Tag: گاڑی

اسلام آباد: نجی ہاؤسنگ سوسائٹی میں گاڑی میں سوار باپ اور بیٹی سیلابی ریلے میں بہہ گئے ، جس کی ویڈیو سامنے آگئی۔

تفصیلات کے مطابق اسلام آباد اور گردونواح میں تیز ہواؤں کے ساتھ موسلادھار بارش جاری ہے، نشیبی علاقوں میں پانی جمع ہو گیا ہے، ندی نالوں میں طغیانی کا خدشہ ظاہر کیا جا رہا ہے۔

ایسے میں ایک المناک واقعہ سامنے آیا، جہاں اسلام ہاؤسنگ سوسائٹی میں گاڑی آبی ریلے میں بہہ گئی۔

عینی شاہدین نے بتایا گاڑی میں باپ بیٹی سوار تھے ، کار سوار افراد نے برساتی نالے کے قریب سے گاڑی گزارنے کی کوشش کی لیکن پانی کابہاؤ تیز ہونے کی وجہ سے دونوں افراد کار سمیت پانی میں بہہ گئے۔

ریسکیو حکام نے بتایا کہ کار سمیت ڈوبنے والے کرنل(ر)اسحاق اور انکی بیٹی کی تلاش جاری ہے ریسکیوکے غوطہ خور،نیوی اور پولیس کی ٹیمیں تلاش کررہی ہے۔

پولیس کا کہنا ہے کہ برساتی نالہ دریائے سواں میں گرتا ہے، اس سے قبل 500میٹر کاکنکریٹ کو رہے، شیڈ کے نیچے اندھیرے اور پانی کے شدید دباؤ کے سبب آپریشن میں مشکلات ہیں۔

اس سے قبل ریسکیو 1122 نے راولپنڈی اور اسلام آباد میں مزید بارش کا ہائی الرٹ جاری کیا ہے۔ کسی بھی ناگہانی صورتحال سے نمٹنے کے لیے تیاریاں مکمل کر لی گئی ہیں اور شہروں اور ملحقہ علاقوں میں خصوصی 1122 ٹیمیں تعینات کر دی گئی ہیں۔

ڈسٹرکٹ ایمرجنسی آفیسر صبغت اللہ نے کہا ہے کہ کسی بھی بارش کی ہنگامی صورتحال سے نمٹنے کے لیے دریائے سوان اور دیگر مقامات پر پانی کی کشتیاں اور دیگر ضروری سامان مہیا کر دیا گیا ہے اور سیلاب کی ہنگامی صورتحال سے نمٹنے کے لیے خصوصی ٹیمیں بھی تعینات کی گئی ہیں۔

انہوں نے کہا کہ رین ایمرجنسی نافذ کر دی گئی اور راولپنڈی میں دفعہ 144 نافذ کر دی گئی ہے۔

یاد رہے گلگت بلتستان کے ضلع دیامر میں طوفانی بارش نے تباہی مچادی، بابو سرٹاپ اور اطراف میں کلاؤڈ برسٹ کی وجہ سے سیلابی صورتحال کے باعث سیاحوں کی پندرہ گاڑیاں ریلے میں بہہ گئیں، جس میں پانچ لاشیں نکال لی گئیں اور چارافراد کو بچا لیا گیا جبکہ درجنوں افراد لاپتا ہیں۔

کرم : وسطی کُرم میں ایک گاڑی گہری کھائی میں گرنے سے کم از کم سات افراد المناک طور پر موقع پر ہی اپنی جان سے ہاتھ دھو بیٹھے جبکہ دو شدید زخمی ہوئے۔

تفصیلات کے مطابق وسطی کُرم کے علاقے گوندل پاڑہ چمکنی میں گاڑی کھائی میں جا گری، حادثے میں گاڑی میں سوار 7 افراد جاں بحق اور دو شدید زخمی ہوگئے ، زخمیوں کو اسپتال منتقل کر دیا گیا۔

پولیس ذرائع کا کہنا ہے کہ ہولناک واقعہ خیبرپختونخوا کے ضلع کرم کے علاقے گنداؤ میں پیش آیا اور کار میں سوار افراد موقع پر ہی جاں بحق ہوگئے۔

ذرائع نے مزید بتایا کہ گندل سے صدہ جانے والی ایک مسافر گاڑی بے قابو موڑ پر جاتے ہوئے سینکڑوں فٹ گہری کھائی میں گر گئی۔

مزید پڑھیں : بونیر: گاڑی کھائی میں گرنے سے ایک ہی خاندان کے 6 افراد جاں بحق

حکام نے تصدیق کی ہے کہ حادثے میں سات افراد ہلاک ہوئے، جب کہ دو کی حالت نازک ہے۔

مقامی پولیس نے اس افسوسناک واقعے کی مکمل تحقیقات شروع کر دی ہیں، جب کہ حادثے کی اصل وجہ کا تعین کرنے کی کوششیں جاری ہیں۔

