی تاریخ میں سب سے زیادہ پیسا آصف زرداری دور میں دیا گیا، قبائلی علاقوں کے بجٹ میں 500 فی صد اضافہ کیا گیا، ہمارا رشتہ قربانیوں کا اور شہیدوں کا رشتہ ہے۔

تفصیلات کے مطابق چیئرمین پیپلز پارٹی بلاول بھٹو نے کے پی کے ضلع مہمند کے علاقے یکہ غنڈ میں جلسے سے خطاب کیا، انھوں نے کہا کہ آپ کے معاشی حقوق پر ڈاکا ڈالا جا رہا ہے، سابق صدر آصف زرداری نے پختون خوا کو شناخت اور حقوق دیے، این ایف سی ایوارڈ میں اضافہ کر کے ہمیشہ کے لیے آپ کے لیے زیادہ پیسا رکھا گیا۔

انھوں نے کہا کہ کل بھی پشاور میں شیڈول کے مطابق پارٹی کنونشن ہوگا، 6 جولائی کو ڈی آئی خان اور شمالی وزیرستان جاؤں گا، ہم دیر اور باجوڑ کے بارڈر پر بھی پارٹی کنونشن رکھیں گے۔

بلاول بھٹو نے کہا کہ چین سے معاہدہ کر کے آصف زرداری نے سی پیک کا انقلابی منصوبہ شروع کیا، ہمارے ہاتھ میں ہوتا تو سی پیک قبائلی علاقوں سے گزر کر بلوچستان جاتا۔

پی پی چیئرمین کا کہنا تھا کہ پیپلز پارٹی نے پنشن میں 100 فی صد اضافہ کیا جو آج تک کسی جماعت نے کیا نہ کر سکتی ہے، شہید ذوالفقار بھٹو نے کے پی، قبائلی علاقوں کی معیشت کو کھڑا کیا تھا، شہید بے نظیر بھٹو پر نوکری دینے کا احتساب کیس بنا تھا، اگر نوکری دینا جرم ہے تو یہ میں بار بار کروں گا۔

بلاول نے کہا کہ پوچھنا چاہتا ہوں پچھلے 6 سالوں میں انھوں نے کیا کیا ہے، کیا آپ کے صوبے میں مفت اسپتال بنے، دل کے علاج کا اسپتال بنا؟ کیا قبائلی علاقوں میں کڈنی، لیور کے مفت اسپتال کھلے؟ ان کا دوغلا نظام دیکھو اور ان کا نیا پاکستان دیکھو، نواز شریف کی آف شور کمپنی حرام ہے لیکن لاڈلے کی حلال ہے۔

انھوں نے کہا اگر خان سچا ہے تو اسے فاٹا کا بجٹ 1000 فی صد بڑھانا چاہیے، وفاق نے تعلیم، صحت، ترقیاتی منصوبوں کے بجٹ میں کٹوتی کر دی، عوام دشمن بجٹ بھی دھاندلی سے منظور کرایا گیا، سبزی، گیس، ڈیزل، پیٹرول، چینی، روٹی سب مہنگا کر دیا گیا، مرنا مہنگا جینا مہنگا ہے مگر خون سستا ہے یہ کس قسم کی تبدیلی ہے۔

بلاول بھٹو نے کہا کہ ٹیکس کے طوفان نے عوام کو بہا دیا ہے، دوائیوں، کپڑے، چینی، دودھ سمیت ہر چیز پر ٹیکسز لگا دیے گئے، یہ کے پی اور قبائل دشمن بجٹ ہے، ہر طرف سے حملے ہو رہے ہیں ہمیں اپنے جمہوری حق کا تحفظ کرنا ہوگا۔

پی پی چیئرمین نے کہا میں عوام دشمن بجٹ کے خلاف نکلا میں، تبدیلی سرکار کے خلاف نکلا ہوں، ان شاء اللہ جیت عوام کی ہوگی، پیپلز پارٹی ملک کے آئین پر آنچ نہیں آنے دے گی، یہ ون یونٹ قایم کرنا چاہتے ہیں، فاٹا سے کراچی تک کئی شہری لاپتا ہیں یہ کس قسم کی آزادی ہے۔

انھوں نے کہا کہ الیکشن کمیشن ضمنی الیکشن میں اپنا کردار ثابت کرے، ضمنی الیکشن میں ثابت ہو جائے گا یہ الیکشن کمیشن ہے یا سلیکشن کمیشن، قبائلی علاقوں میں امیروں کے ہاتھ میں بلا ہے لیکن عام آدمی کے ہاتھ میں تیر ہے۔