Tag: کے پی کے

پشاور: خیبر پختون خوا میں 50 سال سے زائد عمر کے سنگین بیمار ملازمین کو 15 دن کی چھٹی دینے کا فیصلہ کیا گیا ہے، دوسری طرف صوبے میں کرونا وائرس کے مریضوں کو مفت راشن دینے کا اعلان کر دیا گیا۔

تفصیلات کے مطابق گزشتہ روز وزیر صحت، چیف سیکریٹری خیبر پختون خوا کی زیر صدارت اجلاس میں فیصلہ کیا گیا ہے کہ 50 سال سے زائد عمر کے سنگین بیمار ملازمین کو 15 دن کی چھٹی دی جائے گی، ضلع خیبر لیوی سینٹر شاہ کس میں 150 بستروں کا علیحدہ سینٹر قائم کیا جائے گا۔

اجلاس میں انتظامیہ کو ہدایت کی گئی کہ طورخم سے واپس آنے والے مشتبہ کیسز کو مذکورہ سینٹر منتقل کیا جائے، اجلاس میں اہم، ضروری بھرتیوں کے علاوہ تمام بھرتیوں کی منسوخی کا بھی فیصلہ کیا گیا۔

پاکستان میں کرونا وائرس کے متاثرین کی تعداد 183 ہو گئی

دوسری طرف محکمہ ریلیف خیبر پختون خوا کی جانب سے اعلامیہ جاری ہوا ہے، جس میں کہا گیا ہے کہ وزیر اعلیٰ کے پی محمود خان نے کرونا وائرس کے مریضوں کو مفت راشن دینے کا اعلان کر دیا ہے، راشن وائرس سے متاثرہ مریض کے اہل خانہ کو دیا جائے گا۔

اعلامیے کے مطابق مفت راشن انھیں دیا جائے گا جو سرکاری قرنطینہ میں ہیں، یہ راشن 20 کلو آٹا، 10 کلو چاول، 10 کلو چینی،5 کلو دال، دودھ وغیرہ پر مشتمل ہے۔

وزیراعلیٰ خیبرپختونخوا کا قیدیوں کے لیے بڑا اعلان

خیال رہے کہ گزشتہ روز خیبر پختون خوا کے ہیلتھ منسٹر تیمور جھگڑا نے صوبے میں پہلے 15 کیسز کی تصدیق کی ہے، تیمور جھگڑا نے ٹویٹ کے ذریعے کہا کہ تفتان سے کے پی پہنچنے والے 19 افراد میں سے 15 میں کرونا وائرس کا ٹیسٹ مثبت آیا۔ ان مریضوں کو ڈیرہ اسماعیل خان میں ایک علیحدہ عمارت میں قرنطینہ کیا گیا ہے۔

پشاور: خیبر پختون خوا کے علاقے لوئر دیر میں خال بر کلے میں دیوار گرنے سے 2 بچے جاں بحق جب کہ دو زخمی ہو گئے، کے پی میں جاں بحق افراد کی تعداد بڑھ کر 27 ہو گئی۔

تفصیلات کے مطابق کے پی میں حالیہ با رشوں میں27 افراد جاں بحق، 58 زخمی ہوئے، پی ڈی ایم اے کا کہنا ہے کہ بارشوں کے باعث 19 مکانات تباہ، جب کہ 150 گھروں کو جزوی نقصان پہنچا۔

پی ڈی ایم اے کے مطابق جاں بحق افراد میں 23 بچے، 3 خواتین، ایک مرد شامل ہیں، پشاورمیں 2، مردان میں 7، صوابی میں 3 افراد جاں بحق ہوئے، چارسدہ، خیبر اور نوشہرہ میں 2،2 بچے جاں بحق ہوئے، سوات میں 4، بونیر میں ایک بچہ جاں بحق ہوا۔

آج لوئر دیر میں خال بر کلے میں دیوار گرنے سے 2 بچے جاں بحق جب کہ دو زخمی ہو گئے، خستہ حال گھر کی دیوار بارش کے باعث متاثر ہوئی تھی، لوگوں نے اپنی مدد آپ کے تحت ملبےسے زخمیوں کو نکالا۔ گزشتہ روز مردان کے علاقے گڑھی کپورہ میں مکان کی چھت گرنے سے ماں بیٹی جاں بحق ہوئے تھے جب کہ ملبے تلے دبنے سے باپ اور بچہ زخمی ہوئے۔ مہمند میں پنڈیالی میں گھر کی چھت گرنے سے بچی جاں بحق جب کہ خاتون سمیت 2 افراد زخمی ہوئے تھے۔ بٹگرام میں شاہراہ ریشم لینڈ سلائیڈنگ کے باعث شنگلی پائیں کے مقام پر بند ہو چکی ہے۔

پی ڈی ایم اے کا کہنا تھا کہ بٹگرام، شانگلہ اور دیگر متاثرہ اضلاع میں امدادی سامان تقسیم کیا گیا، قراقرم ہائی وے بشام سے داسو تک ٹریفک کے لیے کھول دی گئی ہے۔