شانگلہ : تحصیل الپوری مٹہ اغوان میں گاڑی کھائی میں گرنے سے چار افراد جاں بحق اور ایک زخمی ہوگیا، حادثہ تیز رفتاری باعث پیش آیا۔

تفصیلات کے مطابق شانگلہ کی تحصیل الپوری مٹہ اغوان میں گاڑی کھائی میں جاگری ، حادثے میں چار افراد موقع پر جاں بحق ہوگئے اور ایک زخمی ہوگیا۔

ریسکیو حکام نے بتایا کہ حادثہ تیز رفتاری باعث پیش آیا اور کار بے قابو ہو کر کھائی میں جاگری۔

ریسکیو حکام کا کہنا تھا کہ لاشیں اور زخمی کو ڈی ایچ کیو اسپتال منتقل کردیا گیا ہے جاں بحق افراد کا تعلق ملتان سے ہے۔

دوسری جانب گوجرانوالہ مین تیز رفتار لوڈر رکشہ الٹ گیا، جس کے نتیجے میں 7 افراد زخمی ہوگئے، حادثہ سالار منہیس اسٹاپ کامونکی کے قریب پیش آیا، یوٹرن کے قریب تیز رفتاری میں رکشہ الٹا۔

زخمیوں میں 35 سالہ اکرم،10سالہ عدنان،16سالہ کنزی،15سالہ ارم، 28سالہ آسیہ،20سالہ اسماء اور27سالہ زکیہ بی بی شامل ہیں، جنہیں اسپتال منتقل کردیا گیاہے۔

ایک اور حادثے میں فورٹ منرو میں سیاحوں کی کوچ حادثے کا شکار ہوگئی، جس کے نتیجے میں تین افراد جاں بحق اور تیس سے زائد مسافر زخمی ہوگئے۔

کوچ میں خواتین، بچے اور مرد سوار تھے، تمام مسافرملتان کے رہائشی اور ایک ہی خاندان کے افراد تھے۔

ابتدائی اطلاعات کے مطابق کوچ بریک فیل ہونے کے باعث بے قابو ہو کر پہاڑ سے ٹکرائی، مقامی افرادنےاپنی مدد آپ کے تحت زخمیوں کو قریبی اسپتال منتقل کیا، اسپتال ذرائع کے مطابق کئی زخمیوں کی حالت تشویشناک ہے۔

پاکستان کے دارالحکومت اسلام آباد میں سجا آٹوکار کا میلہ جس میں سب کی نگاہوں کی توجہ کا مرکز ایک ارب روپے کی گاڑی رہی۔

اے آر وائی نیوز کے مطابق کہتے ہیں شوق کا کوئی مول نہیں۔ ایسے ہی شوقین افراد کے لیے وفاقی دارالحکومت اسلام آباد کے سینیٹوریس مال میں سجا سپر کارز آٹو شو، جس نے دھوم مچا دی۔ یہ شو دیکھنے کے لیے دور دور سے شہری آئے۔

اس سپر کارز شو میں جدید لگژری گاڑیوں سے لے کر پرانے ماڈل تک کی گاڑیاں ہر ایک کی توجہ کا مرکز بنیں۔ تاہم شو میں پاکستان میں لائی گئی واحد جی ٹی ایکس 26 اور سکس بائی سکس برابس ٹرک نے دھوم مچا دی، جس کی مالیت ایک ارب روپے ہے۔

نمائش میں بڑی عمر کے لوگوں نے کلاسیک اور ونٹیج کاروں میں دلچسپی ظاہر کی تو نوجوانوں اور بچوں کی ایک بڑی تعداد نے اسپورٹس کاروں اور ہیوی بائیکس کو پسند کیا۔

اسلام آباد کے شہریوں نے شاپنگ مال میں شاپنگ کے ساتھ ساتھ آٹو شو کے انعقاد کو بہترین تفریح قرار دیا۔

شو دیکھنے کے لیے آنے والے افراد نے اس نمائش کو سراہا اور کہا کہ پاکستان میں کار سے پیار کرنے والے بڑی تعداد میں موجود ہیں اور ان کے لیے یہ شو بہت بڑی نعمت ہے، جس میں بہت پیاری گاڑیاں ہیں۔ دنیا بھر میں ونٹیج کار کو پروموٹ کیا جاتا ہے، پاکستان میں بھی اس کو پروموٹ کرنا چاہیے اور اسی لیے ہم اس نمائنش میں آئے ہیں۔

رپورٹ: فاطمہ بتول