وقت کے ساتھ ساتھ چہرے کی جلد کی رنگت اور چمک ماند پڑجاتی ہے، اگر اس مسئلے کا فوری حل نہ نکالا جائے تو بعد میں پریشانی کا سامنا کرنا پڑتا ہے، گاجر کا جوس اس کا بہترین علاج ہے۔
بڑھتی عمر کے ساتھ چہرے پر جھریاں یا آنکھوں کے نیچے سیاہ حلقے پڑنا عام بات ہے، اس پریشانی کا علاج با آسانی گھر بیٹھے بہت کم خرچ میں کیا جاسکتا ہے۔
اس حوالے سے اے آر وائی ڈیجیٹل کے پروگرام گڈ مارننگ پاکستان میں ہربلسٹ ڈاکٹر ام راحیل نے نہایت آسان اور کم خرچ ٹوٹکہ بتایا۔
انہوں نے کہا کہ جلد کی حفاظت اور دیکھ بھال بہت ضروری ہے کیوں کہ یہ صرف خوب صورتی کا معاملہ نہیں ہے بلکہ اس کا صحت کے ساتھ بہت گہرا رشتہ ہے۔
اس موقع پر ڈاکٹر ام راحیل نے اس نسخے کو بنانے کا طریقہ بیان کیا، ان کا کہنا تھا کہ آج کل گاجر کا موسم ہے اور یہ سستی بھی ہے تو روز صبح آدھا گلاس گاجر کے فریش جوس میں آدھا گلاس دودھ ملا کر پینا ضروری ہے۔
انہوں نے کہا کہ اگر ہوسکے تو گھر کا ہر فرد یہ جوس لازمی پیے، یہ جوس بچوں کیلیے اس لیے ضروری ہے کہ کیونکہ یہ آنکھوں کی بینائی اور دماغی صحت کیلیے بہت اچھا ہے۔
اس کے علاوہ وہ لڑکے لڑکیاں جن کی شادی ہونے والی ہے وہ صرف گاجر کا جوس لازمی پیئیں کیونکہ گاجر کا جوس ہارمونز کو بہتر کرتا ہے اس کے پینے سے چہرے کی جلد بہت خوبصورت ہوجاتی ہے۔
ان کا مزید کہنا تھا کہ اس کے باقاعدہ استعمال سے آپ کے چہرے اور ہاتھوں کی جلد چکمدار اور نرم و ملائم ہوجائے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوٹ : مندرجہ بالا تحریر معالج کی عمومی رائے پر مبنی ہے، کسی بھی نسخے یا دوا کو ایک مستند معالج کے مشورے کا متبادل نہ سمجھا جائے۔