پشاور: خیبر پختون خوا میں ٹیکسز جمع کرنے کی شرح میں نمایاں اضافہ ہوا ہے۔

اے آر وائی نیوز کے مطابق صوبائی وزیر خزانہ تیمور جھگڑا نے کہا ہے کہ صوبے کی محصولات میں نمایاں اضافہ ہوا ہے، فروری میں 11 ارب کے محاصل وصول کیے گئے۔

اے آر وائی نیوز سے خصوصی گفتگو کرتے ہوئے تیمور جھگڑا نے کہا کہ مالی سال کے اختتام تک محاصل کی وصولی 18 ارب تک پہنچنے کی امید ہے، صوبے میں ٹیکسز کی شرح کم کر کے وصولی پر توجہ دی گئی ہے تاہم مقرر کردہ ٹیکسز کی وصولی یقینی بنائیں گے۔

مہنگائی میں کمی ہو گئی، حکومت کا اعلان

یاد رہے کہ گزشتہ روز وفاقی وزیر برائے اقتصادی امور حماد اظہر نے کہا تھا کہ مہنگائی کی شرح 14.6 سے کم ہو کر 12.4 فی صد ہو گئی ہے، سینیٹ اجلاس میں سوالات کا جواب دیتے ہوئے حماد اظہر نے بتایا کہ تیل، ڈیزل میں5 روپے کمی کے بعد مہنگائی میں کمی ہوگی۔

انھوں نے کہا تھا کہ رواں سال فروری میں برآمدات میں 13.6 فی صد اضافہ ہوا جب کہ پچھلے سال 32 فی صد خسارہ کم ہوا اور رواں برس 70 فی صد کم ہوا، جب اقتدار سنبھالا تو پاکستان کے پاس صرف 2 ہفتے کے ریزرو رہ گئے تھے، ہماری حکومت نے سخت حالات سے ملک کو نکالا، اسٹیٹ بینک کے ذخائر میں 50 فی صد اضافہ ہوا، روپے کی قدر کو مستحکم کرنے کے لیے ایک ڈالر بھی مارکیٹ میں نہیں جھونکا گیا۔

اسلام آباد: وفاقی کابینہ آج کرونا وائرس کے پھیلنے کے خطرے سے نمٹنے کے لیے سر جوڑ کر بیٹھے گی۔

اے آر وائی نیوز کے مطابق آج وفاقی کابینہ کے اہم اجلاس میں 8 نکاتی ایجنڈے پر غور ہوگا، ایجنڈے میں کرونا وائرس سے متعلق بریفنگ کو بھی شامل کیا گیا ہے، وائرس سے بچاؤ کے لیے حکومتی اقدامات سے آگاہ کیا جائے گا۔

اسپتالوں کی صوبوں سے وفاق کو منتقلی کا معاملہ بھی ایجنڈے میں شامل ہے، کابینہ کو پی ایم ڈی سی اور پی ایم سی کے معاملات پر بریفنگ دی جائے گی۔

آج وزیر اعلیٰ سندھ مراد علی شاہ کی زیر صدارت سندھ کابینہ کا بھی اہم اجلاس صبح 11 بجے ہوگا، جس میں کرونا وائرس سے متعلق حفاظتی اقدامات کا جائزہ لیا جائے گا، کرونا وائرس کے سبب کابینہ اجلاس کا مقام بھی تبدیل کر دیا گیا ہے، اجلاس اب سندھ سیکریٹریٹ کی بہ جائے وزیر اعلیٰ ہاؤس میں ہوگا۔

خیال رہے کہ پاکستان میں کرونا وائرس کے پانچویں کیس کی تصدیق ہو گئی ہے، وزیر اعظم کے معاون خصوصی ڈاکٹر ظفر مرزا کا کہنا تھا کہ مریض کا تعلق وفاق کے زیر انتظام علاقے گلگت سے ہے، مریض کا علاج معالجہ جاری ہے اور اس کی حالت خطرے سے باہر ہے۔ معلوم ہوا ہے کہ کرونا وائرس کی پانچویں شکار ایک خاتون ہے جو ایران سے لوٹی تھیں۔

ادھر خیبر پختون خوا میں کرونا وائرس کے پھیلاؤ کے خدشے کے پیش نظر حفاظتی اقدام کے تحت ریسکیو ہیڈ کوارٹرز میں وائرس سے بچاؤ کی حفاظتی کٹس تقسیم کی گئیں، ڈاکٹر خطیر احمد کا کہنا تھا کہ کٹس صوبے بھر میں قائم ریسکیو اسٹیشنز کو فراہم کی گئی ہیں، مشتبہ مریض کی اسپتال منتقلی کے دوران اہل کار کٹس استعمال کریں گے، مشتبہ مریض اور تیماردار کو بھی ڈسپوزیبل کٹس مہیا کی جائیں گی۔